廣州地鐵

出自維基百科,自由嘅百科全書
跳去: 定向搵嘢
廣州地鐵
概覽
營運地區 Flag of the People's Republic of China.svg 中國廣東廣州佛山
服務類 城市軌道交通系統
路綫總數
  • 通車:10
  • 起緊:15
  • 規劃:8
路綫長 308.7公里
車站總數 166
軌道標準 1435mm(標準軌
列車偏組 2格(APM
4格(46、廣佛綫)
6格(123578
營運資訊
營運時期 1997年6月28號~而家
營運單位 廣州地鐵集團有限公司
- 總部 廣州市海珠區新港東路618號
南豐總滙環球展貿中心
- 網站 www.gzmtr.com
廣州地鐵2016(繁體中文+英文).png

廣州地鐵粵拼gwong2 zau1 dei6 tit3)係中國廣東廣州城市軌道交通系統,由廣州地鐵集團有限公司負責營運同埋管理。第一條路線喺1997年6月28號正式開通。

佢亦係繼北京天津上海之後第四個有地鐵系統嘅中國內地城市,同時亦成為中國大陸第一個有地鐵嘅副省級市

廣州地鐵係廣州市民主要嘅交通工具之一,到2016年12月28號為止,廣州地鐵有10條路綫營運緊,全長308.7公里。不過始終應付唔到快速增長嘅交通需求。佢曾經喺2010年亞洲運動會免費期間以784.4萬人次嘅峰值打破嗰時嘅中國大陸紀錄[1];到咗2017年上半年,佢嘅日均客流量已有736萬人次。為咗解決交通擠塞同客流過載嘅問題,重繼續引導城市向外擴張嘅關係,廣州地鐵重搞緊大規模嘅擴建工程。經過幾次修訂,廣州地鐵嘅遠期規劃長度將去到1025公里。

[編輯]

  • 1992年12月28號,廣州市地下鐵道總公司成立。

工程[編輯]

  • 1965年5月,廣州市人民政府開始搞第一次地鐵規劃同地質調查。
  • 1993年2月28號,1號綫開始喐手起。
  • 1998年7月28號,2號綫開始喐手起。
  • 2001年12月26號,3號綫開始喐手起。
  • 2003年1月19號,4號綫大學城專綫(萬勝圍⇆新造)同2號綫調整工程(琶洲⇆萬勝圍)一齊開始喐手起。
  • 2004年5月28號,5號綫開始喐手起。
  • 2006年3月1號,APM綫開始喐手起。
  • 2006年8月28號,6號綫一期開始喐手起。
  • 2007年4月9號,2、8號綫拆解工程開始喐手起。
  • 2007年6月28號,廣佛城際軌道交通(廣佛地鐵,佛山方嗌佛山地鐵1號綫)全綫、3號綫北延段(機場南站廣州東站)開始喐手起。
  • 2009年7月22號,1號綫西朗站裝好閘門之後,廣州地鐵冚唪唥站點都裝嗮幕門或閘門。
  • 2009年9月29號,9號綫清㘵站開始喐手起。
  • 2009年10月30號,6號綫二期工程(長湴⇆香雪)試驗性工點——蘿崗站開始喐手起。
  • 2010年4月8號,廣佛地鐵首通段(魁奇路⇆西朗)隧道全綫貫通。
  • 2010年4月20號,3號綫北延段隧道全綫貫通。
  • 2010年9月21號,廣佛綫首通段通過咗冷滑試驗[2]
  • 2010年9月22號至24號,因2號綫一分為二同2、8號綫聯合調試嘅需要,原先成條2號綫(三元里⇆萬勝圍)宣佈停運3日[3]
  • 2010年10月11號,有人爆料話3號綫北延段聯絡通道嘅混凝土唔夠硬凈,隨時會冧。但施工方整咗份流嘅檢測報告,令相關部門喺唔知真相嗰陣通過咗驗收。地鐵公司收到水之後攞出整改同埋補救方案。不過呢單嘢冇影響到3號綫北延段喺同年11月份之前開通[4][5]
  • 2012年5月5號,13號綫一期試驗性工點——新塘站開始喐手起。
  • 2013年5月30號,6號綫一期全綫隧道貫通。
  • 2013年10月30號,4號綫南延段畀廣東省發改委批復咗,可以正式喐手起。
  • 2013年12月20號,13號綫一期被批復咗,可以正式喐手起。
  • 2014年4月10號,廣州地鐵招標喺6個站加「文化牆」嘅裝飾,工程要使775.67萬文。重公佈埋會添加「文化牆」嗰六個站——公園前海珠廣場廣州南站廣州火車站廣州東站同埋機場南站[6]
  • 2015年10月9號,7號綫一期西延段畀廣東省發改委批復咗,可以正式喐手起。
  • 2015年11月15號,6號綫二期開始鋪軌。
  • 2015年12月17號,9號綫開始鋪軌。
  • 2015年12月底,7號綫一期冚唪唥車站封頂。
  • 2015年12月29號,6號綫二期冚唪唥車站封頂。
  • 2016年1月,6號綫二期全綫隧道貫通。
  • 2016年1月12號,7號綫首期開始鋪軌。
  • 2016年2月28號,7號綫首期全綫隧道貫通。
  • 2016年6月,7號綫首期西延順德段開工。
  • 2016年7月底,4號綫南延段冚唪唥車站封頂。
  • 2016年9月27號,4號綫南延段全綫隧道貫通。
  • 2016年9月28號,11號綫開始喐手起
  • 2016年10月19號同20號,4號綫南延段同13號綫陸續開始鋪軌。
  • 2016年11月30號,14號綫(知識城支綫)開始鋪軌。
  • 2017年2月28號,13號綫首期冚唪唥車站主體封頂。
  • 2017年4月12號,9號綫全綫隧道貫通。
  • 2017年4月27號,18號綫橫瀝站開始喐手起。
  • 2017年5月10號,14號綫(知識城支綫)冚唪唥車站封頂。
  • 2017年5月27號,13號綫首期全綫隧道貫通。
  • 2017年5月28號,知識城支綫全綫隧道貫通。
  • 2017年8月,18號綫工程可行性研究報告俾廣東省發改委批復咗。

通車營運時間表[編輯]

  • 1997年6月28號,1號綫首段(西朗⇆黃沙)開通觀光試營運,1997年7月2號正式對市民開放。
  • 1999年6月28號,1號綫全綫(西朗⇆廣州東站)正式開通營運。
  • 2002年12月29號,2號綫首段(三元里⇆曉港)開通試營運,同原先嘅1號綫形成「十」字交叉嘅地鐵網絡。公園前站成為廣州地鐵系統第一個轉乘站。
  • 2003年6月28號,2號綫(三元里⇆琶洲)全綫正式開通營運。
  • 2005年12月26號,2號綫調整工程(琶洲⇆萬勝圍)、3號綫首段(廣州東站⇆客村)、4號綫大學城專綫(萬勝圍⇆新造)開通營運。令廣州地鐵第一次形成環形綫網。
  • 2006年12月30號,3號綫一期全綫(廣州東站⇆番禺廣場、天河客運站⇆石牌橋)、4號綫(新造⇆黃閣)開通試運。同日開始,3號綫行車交路改成從 天河客運站⇆番禺廣場 同埋 廣州東站⇆體育西路。嗰時從廣州東站去番禺廣場嗰邊啲乘客必須要喺體育西路站轉車[7]
  • 2007年6月28號,4號綫一期全綫(萬勝圍⇆金洲)開通營運。
  • 2009年12月28號,5號綫首段(滘口⇆文沖)、4號綫(萬勝圍⇆車陂南)開通試營運。
  • 2010年9月25號,新2號綫(嘉禾望崗⇆廣州南站)同8號綫(萬勝圍⇆昌崗)、4號綫北延段(車陂南⇆黃村)喺朝早6點開通試營運[8][9][10]
  • 2010年10月28號,廣佛綫(魁奇路⇆西朗)為咗迎接廣州舉辦亞運而喺11月3號正式開通,重免費畀受邀市民試搭兩日[11][12][13]
  • 2010年10月30號,3號綫北延段(廣州東站⇆機場南)喺晏晝兩點開通營運[14][15][16]
  • 2010年11月3號,廣佛綫首期工程(魁奇路⇆西朗)開通營運[17][18][19]。同日,8號綫寶崗大道站、沙園站、鳳凰新村站開通營運。
  • 2010年11月8號,珠江新城旅客自動輸送系統(簡稱APM綫)(歌劇院⇆林和西)開通營運。經上級部門批准,海心沙站、赤崗塔站暫時唔開通。
  • 2010年11月28號,APM綫赤崗塔站開通,經上級部門批准,海心沙站唔開通營運。
  • 2011年2月24號,APM綫海心沙站開通,同日服務時間再延長一個半鐘。
  • 2013年12月28號,6號綫首期(潯峰崗站⇆長湴站)開通營運,嗰時沙河站同一德路站重未開通。
  • 2014年1月28號,6號綫一德路站正式開通。
  • 2015年12月28號,廣佛綫首期後通段(西塱⇆燕崗)開通試營運。
  • 2016年12月28號,6號綫二期(長湴⇆香雪)、7號綫首期(廣州南站⇆大學城南)同廣佛綫二期(魁奇路⇆新城東)開通營運。
  • 2017年6月28號,6號綫植物園站同柯木塱站開通營運。

客流紀錄[編輯]

  • 2010年1月1號,客流超過369萬人次。
  • 2010年5月1號,客流超過438.99萬人次。
  • 2010年9月30號,國慶假期前夕,客流超過478.44萬人次[20]
  • 2010年10月1號,國慶日,客流量達到513.30萬人次,比上日多出34.87萬人次[21]
  • 2010年11月1號,受到亞運期間免費搭地鐵同巴士嘅影響,客流達到781萬,破全國軌道交通系統單日客流紀錄,全綫站點超過90%需要客流管制,令135呢三條綫都要唔畀入站成10分鐘[22][23][24]
  • 2010年11月3號,受嗰日下晝廣佛地鐵正式通車嘅影響,全日客流達到784萬。
  • 2010年11月5號,最後一日免費搭車,全日客流達到784.44萬。
  • 2011年12月24號,平安夜,嗰日廣州地鐵延長服務一個鐘,廣州地鐵官方微博話客流超過595萬人次。
  • 2012年5月1號,綫網總客流量係684萬人次。
  • 2013年5月1號,綫網總客流量係750萬人次。
  • 2014年5月1號,綫網總客流量係794.2萬人次,打破咗亞運免費嗰時嘅記錄。
  • 2014年12月31號,廣州地鐵官方微博話嗰日總客流量達到861.3萬人次。
  • 2015年12月31號,綫網總客流量係879萬人次。[25]
  • 2016年5月1號,綫網總客流量達到900萬人次。[26]
  • 2017年4月28號,綫網客流達到905.3萬人次。
  • 2017年4月30號,綫網客流達到908.3萬人次,打破咗兩日前創造嘅客流記錄。
  • 2017年9月30號,綫網總客流量達到941.2萬人次,創歷史新高。

其它[編輯]

  • 1997年4月9號,由ANDA-SIEMENS整嘅廣州地鐵第一部列車由嘉興號貨輪運到廣州黃埔港
  • 2010年4月20號,地鐵3號綫(廣州東站⇆體育西路段)編組數3改6。
  • 2010年4月28號,地鐵3號綫(番禺廣場⇆天河客運站段)編組數3改6。
  • 2010年7月23號,第1000部地鐵列車落戶赤沙車輛段[註 1][27]
  • 2010年8月3號,廣州地鐵開始換幕門𢲩板路綫圖同埋部分列車嘅眨燈路綫圖,亞運前統一色調,冚唪唥站嘅路綫圖喺2010年10月13號換嗮[28][29][30]
  • 2010年10月28號,廣州地鐵啟動史上最嚴嘅安全檢查[31][32][33][34]。但實際上,安檢凈係形式上,而且安檢人員都係在校職專學生。
  • 2010年11月6號,免費巴士同地鐵俾廣州市交委叫停,原因係「行街族」嘅人、單雙號、廣交會客流同上落班嘅白領逼爆地鐵同巴士、過江輪渡。
  • 從2010年11月8號開始,全市取消免費搭地鐵、公交同過江輪渡嘅優惠措施,改成向每個家庭發放唔等額嘅現金做交通補貼[35][36]
  • 2010年11月14號,國家發展改革委批覆廣州地鐵1號綫、2號綫、3號綫、5號綫、8號綫增購車輛。呢項總投資53.57億文,總數大概90部,冚唪唥係6架車廂,其中1、2、8號綫係A型車,3號綫係B型車,5號綫係L型車。
2017年10月16號,喺海珠廣場站2號綫站廳附近搞緊嚴格嘅安檢措施,即係「人過安全門、物過X光機、液體要過檢測儀」嘅制度。
廣州地鐵嘅安檢同客流控制嘅相關提示。張相提示嗰兩個標語當中,喺客流高峰專門為矮過1.2m啲細路、大肚婆同傷殘人士嘅快速通道服務。
  • 2010年12月23號,廣州地鐵各個入站口恢復常態化管理,唔再搞X光機檢查乘客嘅隨身物品,但實際上前一日下晝就取消咗安檢。
  • 2011年1月11號晚黑,5號綫一列車發生縱火案,出現乘客受傷,令市民擔心地鐵營運安全[37]
  • 2011年3月18號,考慮到成條1號綫裝嗮屏蔽門/安全門,列車入站時冇吹雞嘅必要,1號綫亦取消咗執行十幾年嘅列車入站吹雞嘅規定。
  • 2012年9月16號,受遊行示威影響,淘金站冚唪唥出入口喺12:13開始搞客流控制直到21:04先至取消[38]
  • 2012年9月28號,iMetro地鐵文化館喺公園前站開張,佢號稱華南第一家地鐵文化館[39]
  • 2012年12月28號,廣州地鐵第一個APP喺Apple Store上綫。
  • 2013年9月14號,悠悠(YoYo)成為廣州地鐵吉祥物[40]
  • 2013年11月21號,廣州地鐵嘅服務短號——96891正式啟用[41]
  • 2014年3月4號,5號綫西村站發生踩踏事件,出現部分財物損失。
  • 2016年8月到12月,廣州地鐵喺全綫車站陸續更新導向牌同月台幕門、月台閘門啲吊板貼紙,加咗車站冧同月台冧、幕門/閘門冧。新嘅綫網圖亦用咗車站冧。同時,全綫各站重增加咗閃付閘機。
  • 2017年6月28號,廣州地鐵開始喺1號綫試行女性車廂,時段係工作日嘅7:00~9:00同17:00~19:00。
  • 從2017年10月10號開始,廣州地鐵開始逐步升級安檢,計劃到11月30號覆蓋成個線網[42],喺全部地鐵出入口都實行嚴格嘅安檢措施:人過安全門、物過X光機、液體要過檢測儀。根據招標公示,使費相信有成26.7億元,包括採購855台安檢設備同1.2萬新安檢崗位設置,成個工程未曾公開諮詢[43]。預計會造成部分地鐵站入站輪候半個鐘甚至一個鐘,影響市民出行[44],當局亦冇安排經濟賠償方案。

開通咗嘅路綫[編輯]

截至2017年11月17號,廣州地鐵已經開咗1、2、3、4、5、6、7、8、廣佛同APM綫,總里程308.7公里,有184座車站(計埋轉車車站),冚唪唥由廣州地鐵集團負責營運。

廣州地鐵2016(繁體中文+英文).png
路綫 首段開通日期 起點站/終點站 車站數 長度(公里) 車輛段/停車場 控制中心 列車規格
市區地鐵路綫
1號綫 1997年6月28號 西朗 廣州東站 16 18.5 西朗車輛段 公園前控制中心 6A
2號綫 2002年12月29號 嘉禾望崗 廣州南站 24 31.8 嘉禾車輛段
大洲停車場
3號綫 2005年12月26號 天河客運站 番禺廣場 16 64.2 廈滘車輛段 大石控制中心 6B
機場南 體育西路 12[圖註 1] 嘉禾車輛段
4號綫 2005年12月26號 金洲 黃村 16[圖註 2] 46.7 新造車輛段 新造控制中心 4L
5號綫 2009年12月28號 滘口 文沖 24 31.9 魚珠車輛段 魚珠控制中心 6L
6號綫 2013年12月28號 潯峰崗 香雪 29[圖註 3] 41.7 潯峰崗停車場 潯峰崗控制中心 4L
蘿崗車輛段
7號綫 2016年12月28號 廣州南站 大學城南 9 18.6 大洲車輛段 大石控制中心 6B
8號綫 2002年12月29號[圖註 4] 萬勝圍 鳳凰新村 13 15.0 赤沙車輛段 公園前控制中心 6A
城際地鐵路綫
廣佛綫[圖註 5] 2010年11月3號 新城東 燕崗 18[圖註 6] 34.4(廣州地區12.9) 夏南車輛段 夏南控制中心 4B
旅客自動輸送系統路綫
APM綫 2010年11月8號 林和西 廣州塔 9 4.0 赤崗塔停車場 赤崗塔控制中心 膠輪2節
總計 182 308.7
  1. 體育西路站唔重複計;唔計未開通嘅高增站機場北站
  2. 由於官橋站慶盛站未開通,所以唔計。
  3. 沙河站暫未開通,唔計入。
  4. 8號綫嘅昌崗萬勝圍段,之前屬2002年開通嘅2號綫,但舊2號綫喺2010年9月25號拆咗畀8號綫,所以8號綫可以睇成2010年9月25號開通。
  5. 廣佛綫係城際地鐵,喺廣州段嘅出入口標識係「廣州地鐵」,喺佛山段嘅出入口標識係「佛山地鐵」。
  6. 計埋佛山入面啲車站。2015年12月27號最後一班車收車之前凈開通從魁奇路到西朗嗰橛。

換乘站[編輯]

內文: 廣州地鐵轉線車站一覽

家下廣州地鐵有26個轉車車站,其中有2個係要出站至轉到車。

1號綫[編輯]

1號綫花地灣站嘅月台

1號綫喺1993年12月28號開工。首通段(西朗⇆黃沙)喺1997年6月28號開始試營運,全綫喺1998年12月28號起好嗮重喺1999年6月28號正式通車。服務時間:06:10~23:30,大概每2~7分鐘一班車。

全綫有16個車站,分別係:西朗(轉廣佛綫)、坑口花地灣芳村黃沙(轉6號綫)、長壽路陳家祠西門口公園前(轉2號綫)、農講所烈士陵園東山口(轉6號綫)、楊箕(轉5號綫)、體育西路(轉3號綫)、體育中心廣州東站(轉3號綫)。

綫路全長約18.48公里,除咗西朗、坑口係地面站之外,其他車站都喺地底。喺西朗⇆坑口之間整咗車輛段,亦係A型列車嘅大修基地。

2號綫[編輯]

2號綫會江站月台

2號綫首期(三元里⇆曉港)喺2002年12月29號開通,隨後全綫(三元里⇆琶洲)喺2003年6月28號開始營運,而調整段(琶洲⇆萬勝圍)就喺2005年12月26號同4號綫(大學城專綫)一齊開通。服務時間從06:00~00:16,大概每2~4分鐘一班車。

2號綫喺開通初期,用咗好多嗰時中國大陸最先進嘅技術,而且係全球首條開通就裝咗月台幕門嘅地鐵綫路。

拆解前,全綫共有17個車站,分別係:三元里廣州火車站(可轉5號綫)、越秀公園紀念堂公園前(可轉1號綫)、海珠廣場市二宮江南西曉港中大鷺江客村(可轉3號綫)、赤崗磨碟沙新港東琶洲萬勝圍站(可轉4號綫),看唪唥車站都喺地底。車輛段喺赤沙。

2010年9月21號晚黑,由三元里站開去萬勝圍站嘅尾班車到總站後,舊二號綫服務正式終止。同年月22~24號,舊二號綫停運開搞軌道、信號、供電割接同聯合調試。2010年9月25號,2號綫南北延長綫(廣州南站⇆昌崗、飛翔公園⇆嘉禾望崗)開通營運,原有嘅曉港⇆萬勝圍段同赤沙車輛段拆咗畀8號綫營運,兩條路綫喺昌崗站交叉。南北延綫共有17座車站,1個車輛段(嘉禾車輛段),1個停車場(大洲停車場),2座轉乘站,2座預留轉乘站。

依家嘅2號綫從南到北整咗24座車站,分別係:廣州南站(可轉7號綫)、石壁(可轉7號綫)、會江南浦洛溪南洲東曉南江泰路昌崗(可轉8號綫)、江南西市二宮海珠廣場(可轉6號綫)、公園前(可轉1號綫)、紀念堂越秀公園廣州火車站(可轉5號綫)、三元里飛翔公園白雲公園白雲文化廣場蕭崗江夏黃邊嘉禾望崗(可轉3號綫),冚唪唥站點都喺地底。

3號綫[編輯]

3號綫京溪南方醫院站月台

3號綫係綫網入邊嘅南北快綫,全綫長64.41km,包括主綫同埋支綫。佢喺中國大陸創咗兩個「第一」——第一條搞支綫同埋第一條最高時速去到120km/h嘅地鐵路線,總投資有CNY¥159.05億。首通段(廣州東站⇆客村)喺2005年12月26號開通。最細行車間隔係1分58秒。其中:

  • 主綫:機場南⇆番禺廣場
  • 支綫:天河客運站⇆體育西路

但現時嘅行車交路同名義上嘅主、支綫唔同。實際行車係:

  • 主交路:天河客運站⇆體育西路⇆番禺廣場
  • 機場交路:機場南⇆體育西路。

主交路共設16座車站:天河客運站(可轉6號綫)、五山華師崗頂石牌橋體育西路(可轉1號綫)、珠江新城(可轉5號綫)、廣州塔(出閘後可轉APM綫)、客村(可轉8號綫)、大塘瀝滘廈滘大石漢溪長隆(可轉7號綫)、市橋番禺廣場。喺廈滘整咗個車輛段,亦係B型列車嘅大修基地。

機場交路有15個車站:機場北(未開通)、機場南高增(未開通)、人和龍歸嘉禾望崗(可轉2號綫)、白雲大道北永泰同和京溪南方醫院梅花園燕塘(可轉6號綫)、廣州東站(可轉1號綫)、林和西(出閘後可轉APM綫)、體育西路(可轉1號綫)。喺嘉禾搞咗個車輛段。

體育西路站係 天河客運站⇆番禺廣場 交路同 機場南⇆體育西路 交路嘅轉乘站。由番禺廣場站北上嘅列車到咗體育西路站後即轉入支綫開去天河客運站,而去機場南站必須喺體育西路站落車轉開去機場南嗰邊啲車先至有得繼續主綫旅程。

4號綫[編輯]

4號綫海傍站月台

4號綫喺2003年1月29號開始喐手起,其中,萬勝圍⇆新造(大學城專綫)喺2005年12月26號開通;新造⇆黃閣喺2006年12月30號開通;黃閣⇆金洲喺2007年6月28號開通。成條路線南北走向,全長43.65公里(其中黃村⇆新造係地底段)。

佢係全球第一條用咗中、大運載量嘅直綫電機綫路,同時亦係中國大陸第一條用直綫電機車輛技術嘅地鐵路線。

依家4號綫有18個車站,由北往南依次為:黃村車陂車陂南(可轉5號綫)、萬勝圍(可轉8號綫)、官洲大學城北大學城南(可轉7號綫)、新造官橋(未開通)、石碁海傍低涌東涌慶盛(未開通)、黃閣汽車城黃閣蕉門金洲,其中地底車站8個,高架車站10個。車輛段喺新造站南面。

而家4號綫南延段(金洲~南沙客運港)喺度調試近,新建飛沙角、廣隆、大涌、塘坑、南橫同埋南沙客運港六站,計劃喺2017年12月28號通車。

5號綫[編輯]

5號綫西村站月台

5號綫成東西走向,全長31.9公里,出咗CNY¥110億嚟起。路線喺2009年12月28號開通營運,同佢同時開通嘅重有4號綫北延綫——萬勝圍車陂南[45],啱啱開通嗰陣,5號綫係唯一同其它4條路綫都有轉乘站。依家5號綫嘅最細行車間隔係2分06秒。

5號綫首期(滘口⇆文沖)一共搞咗24個車站,由西向東嘅順序係:滘口坦尾(可轉6號綫)、中山八西場西村廣州火車站(可轉2號綫)、小北淘金區莊(可轉6號線)、動物園楊箕(可轉1號綫)、五羊邨珠江新城(可轉3號綫)、獵德潭村員村科韻路車陂南(可轉4號綫)、東圃三溪魚珠大沙地大沙東文沖。喺魚珠站北面整咗魚珠車輛段,係L型列車嘅大修基地。

6號綫[編輯]

6號綫坦尾站月台

6號綫首期(潯峰崗⇆長湴)喺2013年12月28號開通,而二期(長湴⇆香雪)就喺2016年12月28號開通。綫路全長41.7公里,其中潯峰崗⇆沙貝段為高架綫,其它站冚唪唥都喺地下。

綫路一共有32個站,由西向東嘅順序係:潯峰崗橫沙沙貝河沙坦尾(轉5號綫)、如意坊黃沙(轉1號綫)、文化公園一德路海珠廣場(轉2號綫)、北京路團一大廣場東湖東山口(轉1號綫)、區莊(轉5號綫)、黃花崗沙河頂沙河(未開)、天平架燕塘(轉3號綫【北延段】)、天河客運站(轉3號綫)、長湴植物園站龍洞柯木塱高塘石黃陂金峰暹崗蘇元蘿崗香雪。其中喺潯峰崗站西南邊整咗潯峰崗停車場,喺香雪站東南邊整咗蘿崗車輛段。

7號綫[編輯]

7號綫員崗站月台

7號綫首期(廣州南站⇆大學城南)喺2016年12月28號開業。綫路成西南-東北走向,全長18.6公里。全綫喺番禺區境內。

依家綫路設咗9個站,由西向東分別係:廣州南站(可以轉2號綫)、石壁(可以轉2號綫)、謝村鍾村漢溪長隆(可以轉3號綫)、南村萬博員崗板橋大學城南(可以轉4號綫)。車輛段位於廣州南站西北面嘅大洲。

將來發展方面,西延段(美的大道⇆廣州南站)已經喺2016年6月動工,預計會喺2020年前後通車;二期(大學城南⇆水西北)亦已經進行咗環評第二次公示。

8號綫[編輯]

8號綫寶崗大道站月台

8號綫從海珠區工業大道北近南田路口地底嘅鳳凰新村站開始,經沙園、昌崗路、新港路,東端係新港東路同規劃新滘東路口下邊嘅萬勝圍站。

曉港⇆萬勝圍係原2號綫嘅沿用路綫,其中曉港⇆琶洲段喺2003年6月28號通車,而萬勝圍站喺2005年12月26號開始營運。2010年9月25號朝早,三元里⇆江南西段正式同曉港⇆萬勝圍段一分為二,後者各站正式摱到8號綫入面,晏啲同新起嘅鳳凰新村⇆昌崗路段接埋一齊,成為8號綫一部分。新起站點入邊,其中昌崗站喺2010年9月25號開通,凈低嗰3站喺同年11月3號開通。

現時8號綫全長14.2公里,有13座車站:鳳凰新村沙園(可轉乘廣佛綫)、寶崗大道昌崗(可轉2號綫)、曉港中大鷺江客村(可轉3號綫)、赤崗磨碟沙新港東琶洲萬勝圍(可轉4號綫)。車輛段係原2號綫赤沙車輛段,接軌站係磨碟沙。

8號綫北延段(鳳凰新村白雲湖)而家重喺度起緊,全長16.1km。入面整咗15座車站,其中同福西站同文化公園站(將可轉6號綫,已經同6號綫同步建設完成)本屬2、8號綫拆解工程第14標段,原本要喺2013年尾同6號綫首期一齊通車,但由於同福西站進度拖延、區間隧道亦冇得起,加上康王南路發生地陷事件而押後到同文化公園以北路段一齊通車。

北延段通車後,8號綫將會用新起嘅白雲湖車輛段,接軌站係白雲湖;原赤沙車輛段將會改成11號綫車輛段。

廣佛綫[編輯]

廣佛綫季華園站嘅月台

廣佛綫係條喺廣州市海珠區、荔灣區、佛山市南海區、禪城區同順德區入面行嘅城際地鐵路綫,由廣佛軌道交通有限公司負責營運。股份方面,廣州地鐵霸咗51%,凈低嗰49%屬佛山地鐵。呢條綫嘅佛山部分又嗌做佛山地鐵1號綫

廣佛綫全長34.4公里,有22個站,全部係地底站,分別係:新城東東平世紀蓮瀾石魁奇路季華園同濟路祖廟普君北路朝安桂城南桂路𧒽崗千燈湖金融高新區龍溪菊樹西朗(轉1號綫)、鶴洞沙涌沙園(轉8號綫),燕崗。車輛段位於五丫口大橋以南嘅夏南。

廣佛綫首期試驗段(魁奇路站)喺2002年10月11號開工,而其它站從2007年6月28號開始陸續開工。2010年11月3號,首通段(魁奇路⇄西朗)開通。原先地鐵方面預計會喺2013年起好嗮後通段(西朗⇄瀝滘),但由於瀝滘站嘅徵地拆遷補償問題未傾掂,令後通段開通時間一拖再拖,最後地鐵考慮到客流問題,聽取咗市民意見,決定喺2015年12月28號開通後通段嘅西朗⇄燕崗段。後嚟喺瀝滘站嘅施工工地直到2016年先至傾掂而入場施工,而石溪同南洲兩站已經起到七七八八。

廣佛綫二期(新城東-魁奇路)喺2016年12月28號開通,除咗瀾石站以外,淨低3個站都係按6B規格起嘅,喺瀾世區間預留咗類似廣州舊2號綫江曉區間拆解結構。以後呢段會拆畀佛山6號綫,而瀾石站後會接新建嘅廣佛綫三期去北圍新城。

APM綫[編輯]

APM綫列車

珠江新城旅客自動輸送系統南邊從海珠區嘅廣州塔站開始,向北下穿珠江主航道、海心沙、花城廣場,北去到林和西站位置。綫路總長3.94公里,全綫都喺地下。

全綫一共整咗9座車站,自北向南分別係:林和西體育中心南(工程名:體育中心站)、天河南(工程名:天河南一路站)、黃埔大道(工程名:市民廣場站)、婦兒中心(工程名:中央廣場站)、花城大道(工程名:雙塔站)、大劇院站(曾用站名:歌劇院)(工程名:廣州歌劇院站)、海心沙廣州塔(曾用站名:赤崗塔)。其中林和西站同廣州塔站出閘之後可以轉乘地鐵3號綫,有通道連接到3號綫嘅同名車站。

路綫喺廣州塔站以南有座地下車輛維修中心同埋控制中心。

起緊嘅路綫[編輯]

直到2016年底,廣州地鐵有3號綫機場段、4號綫南延段、7號綫一期西延段、8號綫二期同北延段同廣佛綫一期凈低部分等五條延長綫同9號綫、11號綫、13號綫首期、14號綫首期同埋知識城支綫、21號綫呢五條新綫喺度起緊,總里程夾埋大概有276km。

路綫 首段幾時起 起點站/終點站 新起站數 長度(公里) 新起嘅車輛段或停車場 控制中心 列車嘥士
3號綫機場段 2013年5月[圖註 1] 機場南 機場北 1[圖註 2] 1.04 大石控制中心 6B
4號綫南延段 2013年8月 金洲 南沙客運港 6[圖註 3] 12.6 南沙停車場 新造控制中心 4L
7號綫首期西延段 2016年6月23號 美的大道 廣州南站 8[圖註 4] 13.46 益豐停車場 大石控制中心 6B
8號綫二期同北延段 2010年 滘心 鳳凰新村 15[圖註 5] 16.1 白雲湖車輛段 公園前控制中心 6A
9號綫 2009年9月29號 飛鵝嶺 高增 11 20.1 岐山車輛段 岐山控制中心 6B
11號綫 2016年9月28號[圖註 6] 赤沙滘 赤沙滘 32 43.2 赤沙車輛段 赤沙控制中心 8A
13號綫首期 2012年5月5號 魚珠 新沙 11 26.7 官湖車輛段 官湖控制中心
14號綫首期 2013年4月16號 嘉禾望崗 街口 13 54.1 鄧村車輛段
石湖停車場
鎮龍北停車場
鎮龍控制中心 6B
知識城綫 2013年10月 新和 鎮龍 [圖註 7]10 21.9
21號綫 2013年3月 天河公園[圖註 8] 增城廣場 20[圖註 9] [圖註 10]60.6 鎮龍車輛段
水西停車場
象嶺停車場
廣佛綫首期剩餘段 2007年7月 燕崗 瀝滘 3[圖註 11] 5.43 夏南控制中心 4B
總計 276.6
  1. 以白雲機場T2動工為準。
  2. 機場南站已經開通,唔計入車站總數。
  3. 金洲站已經開通,唔計入車站總數。
  4. 廣州南站已經開通,唔計入車站總數。
  5. 鳳凰新村站已經開通,唔計入車站總數。
  6. 以11號綫動工儀式進行為準;天河公園–員村段已經同21號綫一齊喺2013年3月動工。
  7. 計埋新和站。
  8. 唔計員村–天河公園11號綫借用段。
  9. 唔計員村站。
  10. 唔計天河公園–員村11號綫借用段。
  11. 燕崗站已經開通,唔計入車站總數。

規劃緊嘅綫路[編輯]

廣州地鐵第三期建設規劃(2017~2023)入邊話,廣州喺將來幾年重會陸續起多10條地鐵,總里程約258km。

路綫 預計開建日期 起點站/終點站 新增車站數 長度(公里) 新建車輛段/停車場 控制中心 新建(擴建)主變電站 列車規格 時速等級(km/h)
3號綫東延段 2020年 番禺廣場 海傍 4[圖註 1] 9.58 廣州新城停車場 大石控制中心 金山主變電站 6B 120
5號綫東延段 2018年 文沖 黃埔客運港 6[圖註 2] 9.76 雙崗北停車場 鎮龍控制中心 墩美主變電站 6L 90
7號綫二期 2018年 大學城南 水西北 11[圖註 3] 22.0 上堂停車場 大石控制中心 魚珠主變電站 6B 80
8號綫北延廣州北站段 2019年 滘心 廣州北站 9[圖註 4] 20.0 雅瑤停車場 公園前控制中心 6A 80
10號綫 2018年 西塱 石牌橋[圖註 5] 14[圖註 6] 19.5[圖註 7] 廣鋼新城車輛段 大石控制中心 坑口主變電站 6B 80
12號綫 2018年 潯峰崗 大學城南 25 37.2 槎頭車輛段
科學中心停車場
白雲文化廣場主變電站
赤沙滘主變電站
6A 80
13號綫二期 2017年 朝陽 魚珠 23[圖註 8] 33.8 凰崗停車場
魚珠停車場
官湖控制中心 彩虹橋主變電站
天河公園主變電站
8A 100
14號綫二期 2018年 廣州火車站 嘉禾望崗 8[圖註 9] 11.74 鎮龍控制中心 白雲文化廣場主變電站 6B 120
18號綫 2017年 廣州東站 萬頃沙 9 62.5 萬頃沙車輛段
隴枕停車場
陳頭崗停車場
隴枕控制中心 8節市域列車 160
22號綫 2017年 白鵝潭(芳村) 番禺廣場[圖註 10] 8[圖註 11] 31.0[圖註 12]
  1. 番禺廣場站已經開通,唔計入車站總數。
  2. 文沖站已經開通,唔計入車站總數。
  3. 大學城南站已經開通,唔計入車站總數。
  4. 滘心站計入8號綫北延段。
  5. 石牌橋~天河客運站路段唔屬於本次建設範圍,不過需要拆解改造嚟貫通運營。
  6. 石牌橋站到天河客運站5個車站已經開業,唔計入車站總數。
  7. 石牌橋到天河客運站呢段已經開通,唔計入里程總數。
  8. 魚珠站計入13號綫首期。
  9. 嘉禾望崗站計入14號綫首期。
  10. 共綫段計入18號綫。
  11. 橫瀝站、萬頃沙站計入18號綫。
  12. 共綫段里程計入18號綫。

營運方[編輯]

家下廣州地鐵嘅營運同管理屬「1+4」模式,其中廣州地鐵集團負責嗮成條綫網嘅營運。

  • 營運事業總部一中心
    • 車務一部:1號綫、廣佛綫
    • 車務二部:2號綫、8號綫
  • 營運事業總部二中心(以直綫電機地鐵列車為主)
    • 車務三部:4號綫、5號綫
    • 車務四部:6號綫
  • 營運事業總部三中心(通勤綫/城際地鐵,以B型地鐵列車為主)
    • 車務五部:3號綫、APM綫

各車務分部轄下重整咗乘務分部。

車站同車廂廣播[編輯]

家下廣州地鐵嘅主要廣播語言順序係,但有男女聲之分。喺報站之前先響「d̼ɔ̝ŋ˥˧ ɖɤ̞˨」(1號綫)或「d̼iŋ˥ ɖɤ̞˨」(其它路綫)兩聲,跟住就人聲廣播。其中:

喺1997年6月28號開通1號綫首通段(西朗⇆黃沙)無耐,嗰時廣州地鐵車流好少(30~35分鐘一班車),加上全程票價都好貴下(坐一次要畀¥5),所以廣播量除咗報下一站係乜之外,其它嘢都唔嗲唔diu3。喺嗰時,最先負責錄音嘅係廣東電台節目組——《真情真我》同《魅力南方》節目錄音嘅主持人——周咏錄音到而家[46]。1999年6月28號1號綫全線開通之後,嗰時月台開始出現廣播。不過同而家相比,由於車站啱營運無耐,冇乜商業廣告,所以報站先後順序係噉:

語種 列車嘅行為
就快入站嗰陣 到站開門之後
普通話 列车马上进站,请保管好您的随身携带物品,先下后上,注意列车与站台之间的空隙。 欢迎光临(站名)站
粵語 列車馬上入站,請保管好您嘅隨身攜帶物品,先落後上,注意列車同月台之間嘅空隙。 歡迎光臨(站名)站
英文 The train is approaching. Please keep all of your carrying belongings. Please allow the passengers to get off before you get on. And mind the gap between with the train and the platform. Welcome to (Station Name).

喺列車開出之後到下一站到站之前,車廂入面嘅廣播重係按舊時噉,凈播報下一站係乜,但喺每次列車就快到總站時都係靠司機做對講機廣播直到2號綫開通首通段(三元里⇆曉港)為止。後嚟隨住啲經銷商睇啱地鐵搞舖頭仔生意,加上站廳同月台啲廣告燈箱開始出現商業廣告之後,重喺報完下一站之後介紹附近啲道路、地方、機構同建築(部分由商家贊助)。喺2號綫啱開通無耐,列車先至出現有男聲廣播,係由廣州跑酷團隊——CitySpanker創始人——李喆負責[47]。但嗰時凈得普通話廣播直到2號綫全線(三元里⇆琶洲)開通為止。2003年6月28號,嗰時公園前站嘅男聲提示右邊棟門落車嘅信息多咗粵語廣播。2005年12月初,受到3號綫首通段(廣州東站⇆客村)同埋4號綫大學城專綫(萬勝圍⇆新造)就快開通嘅影響,男聲亦多到喺各大車站播音出現,但凈限車廂入面廣播。從2005年12月26號開始,喺3號綫首通段(廣州東站⇆客村)同埋4號綫大學城專綫(萬勝圍⇆新造)嘅月台範圍多咗個喺車門就快閂之前嘅三語廣播直到2006年12月27號先至喺地鐵冚唪唥站點出現。雖然2005年底到2006年初、2008年5月嘅2號綫爆出粵語報站被取消嘅醜聞,但經過媒體爆料之後,地鐵方好快將粵語加返上去[48]。2009年12月28號開通咗5號綫之後,好多喺下一站屬轉車站點時嘅播音從原先嘅女聲轉成男聲廣播,嗰時男聲亦出現英文廣播。而就快入站嗰陣嘅月台廣播喺2009年,1號綫裝嗮月台幕門嗰陣取消嗮。

2011年5月31號,地鐵冚唪唥列車喺站點開出無耐嗰時,加咗普通話嘅「請上車的乘客往車廂中部走」同埋「列車即將到達XX站」嘅男聲播音[49],亦有部份站點多咗普粵英三語嘅指定門口落車。雖然2012年底喺各站點嘅扶手電梯整咗提示廣播,連2013年12月28號啱開通嘅6號綫都唔例外,但到咗2017年1月14號冚唪唥取消嗮。尤其係公園前站嘅播音,喺「列車向前行嘅右邊棟門落車」提示至少改咗4次播音。尤其喺下一站係6號綫7號綫嘅轉車站點,除咗6號綫7號綫列車係男聲播報之外,其它都係女聲提示轉乘廣播。喺1號綫5號綫部分下一站嘅報站,重出現冇「請上車的乘客往車廂中部走」呢句播音。

而家基本上嚟講,除咗車廂入面嘅「列車即將到達XX站」同上咗車之後行入去、車站附近啲商家、搭車嘅友情提示凈得普通話廣播之外,其它情況都有普粵英三語廣播。喺月台嗰邊一般都有三語廣播。

設施[編輯]

廣州地鐵每個車站嘅設計都唔一樣,起碼用咗4種裝修設計風格。其中:

  • 1:站廳同月台用嘅係1990年代最㷫用嘅水泥同岩石瓷磚嘅拼接風格。
  • 235(從西場到區莊站)、8(沙園站,除萬勝圍站外)、APM:站廳同月台用嘅係焗漆牆面結構。
  • 467(除廣州南站外)、5(中山八站及以西嘅車站,楊箕站及以東嘅車站)、8(萬勝圍站)站廳同月台用嘅係玻璃牆面結構。
  • 1(除沙園站外)站廳同月台用嘅係類陶瓷磚裝飾。

而大堂大多數喺地下或地面,亦有啲站點畀咗啲空間嚟發展地鐵上蓋同車站商舖、控制室、賣票機同埋機房設施。文化牆方面,其中喺6號綫7號綫部分站點,及3號綫機場南站搞咗出嚟。

站廳同月台[編輯]

燕塘站嘅廁所。喺2013年12月28號中午之前喺地鐵各大站點嘅月台範圍冇呢樣嘢玩。

由於地鐵系統日日都有好多人坐地鐵上落,所以任何一個站嘅月台同站廳之間都整咗扶手電梯出嚟。1號綫早期站廳設計重未考慮到有大量客流出入站而將啲𨋢裝嗮喺站廳嘅免費區入面,後嚟地鐵開通之後,有越嚟越多傷殘或行動不便人士出入站時話好唔方便,後嚟地鐵方考慮到呢個問題而從起2號綫開始,之後每個站喺收費區入面整部𨋢嚟方便乘客往返站廳同月台之間。亦從2009年開始,喺每個站至少一個出入口整個帶傷殘人士專用通道嚟方便傷殘人士出入站。後嚟路線越開越多,1號綫原先整咗專用𨋢喺免費區嘅車站——西朗、黃沙、公園前、東山口、楊箕、體育西路、廣州東站,都劃嗮入收費區入面。

早期時廣州地鐵借鑒港鐵嘅經驗嚟起車站,所以有好多個站點都冇廁所響度。後嚟越來越多搭地鐵啲人成日喺地鐵嘅站廳或月台或車廂入面做「忍者龜」行為令部分乘客好唔滿意,即使起緊4號綫時,凈限高架站先至有廁所;起緊5號綫時凈喺西村站B口、滘口站入面、五羊邨站C口、及車陂南站C口整咗站內廁所出嚟;直到起6號綫時,地鐵方考慮到乘客搭緊地鐵半佬做「忍者龜」行為,先至規定除車站空間唔夠之外,其它凡係新起啲站點都要整廁所出嚟(即使係路線經過舊嘅站點都要噉做)。

從2016年12月28號開始,廣州地鐵全綫車站同埋APM都整咗免費WiFi熱點,WiFi供應商主要由花生地鐵WiFi提供,用戶可以通過智能電話用手機冧同短信驗證碼登錄就可以享受無限時上網[50]

從2017年1月14號開始,地鐵方喺部分轉乘站嘅客流大站點加咗轉車指示嘅投影燈[51],方便趕住轉乘地鐵或成日玩手機啲乘客睇到有噉嘅指引。

2017年3月7號,由於廣州地鐵掛咗好多同國際婦女節有關嘅公益宣傳廣告,就喺廣州南站率先搞咗試點,結果反映比較好。同年8月5號上晝出現39位準阿媽強烈建議地鐵方關注母乳餵養問題而決定凡係新起嘅車站要整個私密性比較好嘅母嬰餵養室。

商舖同自助服務[編輯]

家下廣州地鐵車站除咗佛山地鐵1號綫(廣州方嗌廣佛綫)之外,其他喺廣州市區啲路線都有唔少站點有商舖。初期主要銀行為主,後嚟發展到便利舖、到而家整埋快餐舖、衫褲舖、糖果舖等等……尤其喺客流量比較大嘅站點,商舖多到好似個商場仔噉。喺大多數廣州地鐵站都有以下服務:

車站設計[編輯]

指示設計[編輯]

車飛[編輯]

1997~1999年間用過嘅紙質飛
2002、2008年用過嘅幣質飛

廣州地鐵路線係按里程收費:

等級 距離 費用
Lv. 1 <4km CNY¥2
Lv. 2 4~12km 喺Lv. 1基礎上+CNY¥1/4km
Lv. 3 12~24km 喺Lv. 2基礎上+CNY¥1/6km
Lv. 4 >24km 喺Lv. 3基礎上+CNY¥1/8km

註:APM全程CNY¥2,但同地鐵路線計費唔互通。

註同攷[編輯]

  1. 呢部車係2號綫同8號綫嘅增購車,喺南車株洲出產,列車編號係02A048。
  1. "第二屆地鐵春聯今起徵集 2000元獎金 地鐵列車模型 一年專遞服務等你拿". 羊城地鐵報. 2011年1月10號. 
  2. 廣佛線首通段順利通過冷滑試驗
  3. 原地鐵二號線因拆解而停運三天的公告
  4. "老工程師"冒死"報料 三號線北延段有危險?". 金羊網—新快報. 2010年10月11號. 
  5. "廣州地鐵恐坍 亞運通車添變?". 聯合早報. 2010年10月15號. 
  6. "地鐵六大門戶車站 775萬元裝「文化牆」". 廣州日報. 2014年4月10號. 
  7. "廣州地鐵三號線和四號線30日開通". 信息時報. 2006年12月27號. 
  8. 3條地鐵線明日要迎客
  9. 廣州地鐵二/八號線今日開通試運營
  10. 新二號線53分鐘跑完全程
  11. 10月28日、29日,廣佛線免費試乘兩天
  12. 廣佛地鐵昨日開始試乘,亞運期間「逢包必檢」從北京路到佛山祖廟 坐地鐵只需1小時06分
  13. "廣佛地鐵今日試乘 兩地市民爭飲「頭啖湯」". 羊城晚報. 2010-10-28. 
  14. "地鐵三號線北延段明天迎客 體育中心到機場半個鐘". 新浪廣東. 2010-10-29. 
  15. 廣州地鐵三號線北延段明日下午開通 明起可乘地鐵赴白雲機場
  16. 地鐵三號線北延段今天14時開通 直達白雲機場
  17. 昌崗至鳳凰新村段 、廣佛線首期下月3日開通
  18. 廣佛開通城際地鐵 西朗直達魁奇路只需40分鐘
  19. 廣州地鐵八號線西延段 廣佛線3日開通
  20. "地鐵客流昨日大破紀錄!". 羊城晚報. 2010年10月1號. 
  21. 513萬客流撲向國慶地鐵
  22. "免費地鐵日均客流超600萬人 公交客流昨增23萬". 羊城晚報. 2010年11月3號. 
  23. "廣州免費乘車首日公交地鐵擠爆". 金羊網. 2010年11月2號. 
  24. "免費首日 穗地鐵人流漫出地面". 南方都市報. 2010年11月2號. 
  25. 879萬!地鐵客流再創新高
  26. 900萬!廣州地鐵客流再創新高
  27. "廣州地鐵迎第1000節車廂". 2010年7月26號. 
  28. "兩條地鐵線「門楣」悄然變色". 南方都市報. 2010年8月4號. 
  29. 廣州地鐵:屏蔽門蓋板線路圖亞運前統一色調
  30. "廣州地鐵更換新線路圖 亞運期間持票觀眾免票". 廣州日報. 2010年8月12號. 
  31. "今天起,進站坐車「逢包必檢、逢疑必查」地鐵「最嚴安檢」未見排長龍". 羊城晚報. 2010年10月28號. 
  32. 廣州地鐵今起安檢 強度空前
  33. 過地鐵安檢人均用時9秒 廣州地鐵設312個安檢點「逢包必檢」,安檢首日絕大部分站點秩序良好
  34. 地鐵進站須安檢 攜帶包裹必須經過X光機檢查
  35. "穗公交地鐵免費改為現金補貼". 南方都市報. 2010年11月7號. 
  36. "公交地鐵8日起取消免費措施 改發交通補貼". 大洋網. 2010年11月6號. 
  37. "地鐵五號線有人點燃煤氣罐". 新快報. 2011-01-11].  檢查日期值喺: |date= (詳情)
  38. 廣州地鐵官方微博 21:04 淘金站取消客流控制。
  39. "廣州嘗鮮地鐵文化館" (用中文寫). 羊城地鐵報. 2012年9月28號. 
  40. 這貨是廣州地鐵吉祥物,你怎麼看?
  41. 廣州地鐵服務熱線「96891」啟用
  42. 广州地铁10月10日起逐步升级安检,廣州地鐵 2017-09-27
  43. "耗資26.7億!廣州地鐵將實行全面安檢 雇用1.2萬名安檢員". 新快報. 喺2017-08-10搵到. 
  44. 今起廣州地鐵安檢正式升級,住這些地方的要早起,金羊網 2017-10-10
  45. "五號綫開通試運營新聞發布會舉行". 2009-12-24. 
  46. 46.0 46.1 "地铁女声:十年相伴的人是她". 凤凰网. 2017-03-10. 
  47. 47.0 47.1 "原来,在广州每天陪伴你地铁上下班的声音,是这位斜杠青年的". 南方网. 2016-07-24. 
  48. "巴士粵語報站失聲是場虛驚". 新快報. 2009-03-17. 
  49. "微博稱一號線取消粵語報站 地鐵回應絕無此事". 南方日報. 2011-06-01. 
  50. "广州地铁免费WiFi本周全面"上线"". 南方都市報. 奧一. 2016-12-26. 
  51. "广州地铁启动安静模式 职员不再随身"循环广播"". 廣州日報. 新华网. 2017-01-17. 

出面網頁[編輯]