梁美芬

梁美芬，SBS，JP（英文：Dr Priscilla LEUNG Mei-fun，1960年11月18號—），外號「鼠王芬」，係香港立法會九龍西選區議員，前九龍城區議會議員，執業大律師，香港城市大學法律系副教授，西九新動力召集人。

香港人，廣東肇慶人，2000年得到香港十大傑出青年，家下係經民聯成員，以前係民建聯成員。

梁美芬已婚，老公係大陸法律教授王貴國，曾經做過香港城市大學法律學院院長。

選舉歷史

• 佢喺2007年香港區議會選舉，擊敗民主黨陳家偉，當選成為黃埔東選區嘅區議員。
• 佢喺2008年香港立法會選舉出選九龍西選區，並成功當選。
• 佢喺2011年香港區議會選舉，擊敗民主黨黃碧雲同人民力量嘅歐陽英傑。
• 佢喺2012年香港立法會選舉同2016年立法會選舉成功連任。
• 佢喺2015年香港區議會選舉，擊敗青年新政嘅游蕙禎。
• 2019年第6屆香港區議會選舉，梁美芬做咗三屆黃埔東選區嘅區議員之後，唔再尋求冧莊，並交棒畀徒弟李超宇，但係，由於李超宇嘅選情受制於反修例運動，結果就落選，輸畀泛民主派嘅關家倫。

政治立場同爭議

梁美芬係親中派嘅一員，不時主動提出收緊香港人政治參與權利嘅建議。例如，佢喺2021年3月，就主動提倡要設立資格審查委員會，篩選北京單方面認為唔愛國嘅候選人。佢亦曾經喺2011年發表言論話要懲罰選民，話選民如果投畀一個會中途辭職嘅議員，佢哋應該受到懲罰。

被指借謠言抹黑公民黨

喺2011年，有唔同媒體報導，話公民黨透過法律訴訟，爭取同支持香港外籍家庭傭工住滿7年後獲得居港權，成為香港永久性居民嘅謠言。當時公民黨已經否認並提出有關黨員只係依照《大律師行為守則》行事，但梁美芬喺2012年7月派發立法會工作報告，就被指借呢個謠言攻擊公民黨，結果引起有人發起聯署向香港大律師公會投訴，指責梁美芬身為大律師，熟悉的士站原則，但係刻意誤導公眾。

2015年區選被指選舉舞弊

梁美芬曾經喺2015年區議會選舉入面搵咗同屬親中派嘅李家仁唱《小明上廣州》嘅改詞版去支持佢同為同站台，呢啲搵藝人站台嘅做法本來好普遍。當時亦未有聲音批評梁美芬。但隨著喺2021年8月，黃耀明因為喺2018年3月為民主派區諾軒站台唱歌，兩人一同被控選舉舞弊，就有部分聲音話，梁美芬同李家仁咁做，同樣有選舉舞弊嘅嫌疑，如果廉政公署唔調查嘅話，需要向公眾交代。

出面網頁

• "香港特別行政區立法會 - 議員履歷 ::梁美芬議員, SBS, JP" (中文). 香港特別行政區立法會.
• "香港經濟民生聯盟: 監事委員會．執行委員會" (中文). 香港經濟民生聯盟.
• Staff Profile, City University of Hong Kong
• 香港網絡大典：梁美芬
• 梁美芬嘅Facebook頁