黃之鋒

出自維基百科,自由嘅百科全書
跳去導覽 跳去搵嘢
黃之鋒

黃之鋒Joshua Wong1996年10月13號—),人稱「G Phone」、「河童」,係前香港學生組織學民思潮召集人,係香港眾志創黨成員、香港公開大學社會科學榮譽學士班(政治及公共行政)學生。

生平[編輯]

黃之鋒響2012年曾經積極組織反德育及國民教育科活動,最後逼使政府撤回強制推行課程嘅決定。

到2014年9月,黃之鋒有份組織中學生罷課,反對人大對香港政改嘅框架限制,響添馬艦政府總部抗議時同其他人突破防線入咗政府總部東翼前地(「公民廣場」),結果畀警方拉咗,令好多人到場聲援,衝擊警方防線,於是警方動用胡椒噴霧催淚彈驅趕,結果就令到重更加多人走出嚟抗議,引發咗雨遮革命

10月頭,美國《時代雜誌》亞洲版將黃之鋒放上封面,標題係「The Face of Protest」(抗爭嘅面孔)[1]。美國《紐約太陽報》亦發表社論話佢應該獲頒諾貝爾和平獎,表揚佢幫香港年輕一代爭取民主自由[2]

2019年,黃之鋒放監之後,積極參與反修例抗暴活動,同時宣布參選第6屆香港區議會選舉嘅南區海怡西選區,雖然佢提名期第一日(10月4號)報名,但到舉行抽籤候選人號碼嘅日子(10月24號)都依然未被確認或者取消參選資格,要押後抽籤,去到10月29號,當局正式取消咗佢嘅參選資格,係呢屆區選唯一因政治立場而被取消資格嘅參選人[3]

2020年6月30號,因為香港國家安全法,黃之鋒、周庭羅冠聰敖卓軒都分別喺Facebook宣佈退出香港眾志,香港眾志亦都需要摺埋。[4]

事件[編輯]

受二千萬購貝沙灣假新聞困擾[編輯]

喺2019年10月,網上流傳一單假新聞話黃之鋒,以二千萬購入南區豪宅貝沙灣分層戶,當中指明係貝沙灣南灣六座中高層B室單位,買賣由美聯物業促成。黃之鋒否認事件,美聯物業之後回應話佢哋無幫黃之鋒做過任何買賣,《星島日報》記者去土地註冊處做查冊亦未見嗰個單位易手[5]

不過,有啲激進親中派嘅人,仍然攞呢單新聞嚟做文章。例如喺2020年香港立法會選舉民主派初選嘅投票日個陣,黃之鋒喺太古康怡廣場外為袁嘉蔚拉票嘅時候,石房有忽然現身騷擾佢哋嘅拉票活動,用電話拍攝佢哋,又指罵黃之鋒係「漢奸走狗」,用呢單新聞老屈佢。擾攘約10分鐘後,在場好多人指罵石房有,結果石房有自行離開現場[6]

[編輯]

  1. 黃之鋒「抗爭臉孔」登《時代》封面
  2. 美媒︰黃之鋒應獲和平獎
  3. 「放棄自決並非真心」 區選落閘 獨根未斷 黃之鋒冇得選
  4. "國安法通過 黃之鋒、羅冠聰、周庭等宣佈退出 香港眾志即日解散:化整為零繼續抗爭" (中文). 立場新聞. 2020-06-30. 喺2020-07-03搵到.
  5. 頭條日報. "【Kelly Online】傳二千萬購貝沙灣 黃之鋒:假新聞". 頭條日報 Headline Daily (中文). 喺2021-03-03搵到.
  6. 頭條日報. "【立會選舉】譚文豪初選街站義工遇襲 黃之鋒與「大波man」口角". 頭條日報 Headline Daily (中文). 喺2021-03-03搵到.