石房有

出自維基百科,自由嘅百科全書
跳去導覽 跳去搵嘢

石房有英文Man, Shek Fong Yau1975年6月24號—),俗稱「大波Man(粵拼daai6 bo1 men1)」[1],祖籍廣東省海豐市,香港激進建制派人士,香港親共團體忠義民團」成員,曾經做過香港警察[2]。由於佢不時同香港民主派人士針鋒相對,所以佢得到一啲傳媒嘅關注,另外佢亦有「大波Man」、「碌梯Man」、「Running Man」、「墮波Man」、「大肚Man」等稱號[3]

事件同爭議[編輯]

環繞石房有嘅事件,好多都係同佢高調支持政府或香港警察,或者干擾民主派活動有關。不過,石房有所發起嘅行動,除咗有時會引用假新聞,被民主派人士取笑之外,都唔係一面倒受到政府或警察嘅支持。例如喺2021年,政府以國安法控告47位民主派和平初選參選人同主辦者「串謀顛覆國家罪」,3月1日喺西九龍裁判法院嘅開審時候,佢亦有踩場,但就有傳媒報道一啲警察私下埋怨,佢嚟到反而搞到要警察護送佢,覺得佢唔嚟好過[4]

2019年12月號召「愛中國護港大集會」演變成記者被襲擊[編輯]

2019年香港區議會選舉,親中派因為支持逃犯條例修訂遭遇大敗,石房有喺12月7號號召親中派支持者,喺灣仔港灣道花園舉行「愛中國護港大集會」,得到香港政研會鄧德成,華記茶餐廳東主楊官華等激進親中共派人士出席支持。佢哋聲稱選舉不公,要求重新點票,又話區議員參選人嘅學歷同門檻太低,要港府重新檢討法令。期間有浸會大學學生會編輯委員會,無綫新聞香港01同埋大公報嘅記者,被集會人士襲擊及包圍。[5]

支持富臨集團拖欠薪金[編輯]

喺武漢肺炎疫情期間,唔少公司面對經營困難,但有啲食肆就被指借肺炎來剝削員工。其中富臨集團喺2020年5月被指控以無薪假之名,迫使工友無限期停薪留職。協助工友嘅飲食及酒店業職工總會及民主派民協區議員楊彧何啟明,喺5月10號連同幾名工友前往富臨皇宮美孚分店抗議,石房有當時在場叫囂,在場人士問石係咪老闆欠薪就係正確,石房有即刻答「係」,最後石房有得到警察好似佢嘅私人保鑣咁護送佢離開 [6][7][8]

到英國駐港總領事館請願 當場撕毁已被剪角BNO[編輯]

2020年6月初,因應香港局勢惡化,英國外相藍韜文公開表示有意放寬英國國民(海外)護照(BNO)持有人嘅居留期限後,石房有聯同公民力量發言人林宇星,激進建制派高松傑等人,去到英國駐港總領事館前撕毁BNO同埋宣讀「我是中國人」聲明,又話自己俾英國殖民地政府蝦過,修改BNO居留期限係「政治干預」,表明唔會續領。[9]不過唔少媒體都拍攝到,佢哋手持嘅BNO早已過期,並已被剪角,唔可以攞嚟用。[10]

騷擾參加民主派初選人士的拉票街站[編輯]

2020年7月11號傍晚6時,喺民主派初選當日,前香港眾志秘書長黃之鋒喺太古康怡廣場外為袁嘉蔚拉票嘅時候,石房有忽然現身騷擾佢哋嘅拉票活動,用電話拍攝佢哋,又指罵黃之鋒係「漢奸走狗」,又引述之前已被多方證明不實嘅假新聞[11],屈對方拎咗2,000萬買樓。擾攘約10分鐘後,在場好多人指罵石房有,結果石房有自行離開現場[12]

參考[編輯]

  1. 作者:謝美 04-24-2015. "若為稚子楷模,請石房有以身作則". www.passiontimes.hk. 喺2021-03-02搵到.
  2. "阿Man做節目嘉賓". Facebook. 忠義民團. 喺2015-06-23搵到.
  3. 編輯部, Tmhk (2015-06-04). "「大波man」現身天后 「民團」「熱血」互相叫囂". TMHK - Truth Media (Hong Kong) (中文). 喺2021-03-02搵到.
  4. "Log into Facebook". Facebook (英文). 喺2021-03-02搵到.
  5. "敵我不分!港親共團體輸不起包圍紅媒 女記者狂叫:我TVB啦". 蘋果新聞網 (中文). 喺2020-01-19搵到.
  6. "工友抗議剝削 富臨報警拘兩人". 原先內容歸檔喺2020-07-08. 喺2020-05-10搵到.
  7. "工會質疑富臨申請保就業資助但要求員工放無薪假". 原先內容歸檔喺2020-05-26. 喺2020-05-10搵到.
  8. 曾凱欣. "富臨以無薪假避遣散費 工友到場請願 警方到場拘捕兩人". 原先內容歸檔喺2020-07-11. 喺2020-05-10搵到.
  9. "建制團體到英國駐港總領事館請願 當場撕毁BNO批英干預中國內政". 明報. 2020-06-06. 原先內容歸檔喺2020-06-30. 喺2020-06-06搵到.
  10. 陳晶琦 (2020-06-06). "港版國安法|建制組織撕已剪角BNO 聲言不續領 斥英國延居留期". 香港01. 原先內容歸檔喺2020-06-07. 喺2020-06-06搵到.
  11. 頭條日報. 黃之鋒-假新聞 "【Kelly Online】傳二千萬購貝沙灣 黃之鋒:假新聞". 頭條日報 Headline Daily (中文). 喺2021-03-02搵到.
  12. 頭條日報. "【立會選舉】譚文豪初選街站義工遇襲 黃之鋒與「大波man」口角". 頭條日報 Headline Daily (中文). 喺2021-03-02搵到.