五旬節
跳去導覽
跳去搵嘢
五旬節，喺猶太教入面叫沙夫幼特節，又或者叫做週日節、七七節、收穫節、新果實節。而五旬節係基督教叫法，即係話復活節之後第七個星期日，英國多數叫聖靈降臨節。
五旬節起源[編輯]
五旬節又叫七七節，以色列人要從尼散月18日，佢哋嘅大祭司將一捆新熟嘅大麥獻畀耶和華作為初熟果子嘅嗰日，計起七個星期。一共係49日，然後佢哋會喺第50日守七七節。當後嚟一班猶太人將聖經譯成希臘文嗰陣，希臘文嘅「第50」（日）一字係賓特哥斯提（pentecostē′）。因此，講希臘話嘅猶太人就將七七節稱為賓特哥斯特（英文Pentecost，五旬節）。
五旬節係從逾越節（紀念祖先以色列人從古埃及離開嘅日子）開始計起嘅第50日（一旬為10日），所以稱之為五旬節。喺猶太教，呢一日係摩西喺西奈山領受上帝畀佢《十誡》嘅日子，亦係「感謝律法嘅紀念日」。呢個節日同時亦用嚟感謝上帝賜與嘅收獲，所以又稱收割節同初熟節，係猶太人嘅三大節期之一。
聖靈降臨節[編輯]
對基督教嚟講，五旬節就係《使徒行傳》第二章記載聖靈降臨喺眾門徒身上嘅日子。當聖靈傾注喺門徒身上，門徒就得着力量同勇氣，並得到講方言嘅恩賜，向別人傳揚福音。因為噉樣，亦有人認為係早期基督教會成立嘅日子。但關於聖靈降臨節嘅慶祝，最早記載係喺四世紀末，由西班牙修女以塞利亞所寫嘅《朝聖記》記載。聖靈降臨節亦係聖靈降臨期嘅開始[1]。