丹尼士三叉戟3型

出自維基百科,自由嘅百科全書
跳去: 定向搵嘢
丹尼士三叉戟3型
Dennis Trident 3
JF8429.jpg
香港新世界第一巴士嘅丹尼士三叉戟3型
Sgtrident.JPG
喺新加坡嘅丹尼士三叉戟3型
製造廠 丹尼士車廠
/TransBus International
邊道出 英格蘭Guildford
取代咗 丹尼士巨龍/禿鷹
製造年份 1996年—2002年
後繼產品 丹尼士Trident E500(TransBus Enviro 500)
主要對手 猛獅24.310/24.350
Neoplan Centroliner N4026/3, N4426/3
富豪超級奧林比安
規格
10.3米、10.6米、11.3米、12米
2.5米
4.17米、4.3米、4.4米
引擎 康明斯M11-305E
康明斯ISM-330
康明斯ISMe335
波箱 Voith DIWA
ZF Ecomat

丹尼士三叉戟3型[1]Dennis Trident 3;以丹尼士三叉戟/Dennis Trident名義賣)係一款由英國丹尼士車廠出嘅三軸低地台雙層巴士,亦係丹尼士嘅第一款低地台雙層巴士,喺1996年推出。佢取代咗丹尼士巨龍/禿鷹雙層巴士。丹尼士車廠喺2001年正式併入TransBus International之後,三叉戟3型就改由TransBus出。

設計[編輯]

丹尼士三叉戟3型底盤設計係源自丹尼士長矛/飛箭。佢有打直擺嘅後置式引擎,散熱水箱擺喺引擎右邊。中軸係驅動軸,而尾軸係輔助車軸,用嚟承擔車尾重量同埋縮短後輪跨。三叉戟3型底盤有4隻長度揀:10.3米、10.6米、11.3米同埋12米。其中10.3米版嘅前輪跨短啲。

佢可以配康明斯M11-305E歐盟二型引擎,後來改配康明斯ISMe335歐盟三型引擎,而北美版就配康明斯ISM-330引擎。初時波箱配搭係Voith DIWA863.3或者ZF 5HP590,後來多咗Voith DIWA864.4同埋Voith DIWA864.3,而後期嘅就用Voith DIWA864.3E或ZF 5HP602。三叉戟3型可以配亞歷山大ALX500或者都普金屬部分DM5000車身。

第一架樣辦車[編輯]

第一架三叉戟3型樣辦車喺1996年被送去亞歷山大車身公司嵌咗一個有R型車頭設計嘅車身,而車身其餘部分就係ALX500嘅設計。呢架車俾丹尼士車廠留起作車型發展用途。2005年,架車改咗做開頂兼封咗前門,成為英國太陽報嘅宣傳車。

香港[編輯]

九龍巴士[編輯]

九龍巴士有兩架丹尼士三叉戟3型樣辦車。第一架喺1997年2月嵌好個亞歷山大ALX500樣辦車身,之後佢留喺英國做一連串測試,去到1998年至運去香港,1999年投入服務。

而第二架樣辦車亦係配亞歷山大ALX500樣辦車身,喺1997年5月運到香港,成為香港第一架低地台雙層巴士。之後架巴士俾人油成香檳色、貼埋顯示車廂地台嘅紅線同埋幾個人仔嘅貼紙,以宣傳佢嘅「超低地台」(九巴叫法)設計。巴士喺1997年11月17號投入服務。

1998至1999年,九巴引入186架12米丹尼士三叉戟3型巴士,116架配亞歷山大ALX500車身,70架配都普金屬部分DM5000車身。之後喺1999至2000年間引入50架配都普金屬部分DM5000車身嘅10.6米三叉戟3型巴士。

到咗2000年,九巴引入多110架配都普金屬部分DM5000車身同埋電子路線牌嘅12米三叉戟3型巴士。2001年九巴引入多50架10.6米三叉戟3型巴士,不過係配改良型亞歷山大ALX500車身,其中兩架特別改配歐盟三型引擎同埋油咗漸變嘅車身色彩。

2002年,九巴引入50架配改良型亞歷山大ALX500車身同埋歐盟三型引擎嘅10.6米三叉戟3型巴士。同年九巴訂咗100架配同款車身嘅12米三叉戟3型巴士,不過後來改為淨係要80架,批車喺2002至2003年出。

2002年九巴亦買咗14架原本屬於龍運巴士、配亞歷山大ALX500車身嘅12米丹尼士三叉戟3型巴士。2010至2015年,九巴再由龍運巴士買103架丹尼士三叉戟3型巴士。

九巴有幾架丹尼士三叉戟3型巴士焚燬報廢。一架12米版喺2002年底燒咗,隨後喺2003年退役;三架12米版(其中一架係前龍運嘅車)同埋一架10.6米版喺2008年3月31號响天水圍嘅九巴廠入面燒咗,同年7月退役。一架12米版喺2015年1月燒咗,同年6月退役。由於車齡關係,九巴嘅丹尼士三叉戟3型巴士由2015年底開始被淘汰,其中喺1997年投入服務嘅第一架三叉戟3型巴士,喺2015年9月22號退役後由九巴保留。

龍運巴士[編輯]

龍運巴士喺1997至1998年引入150架配亞歷山大ALX500車身嘅12米丹尼士三叉戟3型巴士,行北大嶼山機場巴士線,其中25架係客車版,有大啲嘅行李架。

其中一架巴士因為喺1999年7月燒咗之後退役。後來查出架車起火係因為設計問題,因此丹尼士車廠整咗一架配都普金屬部分DM5000車身嘅三叉戟3型巴士,並喺2000年投入服務。

後來由於車隊過剩,龍運巴士自1999年起陸續將其中20架三叉戟3型巴士租咗畀九巴,其中14架喺2002年賣咗畀九巴,而其餘6架喺2005年或之前返咗龍運巴士。2010至2015年,龍運再有103架丹尼士三叉戟3型巴士賣咗畀九巴,另外有兩架丹尼士三叉戟3型喺2010同埋2011年撞車而提早退役。剩低30架亞歷山大ALX500車身嘅三叉戟3型巴士,包括全部25架客車版,都喺2016年5至6月退役。

城巴[編輯]

城巴有三架丹尼士三叉戟3型樣辦車,一架係配都普金屬部分DM5000車身嘅客車、一架係配亞歷山大ALX500樣辦車身嘅巴士,同埋一架係配都普金屬部分DM5000車身嘅巴士。

城巴喺1997至1998年引入61架12米丹尼士三叉戟3型客車,用嚟行機場線,11架配亞歷山大ALX500車身,50架配都普金屬部分DM5000車身。另外又喺1998至1999年引入60架配都普金屬部分DM5000車身嘅12米三叉戟3型半客車(單門、雙門版各佔一半。其中一架雙門版去到2000年至出)同埋40架配都普金屬部分DM5000車身嘅12米三叉戟3型巴士。

另外城巴喺1999年出咗一架配都普金屬部分DM5000車身嘅10.6米三叉戟3型客車,呢架亦係丹尼士出嘅第一架10.6米版三叉戟3型。

城巴喺2003年買咗9架原屬新巴、配歐盟三型引擎嘅12米三叉戟3型巴士。

由2010年開始,城巴陸續有三叉戟3型巴士同埋客車因為燒車或者撞車而提早退役,另外由2013年開始,城巴引入新嘅亞歷山大丹尼士Enviro 500客車去取代三叉戟3型客車行機場線,呢啲客車之中有兩架改行過境線,2016年退役;三架改做訓練巴士;八架賣咗畀冠忠巴士,2014年1月開始支援旗下新大嶼山巴士嘅過境線,2015年退役;兩架賣咗畀新大嶼山巴士,2016年退役;其餘嘅都係完全退役。而半客車亦由於車齡關係,由2014年底開始被淘汰。

新世界第一巴士[編輯]

新世界第一巴士喺1998年投得中巴88條線之後,就決定喺2000年8月31號前(即係兩年內)引入合共500架新嘅「特低地台」巴士(新巴叫法)去取代喺中巴買返嚟嘅冇冷氣巴士。第一批278架巴士之中有202架係12米丹尼士三叉戟3型巴士,160架配亞歷山大ALX500車身,42架配都普金屬部分DM5000車身。喺1998年9月1號交接當日,有十幾架投入服務,其餘嘅喺1998至1999年投入服務。

而第二批222架巴士之中有182架係丹尼士三叉戟3型巴士。50架係12米版,30架配亞歷山大ALX500車身,20架配都普金屬部分DM5000車身;30架係11.3米版,配亞歷山大ALX500車身;62架係10.6米版,配亞歷山大ALX500車身;40架係10.3米版,配都普金屬部分DM5000矮車身,用嚟行頂線。佢哋喺1999至2000年投入服務。

新巴喺2000年引入1架配都普金屬部分DM5000車身嘅10.6米版三叉戟3型巴士。其後再喺2002年引入配歐盟三型引擎嘅三叉戟3型巴士,其中21架係12米版,配改良型亞歷山大ALX500車身;而其餘20架係10.3米版,配都普金屬部分DM5000矮車身(喺亞歷山大廠嵌),其中後者係史上最後一批巴士配都普金屬部分車身。

後來由於車隊過剩,新巴喺2003年將頭9架配歐盟三型引擎嘅12米三叉戟3型巴士賣咗畀城巴,再喺2004年底至2005年期間賣咗47架10.6米版同埋6架11.3米版三叉戟3型巴士畀九廣鐵路公司。

2015年,新巴將其中5架配歐盟三型引擎嘅12米三叉戟3型巴士改為開篷巴士,用嚟行人力車觀光巴士線。同年,新巴嘅丹尼士三叉戟3型巴士亦因車齡關係而開始被淘汰。

九廣鐵路公司[編輯]

九廣鐵路公司喺2000年引入22架11.3米版丹尼士三叉戟3型巴士,配改良型亞歷山大ALX500車身,服務新界西北(包括接駁西鐵路線),其後喺2004年底至2005年期間從自新巴買入47架10.6米版同埋6架11.3米版三叉戟3型巴士(全部配亞歷山大車身),以取代旗下嘅都城嘉慕威曼都城巴士,行接駁東鐵或者西鐵嘅路線。

兩鐵合併後九鐵公司將巴士租畀港鐵公司,行西鐵綫嘅港鐵巴士同埋東鐵綫嘅港鐵接駁巴士。2009年底開始,原本行港鐵接駁巴士線嘅三叉戟3型巴士全部改行港鐵巴士線。二手嘅三叉戟3型巴士喺2015至2016年退役。

加拿大[編輯]

加拿大卑詩省嘅BC Transit喺1999年訂咗11架配都普金屬部分DM5000車身嘅三叉戟3型巴士。其中一架喺付運期間損毀,而其餘10架就喺2000年喺Victoria投入服務。

2002年,BC Transit出多19架配都普金屬部分DM5000車身(喺亞歷山大廠嵌)嘅三叉戟3型巴士,其中一架係用嚟代替喺付運期間損毀嘅同款車。頭16架去咗Victoria,3架去咗Kelowna。

新加坡[編輯]

新加坡巴士公司(家下嘅新捷運)早喺1998年訂咗20架配都普金屬部分DM5000車身嘅三叉戟3型巴士,但由於丹尼士車廠要應付來自香港嘅大量訂單,因此底盤延遲至1999年底至開始陸續出廠。全部20架巴士喺2001年投入服務。

美國[編輯]

美國嘅錦倫旅運(Gray Line)喺2001年引入40架配都普金屬部分DM5000開篷車身嘅三叉戟3型巴士,佢哋喺紐約市同埋聖迭戈等城市投入服務。

進一步發展[編輯]

2002年,丹尼士三叉戟3型底盤俾TransBus改良,並配上全新車身,成為TransBus Enviro 500(後來改叫亞歷山大丹尼士Enviro 500)。2002年之後再冇已知嘅三叉戟3型底盤出廠。

[編輯]

  1. 喺巴士上車門側邊嘅金屬牌顯示嘅車輛型號係「TRIDENT」或者「TRIDENT 3」。