亞歷山大丹尼士Enviro 500

出自維基百科,自由嘅百科全書
Jump to navigation Jump to search
TransBus Enviro 500/亞歷山大丹尼士Enviro 500/亞歷山大丹尼士Enviro 500H(Trident E500底盤)
TransBus Enviro 500/Alexander Dennis Enviro 500/Alexander Dennis Enviro 500H (Trident E500 chassis)
ATEx.jpg
香港九龍巴士一架Enviro 500
New York Sightseeing 71609.jpg
美國紐約市一架開篷版Enviro 500
Gyeonggi Bus Route 7770.jpg
喺南韓試行嘅12.8米矮身版Enviro 500
製造廠TransBus International
/亞歷山大丹尼士
邊道出英格蘭Guildford
取代咗丹尼士三叉戟3型
製造年份2002年—
主要對手富豪B9TL
Scania K310UD
規格
11.3米、12米、12.8米
2.55米
引擎康明斯ISMe/ISM/ISLe/ISL
波箱Voith DIWA
ZF Ecomat
Allison B500R
GM-Allison EP50(混能車驅動系統)

亞歷山大丹尼士Enviro 500Alexander Dennis Enviro 500),原本叫TransBus Enviro 500,係由英國亞歷山大丹尼士(同佢嘅前身TransBus International)出嘅三軸低地台雙層巴士,喺2002年亮相。

Enviro 500係屬於「完整巴士」設計,不過底盤可以配第二啲車身,車身亦可以配第二啲底盤。

Enviro 500初頭係設計畀香港市場,後來個設計亦喺歐洲同埋大洋洲賣得出。而北美洲版Enviro 500亦係由原本嘅香港版發展而成。後來兩款Enviro 500設計嘅發展因應唔同嘅市場需要而各行各路。

設計[編輯]

香港/歐洲/大洋洲版[編輯]

Enviro 500底盤(前門附近嘅亞歷山大丹尼士金屬牌上面嘅車輛型號係Trident E500)係由丹尼士三叉戟3型底盤發展而成。喺推出初期,Enviro 500同三叉戟3型一樣係配康明斯ISMe-335歐盟三型引擎,波箱配搭係Voith DIWA864.3E四前速或者ZF 5HP602C五前速,2003年開始亦可以配Voith DIWA864.5四前速,油缸由三叉戟3型分開兩個擺喺中軸前面改為一大個擺喺頭軸右後面。而車身設計係源自Enviro 300單層巴士,上層車頭設計同Plaxton President車身相似,並且配直樓梯。車身全長12米,闊度由三叉戟3型嘅2.5米加闊到2.55米。

2003年後期,廠方推出經修改嘅Enviro 500車身,車嘴同埋車尾設計改咗少少,而呢隻車身亦可以配三軸版富豪B9TL底盤。冇幾耐之後巴士公司改用另一款車尾燈,令到上層指揮燈只可以用較微型嘅款式。2005年,ZF 6HP602六前速波箱取代咗ZF 5HP602C波箱選擇。

其後Enviro 500嘅設計仍然不斷改良。2007年開始,Enviro 500改配康明斯ISLe-340歐盟四型引擎;2008年,上層車尾設計又改咗少少,以容納大啲嘅指揮燈,並加入全長11.3米版本,而油缸可以係分開兩個擺喺中軸前面,亦可以配曲樓梯;2009年開始,改配康明斯ISLe-340歐盟五型引擎;2010年,Enviro 500亦有配ZF 6HP604六前速波箱。

Enviro 500車身可以係喺蘇格蘭由亞歷山大丹尼士嵌,又或者以散件形式運去外地嵌。喺2008年亞歷山大丹尼士同深圳五洲龍汽車有限公司訂下裝嵌車身協議,幫手同遠東地區嘅亞歷山大丹尼士巴士嵌車身[1],但嗰時香港嘅九龍巴士同埋龍運巴士就搵咗珠海廣通客車嵌車身;2011年下半年開始所有香港版Enviro 500車身都係珠海廣通客車嵌。

北美洲版[編輯]

北美版Enviro 500巴士係建基於2003年推出嘅設計,全長同樣係12米(大概40呎),但就改為啱當地嘅規格,而全車有至少六成嘅組件係喺美國揾返嚟。架車係用符合美國環保局廢氣排放標準EPA 2004嘅康明斯ISM 330引擎,可以配Voith DIWA864.3E四前速或者ZF 6HP602六前速波箱。油缸係分開兩個擺喺頭軸後面,一個喺左邊嘅樓梯底,另一個扁身嘅喺右邊。架車係成架嵌好晒先至出口。

喺2007年,亞歷山大丹尼士推出北美版Enviro 500第二型,同時新加入全長12.8米(42呎)版本。架車嘅引擎冷卻系統變咗,散熱器由原本擺喺引擎右邊改成引擎左右邊各一個,康明斯ISM 330引擎符合EPA 2007廢氣排放標準,波箱選擇改為ZF 6HP602六前速、Voith DIWA864.5四前速同埋Allison B500R六前速。

2008年,亞歷山大丹尼士推出Enviro 500第二型嘅柴油/電力混合驅動版,即係Enviro 500H,佢用GM-Allison EP50驅動系統,同埋康明斯ISL 330(EPA 2007)引擎。巴士全長12.8米,下層車廂因為車尾多咗組件而縮短咗,最後一排座椅喺尾軸上面。

2008年底亞歷山大丹尼士宣佈賣去美國嘅北美版Enviro 500由美國ElDorado National嵌車身[2],令佢符合當地嘅「買美國貨」(Buy America)條款。

去到2011年,亞歷山大丹尼士推出北美版Enviro 500第三型,車頭改用同廠Enviro 400車身嘅設計,引擎改為符合EPA 2010廢氣排放標準嘅康明斯ISL 330或ISL 380。另外長12.8米嘅版本多咗隻大概高13呎半嘅矮身版,下層車廂同Enviro 500H一樣係縮短咗,而油缸就擺喺下層車廂後面。

香港[編輯]

九龍巴士[編輯]

Enviro 500係九龍巴士旗下第二代超低地台巴士嘅第一款車型,亦係第一款用直樓梯嘅車型(之前香港巴士普遍用曲樓梯)。巴士車身同其他九巴嘅超低地台巴士一樣以香檳金色為主色,但車身裙腳油咗啡色。

TransBus International宣佈開始研製Enviro 500之後,九巴將2002年交貨嘅100架12米丹尼士三叉戟3型訂單嘅其中20架改為12米Enviro 500。同年稍後,九巴再訂多100架Enviro 500。第一架Enviro 500喺2002年11月12號運抵香港,並喺2003年1月登記。其餘119架就喺2003年3月至11月陸續投入服務。

2003年,九巴再訂多65架Enviro 500,隨後再增訂50架。呢兩批車車身有幾個小改動。其中112架巴士喺2003年11月到2005年6月投入服務,而剩低3架巴士未攞牌就轉投同集團嘅龍運巴士

2005年,九巴訂咗25架經修改車身同埋改用另一款車尾燈嘅Enviro 500,其中24架喺2006年初投入服務,另外一架配歐盟四型廢氣排放標準引擎嘅巴士喺2006年5月投入服務,架車喺2009年2月換咗隻歐盟五型排放標準引擎[3]。2005年底九巴再訂多15架Enviro 500,全部喺2006年8月投入服務。

2008年九巴訂咗9架配歐盟四型引擎嘅Enviro 500,上層車尾設計改咗少少,下層車尾太平門俾一塊緊急逃生玻璃取代。車身由珠海廣通客車嵌。巴士喺2009年中陸續交貨,其中一架喺香港加咗行李架,並喺7月投入服務,其餘嘅喺8月投入服務。其後九巴再訂多46架配歐盟四型引擎嘅Enviro 500,其中20架喺攞牌之前已經調咗去龍運巴士,至於冇調走嗰26架就喺2010至2011年出。

九巴喺2010年再訂多35架Enviro 500,但係同上一批一樣,有啲喺攞牌之前已經調咗去龍運巴士。至於冇調走嗰5架喺2011年底出。

一架Enviro 500(ATE180,LN5481)喺2008年3月31號天水圍車廠火警中燒毀而報廢。

龍運巴士[編輯]

2005年8月,龍運巴士從母公司九巴引入其餘3架未攞牌嘅12米Enviro 500,最初係行香港迪士尼樂園巴士線R8,後來3架車裝晒行李架,改行其他路線。

龍運巴士喺2005年底訂咗5架經修改車身嘅Enviro 500,全部裝定晒行李架,其中4架配普通座椅嘅喺2006年6月至7月投入服務,而另外1架配客車座椅嘅喺2006年7月投入服務。

2008年龍運巴士訂咗7架配歐盟四型引擎嘅Enviro 500,同樣全部裝定晒行李架,上層車尾設計改咗少少。車身由珠海廣通客車嵌。頭6架配普通座椅嘅喺2009年5月至9月出,而另外1架配客車座椅嘅喺2009年10月出。其後龍運巴士再訂多5架配歐盟四型引擎嘅Enviro 500,頭4架喺2009年12月出,另外一架配客車座椅嘅喺2010年4月出。喺2010年上半年,龍運巴士再有20架原本屬於九巴訂單、配普通座椅嘅Enviro 500出街。

2010年龍運巴士訂多6架Enviro 500,另外加多30架原本屬於九巴訂單、配普通座椅嘅Enviro 500,喺2011年5月至2013年出。

城巴[編輯]

城巴喺姊妹公司新世界第一巴士訂咗首批Enviro 500後,動用購買權額外加多10架12米巴士訂單,巴士設有行李架。車身喺新巴創富道車廠嵌。10架巴士喺2007年12月至2008年1月投入服務,主要行城巴深西快線B3/B3A/B3X。

2008年,城巴再買多18架12米Enviro 500巴士,不過冇行李架同埋改用曲樓梯,上層車尾設計改咗少少,油缸由前一批嘅單一油缸喺樓梯底,變成分開兩個擺喺中軸前少少嘅位置。由呢批車開始,車身改由深圳五洲龍嵌。全部巴士已經喺2009年投入服務。

其後城巴再訂多兩批共77架配歐盟五型引擎嘅12米Enviro 500,頭批44架喺2010年5月至9月出,另一批喺2010年9月至2011年1月出。

2011年城巴再訂多115架12米Enviro 500,其中頭3架裝埋行李架行住城巴機場快線,車身改由珠海廣通客車嵌,2012年6月至2013年出。

港鐵巴士[編輯]

九廣鐵路公司喺2007年1月訂購9架12米Enviro 500[4]。首架已裝嵌巴士喺2007年11月24號運到香港。2007年12月2號兩鐵合併後,呢批車根據兩鐵合併條文全數租畀港鐵公司。佢哋喺2008年初投入服務,以九巴「港鐵東鐵綫接駁巴士」名義為港鐵服役。

後來港鐵公司再引入新一批共15架Enviro 500,批車上層車尾設計改咗少少。車身由深圳五洲龍嵌,2009年春天開始交貨,並喺同年4至8月投入服務,有啲一開始就油咗新色。

2011年港鐵公司再訂多9架Enviro 500,不過係11.3米版,車身改由珠海廣通客車嵌,2012年底出。

新世界第一巴士[編輯]

新世界第一巴士喺2007年1月訂購18架12米Enviro 500[4],其中17架喺2008年2月至5月開始投入服務,另外一架冧巴5504嘅巴士,就喺2008年4月至5月喺澳洲做測試以及出席當地商用車展覽作推銷示範,之後喺同年6月返港並投入服務。

2008年,新巴訂咗20架11.3米Enviro 500巴士,由呢批車開始,車身改由深圳五洲龍嵌,佢哋喺2009年7至10月投入服務。之後新巴再訂多20架配歐盟五型引擎嘅11.3米Enviro 500,全部喺2010年初出。

後來新巴再訂多24架配歐盟五型引擎嘅12米Enviro 500,佢哋喺2011年1月至5月出。

2011年新巴再訂多13架12米Enviro 500,車身改由珠海廣通客車嵌,全部喺2012年5月出。2012年新巴再訂多28架12米Enviro 500,亦係北美洲以外最後一批舊版Enviro 500,2013年1月至5月出。

中華電力[編輯]

中電集團喺2008年訂購5架12米Enviro 500做員工巴士,車身由深圳五洲龍嵌,全部喺2009年6月投入服務。巴士所有規格和城巴同期裝嵌嘅Enviro 500相同,但冇企位同埋輪椅位(裝咗固定座位),以及喺上層車頭裝咗車速顯示器。

北美洲[編輯]

亞歷山大丹尼士自2004年開始以呢款巴士去開拓北美洲地區市場,佢曾經先後整過幾架示範車(一架長12米、兩架長12.8米、一架長12.8米矮身版)喺美國加拿大用。

試用過Enviro 500巴士嘅公司有西雅圖以北Snohomish County嘅Community Transit(提供往返縣內同埋西雅圖市中心嘅巴士服務,2005年12月)、加州戴維斯市嘅Unitrans(2006年1月,兩個禮拜)、渥太華嘅OC Transpo(2006年6月28號—7月12號、2007年2月)以及三藩市嘅Muni(2007年11月—2008年1月)等等[5]

另外亞歷山大丹尼士亦整過一架12米Enviro 500示範車,畀巴士公司作長期租用。巴士首先由華盛頓州嘅Community Transit喺2007至2009年租用,架車自2007年8月1號開始嘅一年內行部份喺平日繁忙時間往返西雅圖市中心嘅通勤巴士線。其後架車自2010年開始租畀亞伯達省Strathcona County嘅Strathcona County Transit。

喺2014年底,有兩架Enviro 500示範車運咗去美加以外地方試行,一架12.8米巴士去咗墨西哥,一架12.8米矮身版巴士去咗南韓。

加拿大[編輯]

加拿大卑詩省嘅BC Transit訂購9架Enviro 500雙層巴士,全部被編去維多利亞市,2005年初投入服務,其中兩架喺投入服務之前,曾經去美國做推廣。後來BC Transit再訂購26架Enviro 500,全部巴士喺2008年投入服務,其中16架被編去維多利亞市,其餘10架就被編去Kelowna。2009年,BC Transit接收咗一架Enviro 500H做試驗。

安大略省嘅GO Transit買咗12架12.8米版Enviro 500單門雙層巴士,首架巴士喺2007年底付運加拿大,連同其餘11架喺2008年初投入服務,及後再買多10架,2009年初投入服務。其後佢訂咗25架配新車頭嘅12.8米矮身版Enviro 500,2012年開始交貨,及後再買多70架,2013年開始交貨。

渥太華OC Transpo所訂購,用嚟做進一步測試嘅三架12米Enviro 500喺2008年尾陸續付運,2009年初投入服務。之後佢訂咗75架配新車頭嘅12.8米矮身版Enviro 500,2012至2013年交貨,而原有嘅3架12米Enviro 500就賣咗畀BC Transit。

Strathcona County Transit訂咗14架12.8米矮身版Enviro 500,2013至2014年交貨。

美國[編輯]

美國方面,錦倫旅運(Gray Line)訂購20架開篷版Enviro 500,2005年春季投入服務,後來再加訂13架。開篷版Enviro 500係用作遊客觀光用途,全部喺紐約市行。另有3架單門版Enviro 500喺2005年夏季喺三藩市投入服務。

拉斯維加斯嘅Citizens Area Transit(CAT,已改叫RTC Transit)訂購50架Enviro 500巴士用嚟行The Deuce嘅Strip賭場穿梭巴士線,全部喺2005年10月投入服務。為適應內華達州酷熱乾燥嘅天氣,呢啲巴士嘅冷氣裝置被加強,車尾引擎室加設散熱通風網。其中一架Enviro 500巴士(冧巴224)2006年7月19號晚喺15號州際公路同一架貨車相撞,巴士事後報銷[6]。2006年10月,CAT斥資2,980萬美金,加訂41架12米Enviro 500巴士,巴士喺2007年底開始投入服務。後來CAT加訂40架12.8米Enviro 500巴士,巴士另設一條曲樓梯,以方便乘客更快上落,全部喺2008年投入服務。

Les Cars Rouge觀光公司亦買咗16架開篷版Enviro 500巴士,其中8架喺三藩市行,另外8架喺華盛頓行。

Community Transit喺試緊Enviro 500示範車期間訂咗23架12.8米Enviro 500巴士,喺2011年出。

加州Davis嘅Unitrans訂咗兩架Enviro 500,佢哋係第一批由ElDorado National嵌車身嘅Enviro 500,2010年初出。

加州San Luis Obispo嘅SLO Transit訂咗1架Enviro 500,2010年底出。

服務夏威夷縣嘅Hele-On Bus喺2011年上半年引入1架12.8米Enviro 500。

英國[編輯]

英國First Glasgow引入25架單門版Enviro 500,巴士喺2009年4月至6月投入服務。

澳洲[編輯]

澳洲墨爾本嘅Rockleigh Tours喺2011年引入1架配Kiwi Bus Builders車身嘅Enviro 500,架車係第一架唔係配原廠車身嘅Enviro 500巴士。

配Enviro 500車身嘅富豪B9TL[編輯]

香港龍運巴士一架富豪B9TL/Enviro 500

九巴首架配Enviro 500車身嘅富豪B9TL巴士喺2005年1月完成登記,並喺同年2月投入服務。及後九巴同龍運巴士都有訂購配Enviro 500車身嘅B9TL巴士。

愛爾蘭嘅Dublin Bus喺2005年買入為數20架配Enviro 500車身嘅富豪B9TL巴士,2007年再入多50架。呢70個Enviro 500車身特別之處係佢哋係冇冷氣嘅(其餘嘅都係有冷氣)。

停產[編輯]

亞歷山大丹尼士喺2012年推出新嘅亞歷山大丹尼士Enviro 500 MMC,呢一代Enviro 500就得返左軚版。Enviro 500 MMC喺2014年有埋左軚版之後,Enviro 500就停產。

參考[編輯]

  1. 丹尼斯客車落戶五洲龍(簡體)[失咗效嘅鏈],深圳五洲龍汽車有限公司網站官方新聞稿(2009年3月14號)
  2. "ADL announces US assembly deal". 原著喺2009年7月6號歸檔. 喺2018年12月6號搵到.
  3. 九巴率先引進歐盟第五代環保引擎
  4. 4.0 4.1 FLYING START AS MARKET LEADER WINS ?25M OF NEW ORDERS IN FIRST WEEK OF 2007 互聯網檔案館歸檔,歸檔日期2007年9月27號,.,亞歷山大丹尼士新聞稿(英文)
  5. "Double Decker Bus Trial SFMTA Fact Sheet". 原著喺2012年9月5號歸檔. 喺2018年12月6號搵到.
  6. "Fatal Accident on I-15 Closed Freeway For Hours". 原著喺2015年6月5號歸檔. 喺2018年12月6號搵到.

出面網頁[編輯]