學民思潮

出自維基百科,自由嘅百科全書
Jump to navigation Jump to search
學民思潮呼籲市民參與2012年七一大遊行反對德育及國民教育科。

學民思潮英文Scholarism)係香港一學生組織,2011年5月29號由一班中學生成立,組織宗旨係反對香港特別行政區政府設立德育及國民教育科。現任組織召集人係黃之鋒,發言人係黃子悅

名稱[編輯]

2011年5月29號到2012年3月,甚名爲學民思潮反對德育及國民教育科聯盟,2012年3月至今,簡化爲學民思潮。

「學民」一字來自學生身份,而學生亦帶有香港公民嘅身份,因此必須履行公民義務,積極參與公共社會事務。「思潮」一字係來自五四運動,當年學生摒棄中國舊有傳統思想,追求德先生(Democracy,民主)同賽先生(Science,科學),渴望民主、思想同言論自由。組織者決意以當年嘅學生運動作為榜樣,追求自由開放嘅思想自由,而唔係盲目嘅愛國情懷。

組織喺成立初期命名為「學民思潮 反對德育及國民教育科聯盟」,以示團隊係以撤回德育同國民教育科為目標,關心政府喺德育同國民教育科上推行嘅政策;後來喺2012年3月刪去「反對德育及國民教育科聯盟」,剩係保留「學民思潮」四字。

口號同標語[編輯]

  • 「立於街頭,走進人群」(信念;旗幟標語)
  • 「改變始於足下」(2012年3月至今)
  • 「我要思考,不要洗腦」(7·29遊行口號之一)
  • 「全民行動,free our minds」(活動號召、響應民間反對國民教育科大聯盟,2012年7月至今)
  • 「學生運動,無畏無懼」(Facebook專頁標語,2012年7月30號-8月28號)
  • 「民主會戰勝歸來,後有巨浪承接這變改」(學民思潮T恤標語,引用六四樂隊歌曲《民主會戰勝歸來》嘅歌詞)
  • 「堅持原則,不懼權貴」(旗幟標語)
  • 「不要染紅」(旗幟標語)
  • 「捍衞自由」(旗幟標語)
  • 「拒絕教育二十三條,撤回洗腦國民教育科」(橫額標語)
  • 「日以繼夜反洗腦,夜以繼日為自由」(狙擊工聯會嗰時用)
  • 「學生教師抗議聲,聲聲入耳;工聯國興保皇派,事事不聽」(狙擊工聯會嗰時用)
  • 「Don't Allow Brainwashing」(狙擊民建聯嗰時用)
  • 「全民集會,重回政總」(宣傳「良心話事,守護孩子」公民教育開學禮大集會嗰時用)
  • 「祈求平安」(Facebook專頁標語,2012年10月1號至今,哀悼南丫島嚴重撞船海難死難者同祈求傷者、失蹤者平安)

主要成員[編輯]

[編輯]

香港政府喺2011年中旬提出會喺中、小學設立德育及國民教育科,向公衆發佈諮詢文件。2011年5月29號,來自匯基書院(東九龍)黃之鋒同林朗彥同學認為國民教育管制學生思想、浪費上課時間、浪費公帑[1],決定正式成立「學民思潮」,並由兩人擔任召集人。初期係以「學民思潮 反對德育及國民教育科聯盟」命名,目的係要求特區政府撤回德育及國民教育科,並關心政府喺呢科上推行嘅政策。

2012年3月,學民思潮以「改變始於足下」為口號,透過示威、遊行、記者招待會街站等一連串社會行動,要求政府撤回德育及國民教育科。同時,組織名字簡化為「學民思潮」,以表示除反對德育及國民教育科外,亦會廣泛關心社會議題。例如強颱風韋森特襲港,導致膠粒墮海,引發香港膠災,學民思潮喺發起「全民行動,十區街站,收集簽名」嘅同時亦派成員拾膠珠,又喺Facebook專頁呼籲網民參同拾膠珠行動;又例如南丫島嚴重撞船海難發生後不久,學民思潮旋即把封面相片同資料相片分別更換為黑底灰字「祈求平安」同黑底灰階學民思潮標誌,表示哀掉死難者,並祈求傷者同失蹤者平安。

學民思潮嘅召集人一職起初由黃、林兩人共同擔任,後曾任「九十後動員」召集人之一嘅鍾曉晴加入並成為召集人之一,林之後辭去召集人一職並退居幕後,減少發言,負責更多文宣同構思各類型嘅活動,召集人剩返黃、鍾二人。[2]2012年6月3號九十後動員召集人鍾曉晴宣布退出學民思潮,學民思潮召集人自此由黃之鋒一人擔任[3]

學民思潮除咗喺網頁、社交網站等網上空間發聲外,亦組織多次社會運動去逼使政府撤回國民教育科,當中包括於2012年7月1號起,連續6日向教育局局長吳克儉示威,要求撤回德育及國民教育科。由於學民思潮喺要求撤回國民教育科嘅立場上同教協相近,就同家長組織國民教育家長關注組同教師組織香港教育專業人員協會組成民間反對國民教育科大聯盟,合辦同年7月29號嘅「全民行動,反對洗腦,7月29號,萬人大遊行」、9月1號「良心話事,守護孩子」公民教育開學禮大集會等活動[4][5]。因應政府仍然堅持唔撤回德育及國民教育科,學民思潮隨後發起「全民行動,十區街站,收集簽名」聯署行動,獲得國民教育家長關注組同另一學生組織大專行動嘅支持同協[6]。學民思潮喺8月末更宣佈把行動升級,發起「埋單計數,撤回課程,佔領政總」嘅升級行動,更有3名學生絕食56個鐘。

學民思潮宜家正同教協同民間反對國民教育科大聯盟積極籌劃罷課等不合作運動,前提係教育局喺9月3號前仍不撤回德育及國民教育科,但同時強調罷課係最後一步,召集人黃之鋒同學指:「國民教育科有甚麼內容,係通識科常識科教不到?他們答不到我。」又指:「冇人想罷課,我都想上學,但若要走到這一步,係政府逼我們這樣做。」[7]

舉辦同參與活動一覽[編輯]

學民思潮喺政府總部前集會(2012年9月7號)
  • 七一大遊行(2011年7月1號、2012年7月1號)
  • 821大遊行 撤回德育及國民教育科(2011年8月21號)
  • 學民思潮 撤回國民教育課程大遊行(2012年5月13號)
  • 抗議警權無限大遊行(2012年5月13號)
  • 屯門抗議事件[8](2012年7月2號)
  • 全民行動,反對洗腦,7月29日,萬人大遊行(2012年7月29號,聯同國民教育家長關注組同教協,以民間反對國民教育科大聯盟身份主辦)
  • 響應「香港膠災」「執膠」行動(2012年8月5號開始)
  • 全民行動,十區街站,收集簽名(2012年8月5號-8月12號,主辦,國民教育家長關注組同大專行動協辦)
  • 狙擊立法會候選人(2012年8月13號-8月20號)
  • 守護孩子,自由長征,23公里長征反對洗腦國民教育(2012年8月26號-8月28號,以民間反對國民教育科大聯盟身份主辦)
  • 埋單計數,撤回課程,佔領政總(2012年8月30號-9月9號,主辦,「良心話事,守護孩子」公民教育開學禮大集會過後仍然繼續,3位成員絕食56個鐘,9月7號晚有12萬人參與)
  • 「良心話事,守護孩子」公民教育開學禮大集會(2012年9月1號,以民間反對國民教育科大聯盟身份主辦)
  • 「鐵屋吶喊,撤回課程」大集會(2012年9月3號,以民間反對國民教育科大聯盟身份主辦,大會呼籲通宵留守)
  • 埋門一腳,終極尋狼,全宇宙差你一個(2012年9月30號-10月1號,主辦,狙擊行政長官梁振英
    • 埋門一腳,終極尋狼1,月圓之夜晚會(2012年9月30號,梁振英大宅)
    • 埋門一腳,終極尋狼2,國慶請願行動(2012年10月1號,金紫荊廣場
  • 更換專頁相片,哀悼南丫島嚴重撞船海難死難者同祈求傷者、失蹤者平安(2012年10月1號至今)

親中報紙評價[編輯]

2012年8月28號,《文匯報》有文章批評學民思潮「以反國民教育借題發揮,批鬥教師」,指學民思潮「成為反對派『紅衛兵』,選舉前被利用造勢,嚴重破壞香港尊師重道的傳統美德」。[9]

[編輯]

  1. "學民思潮 立場聲明". 學民思潮. 2011年5月29號. 
  2. "學民思潮小軍師 要退一步「修行」 林朗彥:擔心行得太快". 星島日報. (原先內容喺2014-08-26歸檔). 喺27-07-2012搵到.  檢查日期值喺: |access-date= (詳情)
  3. "【聲明】九十後動員正式退出學民思潮成員". 
  4. "9萬人上街未喝停「洗腦」". 明報. 2012-07-31. (原先內容喺2013-01-07歸檔). 喺2012-08-03搵到. 
  5. "網民喺Google搜尋同是次遊行有關嘅國際新聞報道". 
  6. "家長關注組首日擺街站". 星島日報. 2012年8月11號. 
  7. "國民教育無理由用情感作基礎 黃之鋒︰這場仗不能靠五十幾歲嘅議員同大狀". 《可圈可點》. 2012年8月3號. 
  8. "梁振英到屯門落區學生喺場內抗議". 商業電台新聞資訊. 2012-07-02. 
  9. 《「學民思潮」成為反對派的「紅衛兵」》,香港《文匯報》,2012年8月28號。

睇埋[編輯]

出面網頁[編輯]