金文泰

出自維基百科,自由嘅百科全書
Jump to navigation Jump to search
金文泰爵士

金文泰爵士,GCMGKStJMAFRGSMRASJP粵拼gam1 man4 taai3英文Sir Cecil Clementi1875年9月1號1947年4月5號)係英國殖民地官員,同時亦係知名中國通。早年加入香港政府,其後曾經去英屬印度英屬圭亞那錫蘭等地做官,一九二五年擔任香港總督,一九三零年擔任海峽殖民地總督。就算喺任兩地總督期間,金文泰推行過唔少爭議性嘅改革,但係佢工作效率、處事手法,同埋喺學術上嘅詣藝,外間評價甚高。

屋企[編輯]

出身[編輯]

金文泰喺一八七五年九月一號出世,當時喺印度北方邦坎普爾。佢阿爸係孟塔古•金文泰上校(Colonel Montagu Clementi,1839年1919年),喺當地任職軍法署長,阿媽係伊莎貝拉•科拉爾(Isabel Collard,1850年1930年);另外,金文泰亦係史密士爵士(Sir Cecil Clementi Smith,1840年1916年)嘅姪仔,史密士爵士係殖民地官員,曾經喺1887年1893年擔任海峽殖民地總督。雖然喺印度出世,但係金文泰去返英國讀書。金文泰早年喺倫敦聖保祿公學讀書,後來升讀牛津大學莫德林學院

喺大學嗰段時間,金文泰修讀咗古典文學梵文,而且表現非常出眾。喺一八九五年,佢攞到赫特福德獎學金,第二年喺第一次嘅古典文學考試中,攞到一級榮譽,重分別贏到愛爾蘭獎學金克雷文獎學金。喺一八九七年,金文泰攞埋博登梵文獎學金,重差啲贏埋蓋斯福德希臘散文獎。一八九八年,佢又喺人文學科入面攞到咗二級榮譽,重同時攞到文學士資格。冇幾耐,一八九九年,金文泰參與咗校監拉丁文散文比賽,不過攞唔到第一。一九零一年,金文泰又攞到文學碩士資格。另外,佢又曾經獲授半院士獎學金(demyship),呢個獎學金係莫德林學院獨有,而所有得獎者都係呢個院嘅頂尖學生。

妻兒[編輯]

金文泰嘅老婆叫佩內洛普•露絲•科博德•艾爾斯,MBE(Penelope Rose Cobbold Eyres,1889年1970年),係海軍上將C•J•艾爾斯,DSO,OBE(Admiral C. J. Eyres)個女。金文泰夫人最初因為阿爸派駐香港,而住喺香港,期間識咗金文泰。一九一二年四月十六號,兩人喺香港結婚。

金文泰夫婦嘅關係非常要好,金文泰夫人亦一直全力支持金文泰嘅工作。金文泰夫婦有一個仔兩個女,個仔克雷斯韋爾•金文泰(Cresswell Clementi,1918年1981年)曾經喺皇家空軍做空軍少將。至於克雷斯韋爾個仔大衛•金文泰爵士(Sir David Clementi,1949年2月25號—)就係英國保誠保險嘅主席。

職業[編輯]

殖民地生涯[編輯]

雖則佢學術極有成就,但係金文泰就冇留喺大學入面做學者。一八九九年攞咗學士學位之後,佢就即刻考公務員試,名列第四。金文泰喺英國本土、印度或者各個大英帝國殖民地之中,佢決定去香港。金文泰呢類咁卓越嘅學生,揀去香港做嘢,係極之罕見。當時社會普遍覺得,去殖民地部東方司做事,比起其他工作,地位低人一等。

一八九九年,香港殖民地政府聘請金文泰做官學生,無耐嚟到香港。抵港後,金文泰即刻獲安排去到中國大陸粵語,但係由於內地嗰陣爆發庚子事變,一九零零年七月,被迫返港。雖則返咗香港,金文泰仍然好快學識粵語,除咗喺同年過到考試呢關之外,重喺一九零二年擔任中文考官。憑著佢嘅語言天份,一九零六年,過埋官話試。

一九零一年,金文泰獲任為助理總登記官。一八九九年,英國接管嘅新界。當時輔政司駱克爵士,派去協助登記人口。一九零二年,佢借調到印度政府,嚟執行特別任務;而同年,佢亦獲任太平紳士。一九零三年,金文泰又調去廣西一陣,救濟飢荒。同年冇幾耐,又調返香港,去田土廳出任助理田土註冊處處長巡理府,登記土地。一九零七年,佢改任助理輔政司兼立法局執行秘書,一九零九年,佢去咗上海出席國際鴉片會議。一九一零年,當時護督梅含理爵士,任佢做私人秘書。又無耐,一九一一年到一九一二年,升任署理輔政司,並且同時兼任行政立法兩局嘅議員。

喺香港公職嗰陣,金文泰嘅才華同辦事能力,好得上司嘅賞識。港督卜力爵士形容佢係殖民地部「東方司最有才幹嘅人,作為一位思想家同學者,他日必有所成」。另一位港督盧吉爵士亦讚金文泰才華洋溢,富有同情心,而且曾經喺香港大學成立嗰陣,提名佢出任創校校長,但係到最後因某啲原因而冇成事。此外,金文泰喺香港嗰陣曾經大力支持成立香港大學。當大學喺一九一二年正式成立嗰陣,佢親身撰寫拉丁文校歌,捐贈大批重要中國典籍,重着力為大學嘅中英文化關係研究籌款。大學校方為咗多謝佢,喺一九一六年建議向金文泰頒授榮譽博士學位,但係由於當時金文泰身在他方,一等就去一九二五年,即係金文泰返港出任港督之後,大學先頒贈到榮譽學位畀佢。

金文泰履任港督嗰陣喺皇后碼頭登岸,場面十分熱鬧。

一九一三年,金文泰派咗去英屬圭亞那出任輔政司,任內三次署任總督。一九二二年,金文泰又改調錫蘭,出任輔政司,任內署任總督一次。一九二五年,香港同埋廣州出現咗大規模嘅省港大罷工,由於當時港督司徒拔爵士,態度強硬,對工人唔肯讓步,結果俾英國政府撤換。英國方面睇中金文泰通曉唐人文化,兼同中國一向友善,於是倫敦政府委任佢做第十七任香港總督,緩和省港局勢。金文泰喺一九二五年十一月一號抵港,正式上任港督,而佢亦係史上第二位本地官學生,相當於今日嘅政務主任出身嘅港督。另外金文泰揀喺皇后碼頭登岸,自此以後,港督履新,就依呢個習慣。

金文泰出任港督嘅消息,令到當時署理港督施勳爵士唔滿意,施勳爵士認為,金文泰固然有才華,但係出香港輔政司十五年,極有理由出任港督。故此,施勳講過,佢感到非常驚訝。金文泰上任後,施勳爵士亦冇留喺政府。

香港總督[編輯]

緩解工潮[編輯]

內文: 省港大罷工

一九二五年十一月一號金文泰上任嗰陣,省港大罷工高潮已過。孫文喺廣州成中華民國國民政府,一般叫佢做廣州政府。政府聯俄容共,同中華民國北洋政府打對臺。大罷工就係廣州政府策劃。孫文一九二五年三月逝世以後,由容共嘅汪兆銘主理。佢首先派輔政司廣州傾點樣解決罷工。冇耐,佢邀請國民黨要員宋子文訪港。連串訪問中,雖然金文泰同港府從無讓步,但係就對國民政府態度開放,令到兩者嘅關係逐步修補。金文泰一直認為,「要維繫香港安寧,就有必要同國民政府保持良好關係」,因為咁佢一上任就諗辦法修補關係。得到羅旭龢周壽臣爵士呢啲本地華人社會領袖支持之下,金文泰努力令政府取得輿論嘅認同。其中,佢畀政府向羅旭龢發放津貼,喺香港發行反共報紙,等香港政府同國民黨嘅右翼企喺同一陣線。

一九二六年三月廣州政變蔣介石掌權,國民黨由佢控制,解罷工嘅武裝,大罷工亦日見舒緩。因爲蔣氏唔再信任共產黨人士,大罷工就失政府支持。另一方面,佢又籌謀一統中國,計劃北伐,尋求外國支持,省港關係亦有轉機。是年十月十號,國民政府正式解除對香港嘅封鎖,並且解散罷工委員會,結束咗持續咗好耐嘅省港大罷工。一九二八年三月,金文泰又代表英國政府,到廣州訪問,期間正式承認咗國民政府政權,令到兩地外交關係修復返晒。

大罷工結束以後,金文泰大幅改善勞工同工廠法例,而且限制聘用童工。此外,佢重新規劃市區嘅貧民區,改善貧民嘅生活水平。省港大罷工一度令到香港經濟大受打擊,不過無耐恢復返轉口貿易,香港一九二七年出口船隻嘅總噸位數,直逼一九二四年罷工之前,重不斷上升。政府收入,亦屢創新高,年年收益維持喺二千萬港元以上。

妹仔問題[編輯]

內文: 妹仔

總督司徒拔爵士留低咗妹仔問題,等金文泰解決。妹仔問題,曾一度平息。但喺金文泰任內,英國人再關注妹仔問題。當時英國保守黨執政,而英國工黨在野。下議院入便,工黨議員愛倫威爾金森(Ellen Wilkinson),要求殖民地大臣里奧•艾默里,重新審視香港政府嘅妹仔政策。因此,金文泰亦要向英國建議,點解決呢個問題。

同佢前任一樣,金文泰認為妹仔係中國傳統,妹仔往往會淪為妓女嘅講法,佢亦難以荀同。因為咁,金文泰向英國提議,將妹仔改稱「養女」就算。但係建議送出冇耐,工黨一九二九年大選勝出,上台掌政,而新任殖民地大臣帕斯菲爾德勳爵(Lord Passfield)重係費邊社成員,結果金文泰嘅建議,不爲大臣所納。大臣促請金文泰,盡早廢除妹仔制度。喺呢種情況下,金文泰唯有立例,規範妹仔嘅工作性質。另外,又唔情願咁叫全港4,000名妹仔登記。不過,雖然咁,廢除妹仔都係冇乜進展,金文泰呢任內都未成事。

社會發展[編輯]

金文泰積極發展公共建設。醫療衛生方面,就好似之前咁講,佢除咗落力重建貧民區,改善衛生情況之外,重起咗九龍醫院。另外又計劃瑪麗醫院,設喺薄扶林,以大醫院去應付需求日增嘅醫療服務。此外,金文泰又喺一九二九年成立醫務衛生署,着手消除區入面嘅風土傳染病,連舊日橫行香港嘅鼠疫,都喺佢任內絕跡,而瘧疾呢類常見熱帶傳染病,亦控制得到。

至於喺食水方面,雖然金文泰任內着手擴建城門水塘,但係香港喺一九二九年大旱。當年四月開始,金文泰實施七級制水,日日只供水兩個鐘。天旱嘅情況,一直到九月先好返少少。嗰陣,港府成立食水供應委員會,諗辦法節制用水,重由內地調食水嚟解決水荒。但係嗰陣時仍然咁缺食水,結果搞到成廿萬名居民,走返中國避旱。事後,金文泰建議用海底水管輸水。一九三零年,全港首條海底水管落成,食水供應緊張,等以解決。

交通方面,金文泰好重視航空交通,認爲有得發展。一九二八年,政府接辦九龍機場,原地係何啟爵士區德個持有嘅啟德濱,因而名爲啟德機場。同時,駐紮喺啟德機場嘅皇家空軍,年年亦得到定額津貼,只要到空軍所屬嘅飛行會,就有得拎。另外,海港局長,亦兼任民航處長,航空交通,亦有政府管理。

金文泰任內最為人津津樂道嘅事,就係中意唐文唐字,亦愛唐人文化,因而極力推動香港唐文教育。一九二七年,香港大學設中文系,重用大清遺老賴際熙區大典等嘅翰林教授經典。但係,由於嗰陣時新文化運動乃係中國大陸嘅主流思想,結果港大設立中文系,畀魯迅一類反對傳統文化嘅學者抨擊。此外,一九二六年三月一號,金文泰成立唐文爲主嘅官立學校,卽係官立漢文中學,搵咗漢文視學官兼任校長。一九二八年,金文泰頒布《中小學漢文課程標準》,規定香港嘅漢文學校,同國民政府採用相同,都係六三三學制,等漢文學校學生,都夾到中國學校嘅課程。

新界事務[編輯]

金文泰早年長期喺新界做嘢,所以同新界居民嘅關係,好過好多總督。喺佢上任一個月之後,金文泰就即刻訪問新界,當地居民熱烈歡迎。一九二六年,金文泰廢除新界地區唔合理嘅補地價政策,喺同年九月一號,新界鄉紳罕有咁為港督祝壽。佢哋除咗喺大埔舉行盛大壽宴外,鄉議局又特登呈上《金文泰制軍五一賀壽序文》,以作紀念。

另一方面,金文泰任內亦致力將新界改成永久割讓畀英國。一九二六年一月,即係省港大罷工期間,佢向殖民地部話要保住新界。其後一九二七年,金文泰趁國民政府北伐嗰陣,希望將新界轉爲永租地,但係嗰陣時嘅英國駐華大使藍浦生爵士,擔心咁做會激起中國反殖民主義情緒,因而拒絕。到咗一九三零年,英國交還威海衛租借地,金文泰亦即刻向倫敦建議,英方應借機會延長新界,但係建議始終不爲所納。新界租約始終冇法任內延長,金文泰好失望。

政治革新[編輯]

政治改革上,金文泰革新兩局。一九二六年,佢委任立法局非官守議員周壽臣爵士,去兼任行政局非官守議員,以補遮打爵士逝世後留低嘅席位。周壽臣爵士,係香港史上,首位華人行政局議員,但係實際上,建議周壽臣爵士入行政局,英延極力反對。嗰時嘅外務大臣奧斯汀•張伯倫爵士同殖民地大臣里奧•艾默里都認為,如果周壽臣爵士入局,有可能會洩漏機密,但係金文泰就反駁,歐籍議員都可能泄密,而行政局甚少講到機密。最尾,英廷批准建議,但係喺周壽臣爵士入局嗰陣,英廷又同時規定,行政局議員以後都唔可以掂到機密文件。

立法局方面,金文泰任內亦逐步增加唔同代表。一九二七年,金文泰委任布力架做立法局非官守議員,葡籍人士第首次喺立法局有代表議席。一九二九年,金文泰委任華人曹善允為立法局非官守議員,令九龍有首個代表。綜合嚟講,一九二九年嗰陣,立法局嘅官守議員人數加咗兩名,而非官守議員,由六名加到八名,當中三名係華人,分別係周壽臣、羅旭龢同曹善允。雖然人數有所增加,但係總督仍然有定奪之權。

一九二九年,嗰時嘅海峽殖民地總督克里福爵士突然因病提早退休,金文泰就臨時喺同年十一月廿號,獲任接替克里福爵士。金文泰跟住喺一九三零年二月一號,唔情願咁離開香港,結束佢短暫,但係評價唔錯嘅任期。

海峽殖民地總督[編輯]

已經停用多時嘅加冷機場。

喺做三洲府總督嗰陣,金文泰做咗唔少有遠見嘅改革。有鑑於馬來亞政府嘅權力過份集中,加上海峽殖民地總督又身兼馬來亞高級專員,咁令到金文泰覺得工作非常繁重。因為咁,金文泰盡可能咁下放唔少屬於中央嘅權力畀地方,以助地方施政靈活。另一方面,金文泰又積極咁畀本土人士擔任殖民地政府嘅行政工作,同時又好推廣馬來西亞文化同馬來語,重將呢樣嘢編入當地嘅教育課程入面。但係,金文泰嘅革新就得唔到當地嘅本土人同華人嘅支持,結果促使佢要對改革做出妥協。由於阻力太大,上述嘅改革始終冇法喺任內順利完成。

至於公共建設方面,金文泰任內曾經提出要喺新加坡起一座「世界最大、最好、同最重要嘅機場」,嚟取代唔夠使嘅實里達機場。金文泰嘅建議,促使興建加冷機場,最終喺一九三七年啟用,即係金文泰卸任之後。呢座機場,譽為「大英帝國最好嘅機場」,喺一九五五年巴耶利峇機場落成之前,一直係區入面最重要嘅機場。此外,金文泰又喺一九三三年主持咗新加坡嘅 克里福碼頭(Clifford Pier)開幕儀式,但係由於新碼頭棄用舊名「莊士敦碼頭」,結果開幕禮遭到部份商人杯葛。

晚年[編輯]

喺新加坡公職期間,金文泰患上糖尿病,結果促使佢喺一九三四年十月十八號英國休假嗰陣,宣佈提早退休。退休後嘅金文泰定居喺英國,時間主要花喺寫作同學術研究上面。另外一九四零年到一九四一年間,佢出任綢布商人同業公會主席(Master of Mercers' Company)。晚年嘅金文泰住喺白金漢郡海威科姆(High Wycombe)附近嘅霍爾默閣(Holmer Court)。一九四七年四月五號,佢心臟衰竭喺嗰度死,終年七十一歲,遺體火化之後,安葬喺白金漢郡嘅潘街教堂(Penn Street Church)。

一九四七年九月九號估值,有遺產三千九百八十三英鎊十九仙令兩便士。

學術成就[編輯]

金文泰曾經獲港大頒授榮譽博士學位。

金文泰係皇家亞洲學會會員,鍾愛唐人文化,除咗熟習廣東話官話之外,又通曉唐文詩詞,而且曾經翻譯《粵謳》(Cantonese Love Songs)等書。此外,金文泰好叻書法,家陣香港青山禪院入面,有個「香海名山」牌坊,就係金文泰兩次訪問青山禪院之後題嘅。另外,金文泰又鍾愛歷史,寫過《華人在英屬圭亞那》同埋《英屬圭亞那憲制歷史》等書,呢啲書到而家都好學術價值。金文泰係少有嘅學者總督,佢嘅學術詣藝備受景仰,當中,知名詩人泰戈爾喺訪問香港嗰陣,甚至讚金文泰係「我喺東方遇過最有修養嘅歐洲人」。

除咗文藝,金文泰夫婦鍾意四圍遊。佢哋去過晒中國咁多個省,又深入過印度等地,重寫咗多本旅遊著作。為咗表彰佢嘅貢獻,皇家地理學會曾經喺一九一二年頒贈卡思伯特皮克獎(Cuthbert Peek Award),作為紀念。至於喺香港,金文泰夫婦亦遊歷各處郊野,而家新界唔少山徑,最先都係由佢哋開辟返嚟。

部份著作[編輯]

  • 金文泰爵士著作:
    • Cantonese Love Songs
    • Notes on a journey recently undertaken through the interior of China,一九零二年
    • Pervigilium Veneris,一九一一年
    • Summary of Geographical Observations taken during a journey from Kashgar to Kowloon (1907-8),Hongkong:Noronha,一九一一年
    • Bibliographical and Other Studies on the Pervigilium Veneris,Oxford: B. H. Blackwell or London: Humphrey Milford,一九一三年
    • The Chinese in British Guiana,Georgetown:Argosy,一九一五年
    • Elements in Analysis of Thought,B. Blackwell,一九三三年
    • A Constitutional History of British Guiana,London:Macmillan,一九三七年
  • 金夫人著作:
    • Through British Guiana To The Summit Of Roraima,T. Fischer Unwin,一九二零年

榮譽[編輯]

殊榮[編輯]

榮譽學位[編輯]

以佢命名嘅事物[編輯]

新加坡地鐵沿線有一個金文泰站

參考[編輯]

睇埋[編輯]

連出去[編輯]

官銜
上一任
譚臣
署理香港輔政司
1911年
下一任
巴恩斯
上一任
蒲魯賢
署理香港輔政司
1911年–1912年
下一任
施勳
上一任
曼寧爵士
署理錫蘭總督
1925年
下一任
愛德華•亞歷山大(署理)
上一任
施勳爵士(署理)
第17任香港總督
1925年–1930年
下一任
修頓爵士(署理)
上一任
克里福爵士
海峽殖民地總督
1930年–1934年
下一任
珊頓爵士