錫克教

出自維基百科,自由嘅百科全書
錫克教嘅標誌
香港嘅錫克教廟

錫克教英文Sikhism)係喺十六世紀印度西北部旁遮普地區,一個叫納那克祖師嘅人始創嘅一個宗教。最初錫克教係為咗調和印度教伊斯蘭教嘅衝突而產生出嚟,試圖以和平、溫和嘅方式建立一個超越教派嘅統一宗教。但後來由於錫克教出咗個叫「卡爾沙」嘅軍事教團,令錫克教變成一個崇武嘅宗教。

錫克教係一個一神論宗教,祖師納那克認為,宇宙唯一創造者、全能全知、公正仁慈,而且係唯一、永恆,至於其他唔同宗教所敬拜嘅神,只係同一個神有唔同嘅稱呼咁解。錫克教反對偶像崇拜同儀式,所以錫克廟入面唔會有任何神像,只有一本《阿底格蘭特》。《阿底格蘭特》係錫克教嘅聖典。

錫克教有套祖師制度;佢哋認為祖師係神嘅使者,人一定要喺祖師指導之下修行,先可以解脫。錫克教徒鍾意一齊食飯,呢個習慣來自佢哋集體就餐制度。錫克教 5K 制規定唔畀剪頭髮或者鬍鬚,所以一世人都唔會飛髮,留到頭髮長一長,出街時捲埋一個蛇餅,然後用布包實,即係廣東話叫嘅「包頭」。

教名[編輯]

「錫克」係梵文 Sikha旁遮普文 Siikh 音譯,意思係門徒,即係話信錫克教嘅人都係祖師嘅門徒。另一個解譯話「錫克」係旁遮普文 Sikhna,即係解學習,即係話錫克教教徒都係一生學習同追隨咁解。

簡史[編輯]

內文:錫克教史

錫克教係15世紀印度教巴克提派嘅虔信運動(梵天信仰)同伊斯蘭教蘇菲派嘅共同基礎上產生。1469年由第一代祖師拿那克(Nanak)創始。聖地響旁遮普邦阿姆利則市,呢度有錫克教最大寺廟——大金廟。「錫克」響梵文嘅原意係「門徒」咁解,因呢個教嘅教徒自稱祖師嘅門徒。

早期實行祖師制,響第十代祖師後被廢除。十八世紀初分成易行派獅子派兩個派。錫克教強調人人平等,男人之間都係兄弟,女人之間都係姐妹。佢哋奉行嚴格嘅一神論,同埋會禮拜幾代祖師。

莫臥兒帝國統治時期,教徒多次掀起發對專制主同莫臥兒國家嘅鬥爭。響英國統治時期,曾經多次展開反英鬥爭。1947年印巴分治之後,印度信仰呢個教嘅錫克人掀起咗伽里斯坦運動(Khalistan)。

1980年代錫克教民兵拒絕解除武裝,逐漸發展做地方軍閥,變成「國中國」,印度政府唔妥佢哋,就發動咗藍星行動,解除咗錫克民兵嘅武裝。

十位祖師[編輯]

一幅畫有十位祖師嘅畫
內文:祖師 (錫克教)

錫克教發展過程之中,總共出過十位祖師,第一個祖師叫納那克,佢亦係錫克教創教人。

納那克[編輯]

內文:納那克

納那克戴夫(Nanak Dev)係錫克教創教人,關於納那克歷史上無乜記載。根據錫克教相傳,納那克喺1469年4月15號喺旁遮普塔爾萬提村一個印度教家庭出世。有日佢喺條河度沖沖吓涼唔見咗,全村人博命搵都搵唔到佢,三日之後突然間出現返,之後一路唔講嘢,到開口講嘢時第一句說話就係:「無印度教徒,亦都無穆斯林」之後佢講返自己經歷,話沖沖吓涼突然送咗上天堂,天神畀咗杯甘露佢飲,話:「你飲咗之後,我就與你同在」最初啲人當佢痴線,但係佢嘅行為就激到好多穆斯林都好嬲。有日佢召咗入宮見土邦王,啱啱佢哋做緊禮拜,個個都跪低祈禱,係得納那克無跪,之後佢話:「真主無接受佢哋祈禱」然後慢慢解釋宗教儀式無用,土邦王聽完之後覺得好有道理,重話要將王位讓畀佢,但納那克無受到,之後個土邦王就成為納那克第一個弟子。

其他祖師[編輯]

納那克死咗之後,選咗安格德做指定承繼人,成為第二代祖師。1552年安格德又搵咗阿瑪爾做指定承繼人,成為第三代祖師,喺佢領導之下發展出錫克教集體就餐制度。1574年阿瑪爾死之前又將祖師傳咗畀拜傑特,佢做咗祖師之後,改名做拉姆,成為第四代祖師,佢做咗七年祖師,其間帶領信徒搵咗好多個甘露池,同時開咗好多傳教路線。

拉姆將祖師傳咗畀佢細仔阿爾瓊,成為第五代祖師,佢係第一個畀皇帝處死嘅祖師,佢死咗之後由佢個仔哈爾戈賓德接任成為第六代祖師,由於阿爾瓊嘅死令佢覺得錫克教唔可以再任人宰割,於是開始咗錫克教尚武時期,曾經殺死一隻老虎救返賈汗德皇帝一命,點知後尾畀賈汗德皇帝送咗去古城囚禁,放返之後周圍傳教,放咗好多時間去組織同訓練軍隊,最後佢喺深山過隱居生活。哈爾戈賓德將祖師傳咗畀佢個孫哈爾萊,成為第七代祖師。

之後哈爾萊將祖師傳咗畀佢個二仔哈爾克里森成為第八代祖師,當時佢只得五歲,佢最後因為天花而死,死嗰陣八歲,所以無兒無女,亦無指定承繼人,不過佢死之前拎住一個椰子同五個銀仔,根據呢啲線索,搵到泰格巴哈杜爾接任第九代祖師,期間旁遮普因為政府宗教政策,對伊斯蘭教以外嘅宗教壓迫,原本只係針對印度教,後來連錫克教都波及埋,泰格巴哈杜爾畀人捉去逼改信伊斯蘭教,但佢死都唔肯,結果畀人斬頭,成為第二個殉教嘅祖師。

泰格巴哈杜爾死咗之後,由佢九歲個仔戈德賓辛格接任成為第十代祖師,之後佢曾經領導錫克教軍隊,打贏過好多場,1699年佢頒布法令,成立一個叫「卡爾沙」嘅軍事教團,其間創立咗5K制度,不過佢一生花最多時間喺整理聖典,最後編咗成套《阿底格特》出嚟,宣佈祖師傳到佢就唔再傳,以後《阿底格蘭特》就係十世祖師象徵,最後佢喺1708年10月7號死。

十位祖師生卒年一覽


教義[編輯]

內文:錫克教教義
5K 之中其中三K,即係髮梳(Kanga)、短劍(kirpan)、鐵手鈪(kara)

錫克教最初係由印度教巴克提發展出嚟,創教祖師納那克又同時熟讀伊斯蘭教嘅《古籣經》,喺印度教基礎上,結合伊斯蘭教蘇菲派思想,最後變成自成一格嘅宗教

錫克教基本教義簡單以三個觀念構成:「神、師尊、真名」,神即係指唯一嘅,無論你信邊個,其實都係同一個神。師尊即係指十大祖師,或者一本《阿底格特》代表晒。而真名就即係神嘅顯現形式。

另外有四條教規:

  1. 唔畀食同飲
  2. 一夫一妻神聖婚姻
  3. 唔可以拜偶像
  4. 終身遵行5K,即係五件事:留長頭髮(Kesh);戴髮梳(Kanga);着短褲、長衫過膝(Kachhera);佩短劍(kirpan);戴鐵手鈪(kara);呢五件事嘅第一個字母都係K字頭,所以叫5K,意思即係將道德、精神同軍事結合[1]

重有其他禁忌:

  1. 唔可以殺生獻祭娑提(寡婦響葬禮跳落火度同老公殉葬)同儀式性動物獻祭都係唔准嘅。
  2. 生活方式:錫克教徒唔可以做隱士乞兒瑜伽士修行者修士或者修女)又或者獨身者,應該要做聖戰士。
  3. 無聊話吹水講大話誹謗督背脊後中傷都係唔准嘅。Guru Granth Sahib 告誡錫克教徒[2]:「你把嘴如果係咁誹謗人同埋講人是非,你幾多付出都係冇用同冇好結果嘅。」
  4. 冇神權階層:錫克教唔會有教職人員,佢哋都畀 Guru Gobind Singh(錫克教第十位古魯)廢除咗[3]。唯一有得留低嘅職位係 Granthi,負責照顧 Guru Granth Sahib,任何錫克教徒都可以做 Granthi,接受 Guru Granth Sahib 嘅教誨[3]
  5. 食用儀式殺死嘅動物啲肉:錫克教徒唔可以食通過宗教形式殺死嘅動物啲肉(叫做 Kutha 肉,動物割喉之後失血過多而死)[4],或者唔清楚背景嘅肉[5]。錫克教徒所食用嘅肉稱為 Jhatka 肉[6][7]

思想[編輯]

內文:錫克教思想

一神論[編輯]

錫克教只崇拜一個神,係個一神論宗教,佢哋理解嘅有幾個特點:獨一無二、宇宙唯一創造者、全能全知、公正仁慈。創教祖師納那克認為,唔同宗教嘅人,大家拜嘅神,唔理你話係印度教摩羅伊斯蘭教亞拉,其實都係同一個神。

業報輪迴[編輯]

錫克教出自印度教,所以亦有輪迴之說,即係話,今世做好事,下世會有好報,今世做壞事,下世會有惡報。一定要積德行善,下世先有機會修行成人。人有自由意志去決定做好事定壞事,但因為有摩耶阻住,所以睇唔到真理,無辦法認識,摩耶即係「幻覺」噉解,只有通過祖師嘅教導,先可以突破呢啲幻覺,達到天人合一境界。

解脫[編輯]

錫克教同印度教一樣,以解脫作為終極信仰目的,錫克教認為,人生出嚟就係要受苦受難,然後喺痛苦之中解脫。

倫理[編輯]

錫克教提倡人人平等、勞動價值、非暴力,佢哋反對性別歧視偶像崇拜,亦都反對麻麻煩煩嘅祭祀儀式。

錫克教鼓勵教徒投入社會生活,同時推崇勞動價值,認為不勞而獲等如寄生蟲。佢哋認為職業無貴賤之分,只要係自食其力,又肯同人分享成果,就係正確生活道路。佢哋容忍唔到一個人無所事事。

錫克教提倡一夫一妻制,雖然亦可以離婚,但唔鼓勵。女性地位同男性一樣,可以一齊讀經,又可以擔任宗教聖職。

聖典[編輯]

內文:阿底格蘭特

錫克教最重要嘅聖典係《阿底格蘭特》(Adi Granth),又或者叫做《格蘭特沙哈布》(Granth Sahib),阿底格蘭特意思係「原初經典」,由五世祖師阿爾瓊在位嗰陣開始編,最後由十世祖師戈德賓辛格完成。呢本嘢內容乜都有,主要係講錫克教教義,每一世祖師寫嘅讚歌,總共夾埋有3384 首讚歌,15575 詩節。

聖典主要係用旁遮普文寫成,但亦夾雜咗梵文古吉拉特文印地文馬拉地文波斯文

由於錫克教反對形像崇拜,所以錫克教嘅寺入面無任何神像,只有本《阿底格蘭特》用嚟拜,由於第十世祖師戈德賓辛格取消咗祖師制,所以《阿底格蘭特》就變咗十世祖師象徵。

除咗《阿底格蘭特》,錫克教重有一本《十祖聖典》,係由第十世祖師戈德賓辛格編,1734年完成。

組織[編輯]

公社[編輯]

內文:卡爾沙

公社即係卡爾沙(Khalsa),意思即係純潔,指嘅係國土。卡爾沙由第十世祖師戈德賓辛格設立,之前錫克教以教區(Sangat)組織,即係每個區有一個教主,但後來啲教主慢慢權力越嚟越大,有啲重威脅到祖師嘅權威,於是戈德賓辛格就以卡爾沙取代教區制,跟住又定五種教規,叫做「5K制」。加入錫克教只要通過一個「劍禮儀式」,就會成為卡爾沙成員。

集體就餐[編輯]

內文:集體就餐

集體就餐係錫克教一大特式,由第三世祖師阿瑪爾定出嚟,佢原意係打破印度傳統嘅種姓隔離制度而嚟,種姓隔離制度係將人分成唔同階層,然後每一種人都唔可以一齊。錫克教因為反對呢種制度,所以搞呢個集體就餐制,唔理乜嘢人,有乜嘢宗教背景,都走埋一齊食飯,三世祖師阿瑪爾重試過請到皇帝平民一齊食飯。

而家嘅錫克教仍然會開好多公共餐廳,畀啲窮人入去同佢哋一齊食飯。

錫克人[編輯]

內文:錫克人

錫克教徒以印度旁遮普旁遮普人為主,因為宗教而變成一個民族,叫錫克人。錫克人亦最多喺印度旁遮普地區,但亦有分佈喺全世界唔同地區。由於錫克教尚武嘅傳統,錫克人好多都鍾意入軍隊軍人,印度軍隊入面佔大半都係錫克人,而喺分佈喺其他國家嘅錫克人,都係傾向於搵返類似嘅工作,例如軍隊或者保安之類。

錫克人認為身體係神嘅創造,所以唔會飛髮[8],留到頭髮長一長,出街時捲埋一個蛇餅,然後用布包實,即係廣東話俗稱叫「包頭」,行出街一認就認到,同時亦留到滿面鬍鬚。錫克女人都鍾意着一種叫旁遮普服嘅傳統服裝。錫克人道德觀念同自律性都好強,平時都好有禮貌。

自從第十世祖師戈德賓辛格要求所有錫克人喺受洗後,都要加「辛格」(Singh)喺個名後面,意思係「獅子」,象徵虔誠、勇敢、犧牲精神。之後所有錫克人個名都有辛格。受洗女嘅姓「考爾」(Kaur),意思係「公主」。

香港新加坡亦有好多錫克人,但因為多數人都唔識錫克人講嗰啲,辛格個發音Singh同廣東話「星」同音,慢慢錫克人喺廣東話就有個俗稱叫「亞星」。

現代錫克教[編輯]

內文:現代錫克教

印度獨立之後,錫克人諗住旁遮普可以有一個獨立自治邦,有自己一個錫克教地區,點知當時尼魯赫政府大隻講唔算數,令錫克人開始產生民族主義思想,爭取一個自治邦成為錫克教宗教領袖嘅一個主要議題,由於太多參與政治鬥爭運動,所以喺教義同宗教理論上都無乜嘢搞過。1970年代旁遮普地區喺農業經濟發展上面快速成長,即所謂「綠色革命」,旁遮普生產高級糧品佔全印度幾乎一半,令旁遮普得到一個外號叫「印度糧倉」,由於經濟地位提高咗,自治嘅要求又成為議題,1973年通過「阿南德普爾決議」,將旁遮普語地區劃做一個「旁遮普邦」,但政府遲遲都唔肯落實,就算發動過好多遊行示威政府都係用強硬手段拉人封艇。結果搞到部份錫克人開始激進,重開始出現以恐怖手段爭取獨立,暗殺、爆炸、搶劫等,令旁遮普治安變差,呢啲組織之中,以賓特蘭瓦爾嘅組織最大,呢班人主要匿喺金廟入面。之後印度政府發動「藍星行動」,衝入錫克教認為最神聖嘅金廟入面拉人,期間對金廟造成好多破壞,令鍚克教同印度教結怨,開始發生好多教派仇殺。

旁遮普問題到而家都仍然未解決,係印度政府一個辣手問題。

節日[編輯]

內文:錫克教節日

錫克教有自己獨特文化節日,不過由於錫克教係由印度教演變出嚟,所以有啲節日都係喺印度教度嚟,同埋以印度曆計,例如燈節(即係新年)同灑紅節都係印度教節日。另外,祖師誕辰係錫克教最主要節日,其中以創教祖師納那克誕辰同第十世祖師戈德賓辛格誕辰最大件事。

寺廟[編輯]

寺廟係錫克教徒去敬拜嘅地方,傳統上錫克教徒要日日去上香禮拜,不過而家啲人因為要返工,所以只會放假先去,錫克教嘅寺廟通常都係白色同圓頂,門口掛住一支黃色嘅旗。

錫克教嘅寺廟有兩種,一種係畀教徒做宗教活動而起,另一種就類似聖地咁,呢類通常起喺祖師誕生或者殉難嘅地方,呢類都係屬於古蹟兼係錫克教聖地。

參考[編輯]

  1. K錫克教徒標準裝束. 原著喺2009年2月28號歸檔. 喺2007年10月12號搵到.
  2. Srigranth.org – Guru Granth Sahib Page 1253
  3. 3.0 3.1 The Sikhism Home Page: Introduction to Sikhism
  4. Sikhs and Sikhism, Dr. I.J.Singh, Manohar Publishers.ISBN 978-8173040580
  5. "Sikhism, A Complete Introduction" by Dr. H.S. Singha & Satwant Kaur Hemkunt, Hemkunt Press, New Delhi, 1994, ISBN 81-7010-245-6
  6. Jhatka 互聯網檔案館歸檔,歸檔日期2010年9月10號,., The Sikh Encyclopedia
  7. What is Jhatka Meat and Why?
  8. "Why Sikhs do not cut their hair but they cut their nails?". 原著喺2007年9月27號歸檔. 喺2007年10月12號搵到.

出面網頁[編輯]