梁熙

梁熙
國籍	中華人民共和國
職業	政治人
[改維基數據]

梁熙（英文：Edward Leung Hei，1985年3月8號—）係香港親中陣營民建聯黨員，現任民建聯常務執行委員會委員，港中發展集團有限公司行政總裁，自稱喺香港出世（但講非香港口音粵語），之前喺美國南加州大學畢業，第七屆香港立法會議員，老豆係梁英偉，以前同劉鑾雄合作搞過愛美高，不過後嚟因為發展分歧而拆夥，之後就開始炒股同喺大陸搞地產生意發達。

選舉經歷

2021年，梁熙喺未有選舉經驗嘅情況下，出選2021年香港立法會選舉，空降出戰港島東選區（東區及灣仔），結果順利當選。

之後佢喺李家超無提政綱嘅情況下，有份提名李家超參與2022年香港行政長官選舉。

政治立場同部分言論

佢係親中派一員之一，又曾經和應全國港澳研究會副會長劉兆佳提出「忠誠反對派」嘅槪念。早喺香港政府未經香港人同埋泛民主派同意，單方面喺選舉制度設立政治國安審查之前，佢已經喺2020年11月喺AM730撰文，主張要得到北京同意先可以參選，限制選民以往擁有自由參選嘅權利。

另外，佢亦連同李梓敬、陳穎欣等親中仇外嘅落選前區議員組成組織「中國故事」，佢哋亦不時攻擊流亡外國嘅兩個前立法會議員許智峯同羅冠聰，指責佢哋對外宣傳中共對港惡行係「勾結外國勢力」同「一面倒盲反中共」 。

建議港府請求中共畀香港人以中國代表身份喺國際舞台發聲

喺2021年10月21日，民建聯出版「認識國家發展 講好中國故事」倡議書嘅記者會裡面，作為民建聯執委會常委嘅梁熙話，香港政府應該要請求中共政府爭取，希望中共政府介紹多啲香港嘅人才加入國際機構（例如：聯合國），以中共代表嘅身份發聲，令香港人可以多啲機會參與國際事務 。

其他政治參與

佢曾經同新民黨容海恩一齊喺大公文匯旗下網媒主持節目《EyE on U 容來煕往》。

爭議

• 2021年香港立法會選舉期間，作為民建聯香港島東選區候選人嘅佢，喺選舉論壇入面表示爭取喺西灣河起地鐵站，但係唔知佢係指爭取重建現有嘅西灣河港鐵站，抑或係喺區內起新嘅地鐵站，被質疑搞錯西灣河同小西灣。
• 同時喺選舉期間，36歲嘅梁熙喺選舉政綱入面話「服務港島東29年，選情嚴峻」，被人質疑佢係咪7歲就開始從政。梁熙後來解釋「服務港島東29年」嘅係指「民建聯團隊」，而唔係佢自己。選舉對手潘焯鴻就話梁熙嘅政綱有誤導成份，令人誤以為梁熙服務咗港島東29年咁耐。

出面網頁

• 〈香港特別行政區立法會 -梁熙議員〉 (繁體中文)。香港特別行政區立法會。
• 〈香港特別行政區立法會 - 議員資料庫〉 (繁體中文)。香港特別行政區立法會。
• LegComembers，立法會議員，民建聯
• 政策發言人 | Policy spokespersons—發展事務副發言人，衛生事務發言人，民建聯
• 香港島東候選人_梁熙
• 梁熙嘅facebook頁