單議席單票制

出自維基百科,自由嘅百科全書
跳去導覽 跳去搵嘢

單議席單票制(英文:Single-seat, single-vote system),又叫小選區制(英文:Small constituency system)、單席選區(英文:Single-Member District),係一種選舉制度,指一個選區淨係得一個議席,只有攞到最高票數嘅人先至可以當選。

「單議席單票制」係香港獨有嘅叫法,其他華人地區會多數叫做「小選區制」。

概要[編輯]

採用單議席單票制嘅選區,一定要有至少兩個人參選;如果候選人淨係得一個,咁佢就會自動當選,抑或以「等額選舉」嘅方式去選。由於咁樣會導致啲人好易出術,唔使幾多票就當選,所以有啲地區為咗避免呢種情況發生,會另加法例去保障[1][2]:就好似中華民國嘅《公職人員選舉罷免法》第70條規定,要候選人所得嘅票數一定要到某個百分比,先至成功當選[3];而香港就暫時未有法例去保障。

歷史[編輯]

「單議席單票制」最先響美國實行。1789年,響美國憲法加上咗一句說明:「眾議院應該由州嘅人每兩年選出一位新議員…代表…應該由每個黨平均分派一啲人落唔同州參選。」換言之,美國響當時已經批准咗呢種選舉制度[4]。1842年,已經有成22個州係用「單議席單票制」。1967年,美國法典第二卷將呢種選舉制度寫入法律,對每個州都授權佢哋用[5]

香港以往嘅立法會(嗰時嘅立法局)同區議會係同時採用「單議席單票制」同「雙議席雙票制」(響其他地方超級罕有),分開單議席選區(112席)同雙議席選區(10席),單議席嘅就最高得票者當選;雙議席嘅就最高得票嗰兩個人當選。1988年,立法局改用「比例代表制[1]。1994年,時任港督彭定康覺得呢種方式太亂,所以作出改革:區議會所有委任議席取消,民選議席增加到346個;同時取消「雙議席雙票制」,全部一律用「單議席單票制」。之後,香港政府冇就選舉制度做改革,所以就流傳到依家[6]

長短處[編輯]

好處[編輯]

  • 呢種方法可以幫政府建立一個更加穩定同埋有說服力嘅政權[1][7]
  • 如果一個候選人惹起選民嘅不滿,選民隨時會走去投畀第二個,所以啲政黨唔夠膽做啲傷害選民嘅嘢[8]
  • 簡單方便,候選人可以全力投入選舉之中,而選民鐘意投畀邊個就邊個[9]

壞處[編輯]

  • 雖然呢種選舉方式係簡單,但係好鬼霸道:當選人同在野嘅可能淨係差些微票數,一嚟未能夠完全反映民意,二嚟嗰啲些微票數好有可能係死票[1]
  • 大黨為咗保住選民,多數走中間偏左或偏右嘅路線,對大黨好、對細黨不利,導致其他聲音唔可以入議會[10][2]
  • 黨嘅得票率同實際得票差十萬九千里咁遠。舉個例,就好似2005年英國下議會選舉,當時嘅第一大黨工黨(得票率35.2%,實際攞咗355議席)同第二大黨保守黨(得票率32.4%,實際攞咗198議席)得票率表面係差2.8%,實際上差成157個議席[11]
  • 好難去挑戰政府嘅決定,政府話一就一,反對黨冇得出聲[2]

用緊呢種方法嘅地方[編輯]

簡單多數制[編輯]

兩輪投票制[編輯]

排序選擇投票制[編輯]

混合名額多數制[編輯]

其他選舉制[編輯]

[編輯]

  1. 1.0 1.1 1.2 1.3 "單議席單票制能配票嗎? | 吳獅子 | 立場新聞". 立場新聞 Stand News (英文). 喺2021-02-19搵到.
  2. 2.0 2.1 2.2 "【長技術文慎入】談芬蘭和共識型民主 | 假才子 | 立場新聞". 立場新聞 Stand News (英文). 喺2021-02-19搵到.
  3. "公職人員選舉罷免法§70-全國法規資料庫". law.moj.gov.tw (中文). 喺2021-02-19搵到.
  4. "The Constitution of the United States: A Transcription". National Archives (英文). 2015-11-04. 喺2021-02-19搵到.
  5. Board, The Editorial (2018-11-10). "Opinion | A Congress for Every American". The New York Times (英文). ISSN 0362-4331. 喺2021-02-19搵到.
  6. "卓偉:區議會選舉「單議席」「雙議席」前世今生". www.thinkhk.com. 喺2021-02-19搵到.
  7. "對罷免黃捷公投的隔岸觀察 | 林兆彬". 眾新聞 (中文). 喺2021-02-19搵到.
  8. 朝日. "SENSE隨筆140926單議席單票制 | 掌門天地" (英文). 喺2021-02-19搵到.
  9. "單議席獨贏與比例代表制 - C觀點: 施永青". am730 (英文). 喺2021-02-19搵到.
  10. "不夠民主的當選門檻-香港商报". www.hkcd.com. 喺2021-02-19搵到.
  11. "比例定数80削減/小選挙区制の害悪いっそう". www.jcp.or.jp. 喺2021-02-19搵到.