香港民主運動

出自維基百科,自由嘅百科全書
跳去導覽 跳去搵嘢

香港民主運動香港政治上一連場政治活動,目標係要盡快雙普選,香港市民要一人一行政長官、同埋立法會議員。香港嘅民主運動參與者同推動嘅政黨,一般嚟講合稱民主派。

香港第一次全民直選嘅建議,係由喺1946年時任港督楊慕琦提出嘅建議,設立一個民選議席佔三分二嘅香港市議會,而議會嘅權力仲會慢慢增加。不過呢個計劃並無得到民間共識。於是,香港要去到 1982 年,先有全民直選嘅地區議會(區議會)議席,1983年擴展到市政局,1991年去到立法局。

1997年,香港嘅立法局改名做立法會。唔計算臨時立法會嘅年代,香港嘅立法局(會)一直都有一定數量嘅直選議席,去到2012年,直選同變相直選嘅超級區議會議席佔70席入面嘅40席,超過一半直到2021年北京未諮詢過香港人嘅閹割議會方案,將直選議席比例削減,而且仲要經過審查先可以參選,有別於以前只需要一般選民嘅提名。

2021年3月,為咗落實中共中央總書記習近平提出嘅「愛國者治港」原則[1]全國人大常委會通過新修訂嘅《香港基本法》附件一同附件二,修改咗行政長官嘅產生辦法、立法會嘅產生辦法同表決程序[2],改制後嘅香港選舉制度嘅民主成份大幅減少,標誌咗持續多年嘅香港民主運動以失敗告終[3]

[編輯]

嚮舊時中國五四運動,同埋孫文三民主義民主已經俾國人所知道,佢哋已經開始遊行示威要求當家作主,當時中國嘅武裝革命都以人民當家作主(民主)做政治口號。

香港1997年主權移交六四事件彭定康提案,都激化香港人相信要民主抗共,香港民主運動由此而起。

1946年:未有落實嘅楊慕琦計劃[編輯]

1945年,香港日治時期結束,香港復歸英國接管。香港總督楊慕琦喺1946年5月復任,而由於喺二戰結束前,倫敦當局就已經承諾會喺戰後容許殖民地擁有高度自治權甚至獨立。當工黨政府上台執政後,倫敦當局就著手落實有關承諾。

楊慕琦喺1946年8月28號發表一份政治制度改革方案,希望香港市民有更多責任去管理自己嘅事務,並且進行諮詢。同年10月,楊慕琦正式推出建議書,史稱「楊慕琦計劃[4]。喺佢嘅計劃入面,香港將會設立一個市議會,由30名議員組成,三分之二議員係民選,其餘三分一係委任。建議中呢個議會,最初可負責管理消防、康樂場地、車輛牌照同埋市政局,到日後情況許可嘅話,更可以管理教育、社會福利同公共建設,甚至係公共事業。

不過,呢個計劃未能得到共識,當時香港人對政治並唔熱衷,立法局嘅非官守議員亦有異議,所以最終夭折。

1982年-1983年:香港首次區議會、市政局直選[編輯]

1980年6月,香港政府進行關於地方行政制度嘅諮詢,之後決定喺全港18個行政區分別成立地區管理委員會同埋區議會,而區議會就作為民意諮詢機構。區議會嘅成員包括由政府官員出任官守議員、由政府委任嘅非官守議員、直選產生嘅民選議員,同埋當然議員。

去到1982年,政府舉行第一屆區議會選舉,共有議席490個[5],其中132席係民選直選議席,各個區議會主席由各區政務專員擔任。由於籌備工作嘅問題,新界地區嘅區議會首先喺1982年3月4號進行,市區嘅區議會就喺同年9月23號進行選舉。區議會嘅正常任期為三年,但市區區議會將第一屆嘅任期縮短為兩年半,以令第二屆選舉可以同時喺市區同新界舉行。

另外,香港市政局選舉制度亦都進行咗革新,民選成員由12名增加到15名,佔成個議會嘅一半,而且基本上年齡達21歲嘅香港永久性居民都可以登記做選民。而革新後嘅第一次選舉,就喺1983年3月8號舉行。呢次選舉入面,當時喺市政局佔有一定席位嘅香港公民協會同香港革新會大致保住咗自己嘅議席,而由馮檢基領導嘅香港公共房屋政策評議會亦崛起咗,佔市政局嘅兩席。

去到1985年,香港政府設立埋區域市政局,職權同市政局相等,不過就負責新界地區。而1986年兩局嘅選舉入面,香港公民協會同香港革新會勢力開始消退,而香港公共房屋政策評議會就有所增長,民主黨前身嘅匯點太平山學會(後來合併咗去港同盟)亦喺呢個時候崛起。之後,被視為民主派嘅組織勢力一路喺兩局增長,而兩個舊有嘅組織就逐漸流失議席,一直去到2000年香港特區政府殺局為止。

1991年:香港首次立法局直選[編輯]

1991香港立法局選舉,係第一次香港人擁有直選嘅機會,可以投票選出自己嘅立法局議員。當年實行「雙議席雙票制」,即每區兩個議席,每人可投兩票。當時港同盟成功製造「聯票效應」而大勝。另一方面,親中派大敗,亦催生咗親中派大黨民建聯嘅成立[6]

1995年:新九組出現、民主派首次過半[編輯]

喺1992年10月,末代港督彭定康到立法會宣讀任內第一份施政報告,提出咗比公眾預期更加進取嘅政制改革方案[7],其中包括被稱爲新九組,任何喺1991年人口普查中報稱從事其中一個行業嘅在職人士,都會自動成為新九組其中一組嘅選民[8][9],當時嘅選舉事務委員會仲用「在職人士多一票,各行各業有代表」作為宣傳口號[10]。當時新九組嘅選民數目高達106萬,所以呢九個議席變相成為咗直選議席。不過,當時呢個方案喺1994年6月表決嗰陣,引嚟社會唔少討論,自由黨提出咗修正案,希望可以保障功能界別的利益。而另一方面,前綫劉慧卿亦實施全面直選嘅修正案,單議席單票制,選民一人一票選出六十名議員[11],得到港同盟和民協的支持。但最終,兩個修正案都以一票之差被否決,而彭定康嘅新九組方案就獲得通過,並且喺1995年香港立法局選舉被採用。

北京政府亦對推動彭定康大表不滿,彭定康因而被當時任職港澳辦主任嘅魯平鬧成「千古罪人」。最後,北京政府單方面宣布,中英政府對於最後一屆立法局會自動過渡成為第一屆特區立法會嘅協定唔再有效;並決定「另起爐灶」[12],成立預委會以及由只有政府推選委員會嘅四百名委員有資格投票組成嘅臨時立法會

為咗迎接呢次選舉,匯點亦選擇咗同港同盟合併,組成民主黨[7]。民主派喺1995年嘅立法局選舉,攞到31席,超越建制派嘅29席。其中民主黨就攞到18席[6]

1998年:功能組別全面回歸小圈子[編輯]

1998年首屆立法會嘅選舉辦法,回復至彭定康之前嘅安排,多數功能界別回復為小圈子,「新九組」以小圈子嘅新界別取代,選民基礎大幅收窄,選委會亦以小圈子方式產生,唔再係區議員互選[10],直選議席數目亦只係得20個。民主派喺呢次選舉攞到20席,親中派就攞到40席。

1998年選出嘅立法會議員,任期只有兩年,之後嘅就有四年。直選議席嘅數目,喺2000年增加到24席,去到2004年增加到30席,對應被取代嘅係選委會產生嘅議席。不過,亦因為香港主權移交之後地區直選改用比例代表制,民主派亦開始多咗一啲細黨同獨立人士嘅崛起。例如,公民黨同社民連就分別喺2006年成立咗。

2010年:超級區議會嘅出現[編輯]

香港2012年政改方案諮詢嗰時,社民連同公民黨成員辭職嚟引發2010年香港立法會地方選區補選(「五區公投」),呢個行動引起咗民主派以來一啲分歧。另外,公社兩黨以外(包括民主黨)一啲民主派組織組成嘅終普聯。

呢次補選投票率只有17.19%。之後,特首曾蔭權邀請咗公民黨黨魁余若薇就政制改革方案進行電視辯論,係香港開埠以來首次公開就政制問題進行嘅公開辯論。普遍民調指七成市民認為余若薇表現優勝,只有一成幾認為曾蔭權比較好,而政府方案嘅支持度亦都有所下跌[13][14]

終普聯秘密會見中聯辦,得到中聯辦接受佢哋嘅方案。

2010年6月21號,曾蔭權政府接受民主黨嘅改良方案,喺立法會功能組別加入五名區議會(第二)功能界別議員,由本來喺功能界別冇投票權嘅選民選出,另外亦加咗五個直選議席。隨後議案2010年6月25號喺立法會表決,結果獲得通過。

方案最終得到民主黨8個議員、民協馮檢基、獨立泛民李國麟,中間派梁家騮嘅支持,同埋親中派嘅支持,獲得通過。不過,呢個方案就引起咗民主派嘅分裂。其中,本來屬於民主黨嘅鄭家富,就宣布退黨,然後投反對票[15]

有啲激進嘅民主派主張狙擊民主黨,要求票債票償,但本身屬於激進民主派嘅社民連就因為對民主黨立場,出現咗分歧。之後,人民力量社民連分裂出嚟,而且响2011年第4屆香港區議會選舉狙擊民主黨。

而去到2012年,政改後嘅第一次立法會選舉,當初力推改良方案嘅民主黨亦都大敗,得返六個議席,係創黨以來成績最差嘅一次[16][17]

2014年:雨遮革命[編輯]

內文:雨遮革命

2016年:本土派崛起、首次有候選人被政府剝奪選舉權[編輯]

溫和民主派同激進民主派之間嘅分裂更催生咗香港本土派,喺2010年代初更加激烈,之後更出現幾場社會運動:魚蛋革命反修例運動。有人開始用『非建制派』呢個詞語概括形容民主派同本土派。

2016年2月,因為湯家驊嘅辭職而引發咗一場補選,民主派支持嘅楊岳橋雖然勝出選舉,但本土派嘅梁天琦攞到15%選票,比唔少人預期多[18]

去到2016年香港立法會選舉前夕,由於成個非建制派山頭林立,香港大學法律學院副教授戴耀廷就喺2月初提議『雷動計劃』,以初選決定非建制派出選嘅人,但係喺黨派之間未能達到共識。計劃轉化成為由選民喺投票日之前根據民調商討棄保對象,最終有超過4萬人參加,而且非建制派得到嘅議席亦比預期為多。一項事後研究雷動計劃嘅學術研究,就指民主派山頭林立,周永勤退選事件同埋北京干預選舉,係唔少人參與雷動計劃嘅主要原因[19]

另外喺7月,立法會選舉提名期完結過後,有多名本土派嘅候選人被政府剝奪參選資格,但有部份本土派候選人仍然成功入閘並且當選。不過,民主派同本土派有部份嘅當選人宣誓就職嗰陣並無依據指定嘅誓詞,並無依照本來嘅誓詞,結果引發風波,最後有6個議員被剝奪資格。而呢6個議席嘅補選,有啲甚至流失咗去親中派嘅一邊。之後,香港嘅民主運動一度踏入低朝。

2019年-2021年:反修例運動、港版國安法、選舉先被暫停後閹割[編輯]

喺2019年,香港因為林鄭月娥提出修訂逃犯條例,社會陷入咗好大爭議,其中6月12號嘅和平示威,仲有200萬人參加,破咗香港嘅歷史紀錄,但係當時政府仍然堅持修訂,而且得到立法會親中派政黨嘅支持。喺呢啲抗議活動入面,警察嘅執法表現亦備受爭議,警察對示威者採取過量暴力,違反國際標準同規範,又稱呼佢哋做「曱甴」,仲恐嚇衝突現場嘅義務醫療人員同急救員,對記者亦都非常唔友善。喺有部份示威者不幸離世嘅時候,甚至公然慶祝。呢啲指控都得到國際社會嘅確認[20],例如,國際特赦組織就確認咗香港警隊喺6月12號嘅示威入面,違反國際人權法[21]。但係另一方面,喺七二一元朗襲擊入面,警察就延遲咗39分鐘先到達現場。

因為親中派堅持支持修訂《逃犯條例》,結果喺2019年香港區議會選舉大敗,只係攞到59個民選議席,民主派就攞到388個,民主派喺之後嘅區議會主席改選仲攞到17個區議會嘅正副主席職位。

去到2020年7月,唔同陣營都為咗準備9月進行嘅立法會選舉準備。其中民主派就進行咗初選,初選受到好多人關注,甚至引來激進親中派暴力騷擾[22][23],但投票數仍然達61萬人次。不過,去到提名期後期,12名泛民主派、香港本土派候選人喺選舉主任嘅政治審查之下,被取消參選資格,其中包括被視為溫和民主派嘅公民黨4名候選人,仲有黃之鋒等8位被視為較激進嘅人士。而去到7月31號,林鄭月娥聲稱因為武漢肺炎而宣布延遲選舉,但決定引起咗好大爭議,民主派陣營認為,親中派陣營係怕輸,擔心會好似前一年區議會選舉咁大敗,令民主派無法喺議會乘勝追擊所作出嘅政治決定,粗暴褫奪市民投票嘅權利。呢次決定要由人大介入,係憲制嘅徹底崩塌。被禁參選嘅黃之鋒就話,北京或香港政府無任何基礎去押後選舉,批評政府對民主派嘅打壓超出香港同埋國際社會嘅預期[24]

2021年3月11號,中國第十三屆全國人民代表大會第四次會議入面通過嘅議案,內容係修改香港選舉制度,包括立法會選舉委員會嘅組成辦法。呢個議案授權全國人民代表大會常務委員會修改《香港基本法》嘅附件一同附件二[25]。議案聲稱要全面落實「愛國者治港」原則[26],但未徵詢過香港市民嘅意見,而且大幅度修改咗立法會同選舉委員會嘅人數同組成方法[27]。呢個方案被視為香港民主大倒退,而且扼殺民主派參與選舉嘅權利。有啲傳媒用『閹割選舉』嚟形容呢次嘅決議案[28][29],除咗香港民主派同香港嘅學者之外,台灣、美國、澳洲、英國同歐盟都有發聲批評北京扼殺香港民主自由嘅做法。

去到3月30號,北京全票通過修訂《基本法》附件一、附件二。立法會方面,將原有直選同變相直選嘅40席大幅削減去到20席(由57.14%減少至22.22%),好多功能組別都取消個人票,增加40席「選舉委員會」界別議席[30]。另外,特首選舉委員會入面亦取消區議員界別117 席,加入咗好多親中團體、政協委員名額、各種全部由民政事務處委任產生嘅委員會,以及全國性組織代表。就算係立法會地區直選,候選人亦要攞到選委會提名,通過資格審查委員會、警方國安處、國家安全委員會同選舉主任嘅多種政治審查[31][32][33],而且佢哋亦單方面決定,唔容許任何人作出司法覆核或任何形式嘅上訴[34]

事件再度引起香港同外國嚴重批評。民主黨主席羅健熙批評由國安處審查嘅安排荒謬,減少巿民同民主派嘅參與空間新制比 97 前更保守[35],學者陳祖為蔡子強都對方案批評[36][37],話呢個方案蔑視民意。香港監察主席羅傑斯、前港督彭定康亦都猛烈批評[38],英國外相藍韜文批評中共再次違反聯合聲明[39]

代表人物[編輯]

主要事件[編輯]

參考[編輯]

  1. ""完善'一国两制'制度体系,落实'爱国者治港'根本原则"专题研讨会举行 夏宝龙出席并讲话". 国务院港澳事务办公室 (中文). 2021-02-22. 夏宝龙表示,习近平总书记指出,要确保“一国两制”实践行稳致远,必须始终坚持“爱国者治港”。
  2. "中華人民共和國香港特別行政區基本法附件一香港特別行政區行政長官的產生辦法". 中國人大網. 2021-03-30.
  3. "立法會直選議席比例 1991年後的新低". 立場新聞. 2021-03-31. 喺2021-03-31搵到.
  4. 毛來由, 為何英國不早給香港民主?英國檔案提供的答案 互聯網檔案館歸檔,歸檔日期2014年11月1號,., 輔仁媒體, 2014-1-11
  5. "區議會角色、職能及組成的檢討諮詢文件(2005-2006)" (PDF). 原先內容歸檔 (PDF)喺2020-05-30. 喺2011-06-17搵到.
  6. 6.0 6.1 "【概觀民主黨.選舉機器 2】誰家英雄被歌頌 誰成全了誰的夢 | 立場報道 | 立場新聞". 立場新聞 Stand News (英文). 喺2021-03-16搵到.
  7. 7.0 7.1 "【匯點:原罪背後 6】三十年一覺 民主黃粱大夢 | 立場報道 | 立場新聞". 立場新聞 Stand News (英文). 喺2021-03-21搵到.
  8. 李大煒 (2016-12-07). "【許賢發逝世】實現新九組政改功臣 方案成近年政改借鑑之一". 香港01 (中文). 喺2021-03-17搵到.
  9. "94年投關鍵票 通過新九組方案 | 蘋果日報". Apple Daily 蘋果日報 (中文). 喺2021-03-17搵到.
  10. 10.0 10.1 Https://Www.post852.com, 852郵報 (2014-08-15). "8仔筆記│香港民主倒退鐵證 至今不及95政改|852郵報". 852郵報 (中文). 喺2021-03-17搵到.
  11. "【匯點:原罪背後 6】三十年一覺 民主黃粱大夢 | 立場報道 | 立場新聞". 立場新聞 Stand News (英文). 喺2021-03-21搵到.
  12. "回歸二十年 消失的議會-被喝停的直通車-《大學線》". 《大學線》 (中文). 2016-12-16. 喺2021-03-17搵到.
  13. "2010年政改方案辯論即時民意調查". www.hkupop.hku.hk. 喺2021-03-20搵到.
  14. "民调显示曾余辩论后港府政改支持率大跌". BBC News 中文 (中文). 2010-06-17. 喺2021-03-20搵到.
  15. "鄭家富含淚退出民主黨 難捨兄弟情 誓言在黨外續為終極普選努力 | 蘋果日報". Apple Daily 蘋果日報 (中文). 喺2021-03-17搵到.
  16. "年輕人入老黨 甘願深耕細作". 《大學線》 (中文). 2017-11-28. 喺2021-03-17搵到.
  17. "建制派達標 北京將進一步分裂泛民 | 蘋果日報". Apple Daily 蘋果日報 (中文). 喺2021-03-17搵到.
  18. "香港立法會補選:泛民楊岳橋當選 本土派高票落敗". BBC News 中文 (中文). 2016-02-28. 喺2021-03-17搵到.
  19. Au, Cheuk Hang; Ho, Kevin (2019-10-01). "Deliberation in Mobile Messaging Application: A Case in Hong Kong". Communications of the Association for Information Systems. 45 (1). doi:10.17705/1CAIS.04517. ISSN 1529-3181.
  20. "晚報:聯合國人權事務高級專員指港警武力違反國際標準,促港府徹查". theinitium.com. 2019-08-13. 喺2021-03-22搵到.
  21. "Document". www.amnesty.org (英文). 喺2021-03-22搵到.
  22. "【立法會選舉】逾30藍絲有恃無恐 撕毁民主派候選人街站宣傳品 | 蘋果日報". Apple Daily 蘋果日報 (中文). 喺2021-03-30搵到.
  23. 頭條日報. "【立會選舉】譚文豪初選街站義工遇襲 黃之鋒與「大波man」口角". 頭條日報 Headline Daily (中文). 喺2021-03-30搵到.
  24. "香港立法會選舉因疫情延後一年,反對派稱政府「怕輸」". BBC News 中文 (中文). 喺2020-11-08搵到.
  25. 關於《全國人民代表大會關於完善香港特別行政區選舉制度的決定(草案)》嘅說明
  26. Storm.mg (2021-03-05). "香港民主噩夢!泛民派32人還押候審,中國人大將大修香港選制-風傳媒". www.storm.mg (中文). 喺2021-03-11搵到.
  27. "全國人大會議閉幕 通過完善香港選舉制度決定". Now 新聞 (中文). 喺2021-03-11搵到.
  28. "眾新聞 | 國安法 二二八 閹割選舉 攬炒三步曲". 眾新聞 (中文). 喺2021-03-13搵到.
  29. "【閹割選舉】馬英九:「一國兩制」宣告死亡 國民黨籲保障香港自由民主 | 立場報道 | 立場新聞". 立場新聞 Stand News (英文). 喺2021-03-13搵到.
  30. "全面管治權︱北京敲定立會「432」方案 部份功能組別擬撤個人票 IT界料歸建制 | 蘋果日報". Apple Daily 蘋果日報 (中文). 喺2021-03-30搵到.
  31. "人大常委會全票通過改香港選制 譚耀宗:會上響起熱烈掌聲 選委會佔 40 席 功能界別改團體票為主 | 立場報道 | 立場新聞". 立場新聞 Stand News (英文). 喺2021-03-30搵到.
  32. "【閹割選舉】選委會增分區滅罪防火委員會議席 成員全由民政委任 大量落選建制派有份 | 立場報道 | 立場新聞". 立場新聞 Stand News (英文). 喺2021-03-30搵到.
  33. "【政情】立會議席分布料已成定局 選委議席成建制爭奪焦點". Now 新聞 (中文). 喺2021-03-30搵到.
  34. "【閹割選舉】審查委員會全由港府官員擔任 國安委 DQ 決定不容覆核 林鄭:中央用心良苦 | 立場報道 | 立場新聞". 立場新聞 Stand News (英文). 喺2021-03-30搵到.
  35. "【閹割選舉】羅健熙:警國安處審查荒謬 新制比 97 前更保守 民主黨是否參選需再商討 | 立場報道 | 立場新聞". 立場新聞 Stand News (英文). 喺2021-03-30搵到.
  36. 周皓宜 (2021-03-30). "陳祖為批滅罪防火委員任選委荒謬 蔡子強料泛民立會最多取15席". 香港01 (中文). 喺2021-03-31搵到.
  37. "【閹割選舉】斥新政制荒謬 港大教授陳祖為:不僅無循序漸進,是突然死亡 | 立場報道 | 立場新聞". 立場新聞 Stand News (英文). 喺2021-03-31搵到.
  38. "【閹割選舉】轟北京破壞一國兩制 彭定康:再次展示中共不可信 | 立場報道 | 立場新聞". 立場新聞 Stand News (英文). 喺2021-03-30搵到.
  39. "英國稱北京修改香港選舉制度違反中英聯合聲明". Now 新聞 (中文). 喺2021-03-30搵到.