劉皇發

出自維基百科,自由嘅百科全書
跳去: 定向搵嘢

劉皇發GBMGBSJPLAU Wong-fat1936年10月15號—),人稱發叔新界鄉議局前主席、香港立法會議員、屯門區議會主席、前自由黨成員。劉皇發響香港新界屯門龍鼓灘村出世,係香港新界原居民。佢自1980年起出任新界鄉議局主席,領導新界原居民,所以有「新界土皇帝」或「新界王」稱號。

簡介[編輯]

劉皇發出生於屯門龍鼓灘村窮等家庭,係家中獨仔。佢響靈山中學初中畢業後,幫父母耕田,後來到九廣鐵路公司做路軌上漆工作,之後又響元朗開雜貨舖做小生意。

政途[編輯]

1960年,劉皇發喺前任新界鄉議局主席陳日新嘅支持下,擔任屯門龍鼓灘村村代表,成為當時最年輕嘅新界鄉村代表。1972年,劉獲選為屯門鄉事委員會副主席。其後,劉皇發成功游說龍鼓灘村民,出售地皮畀政府做英軍操炮區,因為咁得到港英政府嘅賞識,成為日後投身政壇嘅踏腳石。1973年,劉獲港英政府委任為太平紳士。1980年,劉出任新界鄉議局主席。1982年,劉出任屯門區議會主席。1985年,劉出任區域市政局議員。同年,佢獲港英政府委任為立法局議員。1991年及1995年,佢循功能組別「鄉事」組別嘅途徑,自動當選立法局議員。1996年,劉擔任臨時立法會議員。1998年及2000年,劉都係以功能組別「鄉議局」組別,自動當選立法會議員。2004年,劉改以「區議會」功能組別參選立法會,並順利當選。2005年7月1號,劉獲頒香港特別行政區政府最高榮譽嘅大紫荊勳章(Great Bauhinia Medal,GBM),以表揚佢對香港社會嘅貢獻,佢亦係首位新界原居民有呢個榮譽。

劉皇發目前係立法會最老嘅議員,又同林偉強張學明李國英合稱「立法會鄉事四子」。

地方名[編輯]

香港嘅街道、地方好少會以本地知名人士命名,但劉皇發就得到呢個榮譽。響1974年為配合將「青山區」改名做「屯門區」,港英政府將當時區內唯一嘅公共屋邨「青山邨」改叫「新發邨」,「新」係指前新界鄉議局主席、時任屯門鄉事委員會主席嘅陳日新;「發」就係指當時屯門鄉事委員會副主席劉皇發。而新發邨現已重建成今日嘅港鐵屯門站;而「皇珠路」嘅名就係將劉皇發嘅「皇」字同佢老婆吳妹姝嘅「珠(姝)」字合併而成。

另外,位於安定邨仁愛堂劉皇發夫人小學,同埋大角嘴世界龍岡學校劉皇發中學,都以佢個名命名。

名下馬匹[編輯]

劉皇發同吳妹姝兩公婆係香港賽馬會會員,名下馬匹大部分都係以「龍船」兩字命名,包括金玉滿堂、龍船(呢隻馬嘅中文馬名用過兩次,之但係,兩駒嘅英文馬名有分別,一隻係1984-1985馬季進口嘅紐西蘭自購馬,烙號BA072,英文馬名叫做REGAL ACE,另一隻係1999-2000馬季進口嘅愛爾蘭自購馬,烙號BV192,英文馬名叫做FISHERMAN'S CREEK)、金龍船、猛龍船、龍船義浩、大龍船、真龍船、龍船快、驪龍、龍船鼓響。另外,劉皇發亦都係07/08告東尼練馬師賽馬團體嘅成員,名下馬匹有「金玉滿堂」。除此之外,劉皇發個仔劉業強、女婿黃汝坤亦係香港賽馬會嘅會員,名下馬匹包括強人、客家寶、知己知彼、知己百勝、好知己、驌龍、龍船旺、龍船勁、龍船寶、勁風。

出面網頁[編輯]