廣州地鐵18號綫

出自維基百科,自由嘅百科全書
廣州地鐵18號綫
概覽
營運地區 中華人民共和國廣州
服務類 城市軌道交通
線路類 市域快綫
線路長 62.7km
車站總數 9
軌道標準 1435mm
列車偏組 8節市域快綫列車
營運資訊
營運時期 2021年9月28號[1]~而家
營運單位 廣州地鐵集團有限公司

 廣州地鐵18號綫粵拼gwong2 zau1 dei6 tit3 sap6 baat3 hou6 sin3 ,又嗌南沙快綫naam4 saa1 faai3 sin3,係廣州市起緊嘅地鐵路綫,從天河區廣州東站開始,一直去到南沙區萬頃沙為止。

[編輯]

規劃[編輯]

同依家規劃相近嘅18號綫出現喺2011年前後。嗰時18號綫由廣州南站開始向東行,經過祈福新邨番禺廣場後入南沙區,行經東涌同蕉門,最後到南沙自貿區明珠灣起步區南邊嘅萬頃沙。亦有計劃利用2010年提出嘅白鵝潭快綫嘅規劃,從廣州南站向北延長,去到荔灣區芳村石圍塘。路綫按快綫模式嚟規劃,整咗好少站。

2014年,22號綫正式出現。嗰時嘅22號綫由客村站出發,向東南斜穿出海珠區後沿南沙港快速行落去,終點喺萬頃沙。後嚟綫路又改咗好多,起點由客村改到廣州東站,路線由行南沙港快速改成行經廣園路、馬場、琶洲西區、華南快速、番禺大道同欖核、大崗,同時18號綫南沙段亦改成行S111省道,同嗰時嘅22號綫共綫營運。

2015年,原嚟嘅18、22號兩綫調轉咗,路綫亦改成從廣州東站去到萬頃沙。嗰陣18號綫重有12個站,綫路行經馬場同大崗鎮區,功能定位係實現南沙自貿區快速入城,同時分流3號綫嘅超大客流壓力。

雖然嗰時兩個都屬遠期規劃,但因廣州市人民政府要發展南沙自貿區,加上地鐵方亦考慮到3號綫太逼嘅問題而決定要先起呢兩條地鐵路綫,重要求全綫要喺半個鐘內行嗮[2][3]

2016年11月17號,18號綫經過嘅車站同路線都有重大改變:

  1. 天河段唔再行馬場同華師,改行冼村路
  2. 番禺段初時話取消沙溪站,結果引起好多民眾反對而保留,但取消咗番禺大道北站。
  3. 南沙段綫路拉直咗,改成跟住番禺大道行,唔再兜入欖核同大崗鎮區,同時亦取消咗欖核同大崗站。

呢啲舉措遭遇咗好多質疑同批評。改咗之後,18號綫全綫長度由65.3km縮短到62.8km,車站由12個減少到9個,同時增加咗快慢綫設置,以達到快車半個鐘行嗮嘅目標。同時,由於縮減咗站數,所以「分流3號綫」嘅事亦冇再提出[4][5]

2017年初,廣州將18號綫同其他9條綫路打包成為第三期建設規劃,上報俾國家發改委。重喺同年3月20號俾國家發改委批復咗[6]。同年3月23號搞咗第一次環評[7]。同年4月13號搞咗第二次環評。

喺環評公示期間,有好多人話要加體育東同魚窩頭兩站[8],但2017年5月10號俾市發改委同地鐵方話唔批:原因係若果加咗呢2個站會出現快車從南北兩邊總站(萬頃沙同廣州東站)開始,行嗮全程會超時,加上佢早前定咗位做160km/h嘅路綫而冇加到[9]

建設[編輯]

  • 2017年4月28號,18號綫橫瀝站動工。意味住綫路進入咗實施階段[10]
  • 2017年12月28號,冼村站正式喐手起。
  • 2018年1月1號,石榴崗站正式喐手起。
  • 2018年1月11號,番禺廣場站正式勘探。

綫路[編輯]

廣州地鐵18號綫係廣州南拓戰略嘅重要支撐。綫路北面由廣州東站開始,經過天河區、海珠區、番禺區同埋南沙區,到達南面嘅萬頃沙站,途經珠江新城、琶洲西區、市橋片區同埋明珠灣等地區。綫路全長62.7km,設置9個站,將會按照時速160km/h嘅標準建設,同時設置快慢綫。

走向[編輯]

綫路起點係位於廣州東站站房下嘅廣州東站地鐵站,向南沿住林和中路同體育東路行,穿過天河路、黃埔大道同埋花城大道之後,喺珠江北岸向東轉出一個S形彎,入咗海洲路之後向南行,穿過萬畝果園之後沿住華南快速、番禺大道同埋鳳凰大道行落去,終點站喺規劃南沙高鐵站嘅站房下面。

車站[編輯]

龍潭站嘅月台
冼村站 磨碟沙站 龍潭站 沙溪站 南村萬博站 番禺廣場站 橫瀝站 萬頃沙站
  • 冚唪唥車站都係地下站。
  • 除咗沙溪站,喺規劃入邊,其它站都係轉車站,依家唔係所有站都有車轉。

轉車車站[編輯]

  • 廣州東站:換乘1號綫3號綫11號綫
    車站初定跨鐵路佈置,同其餘三條綫成「口」字形佈置。站台北面有通道連接11號綫站台。北站廳同廣州東站北站房合建,同11號綫車站同埋3號綫北站廳打通。
  • 冼村站:換乘13號綫
    車站喺冼村路上,同13號綫車站成L字形佈置。
  • 磨碟沙站8號綫19號綫
    呢個站會預留19號綫嘅換乘節點。
  • 龍潭站:換乘11號綫
    呢個站位置喺11號綫車站北面,同11號綫可以實現站廳通道換乘。
  • 南村萬博站:換乘7號綫
    呢個站喺番禺大道東側,同7號綫可以實現站廳通道換乘。
  • 番禺廣場站:換乘3號綫17號綫22號綫
    車站位置喺3號綫車站南面、番禺廣場下邊,同3、17號線可以實現站廳通道換乘,同22號綫同台換乘。
  • 橫瀝站:換乘15號綫
    車站預留15號綫換乘節點。
  • 萬頃沙站:換乘15號綫

車場[編輯]

  • 隴枕停車場位於番禺大道北以東、市南路以北、草龍沙河二街以西嘅地塊入邊,係18號綫同22號綫共用嘅停車場。接軌站係番禺廣場。
  • 萬頃沙車輛段位於X298縣道以東、蕉門水道以西、南沙八涌以北嘅地塊入邊,係18號綫同22號綫共用嘅車輛段,承擔18同22號綫列車嘅架大修任務。接軌站係萬頃沙站。

附屬設施[編輯]

綫路設置萬頃沙主變同赤沙滘主變。赤沙滘主變同11號綫合建。

[編輯]

  1. 线. 廣州地鐵. 2021-09-27. 喺2021-09-27搵到.
  2. 气!投三千来亿,广州未来15年新建15条地铁线. 广州日报. 2015-12-22. 原著喺2015-12-23歸檔.
  3. 广州新一轮地铁规划将杀到 15条线路详解. 方日报. 2015-12-22. 原著喺2016-03-04歸檔.
  4. 鐵18、22號綫站點出爐. 原著喺2020年9月8號歸檔. 喺2017年1月26號搵到.
  5. 國規委主任:18號綫擬今年開建. 原著喺2020年9月8號歸檔. 喺2017年1月26號搵到.
  6. . 原著喺2018年8月30號歸檔. 喺2017年4月15號搵到.
  7. . 原著喺2020年3月16號歸檔. 喺2017年4月14號搵到.
  8. 18號綫第二次環評公示. 原著喺2020年3月16號歸檔. 喺2017年4月14號搵到.
  9. 铁18号线还能否增加站点?广州国规委:不可能. 广州日报. 2017-05-10. 原著喺2020-09-08歸檔.
  10. 18號綫動工. 原著喺2020年3月16號歸檔. 喺2017年5月5號搵到.