廣州地鐵

出自維基百科,自由嘅百科全書
跳去: 定向搵嘢
廣州地鐵
概覽
營運地區 Flag of the People's Republic of China.svg 中國廣州佛山
服務種類 城市軌道交通系統
路綫總數 已啟用:9
路綫長度 266公里
車站總數 164
軌道標準 1435mm(標準軌
列車偏組 2節(APM
4節(4、6號綫、廣佛綫)
6節(1、2、3、5、8號綫)
營運資訊
營運時期 1997年6月28號至今
營運單位 廣州地鐵集團有限公司
- 總部 廣州市海珠區新港東路618號
南豐總滙環球展貿中心
- 網站 www.gzmtr.com
廣州地鐵2013(繁體中文+英文).jpg

廣州地鐵粵拼gwong2 zau1 dei6 tit3)係中華人民共和國廣州市城市軌道交通系統,由廣州市地下鐵道總公司負責營運同埋管理。首段喺1997年6月28號正式開通,唔計香港臺灣,廣州係繼北京天津上海之後,第四個有地鐵系統嘅中國城市,亦係中國第一個擁有地鐵嘅副省級市

廣州地鐵係廣州市民主要嘅交通工具之一,截至2015年12月28號,廣州地鐵擁有9條營運路綫,總長為266公里,但係始終應付唔到快速增長嘅交通需求,2011年年報顯示日均客流量有450.59萬人次,並喺2010年亞洲運動會免費期以784.4萬人次嘅峰值打破當時嘅全國紀錄[1]。為咗解決交通擠塞嘅問題,並繼續引導城市向外擴張,廣州地鐵仍然進行緊大規模嘅擴建。經過幾次修訂,廣州地鐵嘅遠期規劃長度將達到1023公里。

歷史[編輯]

  • 1992年12月28號,廣州市地下鐵道總公司成立。

工程[編輯]

  • 1965年5月,廣州市進行第一次地鐵規劃與地質勘測。
  • 1993年2月28號,地鐵1號綫正式開工。
  • 1998年7月28號,地鐵2號綫開工。
  • 2001年12月26號,地鐵3號綫開工。
  • 2003年1月19號,地鐵4號綫同地鐵2號綫調整(琶洲至萬勝圍區間)工程(呢段而家係地鐵8號綫)開工、地鐵4號綫大學城專綫(萬勝圍至新造)開工。
  • 2004年5月28號,地鐵5號綫開工。
  • 2006年3月1號,珠江新城旅客自動輸送系統開工。
  • 2006年8月28號,地鐵6號綫開工。
  • 2007年4月9號,地鐵2/8號綫拆解工程開工。
  • 2007年6月28號,廣佛城際軌道交通(廣佛地鐵)全綫、地鐵3號綫北延段(白雲國際機場廣州東站)開工。
  • 2009年7月22號,地鐵1號綫西朗站裝好閘門,標誌住廣州地鐵全部站都裝咗幕門或者閘門。
  • 2009年9月29號,地鐵9號綫清㘵站開工。
  • 2009年10月30號,地鐵6號綫二期工程(長湴-香雪)段試驗性工點蘿崗站開工。
  • 2010年4月8號,廣佛地鐵首通段(魁奇路站-西朗站)隧道全綫貫通。
  • 2010年4月20號,地鐵3號綫北延段隧道全綫貫通。
  • 2010年9月21號,廣佛綫首通段通過咗冷滑試驗[2]
  • 2010年9月22號至24號,因地鐵2號綫拆解同2、8號綫聯合調試嘅需要,原嚟地鐵2號綫(三元里到萬勝圍)成條停運[3]
  • 2010年10月11號,廣州地鐵3號綫北延段整出咗聯絡通道(喺兩條地鐵隧道間用於工程維修、緊急避險同排水嘅通道)嘅混凝土強度肥佬咗,可能會冧。但施工方就整咗份流嘅檢測報告,搞到相關部門喺唔知真相嗰陣就通過咗驗收。之後地鐵公司知道咗呢單嘢,重攞出咗整改同埋補救嘅方案,不過冇影響到3號綫北延段喺11月份之前開通[4][5]
  • 2012年5月5號,地鐵13號綫首期試驗性工點新塘站開工。
  • 2013年5月30號,6號綫首期全綫隧道貫通。
  • 2013年10月30號,4號綫南延段獲得省發改委批復,可以正式開工。
  • 2013年12月20號,13號綫首期獲得批復,可以正式開工。
  • 2014年4月10號,廣州地鐵招標喺6個站添加「文化牆」嘅裝飾,工程價錢係775.67萬蚊。會添加「文化牆」嘅六個站係公園前海珠廣場廣州南站廣州火車站廣州東站同埋機場南站[6]
  • 2015年10月9號,地鐵7號綫首期西延段獲得省發改委批復,可以正式開工。
  • 2015年11月15號,6號綫二期開始鋪軌。
  • 2015年12月17號,9號綫開始鋪軌。
  • 2015年12月底,7號綫首期全部車站封頂。
  • 2015年12月29號,6號綫二期全部車站封頂。
  • 2016年1月,6號綫二期全綫隧道貫通。
  • 2016年1月12號,7號綫首期開始鋪軌。
  • 2016年2月28號,7號綫首期全綫隧道貫通。
  • 2016年6月,7號綫首期西延順德段開工。
  • 2016年7月底,4號綫南延段全部車站封頂。
  • 2016年9月27號,4號綫南延段全綫隧道貫通。
  • 2016年9月28號,地鐵11號綫動工。
  • 2016年10月19號同20號,4號綫南延段同13號綫相繼開始鋪軌。
  • 2016年11月30號,知識城綫開始鋪軌。

通車營運時間表[編輯]

  • 1997年6月28號,地鐵1號綫首段(西朗至黃沙)開通觀光試營運,1997年7月2號正式對市民開放。
  • 1999年6月28號,地鐵1號綫全綫(西朗至廣州東站)正式開通營運。
  • 2002年12月29號,地鐵2號綫首段(三元里至曉港)開通試營運,同原有嘅1號綫形成「十」字型交叉地下軌道網絡。公園前站成為廣州地鐵系統嘅第一個換乘站。
  • 2003年6月28號,地鐵2號綫(三元里至琶洲)全綫正式開通營運。
  • 2005年12月26號,2號綫調整工程(琶洲至萬勝圍區間)(呢段現時係8號綫)、3號綫首段(廣州東站至客村)、4號綫大學城專綫(萬勝圍至新造段)開通營運。
  • 2006年12月30號,地鐵3號綫一期全綫(廣州東站至番禺廣場、天河客運站至石牌橋)、4號綫(新造至黃閣段)開通試運。同日起3號綫行車交路改成 天河客運站-番禺廣場 同 廣州東站-體育西路。由廣州東站往番禺廣場方向嘅乘客,需要喺體育西路站換乘[7]
  • 2007年6月28號,地鐵4號綫一期全綫(萬勝圍至金洲)開通營運。
  • 2009年12月28號,地鐵5號綫首段(滘口至文沖)、4號綫(萬勝圍至車陂南)開通試營運。
  • 2010年9月25號,新二號綫(嘉禾望崗-廣州南站)同八號綫(萬勝圍-昌崗)、四號綫北延段(車陂南-黃村)喺早晨6點開通試營運[8][9][10]
  • 2010年10月28號,廣佛綫(魁奇路站-西朗站)為咗迎接喺11月3號嘅正式開通,免費畀受邀市民試乘兩日[11][12][13]
  • 2010年10月30號,廣州地鐵三號綫北延段(廣州東站-機場南)喺下晝兩點開通營運[14][15][16]
  • 2010年11月3號,廣佛綫首期工程(魁奇路站-西朗站)開通營運[17][18][19]。同日,廣州地鐵八號綫寶崗大道站、沙園站、鳳凰新村站開通營運。
  • 2010年11月8號,珠江新城旅客自動輸送系統(歌劇院站-林和西站)開通營運。經上級部門批准,海心沙站、赤崗塔站暫時唔開通。
  • 2010年11月28號,APM綫赤崗塔站開通,經上級部門批准,海心沙站唔開通營運。
  • 2011年2月24號,APM綫海心沙站開通,同日服務時間再延長一個半鐘。
  • 2013年12月28號,六號線首期(潯峰崗站-長湴站)開通運營,當時沙河站同一德路站重未開通。
  • 2014年1月28號,六號線一德路站開通迎客。
  • 2015年12月28號,廣佛線首期後通段西朗至燕崗段開通試運營。

客流紀錄[編輯]

  • 2010年1月1號,客流超過369萬人次。
  • 2010年5月1號,客流超過438.99萬人次。
  • 2010年9月30號,國慶假期前夕,客流超過478.44萬人次[20]
  • 2010年10月1號,國慶日,客流量為513.30萬人次,比上日多出34.87萬人次[21]
  • 2010年11月1號,受到亞運期間公交免費影響,客流達到781萬,破全國軌道交通系統單日客流紀錄,全綫站點超過90%需要客流管制,1號綫,3號綫,5號綫都要唔畀入站10分鐘[22][23][24]
  • 2010年11月3號,受當日下晝廣佛地鐵正式通車嘅影響,全日客流達到784萬。
  • 2010年11月5號,最後一日免費搭車,全日客流達到784.44萬。
  • 2011年12月24號,平安夜,當日廣州地鐵延長服務一小時,廣州地鐵官方微博話當日客流超過595萬人次。
  • 2014年12月31號,廣州地鐵官方微博話當日總客流量為861.3萬人次。
  • 2016年5月1號,當日綫網總客流達到900萬人次。

其他[編輯]

  • 1997年4月9號,安達-西門子造嘅廣州地鐵首部列車由嘉興號貨輪運到廣州黃埔港
  • 2010年4月20號,地鐵3號綫(廣州東站-體育西路段)由3節編組改成6節編組。
  • 2010年4月28號,地鐵3號綫(番禺廣場-天河客運站段)由3節編組改成6節編組。
  • 2010年7月23號,第1000部地鐵列車落戶赤沙車輛段(呢部車係2號綫同8號綫嘅增購車,產自南車株洲,列車編號係02A048)[25]
  • 2010年8月3號,廣州地鐵開始換幕門蓋板路綫圖同埋部分列車嘅閃燈路綫圖,亞運前統一色調,全部站嘅路綫圖喺2010年10月13號換晒[26][27][28]
  • 2010年10月28號,廣州地鐵啟動史上最嚴嘅安全檢查[29][30][31][32]。但實際上安檢只係流於形式,而且安檢人員都係在校職專學生。
  • 2010年11月6號,免費公交地鐵俾市交委叫停,原因係「行街族」嘅人、單雙號、廣交會客流同上落班嘅白領逼爆地鐵。
  • 2010年11月8號(週一)開始,全市取消免費搭地鐵、公交同過江輪渡嘅優惠措施,向每個家庭發放唔等額嘅現金,作為交通補貼[33][34]
  • 2010年11月14號,國家發展改革委批覆廣州地鐵1號綫、2號綫、3號綫、5號綫、8號綫增購車輛。呢個項目總投資53.57億文,總數大概90列,全部都係6節車廂編組,其中1、2、8號綫係A型車,3號綫係B型車,5號綫係L型車。
  • 2010年12月23號,廣州地鐵各個入站口恢復常態化管理,唔再設置X光機檢查乘客嘅隨身物品,但實際上前一日下晝就取消咗安檢。
  • 2011年1月11號晚黑,5號綫一列車發生縱火案,導致乘客受傷,引發市民對地鐵安全嘅擔憂[35]
  • 2011年3月18號,考慮到1號綫成條綫都裝咗屏蔽門/安全門,列車入站時已經冇鳴笛嘅必要,1號綫取消咗執行十幾年嘅列車進站鳴笛規定。
  • 2012年9月16號,受遊行示威影響,地鐵淘金站全部(A、B)出口自中午12:13開始執行客流控制,至夜晚21:04取消客流控制[36]
  • 2012年9月28號,iMetro地鐵文化館喺公園前站開張,佢號稱華南第一家地鐵文化館[37]
  • 2012年12月28號,廣州地鐵第一個APP喺蘋果Apple Store上咗綫。
  • 2013年9月14號,「科技範」悠悠(YoYo)成為廣州地鐵吉祥物[38]
  • 2013年11月21號,廣州地鐵嘅服務短號96891正式啟用[39]
  • 2014年3月4號,5號綫西村站發生人踩人事件,導致部分財物損失。
  • 2016年8月到12月,廣州地鐵喺全綫車站陸續更新導向牌同屏蔽門吊板貼紙,增加車站編號。新嘅綫網圖亦用咗車站編號。同時,全綫各站重添加咗閃付閘機,預計喺當年年底投用。

開通咗嘅路綫[編輯]

到2015年12月28號為止,廣州地鐵已經開咗1、2、3、4、5、6、8、廣佛同APM綫,挾埋有260.5公里,167座車站(計埋轉車車站),冚唪唥嘅路綫都係廣州市地下鐵道總公司嚟負責營運。

廣州地鐵2015(繁體中文+英文).jpg
路綫 首段開通日期 起點站/終點站 車站數 長度(公里) 車輛段/停車場 控制中心 列車編號
市區地鐵路綫
1號綫 1997年6月28號 西朗 廣州東站 16 18.5 西朗車輛段 公園前控制中心 6A
2號綫 2002年12月29號 嘉禾望崗 廣州南站 24 31.8 嘉禾車輛段
大洲停車場
3號綫 2005年12月26號 天河客運站 番禺廣場 16 64.2 廈滘車輛段 大石控制中心 6B
機場南 體育西路 12[圖註 1] 嘉禾車輛段
4號綫 2005年12月26號 金洲 黃村 16[圖註 2] 46.7 新造車輛段 新造控制中心 4L
5號綫 2009年12月28號 滘口 文沖 24 31.9 魚珠車輛段 魚珠控制中心 6L
6號綫 2013年12月28號 潯峰崗 長湴 21[圖註 3] 34 潯峰崗停車場 潯峰崗控制中心 4L
8號綫 2002年12月29號[圖註 4] 萬勝圍 鳳凰新村 13 15.0 赤沙車輛段 公園前控制中心 6A
城際地鐵路綫
廣佛綫[圖註 5] 2010年11月3號 魁奇路 燕崗 18[圖註 6] 20.73(廣州境內5.9) 夏南車輛段 夏南控制中心 4B
旅客自動輸送系統路綫
APM綫 2010年11月8號 林和西 廣州塔 9 4.0 赤崗塔停車場 赤崗塔控制中心 膠輪2節
總計 143 260.5
  1. 體育西路站唔重複計;唔計未開通嘅高增站機場北站
  2. 由於官橋站慶盛站未開通,所以唔計。
  3. 沙河站暫未開通,唔計入。
  4. 8號綫嘅昌崗萬勝圍段,之前屬2002年開通嘅2號綫,但舊2號綫喺2010年9月25號拆咗畀8號綫,所以8號綫可以睇成2010年9月25號開通。
  5. 廣佛綫係城際地鐵,喺廣州段嘅出入口標識係「廣州地鐵」,喺佛山段嘅出入口標識係「佛山地鐵」。
  6. 計埋佛山入面啲車站。2015年12月27號最後一班車收車之前凈開通從魁奇路到西朗嗰橛。

換乘站[編輯]

內文: 廣州地鐵轉線車站一覽

家下廣州地鐵有18個轉車車站,其中有2個係要出站先至得。

1號綫[編輯]

1號綫嘅安达-西門子列车

1號綫喺1993年12月28號開始逳手,首通段(西朗-黃沙)喺1997年6月28號開始試車。而全綫喺1998年12月28號完工,到咗1999年6月28號先至正式通車,服務時間從朝早6:10到晚黑23:30,大概每2~7分鐘一班車。

1號綫全綫有16個車站,分別係:西朗(轉廣佛綫)、坑口花地灣芳村黃沙(轉6號綫)、長壽路陳家祠西門口公園前(轉2號綫)、農講所烈士陵園東山口(轉6號綫)、楊箕(轉5號綫)、體育西路(轉3號綫)、體育中心廣州東站(轉3號綫),全長大概18.48公里,除咗西朗、坑口係地面站之外,其他車站都喺地底。

2號綫[編輯]

2號綫會江站月台

2號綫第一期(三元里至曉港)喺2002年12月29號開通,全綫(三元里至琶洲)喺2003年6月28號開始營運,而調整段(琶洲至萬勝圍)就喺2005年12月26號同4號綫大學城專綫一齊開通。服務時間從06:00~00:16,大概每2~4分鐘一班車。

2號綫用咗好多國內最先進嘅技術,而且係全球第一條一開通就裝咗屏蔽門嘅地鐵路綫之一。

拆解前有17個車站,分別係:三元里廣州火車站(可轉5號綫)、越秀公園紀念堂公園前(可轉1號綫)、海珠廣場市二宮江南西曉港中大鷺江客村(可轉3號綫)、赤崗磨碟沙新港東琶洲萬勝圍站(可轉4號綫),所有車站都喺地底。

2010年9月21號晚黑,由三元里站開去萬勝圍站嘅尾班車結束服務之後,舊二號綫嘅服務正式停嗮。22號到24號,舊嘅二號綫停運,進行軌道拆解、信號,供電割接工程同埋聯合調試。到咗2010年9月25號,2號綫嘅南北延長綫(廣州南站 - 昌崗、飛翔公園 - 嘉禾望崗)開通運營,之前原先有嘅曉港 - 萬勝圍區間拆解,畀咗8號綫運營,兩條路綫喺昌崗站交匯。南北延綫共有17座車站,1個車輛段(嘉禾車輛段),1個停車場(大洲停車場),2座轉乘車站,2座預留轉乘車站。

依家嘅2號綫由南往北車站分別係:廣州南站石壁會江南浦洛溪南洲東曉南江泰路昌崗(可轉8號綫)、江南西市二宮海珠廣場(可轉6號綫)、公園前(可轉1號綫)、紀念堂越秀公園廣州火車站(可轉5號綫)、三元里飛翔公園白雲公園白雲文化廣場蕭崗江夏黃邊嘉禾望崗(可轉3號綫),冚唪唥嘅車站都喺地底。

3號綫[編輯]

3號綫京溪南方醫院站月台

3號綫係南北走向,全綫長67.25公里,全部係地下綫,包括一條主綫同埋一條支綫,係中國第一條Y形運行模式嘅地鐵綫,亦係中國第一條最高時速去到120公里嘅地鐵綫,總投資達到人民幣159.05億元,首通段 廣州東站-客村 喺2005年12月26號開通。

3號綫嘅主綫係 機場南-番禺廣場,支綫係 天河客運站—體育西路,但現時嘅行車交路同名義上嘅主、支綫並唔相同。實際行車主交路係 天河客運站—體育西路—番禺廣場,機場交路係 機場南-體育西路。

主交路共設16座車站:天河客運站(可轉6號綫)、五山華師崗頂石牌橋體育西路(可轉1號綫)、珠江新城(可轉5號綫)、廣州塔(出閘後可轉APM綫)、客村(可轉8號綫)、大塘瀝滘廈滘大石漢溪長隆市橋番禺廣場

機場交路有15個車站:機場北(未開通)、機場南高增(未開通)、人和龍歸嘉禾望崗(可轉2號綫)、白雲大道北永泰同和京溪南方醫院梅花園燕塘(可轉6號綫)、廣州東站(可轉1號綫)、林和西(出閘後可轉APM綫)、體育西路(可轉1號綫)。

體育西路站係 天河客運站—番禺廣場 交路同 機場南-體育西路 交路嘅轉乘站。由番禺廣場站北上嘅列車到咗體育西路站後即轉入支綫開往天河客運站,而去往機場南站需要喺體育西路站落車轉乘開往機場南方向嘅列車,繼續主綫旅程。

4號綫[編輯]

4號綫海傍站月台

4號綫喺2003年1月29號開工,其中萬勝圍到新造(大學城專綫)喺2005年12月26號開通;新造到黃閣喺2006年12月30號開通;黃閣到金洲喺2007年6月28號開通,全綫長68.96公里(其中黃村到新造係地底段,有29.11公里),服務時間係由6:00到23:00(新造以南地面段21:30收車),大約每4到7分鐘有一班車。

4號綫係南北走向,有18個車站:黃村車陂車陂南(可轉5號綫)、萬勝圍(可轉8號綫)、官洲大學城北大學城南新造官橋(未開通)、石碁海傍低涌東涌慶盛(未開通)、黃閣汽車城黃閣蕉門金洲。其中有地底車站8個、高架車站有10個。

另外4號綫係世界上第一條中、大運載量嘅直綫電機綫路,中國第一條採用直綫電機車輛技術嘅地鐵綫。

而家4號綫南延段起緊,由金洲到南沙客運港,新建飛沙角、廣隆、大沖、塘坑、南橫同埋南沙客運港六站,計劃於2017年通車。

5號綫[編輯]

5號綫西村站月台

5號綫全長大概31公里,投資大概110億文人民幣。5號綫首期工程由滘口至文沖設置24個車站:滘口坦尾(可轉6號線)、中山八西場西村廣州火車站(可轉2號綫)、小北淘金區莊(可轉6號線)、動物園楊箕(可轉1號綫)、五羊邨珠江新城(可轉3號綫)、獵德潭村員村科韻路車陂南(可轉4號綫)、東圃三溪魚珠大沙地大沙東文沖

5號綫喺2009年12月28號開通試運行,同佢同時開通嘅重有4號綫北延綫萬勝圍車陂南[40],啱啱開通嗰時,5號綫係唯一同其它4條路綫都有轉乘站嘅路綫。

6號綫[編輯]

6號綫坦尾站月台

6號綫首期全長大概24.3公里,由潯峰崗至長湴,共設置咗22個車站:潯峰崗橫沙沙貝河沙坦尾(可以轉5號綫)、如意坊黃沙(可以轉1號綫)、文化公園一德路海珠廣場(可以轉2號綫)、北京路團一大廣場東湖東山口(可以轉1號綫)、區莊(可以轉5號綫)、黃花崗沙河頂沙河(未開)、天平架燕塘(可以轉3號綫【北延段】)、天河客運站(可以轉3號綫)、長湴。另外二期12個站重未開通,計劃於2016年底開通。

6號綫喺2013年12月28號開通試運營。啱啱開通嗰陣,6號綫係最多有同一綫路2次換乘站點嘅路綫。

8號綫[編輯]

8號綫寶崗大道站月台

8號綫西起於海珠區工業大道北南田路口鳳凰新村站,經沙園、昌崗路、新港路,東端係海珠區新港東路萬勝圍站。

曉港—萬勝圍係原2號綫嘅沿用路綫,喺2005年12月26號全部通車。2010年9月25號朝早,三元里-江南西段正式同曉港-萬勝圍段分拆,後者各站正式改屬8號綫車站,晏啲就同新建嘅鳳凰新村—昌崗4座新站段連接,貫通成8號綫獨立運營。

現時8號綫全長14.2公里,有13座車站:鳳凰新村沙園(可轉乘廣佛線)、寶崗大道昌崗(可轉2號綫)、曉港中大鷺江客村(可轉3號綫)、赤崗磨碟沙新港東琶洲萬勝圍(可轉4號綫),昌崗站喺2010年9月25號開通,其它3個站喺同年嘅11月3號開通。車輛段係原2號線赤沙車輛段,接軌站係磨碟沙。

8號綫現正實施緊北延段鳳凰新村白雲湖,其中同福西站同文化公園站(將可轉6號綫,已經同6號綫同步建設完成)原來屬於二八拆解工程第14標段,原本預計於2013年尾同6號綫首期一齊通車,但由於同福西站遲遲重未開工,導致區間隧道亦無法開工,所以呢段路綫嘅通車時間被推遲,將同文化公園以北段一齊通車。

北延段通車後,8號綫將使用新起嘅白雲湖車輛段,接軌站係白雲湖;原赤沙車輛段將改建為11號線車輛段。

廣佛綫[編輯]

廣佛綫季華園站嘅月台

廣佛綫係一條跨越廣州市海珠區、荔灣區、佛山市南海區、禪城區嘅城際地鐵路綫,由廣佛軌道交通有限公司負責營運。股份方面,廣州地鐵佔咗51%,凈低嗰49%屬於佛山地鐵。

廣佛綫全長32.973公里,有22個站,全部係地底站,分別係:魁奇路季華園同濟路祖廟普君北路朝安桂城南桂路𧒽崗千燈湖金融高新區龍溪菊樹西朗(可轉乘1號綫)、鶴洞沙涌沙園(可轉乘8號綫),燕崗

廣佛綫試驗段(魁奇路站)喺2002年10月11號開始喐手起,而其它站從2007年6月28號開始陸續開工。2010年11月3號,魁奇路⇄西朗呢橛開通咗。本嚟地鐵方面預計喺2013年起好嗮從西朗⇄瀝滘嘅路段,但由於瀝滘站嘅徵地拆遷補償問題一直未傾掂,搞到後通段開通時間一拖再拖,最後地鐵考慮到客流問題,聽取咗市民意見,決定喺2015年12月28號開通從西朗⇄燕崗嘅後通段。依家淨低石溪到瀝滘呢段重喺度施工緊,預計喺2018年通車。

APM綫[編輯]

APM綫列車

珠江新城旅客自動輸送系統(全稱廣州市珠江新城核心區市政交通項目旅客自動輸送系統,原珠江新城集運系統,簡稱APM)南起海珠區嘅廣州塔站,向北下穿珠江主航道、海心沙、花城廣場,北至林和西站,路綫總長大概3.88公里,全部採用地下路綫。

全綫共設有9座車站,自北向南分別係:林和西體育中心南(工程名:體育中心站)、天河南(工程名:天河南一路站)、黃埔大道(工程名:市民廣場站)、婦兒中心(工程名:中央廣場站)、花城大道(工程名:雙塔站)、大劇院站(曾用站名:歌劇院)(工程名:廣州歌劇院站)、海心沙廣州塔(曾用站名:赤崗塔)。其中林和西站同廣州塔站出閘之後可以轉乘地鐵3號綫,有通道連接到3號綫嘅同名車站。

路綫喺廣州塔站以南有1座地下車輛維修中心(含控制中心)。

運營方[編輯]

現時,廣州地鐵嘅運營管理係「1+4」模式,其中廣州市地下鐵道總公司負責成個網絡嘅運營:

  • 運營事業總部運營一中心
    • 車務一部:1號綫、廣佛綫
    • 車務二部:2號綫、8號綫
  • 運營事業總部運營二中心(以直綫電機地鐵列車為主)
    • 車務三部:4號綫、5號綫
    • 車務四部:6號綫
  • 運營事業總部運營三中心(通勤綫/城際地鐵,以B型地鐵列車為主)
    • 車務五部:3號綫(含三北綫)、APM綫

各車務分部轄下設乘務分部。

廣播[編輯]

一般情況下,廣州地鐵車廂內報站語言依次係普通話粵語同埋英語。報完站之後介紹站點附近嘅道路、地方、機構、建築物(部分由商家贊助),淨係有普通話。5號綫開通後重喺最後加一句普通話「列車即將到達XX站」,之後其他綫路亦加咗呢句。

港鐵嘅系列(包括深圳地鐵)相比,廣州地鐵嘅車廂報站好鬼長。首先港鐵喺任何情況下都唔會只用一語種廣播,無論安全警示又抑或普通報站都係3語廣播(依次係粵普英),車廂廣播亦唔會介紹附近商家。而廣州地鐵普粵英比例唔平等,車廂嘅安全提示、部分換乘指引、站點附近介紹同埋車站手扶電梯附近嘅擴音機安全警示,經常係得普粵英三語中嘅一種或兩種。

2008年5月,2號綫粵語報站俾完全取消咗,網絡上嘅廣州網友頓時群起抗議,一位自稱係地鐵工作人員嘅網民喺論壇上話:「6月28日四號綫因某些原因要從5月8日至6月27日停運,於是,停運信息要加到列車廣播里,但是二號綫廣播系統存儲文件的空間有限,因此只能暫時清理原來的粵語內容以騰出空間。」呢件事經媒體報道之後,5月15號2號綫各站都恢復咗粵語報站[41]。2011年5月31號,有人喺微博上話「廣州地鐵一號綫粵語報站被取消」,再次引起社會廣泛關注。地鐵公司話,佢哋喺列車啟動時加咗「請上車的乘客往車廂中部走」嘅普通話語音播報引導,但冇改變報站語言,只係將報站延後,報站重係三種語言,所以引起咗乘客誤解[42]

車飛[編輯]

廣州地鐵線按里程分段計票價:起步(頭4公里)2元,4~12公里每4公里加收一元,12~24公里每6公里加收一元,多過24公里嘅,每8公里加收一元。APM全程2元。

參攷[編輯]

  1. 第二届地铁春联今起征集 2000元奖金 地铁列车模型 一年专递服务等你拿. 羊城地鐵報. 2011年1月10號.
  2. 广佛线首通段顺利通过冷滑试验
  3. 原地铁二号线因拆解而停运三天的公告
  4. 老工程师"冒死"报料 三号线北延段有危险?. 金羊網—新快報. 2010年10月11號.
  5. 广州地铁恐坍 亚运通车添变?. 聯合早報. 2010年10月15號.
  6. 地铁六大门户车站 775万元装“文化墙”. 廣州日報. 2014年4月10號.
  7. 广州地铁三号线和四号线30日开通. 信息时报. 2006年12月27號.
  8. 3条地铁线明日要迎客
  9. 广州地铁二/八号线今日开通试运营
  10. 新二号线53分钟跑完全程
  11. 10月28日、29日,广佛线免费试乘两天
  12. 广佛地铁昨日开始试乘,亚运期间“逢包必检”从北京路到佛山祖庙 坐地铁只需1小时06分
  13. 广佛地铁今日试乘 两地市民争饮“头啖汤”. 羊城晚报. 2010-10-28.
  14. "地铁三号线北延段明天迎客 体育中心到机场半个钟". 新浪廣東. 2010-10-29. 
  15. 广州地铁三号线北延段明日下午开通 明起可乘地铁赴白云机场
  16. 地铁三号线北延段今天14时开通 直达白云机场
  17. 昌岗至凤凰新村段 、广佛线首期下月3日开通
  18. 广佛开通城际地铁 西朗直达魁奇路只需40分钟
  19. 广州地铁八号线西延段 广佛线3日开通
  20. 地铁客流昨日大破纪录!. 羊城晚報. 2010年10月1號.
  21. 513万客流扑向国庆地铁
  22. 免费地铁日均客流超600万人 公交客流昨增23万. 羊城晚報. 2010年11月3號.
  23. "广州免费乘车首日公交地铁挤爆". 金羊網. 2010年11月2號. 
  24. 免费首日 穗地铁人流漫出地面. 南方都市報. 2010年11月2號.
  25. 广州地铁迎第1000节车厢. 2010年7月26號.
  26. 两条地铁线“门楣”悄然变色. 南方都市報. 2010年8月4號.
  27. 广州地铁:屏蔽门盖板线路图亚运前统一色调
  28. 广州地铁更换新线路图 亚运期间持票观众免票. 廣州日報. 2010年8月12號.
  29. 今天起,进站坐车“逢包必检、逢疑必查”地铁“最严安检”未见排长龙. 羊城晚報. 2010年10月28號.
  30. 广州地铁今起安检 强度空前
  31. 过地铁安检人均用时9秒 廣州地鐵设312个安检点“逢包必检”,安检首日绝大部分站点秩序良好
  32. 地铁进站须安检 携带包裹必须经过X光机检查
  33. 穗公交地铁免费改为现金补贴. 南方都市報. 2010年11月7號.
  34. 公交地铁8日起取消免费措施 改发交通补贴. 大洋網. 2010年11月6號.
  35. 地铁五号线有人点燃煤气罐. 新快报. 2011-01-11].
  36. 广州地铁官方微博 21:04 淘金站取消客流控制。
  37. 广州尝鲜地铁文化馆. 羊城地铁报. 2012年9月28號. (zh-cn)
  38. 这货是广州地铁吉祥物,你怎么看?
  39. 广州地铁服务热线“96891”启用
  40. "五号线开通试运营新闻发布会举行". 2009-12-24. 
  41. 巴士粤语报站失声是场虚惊. 新快报. 2009-03-17.
  42. 微博称一号线取消粤语报站 地铁回应绝无此事. 南方日报. 2011-06-01.

出面網頁[編輯]