馮檢基

馮檢基
出生日	1953年3月17號  （69歲）
出生地	香港
國籍	中華人民共和國
母校	筲箕灣官立中學、香港大學、University of Bradford
職業	政治人、社會工作者、太平紳士
政黨	香港民主民生協進會
[改維基數據]

馮檢基，SBS，JP（Frederick FUNG Kin-kee；1953年3月17號—），花名「基哥」，係香港政黨香港民主民生協進會（簡稱「民協」）前任主席（1989年至2007年），香港立法會前任議員，香港區議會前任議員（1999年至2015年）。

佢本來係泛民主派主要人物之一，但2018年之後逐漸向親中派靠攏，而家一般人會將佢視為中間派。

屋企

馮檢基祖籍廣東東莞，而佢就喺香港出世。

馮檢基老婆叫陳敏慈，家吓做緊香港公開大學嘅學生事務長。兩人育有一個仔女。

從政生涯

馮檢基係1983年起獲選做深水埗區議員，1991年成為立法局議員。除咗1998年直選落選外，多年來一直成功循直選進入立法會（局）。

2018年3月立法會九龍西補選

為咗2018年3月立法會九龍西嘅補選，民主派唔同組織已經喺前一年有部署，其中民協喺2017年6月決定人選嘅時候，通過咗由馮檢基代表民協。但當時就有啲民協成員唔同意呢個決定，其中莫嘉嫻就話，社會整個大氣氛都唔係要舊人，而係希望有新人新氣象。但民協做嘅嘢，同香港市民嘅期望背道而馳，所以佢決定退出民協。

馮檢基之後代表民協參與民主派就呢次補選喺2018年1月進行嘅初選，另外兩名參選人係姚松炎同埋袁海文。姚松炎以大比數勝出初選，但由於姚松炎面對再次被香港政府剝奪資格嘅風險，民主派好早亦有研究Plan B（後備人選），當時就訂咗可以再到時討論。之後，喺姚松炎遲遲未被確定入閘嗰陣，馮檢基希望成為後備人選但就被部分民主派人士質疑勝算，例如鄭宇碩就曾經向馮檢基分析形勢，話假如最後馮檢基代表民主派，佢會支持，但馮檢基就要面對好多人嘅責罵，仲有本土派同自決派嘅挑戰，希望馮檢基顧全大局。

馮檢基最後放棄做Plan B，而姚松炎最終成功入閘，最終輸咗畀親中派支持嘅鄭泳舜。喺民主派敗選之後，佢曾經多番公開炮轟民主動力，又批評姚松炎分化支持者。

退出民協

2018年7月，馮檢基開記者招待會，喺民協成員陪同下宣布退出民協，同埋會另組新壓力團體，仲話同特首林鄭月娥拗手瓜。

2018年11月立法會九龍西補選

喺呢次九龍西補選選舉入面，馮檢基一直希望代表民主派參選。不過，由於呢次選舉係填補劉小麗被政府剝奪資格後嘅議席空缺，所以民主派本來一直打算由劉小麗出戰。當時民主派亦衡量過劉小麗再次被剝奪資格嘅風險，於是由劉小麗決定咗由黨友，同屬工黨嘅李卓人做Plan B（後備人選）。而劉小麗最終亦的確被政府禁止參選，民主派改由李卓人出戰。未被民主派推薦嘅馮檢基，喺2018年10月2號正式參選，同李卓人直接競爭。馮檢基又聲稱，民主派欺凌佢。

呢次選舉，支持佢嘅民主派人士唔多，但馮檢基就得到親中派反佔中嘅代表人物之一周念慈嘅支持。不過馮檢基最終落選，只係攞到12,509票，大比數輸畀陳凱欣。陳凱欣攞到 106,457票。

政治立場

由從政初期去到2018年，馮檢基一般都被視作泛民主派人士。但喺佢參加民主派就2018年3月立法會補選進行嘅初選落敗之後，立場就開始有所變化，喺同年11月另一場立法會補選入面甚至同民主派直接競爭。另外，佢喺2019年香港區議會選舉亦同民主派嘅代表陳嘉朗喺尖沙咀西選區撞區，佢當時自稱無政黨民主派，又話希望同陳嘉朗協調但安排唔到。馮檢基喺交提名嗰陣，亦無泛民同佢站台。最終馮檢基只係攞到154票（7%選票）落敗，陳嘉朗就贏咗選舉。

而喺2021年，北京未經香港人同意進行所謂嘅「完善香港選舉制度決定草案」，民主大倒退之後，直選議席比例創新低而且入閘仲要經過多種政治審查，民主派大多認為唔應該再參加嘅時候，馮檢基就同民主派唱反調，話民主派喺新制下「仍然有得玩」。呢個說法被唔少人批評，例如喺2019年區選擊敗佢嘅陳嘉朗，就形容佢係「154先生」。

另外，馮檢基脫離民主派之後，亦對美國持不友善態度。例如，喺2021年1月，佢就曾經接受《大公報》訪問，揶揄美國大選係對民主嘅恥笑。佢亦喺2021年5月喺媒體灼見名家嗰度，聲稱呢個方案係由於美國插手香港政治太深，所以中央非出手不可。

2021年第7屆香港立法會選舉，佢參選九龍西選區直選，得到王䓪鳴、簡松年等親中陣營人士提名，結果以15961票落選。

個人榮譽

• 太平紳士（2004年）
• 銀紫荊星章（2006年）

睇埋

• 2012年香港特別行政區行政長官選舉

出面網頁

• 馮檢基喺虛擬國際權威檔案識別碼嘅資料
• 馮檢基喺Freebase嘅資料
• 〈香港特別行政區立法會 - 議員資料庫〉 (繁體中文). 香港特別行政區立法會.