跳去內容

2012年南丫島海難

出自維基百科，自由嘅百科全書
(由南丫島撞船事故跳轉過嚟)
2012年南丫島海難
南丫四號，海難後置於牙骹灣
日期2012年10月1號
地點南丫島北面榕樹灣對開
又叫十一國慶海難
參加嘅人海泰號
南丫四號
結果卅九人死，九十二人傷
海泰號

2012年南丫島海難係香港海難，事發2012年10月1號晚，國慶煙花匯演開始大半個鐘頭之前，兩船喺南丫島北面榕樹灣對開相撞，一船爲港九小輪渡輪，重行得，另一船爲香港電燈街渡，沉咗，致卅九人死，九十二人傷。是爲香港主權移交之後，最大鑊嘅撞船意外。海難懷疑涉及雙方海員疏忽。而小輪船長離開現場，冇去救援，亦受多方責難。

事件詳細經過

[編輯]

事前

[編輯]

海泰號，英文Sea Smooth，係港九小輪雙體船，擁有權證明書冧把A10263。船二零零三年造，長廿八米、闊八米，法定載客人數三百八九人，最快行到每小時廿四浬[1]，原屬珀麗灣客運，舊名珀麗灣六號，後轉入港九小輪名下。佢行開中環碼頭到榕樹灣呢條綫。當晚八點正，中環開船，船上搭客唔到一百人[2]。

南丫四號，英文Lamma IV，香港電燈嘅客船遊艇，之前稱街渡，擁有權證明書冧把A9153，可坐二百人，載香港電燈職員同埋家屬參觀完南丫發電廠後，喺當晚約八點十八分，由榕樹灣開出，駛去維多利亞港中部欣賞「國慶煙花匯演」，當時全船一百廿四人，三人為船員，一百廿一人為搭客。船上救生設備足夠，無超速超載[3]。

相撞

[編輯]

晚上八點廿三分，南丫四號行到南丫島北角村西北對出海面，近榕樹灣，畀海泰號撞穿船尾。撞後南丫四號快速入水，一兩分鐘內傾側下沉。船艙後半隨即沉沒，插入海床，得返前半截露出水面[4]，船上一百廿四人全部墮海。

救援

[編輯]

消防處喺晚上八點廿三分收到報告，八點卌一分到場救援[5]。當局派出海事處、警務處（水警總區、特別任務連、警察機動部隊）、消防處（包括救護總區）、醫療輔助隊、香港聖約翰救傷隊同埋醫院管理局等過千人參與救援任務。至10月2號凌晨1點，有百另一人被救，八人死，超過廿人失蹤[6]，傷者分別被送到海怡半島嘅公眾碼頭同南丫島，再轉送律敦治醫院、瑪麗醫院、東區醫院同埋伊利沙伯醫院治療[7]。香港消防處潛水組、水警總區同埋特別任務連人員，通宵附近水域搜索同埋拯救失蹤者，政府飛行服務隊出動直升機，射燈照海面，以助拯救[8]。

海泰號離開現場

[編輯]

海泰號撞穿南丫四號之後，繼續開到碼頭。海事處嘅轉述，當時海泰號有入水跡象，船上乘客擔心海泰號會沉，船長按乘客要求，駛船到就近碼頭[2]。

港燈發言人、營運董事阮水師指出，遊艇開船五分鐘左右，畀港九小輪攔腰撞倒，涉及嘅小輪不顧而去[9]。

傷亡

[編輯]

十月一號夜晚十一點左右，七十二人獲救；十月二號午夜左右，一百零一人獲救，一死；凌晨一點半，八死；朝早七點，廿五死；九點，卅六死。下晝四點半之後，行政長官梁振英召開記者會，宣佈卅七人死；下晝六點，卅八死、九十二傷（計埋海泰號約十個傷者），其中兩嚴重、兩危殆[10]。屍體全經香港警務處災難遇害者辨認組確認[11]。十月五號晚九點，卅九死。

本地反應

[編輯]
香港碼頭

政府

[編輯]

緊急事故協調中心收報後運作，香港行政長官梁振英，親自去海怡半島碼頭睇救災情況，之後去咗瑪麗醫院，探望傷者。佢形容事件係一次嚴重嘅海難，通宵進行大範圍海空搜索，徹查意外原因[12]。

十月二號下晝四點卅五分，行政長官梁振英聯同政務司司長林鄭月娥加埋幾名局長，開記者會交代最新情況，重喺記者會前為死者默哀一分鐘[13]。而政府亦會喺十月四號至十月六號喺香港十八區設立弔唁處畀市民悼念死難者[14]。

十月四號定為全港哀悼日之故，當日中午全港默哀三分鐘；打後三日，政府部門下半旗致哀，係喺「2010年馬尼拉人質事件」同「2011年花園街四級大火」之後嘅全港哀悼[15]。

長江實業集團

[編輯]

香港電燈嘅母公司長江實業集團主席李嘉誠同埋副主席李澤鉅形容件事係慘劇，感到傷心，會盡力幫助受難嘅人，位位死者，其親屬得公司廿萬港元應急[16]。集團總部長江中心下半旗致哀。

傳播媒體

[編輯]

《蘋果日報》喺佢哋Facebook嘅專頁上面，標誌換成為黑蘋果，是為首間致哀報館；同日封面相換張寫咗「我們不會忘記 1/10/2012 RIP」嘅南丫四號沉沒照片，當晚更再換「悼」及「安息 振作」嘅黑底圖片，以示深切哀悼，並且聯同集團裏面嘅免費報紙《爽報》喺十月二號下晝趕製號外（號外上《蘋果日報》標誌更換成為藍蘋果，《爽報》亦換為黑底白字），係呢份報紙繼2012年「七一遊行」同埋「2012年香港立法會選舉」之後首次以號外報道。

香港各主要電視台台徽轉黑白。有線新聞台率先喺十月二號上晝，換做灰台徽，重用「十．一海難」為名，展開特別報道，係香港首間為呢一次意外致哀嘅電視台，有線電視其他頻道亦都喺下晝將台徽變灰；Now新聞台、無綫電視、香港電台同埋亞洲電視旗下頻道亦都喺下晝將台徽變灰。香港商業電台、香港數碼廣播有限公司、香港電台喺十月二號朝早開始不斷廣播悼念聲帶。

外界反應

[編輯]

中央政府

[編輯]

國家主席胡錦濤、國務院總理溫家寶、國家副主席習近平向遇難者家屬同埋受傷人員表示慰問，兼指示香港特別行政區政府全力做好善後工作[17]。

中國救援單位

[編輯]

中聯辦副主任李剛事發後到瑪麗醫院探撞船傷者，重要求廣東政府派大型打撈船去香港幫手搜救[18]。之後嘅上晝，中國交通運輸部南海救助局派咗四隻海上救助船艇同應急反應救助分隊去現場待命，但係香港政府冇用[19]。

英國政府機關

[編輯]

英國首相甘民樂致函行政長官梁振英，對撞船慘劇表示悲痛，向遇難者致以深切哀悼，同埋對生還者致以深切慰問。英國領事館跟香港政府下半旗致哀。

歐洲聯盟

[編輯]

外交事務與安全政策高級代表及副主席嘉芙蓮阿殊頓嘅發言人話感事十分悲痛同埋沉重打擊，向遇難者家庭同親友同聲哀悼，亦重申歐洲聯盟向來重視同香港友好合作[20]。

日本

[編輯]

日本駐港總領事隈丸優次感事極為哀痛，讚揚救援有效率[21]。

爭議

[編輯]

對於港九小輪海泰號係唔係應該喺事故發生後留低救人，引發咗一場媒體爭議[22]。

調查

[編輯]

事故發生後，相撞嘅港九小輪海泰號停咗喺榕樹灣碼頭，船頭左邊位置損毀穿大窿。香港警務處嘅重案組同海事處人員視察小輪[23]，警方同時設立熱線，呼籲市民提供資料[24]。

有港九小輪乘客表示，船長事發後曾經表示過要留喺現場等候救援，但由於乘客擔心小輪可能沉沒，故此要求船長駕駛返去榕樹灣碼頭[25]。

梁振英指示行政會議召開特別調查委員會進行調查[26]。

海事訓練學院經理楊沛強初步估計，南丫四號近船尾位置被猛撞，直接導致南丫四號喺兩分鐘內沉沒[27]。

參考資料

[編輯]
  1. ↑ 〈下沉港燈遊艇船齡高〉 (中文)。蘋果日報 (香港)。2012-10-02。原著喺2014-11-17歸檔。喺2012-10-02搵到。
  2. ↑ 2.0 2.1 〈太陽報(2012-10-2)：海難16死15失蹤〉 (中文)。太陽報。2012-10-02。喺2012-10-02搵到。
  3. ↑ 〈港燈：開船後5分鐘被攔腰撞 船載120人〉。香港電台。喺2012-10-02搵到。{{cite web}}: CS1 maint: url-status (link)
  4. ↑ 〈榕樹灣對開撞船涉百人 74人獲救〉。香港電台。2012-10-01。原著喺2012-10-04歸檔。喺2012-10-02搵到。
  5. ↑ 〈撞船死者增至38人〉 (中文)。香港政府。2012-10-02。原著喺2012-10-04歸檔。喺2012-10-02搵到。｢撞船事故涉及兩艘載客船隻，消防處昨晚8時23分收到報告，8時41分到場搜救。｣
  6. ↑ 〈國慶夜大海難　快速船撞沉客船 至少8死逾10失蹤〉。原著喺2013年1月5號歸檔。喺2021年8月27號搵到。
  7. ↑ 〈榕樹灣對開撞船至今101人獲救〉。香港電台。2012-10-01。原著喺2012-10-04歸檔。喺2012-10-02搵到。
  8. ↑ 〈港燈船與港九小輪相撞8死23人失蹤〉。香港電台。2012-10-02。原著喺2012-10-05歸檔。喺2012-10-02搵到。
  9. ↑ 〈港燈船與港九小輪相撞多人墮海初步8死〉。香港電台。喺2012-10-02搵到。{{cite web}}: CS1 maint: url-status (link)
  10. ↑ 〈政府新聞署最新資料〉。香港政府。喺2012-10-02搵到。
  11. ↑ 災難受害者辨認小組助識別死者
  12. ↑ 〈梁振英：搜索失蹤者工作通宵進行〉。香港電台。2012-10-02。原著喺2013-09-23歸檔。喺2012-10-02搵到。
  13. ↑ 〈特首與官員記者會前為撞船死者默哀一分鐘〉。香港電台。2012-10-02。原著喺2013-09-23歸檔。喺2012-10-02搵到。
  14. ↑ 〈政府18區設撞船弔唁處〉。雅虎香港轉自明報。2012-10-02。原著喺2012-10-05歸檔。喺2012-10-02搵到。
  15. ↑ 〈周 四 中 午 默 哀 3 分 鐘 　 政 府 機 關 下 半 旗〉 (繁體中文)。香港電台。2012年10月2日。原著喺2014年7月14日歸檔。喺2012年10月2日搵到。 {{cite news}}: Cite has empty unknown parameter: |coauthors= (help)
  16. ↑ 〈李澤鉅沉痛：每位死難者$20萬應急〉。蘋果日報。2012-10-02。原著喺2014-09-16歸檔。喺2012-10-02搵到。
  17. ↑ 胡錦濤溫家寶等關心港撞船事故
  18. ↑ 〈李剛：向廣東省要求打撈船來港協助搜救〉。香港電台。2012-10-01。原著喺2014-09-11歸檔。喺2012-10-02搵到。
  19. ↑ 〈交通运输部派4船艇参与香港撞船事故搜救〉。网易转自新华社。2012-10-02。喺2012-10-02搵到。
  20. ↑ 歐盟哀悼遇難者
  21. ↑ 〈十八區默哀 同心悼亡魂〉。原著喺2012年10月8號歸檔。喺2021年8月27號搵到。
  22. ↑ 〈港九小輪乘客怕沉船 促船長離開現場〉。蘋果日報。原著喺2014-09-16歸檔。喺2012-10-02搵到。 {{cite web}}: Cite has empty unknown parameter: |date2012-10-02= (help)
  23. ↑ 〈重案組探員及海事處人員視察肇事小輪〉。香港電台。2012-10-02。喺2012-10-02搵到。{{cite web}}: CS1 maint: url-status (link)
  24. ↑ 警察公共關係科 (2012-10-02)。〈警方呼籲市民就南丫島對開海面撞船事故提供資料〉 (中文)。香港政府、香港警務處。喺2012-10-02搵到。｢警方呼籲市民就昨晚（十月一號）喺南丫島對開海面發生嘅一宗撞船事故提供資料。任何人如目擊事件或有資料提供，請即致電警方調查熱線九一八八　二七一○與調查人員聯絡。警察公共關係科新聞公布第二百六十一號｣
  25. ↑ 〈港九小輪乘客怕沉船 促船長離開現場〉。苹果日报。原著喺2014-09-16歸檔。喺2012-10-02搵到。 {{cite web}}: Cite has empty unknown parameter: |date2012-10-02= (help)
  26. ↑ 〈林鄭月娥：將召開特別委員會徹查撞船事件〉。香港電台。原著喺2014-07-14歸檔。喺2012-10-02搵到。 {{cite web}}: Cite has empty unknown parameter: |date2012-10-02= (help)
  27. ↑ 專家估計港燈船被撞船尾 Archive.is嘅歸檔，歸檔日期2013年1月5號，，明報，2012年10月2日

出面網頁

[編輯]
各新聞網站專題
香港政府新聞公報
香港政府新聞網報道
由「https://zh-yue.wikipedia.org/w/index.php?title=2012年南丫島海難&oldid=2115841」收