鄭錦滿

出自維基百科,自由嘅百科全書
Jump to navigation Jump to search

鄭錦滿Alvin Cheng1988年6月23號—),花名四眼哥哥超音鼠,係香港社運人士,2016年加入香港本土派政治組織熱血公民,以呢個組織身份參選立法會選舉。

簡歷[編輯]

鄭錦滿中學時期開始參與社運,包括社民連嘅活動同反高鐵運動,到2009年屋企人安排佢過澳洲留學。

2014年9月香港爆發雨遮革命,嗰時讀緊澳洲昆士蘭科技大學嘅鄭錦滿返香港聲援,11月21號佢因為唔滿意有團體企圖主導佔領運動,而帶領網民到金鐘佔領現場「拆大台」,因而開始出名。12月頭佔領運動尾聲,佢創立學運組織學生前線,但第二年3月就解散。另外佢亦參與過佔領運動後嘅「鳩嗚行動」。

2016年2月,鄭錦滿加入熱血公民,志在用呢個組織身份參選第6屆香港立法會選舉。佢喺香港島地區直選議席嘅熱血公民候選名單入面排頭位,後面係鍾琬媛。而呢張名單係香港島選區唯一自稱本土派嘅正式候選名單。不過,由於佢張名單只係攞到22,555票排第八,佢嘅第一次參選立法會之旅亦只能飲恨告終。

2017年3月30號,鄭錦滿因為喺雨傘運動期間阻住警察喺旺角佔領區嘅清場行動,被高等法院裁定藐視法庭罪名成立,被判坐花廳三個月。