瑪麗醫院
瑪麗醫院（英文：Queen Mary Hospital、粵拼：maa5 lai6 ji1 jyun6*2）係香港嘅主要公營醫院之一，同時亦係香港大學醫學院嘅教學醫院。醫院喺香港島西部嘅薄扶林，喺1937年4月13號啟用，當時係遠東地區規模最大嘅醫院。
歷史
[編輯]1925年，港督金文泰上任，為咗改善香港嘅公營醫療服務。1929年9月，喺九龍塘南部嘅公立醫院九龍醫院開始啟用，金文泰亦喺同年宣佈喺香港島起一間規模更大嘅醫院。新醫院選址薄扶林道同沙宣道對上嘅山麓，背靠太平山，面向西博寮海峽。醫院喺1933年開始起，因為資金唔夠，搞到1937年4月13號先正起好，由繼任港督郝德傑主持開幕儀式，用當時英王佐治五世嘅皇后瑪麗命名。
瑪麗醫院係當時遠東地區規模最大嘅醫院，H型嘅7層主建築物共分5個翼，啟用同年起亦成為香港大學嘅醫科生臨床實習同埋教書嘅地方。香港日治時期，醫院曾經俾日軍徵用。1945年10月1號，即係香港重光後個幾月，瑪麗醫院重開。由1955年開始，醫院擴建過幾次，其中以1960年代同埋1980年代嘅規模最大。1980年落成嘅K座高達137米（28層），係全亞洲最高嘅醫院建築物，亦係全球第二高。截至2005年，瑪麗醫院有14座建築物。
現況
[編輯]瑪麗醫院目前由香港醫院管理局管理，屬於港島西聯網，亦係聯網中嘅「龍頭醫院」同埋專科轉介中心。瑪麗醫院有大約1,440張床位，請超過三千八百個員工，提供嘅服務包括廿四小時急症、各項專科以至復康護理。
公共交通
[編輯]新巴91線，來往中環至鴨脷洲邨。
新巴970線，來往數碼港至蘇屋邨。
新巴970X線，來往香港仔至長沙灣（甘泉街）。
