賴際熙

賴際熙

賴際熙（1865年—1937年），原名韶祥，字煥文，早號荔垞，晚號圓智，廣東增城湖塘埔（依家嘅增城光輝村）人，晚清進士、學者，香港大學教授。因為佢曾經係清朝國史館嘅總纂，所以又俾人尊稱做賴太史。

生平

賴際熙細個嘅時候已經好鍾意讀書，喺廣州廣雅書院（依家嘅廣東廣雅中學）返學。光緒十五年（1889年）佢喺鄉試嗰度中咗舉人。光緒二十九年（1903年）38歲嘅賴際熙喺科舉試嗰度攞到「二甲」進士。同年嘅閏五月，朝廷俾咗個翰林院庶吉士嘅位佢做，派咗佢去進士館（進士館係京師大學堂嘅下屬機構）研習法政學。賴際熙完成咗三年嘅學習之後，俾人派咗去翰林院做編修，主要工作係做國史館嘅纂修，無幾耐佢就升咗做為總纂（近似依家嘅總編輯）。

辛亥革命成功之後，清朝無咗，佢又唔想改打新政府嘅工，於是同陳伯陶、吳道鎔等原籍係廣東嘅清朝遺老移民嚟英屬香港，喺香港專心從事文化教育同埋國學研究。

1912年，香港大學成立，最初只有醫學院同工學院；喺1913年增設咗文學院（Faculty of Arts），文學院有開辦中文課程，不過只係一年級嘅選修科。當時，賴際熙同區大典一齊喺香港大學做兼職，以時薪嘅形式，做咗香港大學嘅漢文講師，佢兩個分別負責講授四年制「傳統漢文（Classical Chinese）」課程嘅「史學（History）」同「文學（Literature）」科目。賴際熙負責「史學」，講授三代（夏、商、周）到明朝嘅歷史。當時嘅「文學」科，實際上係「經學」科，講授朱熹同埋其他學者對《四書》同《五經》嘅評註。賴際熙又另外教「正音班」（Mandarin Class）俾啲唔識粵語嘅學生讀。

1921年9月29日，賴際熙創辦咗香港崇正總會，係香港歷史悠久嘅客家人組織，佢俾人推舉做會長，長達13年。

1923年，佢同陳伯陶等同道中人成立咗「學海書樓」聚書講學，目的係要宏揚中國文化。香港富商何東、郭春秧、利希慎、李海東都好支持佢哋嘅做法，好踴躍捐錢俾佢哋去買書。當時嘅香港仲未有政府嘅公共圖書館，學海書樓嘅藏書達到幾十萬本，可以俾香港市民借閱，可以話係香港嘅第一間公共圖書館。

1925年，漢學家金文泰（Sir Cecil Clementi）接替司徒拔，做咗港督，開始推動中文教育。1926年，從英國嚟考察香港大學教育表現嘅威靈頓代表團（Willingdon Delegation）喺考察報告嗰度話香港大學嘅漢文教育除咗需要保留傳統嘅「經史之學」之外，仲需要賦予呢啲教育新嘅現代意義。賴際熙同區大典於是向港大提議改革中文科，設立「華文部」，喺原本已經有嘅史學同經學嘅基礎上面增辦「文詞學」。身兼港大校監嘅金文泰支持佢哋嘅建議，但係港大缺乏經費，於是港大校長康寧（William W. Hornell）聯同賴際熙就去咗馬來亞籌款，得到當地華僑捐獻，總共集資港幣4萬幾蚊。1927年，香港大學成立咗「中文學院（School of Chinese Studies）」，由賴際熙領導。賴際熙俾香港大學委任做全職嘅中國歷史準教授（Reader in Chinese History）。

1928年，港大校方因為財政困難，準備結束啱啱先起步發展嘅中文學院。喺港督金文泰周旋之下，華人領袖周壽臣、羅旭龢同馮平山等人成立咗勸捐委員會，總共籌到港幣20萬蚊，令到中文教學可以繼續做落去。當時中文學院無專用嘅課室，亦都無具規模嘅中文圖書館，所以鄧志昂就捐咗6萬幾蚊嚟起教學大樓（即係港大嘅鄧志昂樓），馮平山又捐咗10萬蚊起咗中文圖書館大樓（即係港大嘅馮平山圖書館，依家改咗做香港大學美術博物館，係一級歷史建築），兩座大樓分別喺1931年同1932年啟用。

1933年，香港大學文學院改組，將「中文學院（School of Chinese Studies）」納入文學院，成為文學院嘅其中一個系，叫做「中文系（Department of Chinese）」。改組之後，賴際熙結束咗佢喺香港大學嘅二十年教學歲月。

1937年，賴際熙逝世，享年73歲。

逸事

賴際熙曾經登上宋王臺，仲寫咗兩首賦《登宋王臺作》：

其一

九州何更有埏垓，小絕朝廷此地開。

六璽螭龍潛海曲，百官牆壁倚山隈。

難憑天塹限胡越，為訪遺碑剔草萊。

宋道景炎明紹武，皇輿先後總南來。

其二

登臨遠在水之湄，豈獨興亡異代悲。

大地已隨滄海盡，怒濤猶挾故宮移。

殘山今屬周原外，塊肉曾無趙氏遺。

我亦當年謝皋羽，西臺慟哭只編詩。

詩中賴氏以終老海濱嘅南宋遺民謝皋羽自許，「豈獨、已隨、猶挾、今屬、曾無、我亦、只」等虛辭，襯托出賴氏嘅慷慨悲憤，亦都凸顯咗佢對前朝嘅眷戀。

著作

民國四年（1915年）佢曾經編咗《廣東通志》，之後又同陳念典、湛桂芬總纂咗《增城縣志》，另外，仲編寫咗《清史貴族傳》、《崇正同人系譜》、《赤溪縣志》 》、《香港大學經學講義》等書。後人搜集咗佢嘅著作，編成《荔垞文存》。