豐田Coaster

出自維基百科,自由嘅百科全書
Jump to navigation Jump to search
豐田Coaster
トヨタ・コースター
Toyota Coaster
TCM 15.JPG
澳巴一架第三代豐田Coaster
HW8649 Ho Man Tin to Mong Kok 09-09-2019.jpg
香港小巴塗裝嘅第四代豐田Coaster
Southern Vectis 204 934 BDL 2.JPG
英國一架豐田Coaster/Caetano Optimo
又叫日野Liésse II(OEM,1996年-)
製造廠豐田
邊道出日本
中國(四川一汽豐田汽車,2000年起)
取代咗豐田Light Bus
製造年份1969年—
主要對手三菱Rosa
日產Civilian
日野Rainbow小巴
五十鈴Journey
萬事得Parkway
規格
引擎豐田
日野N04C(2004年起)
波箱棍波
自動波
混能車驅動系統

豐田Coaster日本豐田出嘅一款小巴,1969年開始造。自2000年起,由豐田汽車、豐田通商同埋中國第一汽車集團合資成立嘅四川一汽豐田汽車喺中國四川出豐田Coaster(喺中國大陸稱為「豐田柯斯達」)。

Coaster喺1982年出到第二代,到1992/1993年推出第三代,2017年推出第四代。除咗較為普遍嘅小巴版之外,豐田亦喺1984年推出Coaster嘅大型貨Van版(車廂後面有一大個吉位擺貨),並喺1995至2004年間出過四驅版Coaster小巴,同埋喺1997至2007年間出過混能版Coaster小巴。

1980年代開始,豐田一直有運Coaster底盤畀葡萄牙Salvador Caetano嵌車身,是為Caetano Optimo。另外自1996年起,有Coaster係以日野呢個牌子賣,是為日野Liésse II(日野リエッセII)。

另外喺1996至2004年間,豐田亦出過一隻叫豐田Coaster R(トヨタ・コースターR)嘅小巴,不過佢係以豐田名義賣嘅日野Liésse

[編輯]

車型名「Coaster」有沿岸貿易船巡航船嘅意思。

生產史[編輯]

第一代(U10系、B10系)[編輯]

1969年2月豐田推出第一代Coaster,車身由荒川車體工業生產,全長6.08米,有單尾胎同埋孖尾胎版,高級規格有得揀冷氣版。作為同廠Dyna貨車嘅姊妹車種,型號代碼同Dyna共用一個「U」字,型號有配5R汽油引擎嘅RU18同埋2J柴油引擎嘅JU18[1]

1972年2月,Coaster嘅軸距由3.07米稍為加長至3.085米,車身長度冇變,同時柴油引擎配搭改咗。型號有配5R汽油引擎嘅RU19同埋B型柴油引擎嘅BU19[1]

1973年,東京都交通局引入咗一批Coaster BU19作為市內小巴,佢哋嘅車頂係特別加高咗。

1977年8月,豐田推出新一代Dyna,Coaster型號代碼由「U」字改為「B」字,同時高車頂版成為可選配搭。型號有配5R汽油引擎嘅RB10(只限出口),20R汽油引擎嘅RB11同埋2B柴油引擎嘅BB10[1]

1979年11月,波棍由原本嘅軚波改嗮做地波,同時冇得再揀5R引擎。日本本土版改到符合昭和54年(1979年)廢氣排放標準,型號改成配20R汽油引擎嘅RB12同埋2B柴油引擎嘅BB11[1]

1980年8月,22R汽油引擎取代咗20R引擎,車型代號係RB13[1]

第二代(B20系、B30系)[編輯]

1982年5月豐田推出第二代Coaster,頭軸改用扭力桿式前獨立避震,全部行孖尾胎。新設計嘅荒川車身(1988年改叫Araco,アラコ),有得揀嵌入式車門,車頭燈可以係圓燈或方燈。另外亦新增長陣版,有全長6.18米(B20系)同埋6.86米(B30系)兩款。初時嘅引擎選擇,有22R汽油、3B柴油同埋2H六氣缸柴油三款[1]

1984年8月,Coaster大型貨Van版喺日本本土推出,車廂後面有一大個吉位擺貨。同年豐田開始出Coaster底盤畀葡萄牙嘅Salvador Caetano,車身由後者做,並以Caetano Optimo呢個名喺歐洲賣。

1985年開始,Coaster有得揀自動波,同時加入直接噴注柴油引擎選擇,包括有13B四氣缸(只限出口)同埋12H-T渦輪增壓六氣缸引擎。

1986年,出口版增設3F汽油引擎選擇。

1988年8月,日本本土嘅高級車有得揀後氣墊避震;同時14B取代咗13B引擎,日本本土同出口版都有得揀。

1990年,1HZ(渦流室式)同埋1HD(直接噴注)六氣缸柴油引擎,分別取代咗2H同埋12H-T引擎選擇。同年開始,歐洲版改配Caetano Optimo II車身。

第三代(B40系、B50系)[編輯]

初期版本[編輯]

1993年1月,豐田推出第三代Coaster。新車嘅引擎被移前,日本本土高級車嘅前獨立加後氣墊避震選擇改成前獨立加全氣墊避震;新設計車身,冷氣蒸發器由車尾頂部搬咗去車頭頂部,車頭燈可以係圓燈或方燈。車身全長6.255米(B40系)或者6.99米(B50系),另外亦出現過由短陣改短尾輪跨而成、長5.4或5.5米嘅超短版,同埋由長陣加長尾輪跨而成嘅超長版。另外亦為薩爾瓦多推出雙門版,尾門擺喺尾輪跨。初時嘅引擎選擇,有3B、14B(只限出口)、1HZ、1HD同埋3RZ(汽油,只限出口)。

1995年,豐田向日本本土推出四驅版Coaster(長陣,車型代號B55),採用同廠Mega Cruiser四驅車嘅驅動組件,行單尾轆兼有全獨立避震,車身比尾驅版高咗一截。佢亦係第一款Coaster用15B渦輪增壓引擎,1996年開始15B亦有作為歐盟二型排放引擎賣出口,不過只配落尾驅版。

1996年,Coaster亦開始以代工生產形式畀日野發售,是為日野Liésse II,規格同豐田牌頭嘅Coaster相若。

1997年,豐田推出混能版Coaster(車型代號HZB50改),係豐田第一款混能車,架車有一副5E-FE引擎發電。同年豐田改出另一款四驅版Coaster(長陣,車型代號B58,只限右軚),尾軸改為尾驅版嘅款式,而唔係原本嘅單尾胎。

2000年有8架石油氣引擎嘅Coaster運咗去香港試車,係四款參與「另類燃料小型巴士試驗計劃」嘅車款之一[2],最後得佢一款試驗成功。同年10月嘅第34屆東京車展,豐田展出Coaster混能遊覽巴士。

2001年初,豐田推出長7.725米嘅超長陣版(車型代號同一般長陣版一樣係B50),淨係賣出口。同長陣版相比,軸距同埋尾輪跨都長咗。

2001年小改[編輯]

2001年8月,Coaster作咗一次小改。佢車頭水箱網設計轉咗,兼再冇圓燈版;車尾燈外殼變咗,指揮燈個位改為透明。超長陣版嘅車型代號同時分拆為B59。同時石油氣版開始投產,引擎係1BZ,2002年3月開始亦向日本本土推銷。

2004年,因應日本平成15年(2003年)廢氣排放標準實施,日本本土嘅柴油車改配日野N04C引擎,而3B同埋1HD亦自此冇再配落Coaster度,同時四驅版宣佈停產。2004年10月,Coaster嘅車身生產事業轉咗畀豐田車體。

2006年,日野N04C引擎亦開始賣出口,畀需要歐盟四型或以上排放標準嘅地方用。

2007年小改[編輯]

2007年7月,Coaster嚟多一次小改,車頭燈同車頭泵把設計唔同咗,水箱網明顯加大;喺一啲2001年小改嘅車型已經出現嘅車側指揮燈,由呢一刻開始改為全面設置。有車價貴同埋喺嚴寒天氣輸出下降缺點嘅混能版宣佈停產。引擎選擇冇大變動,但汽油引擎由3RZ改為2TR。

歐洲版[編輯]

賣去歐洲嘅第三代Coaster同第二代一樣安排,都係由豐田出Coaster底盤畀Salvador Caetano,車身由後者做。最初嘅車身係Optimo III,1996年改成Optimo IV,2000年改成Optimo V。2007年左軑版改配Optimo 7(代號CS700)車身,但右軑版去到2012年先至跟隨。

用過嘅引擎包括1HZ(歐盟一型)、15B(歐盟二型、三型)同埋日野N04C(歐盟四型、五型)。

2010年代中,由於遲遲未有歐盟六型引擎等原因,Caetano Optimo系列停產,豐田Coaster撤出歐洲市場[3]

四川一汽豐田柯斯達[編輯]

喺八九十年代,中國大陸係豐田Coaster嘅主要出口市場。由成都一汽同埋豐田合資嘅四川一汽豐田,2000年開始喺中國大陸生產豐田Coaster,喺當地嘅型號名係「柯斯達」,淨係有出左軚長陣版,中國大陸車型代號SCT6700系列

最初時嘅外型跟返日本嘅第三代最早期款式,配15B或者3RZ引擎,車型代號分別係前獨立避震嘅B53同埋前後葉片避震嘅B54。

2007年1月,柯斯達第一次小改,車頭燈同車頭泵把設計唔同咗,水箱網明顯加大,呢個車咀設計即係半年後日本製Coaster開始採用嗰隻款;前後葉片避震版本停產,引擎選擇改為2TR同埋日野N04C。

2013年1月,柯斯達第二次小改,水箱網設計變咗,豐田標誌擺喺佢中間;車頭擋風玻璃下面黑色面積明顯加大。引擎選擇改嗮,包括有6GR汽油、3TR汽油同埋日野N041柴油。即使豐田喺2017年開始出新一代Coaster,呢個版本嘅柯斯達仍然繼續生產。

大概2019年開始,柯斯達改為淨係提供9GR汽油引擎。

第四代(B60系、B70系、B80系)[編輯]

2016年12月22號,豐田宣佈推出第四代Coaster,由2017年1月23號開始賣。由呢一代Coaster開始,車身生產由豐田車體喺愛知縣嘅吉原工場改咗去豐田車體屬下嘅岐阜車體。新車身嘅骨架經過強化,加強翻側保護,車廂空間亦增加咗[4]。氣墊避震嘅選擇就取消咗。

第四代Coaster一開始只有長6.255米嘅短陣版(B60系)同埋長6.99米嘅長陣版(B70系),未有同時推出超長陣版。而由短陣改短尾輪跨而成嘅超短版仍然有賣。日本本土嘅引擎選擇淨係得日野N04C系列,佢亦有作為歐盟五型或以上排放引擎賣出口;其餘嘅引擎選擇有豐田14B、1HZ、1BZ同埋2TR。

由日野賣嘅版本就係第二代Liésse II,喺2016年12月26號公佈,由2017年1月6號開始賣。

2019年7月,豐田宣佈推出長7.725米嘅超長陣版(B80系),喺日本本土同埋出口市場都有賣。

參考[編輯]

  1. 1.0 1.1 1.2 1.3 1.4 1.5 Vehicle Identification Manual. Toyota. 1984. No.97913-84.
  2. 另類燃料小型巴士試驗計劃報告 互聯網檔案館歸檔,歸檔日期2005年5月15號,.-香港環境保護署,2001年6月
  3. Caetano iTrabus Iveco Daily 70C17,Bus & Coach Buyer,2017年1月31號
  4. 【有新款小巴坐】Toyota Coaster 24年來首度大轉款,MenClub,2016年12月22號

出面網頁[編輯]