花都

中華人民共和國 > 廣東省 > 廣州市 > 花都區

  想搵第二個意思嘅話，請睇花都 (搞清楚)。

花都（粵拼：faa1 dou1），原本係叫花縣（faa1 jyun6*2），係喺廣東廣州嘅一個市轄區，叫花都區，喺市北邊。中間改過做縣級市做花都市，後來撤市改區。

地理

地理上花縣係廣州嘅「北大門」，自古有「省城之屏障，南北粵之咽喉」嘅講法，向來都係軍事要地。按照而家嘅行政建制，廣州市入邊嘅花都，東邊係從化，南邊係白雲區。喺市界外，北邊係清遠清城，西邊係佛山三水。

史

大清乾隆時廣州府，圖中個花字就係花縣，響省城白雲山以北。

花都一帶，秦國征嶺南時，將佢歸入南海郡番禺縣。隋朝時改歸南海縣管。大宋嗰陣，花都呢帶係分畀番禺、南海兩縣管。

1686年，大清康熙二十五年，廣東省番禺縣近花山一帶，夾埋南海縣地，就開咗個新縣，叫花縣。花縣就仍然係廣州府管。19世紀，太平天國天王洪秀全，就響呢度出世。民國時期廢州府，花縣直轄於廣東省。

共軍入粵之後，花縣就掉來掉去，跟過江北專區、珠江專區、粵北行政區、佛山專區。1960年4月劃做廣州市屬縣。1993年6月18號，縣改市，改名花都，變做花都市，由廣州市代管。2000年5月21號正式併入廣州市，變咗花都區。

政區

花都下有新華街道、新雅街道、秀全街道、花城街道、花山鎮、花東鎮、梯面鎮、炭步鎮、赤坭鎮、獅嶺鎮。