公民力量

公民力量，簡稱公力，係香港一個政黨，喺1993年12月成立，由八個時任沙田區議員發起，因此號稱「沙田執政黨」。但係到2019年區議會選舉，公民力量輸到一席都冇，俾外界形容係「滅黨」。

歷史

1993年12月，8個沙田區議員成立咗公民力量，當中大粒啲嘅劉江華同蔡根培都係喺港同盟走出嚟。

第二年嘅區議會選舉，公民力量派10個人出嚟選（包括劉江華、蔡根培、韋國洪、湯寶珍、何厚祥、陳國添、林康華、李錦明、黃澤標、梁志堅），全部贏晒，就係咁就奠定咗「沙田執政黨」嘅地位。

1998年，劉江華加入民建聯，公民力量因為幫劉江華拉票嘅關係，當時開始被視為民建聯嘅抬轎組織。

1999年之後，開始有西貢區議員（區能發、羅祥國、溫悅昌）加入，公民力量嘅勢力亦擴張到西貢區。

跟住嘅一段時期，公民力量喺西貢同沙田區穩定發展，直到2012年，因為劉江華轉戰超級區議會，公民力量開始擺脫同民建聯抬轎嘅傳統，喺新界東都派一條名單出嚟，由入黨冇耐嘅龐愛蘭帶頭，最後都係輸咗。最弊嘅係，劉江華喺超級區議會都輸咗，公民力量喺立法會冇嗮議席，不過好快，劉江華畀政府招攬，做咗政制及內地事務局副局長就開始淡出公民力量，同時潘國山亦做番區議員。

到2013年，做過沙田委任區議員嘅林大輝加入公民力量，外界都認為係林大輝係想喺下屆選舉由功能組別轉戰地方選區，但係冇幾耐，公民力量同新民黨喺2014年「結盟」，一般認為新民黨食咗公民力量，又認為劉江華今次係「賣仔」。新民黨有意喺2016年嘅立法會新界東選區出選，林大輝同龐愛蘭亦都知道自己冇行，並冇跟大隊加入新民黨，而且分別喺2015年同2016年退出公民力量。

到2015年區議會選舉，公民力量成功走出新界東，鄭捷彬（曾經做過陳國添議員助理）喺荃灣區贏咗，不過喺地頭沙田就輸返7個，導致沙田區嘅親中派同民主派打成平手，公民力量黨勢亦開始滑落，當時有分析話，公民力量同新民黨嘅結盟可能係導致慘敗嘅原因。

2016年，新民黨同公民力量派出當時寂寂無名嘅容海恩（青專網主席），公民力量其他成員繼續負責抬轎，雖則容海恩選舉嗰陣表現唔好，但係公民力量憑住地區樁腳嘅實力，始終成功保送容海恩入立法會。

到咗2017年，時任公民力量榮譽主席田北辰退出新民黨，重帶走一啲區議員，當中包括公民力量唯一嘅新界西區議員鄭捷彬（阿捷），鄭氏決定「雙退」（退出新民黨同公民力量），同田二少一齊加盟實政圓桌，結果公民力量勢力退返去沙田同西貢區。

2018到2019年，新民黨掀起咗一波退黨潮，公民力量入面，黃宇翰同林松茵都退出新民黨，但係留住會籍，而譚領律就「雙退」。

2019年區議會選舉，公民力量有19人參選，16人同時掛埋新民黨牌頭（除咗黃宇翰、林松茵、魏志偉之外）。由於葉劉淑儀成日出嚟推銷逃犯條例修訂草案，而且態度強硬，引起市民反感，加上公民力量嘅立足地（西貢、沙田）係泛民主派票倉，尤其沙田係香港修例風波之下，警民衝突特別多嘅地方，親中派喺度出選零舍艱難。最後公民力量連同新民黨，雙雙全軍覆沒，外界形容係「滅黨」。

出面網頁

• 公民力量