劉千石

劉千石
出生日	1944年9月12號  （80歲）
出生地	廣州
國籍	香港
信奉	基督教
職業	政治人、太平紳士、trade unionist
政黨	香港民主同盟、民主黨、香港職工會聯盟、The Frontier
[改維基數據]

劉千石，JP（LAU Chin-shek，1944年9月12號—），人稱阿石，香港立法會前議員，香港職工會聯盟（職工盟）前任會長，曾經係立法會泛民主派嘅一員。

生平

劉千石祖籍廣東順德，廣東廣州出世。響1960年由廣州偷渡到香港。1972年，佢加入咗基督教工業委員會，開始同工會運動結緣。

1980年代

1980年代初，佢開始喺工會運動中冒起，成為香港獨立工運嘅領袖，當時有「香港華里沙」之稱。1985年，基本法準備起草，原本好有機會被委任入基本法起草委員會嘅劉千石，最後被剔出委員會名單，失去響建制內參與起草基本法嘅機會。呢件事響當時引起社會好大反響，就係好出名嘅「飛石事件」。同時，劉千石亦因為呢件事，令佢喺香港政壇聲名更響；而佢反對建制，為工人謀福利嘅形象就更加深入民心。

1989年，中國大陸發生「六四事件」，佢加入支聯會，支持北京學生民主運動，自此受到中華人民共和國政府進一步打壓，畀大陸沒收回鄉證，多年來冇得返大陸。

1990年代

1990年4月，香港民主黨前身「香港民主同盟」成立，劉千石成為創黨黨員之一。1990年7月，香港職工會聯盟成立，劉千石當選主席。1991年起，佢一直獲選為立法局（1991年至1997年）同立法會（1998年至2008年）議員。

1994年12月，劉千石就《僱傭條例草案》嘅修正案二讀時提出修訂，重成功獲得立法局通過，但港英政府官員梁文健喺草案三讀前收回草案，令劉千石嘅修訂無功而回。佢批評政府「輸打贏要」，憤而辭去立法局議員職務，成為第一個亦係唯一一個因抗議政府而辭職嘅立法局議員。

2000年代

2000年5月，冇回鄉證嘅劉千石得到當時香港行政長官董建華嘅協助，六四事件後第一次獲發回鄉證返廣州探望當時病重嘅母親，其後更可以多次返中國大陸。2000年6月，佢因同時持有民主黨同前綫嘅雙重黨籍，畀民主黨革除黨籍。

2004年6月，劉千石突然提出泛民主派應該同中華人民共和國中央政府「大和解」，「加強彼此互信和溝通」，但畀泛民主派同僚指摘咁做係討好中央，以換取更多機會返廣州探望母親。

之後，佢表現十分低調，甚少出席泛民主派嘅遊行活動，而佢響立法會嘅投票意向亦偶然同其他民主派議員唔同。2005年6月，劉千石、鄭經翰同陳偉業提名支持曾蔭權接任香港行政長官，而冇提名支持由大部份泛民主派推舉嘅李永達。2005年12月21號，劉千石響立法會政改方案投棄權票，係唯一投棄權票嘅議員，亦係25位泛民主派議員中唯一冇投反對票。佢發言時話：「無論呢次政改方案係獲得通過抑或被否決，都有一半人會失望。」最後，政改方案得到34票贊成，24票反對，1票棄權，得唔到三分二議員支持而被否決。

2008年，佢响第4屆香港立法會選舉嘅九龍西選區尋求冧莊，佢唔單止拒絕出席所有公開論壇同埋活動，最後輸畀梁美芬。選後，佢响香港電台一個節目入面，證實自己確診直腸癌，但係病情仍然受到控制，之後逐步淡出香港政壇。

個人榮譽

• 太平紳士（1997年）

出面網頁

• 劉千石喺Freebase嘅資料
• 〈香港特別行政區立法會 - 議員資料庫〉 (繁體中文)。香港特別行政區立法會。