羊城通

出自維基百科,自由嘅百科全書
Jump to navigation Jump to search

羊城通粵拼joeng4 sing4 tung1)係中國廣州市嘅交通儲值卡,可用來坐公共汽車的士地鐵渡輪,亦可以用來喺某啲商店找數。而家已經加入咗嶺南通系統,所有羊城通卡唔使換卡就可以喺嶺南通嘅使用範圍裡邊用。

系統概述[編輯]

羊城通系統嘅全名係廣州市城市公共交通電子收費系統建設工程,係廣州市嘅一項重點工程。工程分為後台管理中心、前台公用子系統(公交、渡輪)同地鐵子系統,分別由廣州羊城通有限公司(原廣州交通電子收費營運有限公司)、廣州市公共交通數據管理中心同廣州地鐵公司負責起同管。

經營狀況[編輯]

  • 羊城通電子收費系統發展得好快。由2001年12月30號試行至今,已可用喺廣州市內所有公共汽(電)車、輪渡、地鐵各站同埋一啲電信業務同商務小額消費,應用區域亦都由廣州市區擴大到增城花都番禺佛山南海區等地。至而家已發行超過300萬張卡,每日刷卡超過咗180萬次。番禺原有嘅番禺通亦都逐步被羊城通替代。
  • 羊城通積極拓展緊跨區服務,希望一卡通曬珠江三角洲嘅公交電子收費。
  • 羊城通除咗繼續喺交通領域擴展(如停車場、出租車、路邊泊車咪表等)、仲拓展到電信電話同小額消費領域(藝術博物院同廣州動物園門票、部分麥當勞快餐店、超市、便利店等),使羊城通成為集公交通、電信通、商務通于一身嘅電子收費卡。
  • 羊城通卡嘅管理功能亦已經拓展到機關事業單位考勤、門禁系統、物業管理等領域,作為員工卡、小區業主卡、學生證等證照卡,為企業、住宅小區、校園等集體社區提供身份識別、門禁、員工考勤、保安巡更管理等社區內部管理。目前已成功應用喺司機考勤同翠雅苑嘅小區門禁系統 。2004年9月廣州大學城開通咗集公交、飯堂、醫療、圖書館通行、上機/上網通行、帶門禁的通道等功能嘅羊城通一卡通。

種類同價格[編輯]

羊城通有押金卡、紀念卡、聯名卡同異型卡四種。聯名卡除咗普通羊城通卡小額消費功能,仲有銀行卡理財消費功能。

  • 押金卡可以喺地鐵站服務亭、羊城通便利站同幾間知名連鎖便利店買到,售價係¥20,即係押金,退卡嗰時可以攞返。

不過宜家好多賣羊城通嘅地方都會出現押金卡缺貨嘅情況,跟著就兜售啲“紀念版”,通常賣¥35。但紀念版羊城通真係唔退得卡嘅,而且所謂嘅“紀念版”都係好普通,可以講通街嘅紀念版嘅款式都一樣,冇咩收藏意義。不過押金卡缺貨嘅問題其實原因在於押金卡嗰¥20可以退得返,所以好多人買卡都係搵押金卡先,好賣所以就成日缺貨。喺靠近交通樞紐嘅便利店,即使每隔兩三日就入二三十張卡返來賣,但都好快會賣嗮。

  • 紀念卡同異型卡無押金,唔退得;
  • 聯名卡無押金,芯片帳戶唔可以掛失;
  • 異型卡包括手表、鑰匙扣、手機掛繩等。

用法[編輯]

廣州的士上面嘅羊城通操作器

羊城通係一種非接觸式智能卡,係電子貨幣中使用上好方便。無論係進行交易定是充值,操作都好簡單。

用來畀錢[編輯]

用羊城通畀錢嗰陣,用者只需將羊城通卡放近機器嘅驗卡區域,錢就會自動被扣。交易時間平均0.3秒。交易完,讀卡器會“嘀”一聲響,顯示屏會顯示被扣嘅金額同卡嘅余額。而高音調、長時間嘅“嗶哩嗶哩”聲,就代表交易未完,羊城通機會著紅燈。常見嘅原因係張卡未對準驗卡區、或張卡唔夠錢。

由於羊城通係非接觸式智能卡,所以就算隔著几厘米嘅普通物料(如膠同皮等),只要對准驗卡區域,都可以感應得到,所以只需攞起荷包、手袋甚至係將裝有衫嘅袋放近驗卡區域,都可以進行羊城通交易。

充值[編輯]

  • 人工充值地點:市內知名連鎖便利店及餅屋(7-ELEVEN全家FamilyMart、Circle K、喜士多、Vango、華潤萬家便利超市、興安超市、聖安娜餅屋)、部分銀行同埋郵局、設有羊城通便利站嘅加盟士多、各個地鐵站入面嘅天天洗衣店、羊城通客戶服務中心、已加盟羊城通公司嘅中國福利彩票售賣店。(凡此類人工充值點門口都會有掛著“羊城通發行充值點”或者“羊城通便利站”字樣嘅招牌,或者門口貼住“羊城通充值服務”嘅門貼)
  • 自助充值機分布地點:市區設有“自助服務區”嘅中國工商銀行交通銀行中國民生銀行、地鐵站同商場入面嘅“好易”充值機、各區電信局嘅“交費易”電子交費機。(注:工商銀行祗係接受本行嘅提款卡同埋信用卡進行充值,其他銀行嘅提款卡一律無法識別。而其他充值機就接受卡面印有銀聯標識嘅各類型提款卡同信用卡。)
  • 捆綁銀行卡,當羊城通放喺自動充值機上就可以自動咁充值,不過呢個方法比較唔安全,所以很少市民會用。

注:目前喺各個地鐵站大堂嘅服務窗羊城通充值業務已經取消咗。

可以用得嘅地方[編輯]

睇埋:嶺南通#可以用得嘅地方

羊城通幾乎適用於廣州市(包括市區及花都增城從化南沙)所有嘅公共交通工具同埋部分嘅大型連鎖店,例如部分百佳、勝佳超市、麥當勞、肯德基快餐店同全線7-ELEVEN、全家FamilyMart、Circle K、喜士多、Vango便利店等。廣州好多新款機器都接受羊城通付款,包括收費公用電話亭等。

亦可以喺嶺南通支持嘅地區使用。

折扣優惠[編輯]

當使用羊城通坐地鐵嗰陣,地鐵公司會收取比單程票平嘅車費,折扣係單程票價嘅9.5折。

以前嘅優惠措施係,羊城通系統喺2001年12月30號投入試運行,嗰時為咗配合系統嘅應用同埋推廣,各公交公司都實行咗坐車(船)九五折嘅優惠措施,但係由2003年9月1日起,各公交公司對攞羊城通卡乘坐車(船)者恢復按物價部門核定嘅標準收費。乘客持羊城通卡乘坐公共汽車、渡輪,可以享受嘅九五折優惠被取消,祗有地鐵公司繼續保留9.5折優惠措施

退卡[編輯]

持卡人祗可喺羊城通客戶服務中心退卡。

范圍:僅限普通票卡,其他種類卡唔辦理該業務。普通票卡余額大于10元(含10元)須收取余額10%嘅手續費。

退卡方式:

  1. 票卡完好無損嘅,押金20蚊全額退還,回收票卡;
  2. 票卡損壞嘅,唔退還押金20蚊。(票卡損壞標準:卡面有折疊、劃花、扭曲、塗污、打窿、腐蝕或經任何液體浸泡導致票卡受損等;卡整體有缺損,如缺邊、缺角、裂痕等。)
  3. 現場讀得出卡入面嘅余額嘅,即時辦理退款手續;
  4. 現場讀唔出卡內余額嘅,需要經技術檢測核查7個工作日後,憑回執辦理退款手續。(注:票卡只可以作一次性退卡,押金同余額唔可以分開退還。)

客戶服務中心地址:

  1. 東華東:越秀區東華東路車路邊37號,東華南路巴士站後邊(營業時間:星期一至五 9:00-19:00,週末 10:00-16:00)
  2. 人民北:越秀區人民北路466號,西門口巴士站後邊(營業時間:每日 9:00-19:00)
  3. 公園前:越秀區地鐵公園前站站內J出口附近商舖(營業時間:每日 9:00-19:00)
  4. 體育西:天河區地鐵體育西路站站內G出口附近商鋪(營業時間:每日 9:00-19:00)
  5. 動物園:越秀區地鐵動物園站站內C出口附近商舖(營業時間:星期一至五 9:30-19:00,週末 10:00-16:00)
  6. 客村:海珠區地鐵客村站站內商舖(營業時間:每日 9:00-19:00)
  7. 魚珠:黃埔區地鐵魚珠站站內C出口附近商舖(營業時間:星期一至五 9:00-19:00,週末 10:00-16:00)
  8. 廣州東站:天河區地鐵廣州東站站內H/J出口附近商舖(營業時間:星期一至五 9:00-19:00,週末 10:00-16:00)
  9. 花地灣:荔灣區地鐵花地灣站站內A/D出口附近商舖(營業時間:星期一至五 9:00-19:00,週末 10:00-16:00)
  10. 黃閣汽車城:南沙區地鐵黃閣汽車城站站內A出口附近商舖(營業時間:星期一至五 10:00-19:00,週末 10:00-16:00)
  11. 漢溪長隆:番禺區地鐵漢溪長隆站站內C出口附近商舖(營業時間:每日 9:00-19:00)
  12. 白雲文化廣場:白雲區地鐵白雲文化廣場站站內C出口附近商舖(營業時間:星期一至五 9:30-19:00,週末 10:00-16:00)

缺點[編輯]

由於除學生卡、老人優待卡以外嘅羊城通都係唔記名嘅,唔見咗就只可以買過張新嘅,唔可以申請掛失。近排新開嘅羊城通捆綁銀行卡充值嘅業務,咁捆綁咗賬戶嘅持卡者更加唔可以唔見張卡,唔見嘅話銀行卡入面嘅存款就可能會被人充入羊城通卡使嗮。

創新不足,近年來推出嘅新產品都無受到消費者太大嘅青睞。譬如支付寶、財付通網上充值服務,由於羊城通(或者講嶺南通)遲遲未開始研發結合NFC技術嘅充值方式,導致用家眼見北京市政一卡通等其他城市嘅手機NFC充值服務,自己就要喺網上付款充值後,再跑到人工或自動充值網點進行飛充。而網充寶嘅高價錢、操作複雜性就更加睇唔出佢係一款面向大眾消費者嘅產品。

睇埋[編輯]

出面網頁[編輯]