全國人民代表大會關於完善香港特別行政區選舉制度的決定

出自維基百科,自由嘅百科全書
全國人民代表大會關於完善香港特別行政區選舉制度的決定
法案起草機關全國人民代表大會常務委員會法制工作委員會
提請審議機關全國人民代表大會常務委員會
施行日期2021年3月11號
法律類別全國人民代表大會決定
立法歷程
現狀:施行中

全國人民代表大會關於完善香港特別行政區選舉制度的決定》,通稱311決定,係2021年3月11號中國第十三屆全國人民代表大會第四次會議入面通過嘅議案,內容係修改香港嘅選舉制度,包括立法會選舉委員會嘅組成辦法。

呢個議案授權全國人民代表大會常務委員會修改《香港基本法》嘅附件一同附件二[3]。議案聲稱要全面落實「愛國者治港」原則[4],但未徵詢過香港市民嘅意見,而且大幅度修改咗立法會同選舉委員會嘅人數同組成方法[5]。呢個方案被視為香港民主大倒退,而且扼殺泛民主派參與選舉嘅權利。有啲親泛民傳媒用『閹割選舉』來形容呢次嘅決議案[6][7],除咗香港民主派同香港嘅學者之外,台灣、美國、澳洲、英國同歐盟都有發聲批評北京扼殺香港民主自由嘅做法。

背景[編輯]

2019年香港爆發香港修例風波,同年泛民主派區議會選舉贏得大多數議席。中國大陸當局擔心泛民主派嘅政治影響力越嚟越大,有機會攞到立法會過半數議席,甚至可以左右到行政長官選舉嘅形勢,所以就諗住修改香港嘅選舉制度,保障親中陣營佔絕對嘅大多數。

2021年1月27號,中共中央總書記習近平喺聽緊香港行政長官林鄭月娥工作匯報嗰陣,重申「愛國者治港」係一國兩制嘅根本原則[8]

流傳決定內容[編輯]

根據香港傳媒報道,改動內容涉及立法會選舉委員會嘅組成辦法[9]

立法會[編輯]

  • 立法會議席由70席加到90席。
  • 地區直選由35席減到20席(佔22.2%),全香港改劃成10個選區,每區2席,用「雙議席單票制」選出。
  • 功能界別由35席減到30席(佔33.3%),差異係取消區議會(第二)功能界別(俗稱「超級區議會」)嗰5席。
  • 恢復選舉委員會議席共40席(佔44.4%),由選舉委員會委員互選產生。

選舉委員會[編輯]

  • 選舉委員會委員由1200席加到1500席。
  • 選舉委員會界別由4個加到5個。
  • 取消選舉委員會入面「港九區議會」同「新界區議會」合共117席。
  • 行政長官提名門檻由150人加到188人,同埋要攞到每個界別至少15個選委提名。

獲通過嘅決定內容[編輯]

同流傳內容比較,獲通過嘅內容只係提到大原則,其他具爭議性嘅細節(例如立法會議席各界別嘅具體比例,點名廢除區議會相關嘅立會同選委議席等)就無提起。

獲通過嘅決定內容主要包括:

  • 立法會議席加到90席,由選舉委員會選舉、功能團體選舉同分區直接選舉產生。
  • 選舉委員會委員加到1500席,界別加到5個(「各議會組織代表界」改組成「立法會議員、地區組織代表等界」同埋「港區全國人大代表、港區全國政協委員和有關全國性團體香港成員代表界」)。
  • 行政長官提名門檻由150人加到188人,同埋要攞到每個界別至少15個選委提名。

去到3月30號,北京全票通過修訂《基本法》附件一、附件二。立法會方面,將原有直選同變相直選嘅40席大幅削減去到20席(由57.14%減少至22.22%),好多功能組別都取消個人票,增加40席「選舉委員會」界別議席[10]。另外,特首選舉委員會入面亦取消區議員界別117 席,加入咗好多親中團體、政協委員名額、各種全部由民政事務處委任產生嘅委員會,以及全國性組織代表。就算係立法會地區直選,候選人亦要攞到選委會提名,通過資格審查委員會、警方國安處、國家安全委員會同選舉主任嘅多種政治審查[11][12][13],而且佢哋亦單方面決定,唔容許任何人作出司法覆核或任何形式嘅上訴[14]

官方反應[編輯]

香港政府[編輯]

特首林鄭月娥喺草案通過之後,發稿話港府堅定支持草案,並由衷感謝全國人大[15]。香港政府之後為人大嘅決定搞本地立法,同年5月27號由立法會通過《完善選舉制度條例草案》。

外間反應[編輯]

香港民主派同學者普遍批評呢個議案,話呢個議案犧牲民意,打壓泛民主派,走民主回頭路,唔符合程序公義,而且出現嚴重利益衝突。國際社會亦對北京單方面決定作出嚴厲批評,英國三大黨有啲議員除咗批評北京之外,亦批評執政嘅保守黨對香港人支持不足。

香港學者[編輯]

  • 喺方案表決之前,香港中文大學政治與行政學系高級講師蔡子強接受訪問嘅時候形容,喺呢個決議案下,全國人大連香港立法會嘅參選權都要集中喺自己手中,民主派「入閘」嘅機會極低,最極端情況係香港再無在野黨,議會無晒應有嘅制衡能力[16]
    • 喺3月30號,蔡子強進一步批評指,滅罪及防火委員會選委所佔比例仲多過專業界別,只係增加中共眼中嘅安全系數,犧牲民意,係滑稽嘅做法[17]
  • 香港中文大學客座教授、中國問題專家林和立話呢個方案將會有效消滅所有剩餘反對派[18]
  • 香港中文大學政治與行政學系副教授馬嶽指選委會成為「太上皇式」架構,權力非常大、成為正式嘅審查委員會,必定係民主倒退。而選委會嘅結構更無代表性,只係親中人士分餅仔,變得更小圈子[19]
  • 香港大學法律學院公法講座教授陳文敏認為,參選門檻愈收愈緊下,選舉變得無意義,只會令公眾對選舉更冷漠,循序漸進實現普選嘅希望已經冇可能實現[19]
  • 香港大學政治與公共行政學系教授陳祖為喺3月30號批評有關決定「四大荒謬」,撕破高度自治嘅承諾。佢提到方案有4個荒謬之處:(一)選舉委員會嘅區議會議席,被政府委任嘅分區委員會、地區撲滅罪行委員會、地區防火委員會取代;(二)國家安全委員會參與審核特首候選人嘅資格,委員會由特首主持,即係現任特首審核佢嘅挑戰者或承繼者嘅資格,有明顯角色衝突;(三)候選人資格審查委員會作出嘅決定唔可以被提起訴訟,明顯違背程序公義;(四)基本法草擬嘅大規模民意諮詢,變成無限大嘅主權單方面改變香港政治規則,撕破高度自治嘅承諾[20][17]

香港民主派同埋民間聲音[編輯]

  • 民主黨主席羅健熙批評全國人大嘅建議係走回頭路,甚至比香港主權移交初期嘅情況更差。一旦喺立法會加入較大比例來自選舉委員會嘅議席,會令直選議席比率減少,立法會嘅代表性會更為降低,民主派嘅參政空間將會更加狹窄[21]。佢以「惡啃」形容呢個制度下對參選人係咪「愛國愛港」作出嘅審查,話唔知要做多啲乜先入到閘,選舉甚至成為「狗窿」,要低頭放低姿態先可以捐入去。但佢又話,唔會特別去遷就佢啲紅線[22]
  • 民主黨前主席劉慧卿話,如果人大決定取消5個超級區議會議席,有如民主倒退,中央政府應繼續畀香港發展民主。佢又認為如果民主派喺日後嘅選舉冇勝算,就唔應該參加,否則會成為政治花瓶[23]
  • 選舉委員會工程界選委黎廣德認為有關改革係增加中央控制選委會嘅安全系數,進一步打壓民主派嘅影響力。佢話,只要有一絲空間發聲,民主派人士都應該爭取,盡最大努力防止政制加快倒退[21]
  • 工黨前立法會議員張超雄表示,決定令香港民主倒退,只會令民生工作變得舉步維艱,擔心未來基層聲音更加不被尊重[24]
  • 嗰時流亡英國嘅羅冠聰,喺出席美國參議院外交關係委員會「世界各地的民主狀況」聽證會嘅時候,批評北京「完善」香港選舉制度嘅決定,實際上係將香港議會變成如大陸「人大」一樣嘅「橡皮圖章」,令「選舉」淪為「挑選」[25]
  • 香港監察(Hong Kong Watch)發起聯署,促請歐盟,除非中共廢除《國安法》,否則拒認《中歐投資協定》。聯署又話北京違反《中英聯合聲明》改寫香港嘅選舉制度,更加以嚴厲嘅《國安法》對民主派人士進行大規模逮捕同審判,侵犯《基本法》同埋《公民權利和政治權利國際公約》所保障嘅基本自由,認為睇唔到歐盟繼續承認該投資條約嘅理由。呢個聯署由24名香港社運人士聯署,當中包括13名已流亡海外嘅香港民主派人士[26]
  • 香港蘋果日報》喺3月11號報導佢哋關於首投族嘅街頭訪問,問及「首投族」對選舉嘅睇法。佢哋一致認為選舉「唔公平、無意思」,唔少人話唔會投票或只會投廢票,政府亦會好主觀咁唔畀民主派參選[27]
  • 喺2021年5月,一項民調話接近6成受訪者,反對呢次修改香港選舉制度。另外就民主派呼籲投白票,政府打算立法禁止,有56%受訪者反對咁做[28]

香港中間派[編輯]

  • 新思維主席狄志遠話,新制度唔理想,關卡同提名門檻增多,又有審查機制,形容係退步。而新設嘅資格審查委員會,亦令人懷疑係一個阻攔嘅機制。不過,佢作為民主黨前成員,就認為泛民主派仍然應該繼續參選[29]

台灣[編輯]

  • 台灣陸委會發言人邱垂喺3月11號下晝回應,話中共推行嘅「愛國者治港」,其實係中國共產黨直接治港,亦即係「愛黨者治港」。佢呼籲相關各方停止蠻橫打壓香港民主自由,致力於維護香港嘅高度自治,兌現對港人嘅承諾[30]
  • 前總統馬英九形容,呢個舉動令一國兩制嘅構想正式進入歷史、宣告死亡,對此覺得遺憾[31][32]
  • 國民黨主席江啟臣表示對北京嘅做法感到遺憾,佢再次呼籲北京當局,確保香港嘅自由同民主化,先可以得到香港嘅民心[33]

美國[編輯]

  • 美國國務院發言人內德·普萊斯(Ned Price)話,北京咁做係對香港自治、香港自由同民主進程嘅直接攻擊,將極大破壞香港嘅民主體制,同基本法列明要朝向普選嘅方向背道而馳。佢又話,美國譴責中國繼續攻擊香港嘅民主體制,華盛頓正同盟友合作以激發採取集體行動,反對中國對新疆穆斯林少數民族嘅人權侵犯同對香港嘅鎮壓[18][34]
  • 前中共中央黨校校刊《學習時報》副編審,而家去咗美國嘅鄧聿文話,呢個改動係滿足習近平「愛國者治港」嘅新要求,目的係為咗掏空香港,清算香港民主派[35]
  • 加拿大、法國、德國、意大利、日本、英國同美國嘅外相,連同歐盟外長,喺3月12號經美國國務院發表聲明,批評北京做法係由根本對香港選舉制度嘅民主元素蠶食,凸顯北京決意打壓喺香港唔同嘅聲音,而且破壞一國兩制,同《基本法》定落嚟循序漸進普選嘅目標背道而馳。聲明又話,面對香港以內唔同嘅意見,係應該討論而唔係滅聲,咁先可以保證香港嘅繁榮穩定,又要求中國遵守《中英聯合聲明》,尊重香港人嘅基本人權同自由[36][37]

澳洲[編輯]

  • 澳洲外交部長派恩(Marise Payne)喺3月12號早上發聲明回應,表示「嚴重關切」,話北京咁做係削減香港嘅民主制度,香港人有渠道去行使表達政治看法嘅自由嘅根本權力,係好重要嘅[38]
  • 去到3月14號,澳洲同新西蘭嘅外長亦發表聯合聲明,指中國咁做係進一步削弱香港人應有嘅權利同自由,仲有高度自治,而呢啲都係《基本法》定明賦予嘅[39]

歐盟[編輯]

  • 歐盟喺表決之前,曾經呼籲北京仔細考慮任何改革香港選舉制度嘅決定對政治同埋經濟嘅影響,因為咁做會破壞香港嘅基本自由、政治多元化同民主原則[18]

英國[編輯]

  • 外交部敦促中國當局恪守對香港人嘅承諾,包括尊重佢哋嘅基本權利同自由,以及香港嘅高度自治[18]
  • 英國外交大臣藍韜文發表聲明,批評北京係挖空香港民主辯論嘅空間,同中國本身嘅承諾背道而馳。佢又話,北京咁樣做會進一步破壞大家對中國履行國際責任同法律義務嘅信心同信任[30][40]
  • 自由民主黨國會議員 Layla Moran喺國會向政府提出緊急質詢,問英政府對香港選舉制度「被完善」有咩行動。英國政府有責任保障港人權益。佢話,而家香港幾乎每一位傑出嘅民主運動成員都身陷牢獄、BBC 被中國禁止播放、英國駐華大使被斥訓、公平選舉被取消,無論紅線要點劃,佢都肯定已被跨過。中國就好似喺度欺凌香港,而唯有付諸行動,欺凌者先會聽得明呢啲批評,要求政府唔好再推搪[41]
  • 工黨議員 Andrew Gwynne 表示,英國對香港嘅自由民主有承諾,質問政府點樣先會唔係淨係發聲明,直接同國際社會合作,向中國問責[41]
  • 保守黨議員施志安(Iain Duncan Smith)話,部份國家已經就制裁涉事官員展開行動,但英國仲未有動作,質問政府幾時先行動[41]
  • 末代港督彭定康話,呢個係中共至今最大嘅一步去抹殺香喺法制框架下實現自由同更大民主嘅願望[18]
  • BBC駐中國記者麥迪文形容,呢個制度之下,任何主張民主變革嘅候選人幾乎冇可能當選,而呢個正正係中國高層領導鍾意嘅方式[18]

睇埋[編輯]

[編輯]

  1. 十三屆全國人大三次會議議程草案於2021年2月28號獲十三屆全國人大常委會第二十六次會議批准[1],《決定(草案)》被列入該議程[2]
  2. 2021年2月27至28號,第十三屆全國人民代表大會常務委員會第二十六次會議聽取同審議《國務院關於修改完善香港特別行政區選舉制度和有關建議的報告》。

參考[編輯]

  1. . (簡體中文、中國中文). 喺2021-03-05搵到.
  2. . (中國中文). 2021-03-04. 喺2021-03-05搵到.
  3. 關於《全國人民代表大會關於完善香港特別行政區選舉制度的決定(草案)》的說明
  4. Storm.mg (2021-03-05). 港民主噩夢!泛民派32人還押候審,中國人大將大修香港選制-風傳媒. www.storm.mg (臺灣中文). 喺2021-03-11搵到.
  5. 國人大會議閉幕 通過完善香港選舉制度決定. Now 新聞 (香港中文). 喺2021-03-11搵到.
  6. 新聞 | 國安法 二二八 閹割選舉 攬炒三步曲. (中文). 原著喺2021-03-13歸檔. 喺2021-03-13搵到.
  7. 割選舉英九:國兩制告死亡 國民黨籲保障香港自由民主 | 立場報道 | 立場新聞. 場新聞 Stand News (英文). 原著喺2021-03-12歸檔. 喺2021-03-13搵到.
  8. 田飛龍 (2021-03-03). . (香港中文). 原先內容歸檔喺2021-03-04. 喺2021-03-13搵到.
  9. 01消息│立法會90席分佈曝光 地區直選大減至20席 選委會40席
  10. 面管治權︱北京敲定立會432案 部份功能組別擬撤個人票 IT界料歸建制 | 蘋果日報. Apple Daily 蘋果日報 (香港中文). 原著喺2021-03-29歸檔. 喺2021-03-30搵到.
  11. 大常委會全票通過改香港選制 譚耀宗:會上響起熱烈掌聲 選委會佔 40 席 功能界別改團體票為主 | 立場報道 | 立場新聞. 場新聞 Stand News (英文). 原著喺2021-03-31歸檔. 喺2021-03-30搵到.
  12. 割選舉委會增分區滅罪防火委員會議席 成員全由民政委任 大量落選建制派有份 | 立場報道 | 立場新聞. 場新聞 Stand News (英文). 原著喺2021-03-31歸檔. 喺2021-03-30搵到.
  13. 會議席分布料已成定局 選委議席成建制爭奪焦點. Now 新聞 (香港中文). 喺2021-03-30搵到.
  14. 割選舉查委員會全由港府官員擔任 國安委 DQ 決定不容覆核 林鄭:中央用心良苦 | 立場報道 | 立場新聞. 場新聞 Stand News (英文). 原著喺2021-03-31歸檔. 喺2021-03-30搵到.
  15. 割選舉大通過修改香港選舉制度 0 票反對 設選委會審查候選人 林鄭:由衷感謝 | 立場報道 | 立場新聞. 場新聞 Stand News (英文). 原著喺2021-03-11歸檔. 喺2021-03-11搵到.
  16. 子強料民主派再在選舉入閘機會微 民主步伐一筆勾銷 - RTHK. news.rthk.hk (臺灣中文). 喺2021-03-07搵到.
  17. 17.0 17.1 周皓宜 (2021-03-30). 祖為批滅罪防火委員任選委荒謬 蔡子強料泛民立會最多取15席. 港01 (香港中文). 喺2021-03-31搵到.
  18. 18.0 18.1 18.2 18.3 18.4 18.5 Storm.mg (2021-03-06). 國兩會京擬改香港選舉制度 美國出聲譴責:這是在攻擊民主-風傳媒. www.storm.mg (臺灣中文). 喺2021-03-11搵到.
  19. 19.0 19.1  . am730. 2021-03-05. 原著喺2021-03-13歸檔. 喺2021-03-11搵到.
  20. 割選舉新政制荒謬 港大教授陳祖為:不僅無循序漸進,是突然死亡 | 立場報道 | 立場新聞. 場新聞 Stand News (英文). 原著喺2021-03-31歸檔. 喺2021-03-31搵到.
  21. 21.0 21.1 健熙:民主派日後想參選亦未必有機會 - RTHK. news.rthk.hk (臺灣中文). 喺2021-03-11搵到.
  22. 黨專訪。上閹割議會後 民主黨還是否參選? | 立場專題 | 立場新聞. 場新聞 Stand News (英文). 原著喺2021-03-11歸檔. 喺2021-03-11搵到.
  23. 慧卿指若最終取消超級區議會5席有如民主倒退. RTHK. 2021-03-05.
  24. . 獨立媒體. 2021-03-11. 喺2021-03-11搵到.
  25.  . 自由亞洲電台. 2021-03-10. 喺2021-03-11搵到.
  26. 面管治權︱13流亡港人聯署促歐盟拒認歐投資協定 | 蘋果日報. Apple Daily 蘋果日報 (香港中文). 原著喺2021-03-12歸檔. 喺2021-03-12搵到.
  27. 面管治權︱首投族杯葛選舉做選民 多年選民灰心:全家人杯葛 | 蘋果日報. Apple Daily 蘋果日報 (香港中文). 原著喺2021-03-13歸檔. 喺2021-03-11搵到.
  28. 港民调:近6成人反对修改选制 学者指投白票废票率或创新高. (中文). 喺2021-08-09搵到.
  29. 志遠料民主派在立法會最多能取10多席 仍有影響力 - RTHK. news.rthk.hk (臺灣中文). 喺2021-03-31搵到.
  30. 30.0 30.1 割選舉外相:北京挖空香港民主辯論空間 台灣陸委會:中共直接治港、愛黨者治港 | 立場報道 | 立場新聞. 場新聞 Stand News (英文). 原著喺2021-03-13歸檔. 喺2021-03-11搵到.
  31. 英九形容一國兩制正式進入歷史 - RTHK. news.rthk.hk (臺灣中文). 喺2021-03-12搵到.
  32. 經濟日報. 英九遺憾一國兩制死亡 江啟臣籲確保香港民主 | 政經焦點 | 要聞. (中文). 原著喺2021-03-13歸檔. 喺2021-03-12搵到.
  33. 經濟日報. 英九遺憾一國兩制死亡 江啟臣籲確保香港民主 | 政經焦點 | 要聞. (中文). 原著喺2021-03-13歸檔. 喺2021-03-12搵到.
  34. "Subscribe to read | Financial Times". www.ft.com. 喺2021-03-11搵到. {{cite web}}: Cite uses generic title (help)
  35. Storm.mg (2021-03-10). 聿文觀點:北京兩手進一步掏空香港-風傳媒. www.storm.mg (臺灣中文). 喺2021-03-11搵到.
  36. "G7 Statement on Hong Kong Electoral Changes". United States Department of State (英文). 喺2021-03-13搵到.
  37. 英德等 G7 外長:嚴重關注中國修改香港選制、消滅異見聲音 促停止打壓 | 立場報道 | 立場新聞. 場新聞 Stand News (英文). 原著喺2021-03-13歸檔. 喺2021-03-13搵到.
  38. . SBS Your Language (繁體中文). 喺2021-03-12搵到.
  39. 洲與新西蘭發表聯合聲明 對人大改變香港選舉制度深表關切. SBS Your Language (繁體中文). 喺2021-03-15搵到.
  40. 面管治權|藍韜文批北京扼殺港民主、違反對港承諾 華使館提醒勿低估中國捍衛利益尊嚴意願 | 蘋果日報. Apple Daily 蘋果日報 (香港中文). 原著喺2021-03-11歸檔. 喺2021-03-11搵到.
  41. 41.0 41.1 41.2 國會議員提緊急質詢 要求政府再推搪 坐言起行制裁打壓香港官員 | 立場報道 | 立場新聞. 場新聞 Stand News (英文). 原著喺2021-03-10歸檔. 喺2021-03-11搵到.