第7屆香港立法會選舉

出自維基百科,自由嘅百科全書
跳去導覽 跳去搵嘢

2021年香港立法會選舉香港特別行政區成立之後嘅第七屆立法會選舉,會重新選出全部議席,原定喺2020年9月6號舉行,而家改咗喺2021年12月19號舉行。

呢次選舉本嚟同第5屆第6屆一樣,即係會選出35個地方直選議席同35個功能界別議席,總共70個議席。但係延期之後,北京當局未經香港人同意或者事先諮詢,就大幅度削減立法會直選議席數目同比例,同時設立政治審查制度之後嘅第一次選舉。選舉有40席係選舉委員會產生;30席係功能組別,但係變相直選嘅區議會(第二)功能界別就被取消;直選議席就由35席大幅度削減至20席。三類議席夾埋總共90個。

民主派唔少代表人物明言杯葛,所以呢次選舉係首次有主要政治派系明言杯葛嘅香港立法會換屆選舉。

選前事件[編輯]

2020年[編輯]

2020年6月12號,特區政府刊登香港憲報,將投票日定喺2020年9月6號[1],提名期由7月18號至7月31號[2]

2020年7月11-12號,民主派就決定人選進行初選,希望可以攞到過半議席,逼使政府回應五大訴求

2020年7月30號,12名泛民主派香港本土派候選人俾選舉主任取消資格,包括4位尋求連任嘅議員郭榮鏗梁繼昌楊岳橋郭家麒同埋黃之鋒岑敖暉袁嘉蔚梁晃維鄭達鴻何桂藍劉穎匡鄭錦滿

2020年7月31號,行政長官林鄭月娥宣佈,因為武漢肺炎香港疫情肆虐影響公眾安全,所以引用《香港法例》第241章《緊急情況規例條例》訂立附屬法例第241L章《緊急情況(換屆選舉日期)(第七屆立法會)規例》,褪遲一年至2021年9月5號先至舉行立法會選舉,並向中央人民政府(國務院)尋求支持,並提呈全國人民代表大會常務委員會決定第七屆香港立法會議員嘅任期長度。

不過,呢個決定引起咗好大爭議,民主派陣營認為,親中派陣營係怕輸,擔心會好似上年區議會選舉咁大敗,令民主派無法喺議會乘勝追擊所作出嘅政治決定,粗暴褫奪市民投票的權利。呢次決定要由人大介入,係憲制嘅徹底崩塌。被禁參選嘅黃之鋒就話,北京或香港政府無任何基礎去押後選舉,批評政府對民主派嘅打壓超出香港同埋國際社會嘅預期[3]。一篇討論香港社會兩極化嘅學術文章提及,有啲選民並唔信納呢個理由,又用新加坡做例子,覺得當時疫情都控制得唔太好嘅新加坡都可以進行大選,用武漢肺炎為理由根本就係藉口。由於民間覺得無辦法表達對政府嘅意見,就借一啲事件(例如同年李偲嫣嘅死)製作二次創作嘅作品,去表達對政府同激進親中派嘅不滿。文章亦指,政府呢個決定,加劇咗社會嘅兩極化[4]

2020年8月11號,全國人民代表大會常務委員會通過延長第六屆立法會議員任期唔少於一年,直至第七屆任期開始。而香港特區第七屆立法會依法產生之後,任期仍然係4年。

2021年[編輯]

喺2021年3月11號,中國第十三屆全國人民代表大會第四次會議入面,未經香港人同意或者事先諮詢,就通過議案大幅度削減立法會直選議席數目同比例,同時設立政治審查制度。呢個方案被視為香港民主大倒退,而且扼殺民主派參與選舉嘅權利。有啲傳媒用『閹割選舉』來形容呢次嘅決議案[5][6],除咗香港民主派同香港嘅學者之外,台灣、美國、澳洲、英國同歐盟都有發聲批評北京扼殺香港民主自由嘅做法。亦因為咁,民主派唔少政黨同領導人物都表明杯葛選舉。

有啲本來係泛民主派出身,但係後來向親中派靠攏甚至入埋行政會議嘅人,包括湯家驊馮檢基狄志遠就有意參選[7]

2021年3月30號,為咗落實中共中央總書記習近平提出嘅「愛國者治港」要求[8]全國人大常委會通過決議[9],確定立法會議席由70席增加到90席,立法會嘅90個議席以40、30、20比例分配議席,又叫「四三二方案」。具體係選舉委員會界別40席;傳統功能界別30席;地區直選20席[10]。由於直選議席數目大減,民主派人士認為立法會已經淪為「橡皮圖章[11]

參考[編輯]

  1. "第3115號公告" (PDF). 政府物流服務署. 2020-06-12. 原著 (PDF)喺2020-07-17歸檔. 喺2020-07-15搵到.
  2. "立法會選舉確定於9月6日舉行". NOW新聞. 2020-06-10. 原著喺2020-06-10歸檔. 喺2020-06-10搵到.
  3. "香港立法會選舉因疫情延後一年,反對派稱政府「怕輸」". BBC News 中文 (中文). 喺2020-11-08搵到.
  4. Au, Cheuk Hang; Ho, Kevin K.W. (2021-01-01). "Online schadenfreude as an outcome of ideological polarization: a case in Hong Kong". Online Information Review. ahead-of-print (ahead-of-print). doi:10.1108/OIR-03-2021-0142. ISSN 1468-4527.需要註冊
  5. "眾新聞 | 國安法 二二八 閹割選舉 攬炒三步曲". 眾新聞 (中文). 喺2021-03-13搵到.
  6. "【閹割選舉】馬英九:「一國兩制」宣告死亡 國民黨籲保障香港自由民主 | 立場報道 | 立場新聞". 立場新聞 Stand News (英文). 喺2021-03-13搵到.
  7. "馮檢基湯家驊參選呼聲高 狄志遠有意組新黨". www.bastillepost.com. 2021-03-16. 喺2021-05-07搵到.
  8. ""完善'一国两制'制度体系,落实'爱国者治港'根本原则"专题研讨会举行 夏宝龙出席并讲话". 国务院港澳事务办公室 (中文). 2021-02-22. 夏宝龙表示,习近平总书记指出,要确保“一国两制”实践行稳致远,必须始终坚持“爱国者治港”。
  9. "【全面治港】中國人大常委通過港選舉改制方案 立法會直選議席大減". 蘋果日報. 2021-03-30.
  10. "譚耀宗:立法會以40、30、20比例分配議席". 香港電台. 2021-03-30.
  11. "全面管治權︱立法會直選比例或降至22% 倒退30年歷來最低". 蘋果日報. 2021-03-11. 喺2021-03-11搵到.