八達通

出自維基百科,自由嘅百科全書
跳去: 定向搵嘢
新巴上八達通拍卡機
港鐵嘅八達通拍卡機

八達通Octopus)係香港通用電子找數系統。八達通咭裏頭攝住原子晶片,增值後放響八達通機上高即可找數,堪稱「易過借火」。1997年9月1號八達通啟用,起初淨係巴士地下鐵路公共交通工具至用得,其後發展至各行各業,即如百貨公司食肆停車場之類,及後甚至愛嚟做學校寫字樓與及住宅大廈通行咭。初頭要用增值機增值,後經改良連鋪頭收銀機都得,而家陣信用咭銀行戶口自動過數亦冇問題。

八達通係世界至早電子貨幣之一,其普及程度亦係首屈一指。統計數字顯示,截至2005年有1240萬張八達通用緊,而每日就錄得超過900萬次嘟咭紀錄。八達通公司藉此佳績享譽國際,後嚟重幫荷蘭中國長沙興建當地電子過數系統。有消息指,八達通有意同深圳地鐵咭通用。

歷史[編輯]

香港地鐵公司1979年嗰時經已校好晒自動過數系統,當其時嘅車飛係一張磁力咭,分為單程飛同儲值飛。九廣鐵路則於1984年改用同類車飛,重嗌佢做通用儲值票。而去到1989年,通用儲值票經已應用到九巴城巴,甚至乎公共交通之外嘅行業添,譬如快餐店同自助影相之類。

地鐵公司響1993年宣佈將會改用一種可以隔空感應過數嘅車飛。為咗令到多啲市民受落,地鐵公司摟埋城巴、九巴同香港小輪於1994年成立聯俊達有限公司(2002年1月改名做八達通卡有限公司)。之不過當其時港島公共交通龍頭大佬中巴就杯葛此事。

歷經三年試用,八達通卒之響1997年9月1號正式啟用,其後短短3個月就賣出超過300萬張八達通。八達通起初淨係可以愛嚟搭聯俊達旗下五間公司嘅車,之但係到咗1999年,八達通開始應用於其他行業,同年推出自動增值服務及八達通手錶。2000年金管局派發牌照畀各大商舖,廢除八達通非交通類業務不得多過15%嘅不平等條例。2001年1月,啱啱宣佈放棄經營渡輪事業嘅油麻地小輪簽署新股東同意書,同意將股份讓畀新世界第一巴士同埋新世界第一渡輪。同年八達通公司消滅赤字,開始賺錢。

2003年6月29號香港政府決定將全港18,000個泊車位改用八達通咪錶。呢次大換血行動響2004年11月21號搞掂。與此同時,好多政府公共設施都開始改用八達通找數。2003年11月,八達通公司同荷蘭簽署一張1.2億歐羅嘅合約,幫荷蘭興建隔空嘟咭找數系統,一統荷蘭七國咁亂(NS、RET、GVB及HTM)嘅公共交通。

2005年11月,推出「八達通日日賞」優惠計劃。申請此計劃之人士,響指定商舖(包括惠康UA院線麥當勞等)買嘢,無論用任何方式(八達通、現金抑或信用咭)找數,即可幫八達通咭積分,儲夠積分可換購禮品。

其它用途[編輯]

警方用八達通可以查到卡主去過邊,有幫助破案,例如徐步高案。

出面網頁[編輯]