廣州地鐵8號綫

廣州地鐵8號綫
概覽
營運地區	中國廣東廣州
服務類	城市軌道交通
線路類	市區幹綫
線路長	76.5km+7.1km
- 營運長	14.8km
- 總長	83.6km
車站總數	13
軌道標準	1435mm
列車偏組	6卡編組A型列車
營運資訊
營運時期	2010年9月25號～而家
營運單位	廣州市地鐵集團有限公司

廣州地鐵8號綫，第個名叫琶洲綫，係廣州地鐵第6條通車嘅地鐵綫路。代表色係█藍綠。

佢喺2002年12月28號到2010年9月22號間係2號綫嘅一部分，但喺2010年9月25號一分為二之後先正式獨立，所以可以睇成喺2010年9月25號開通。喺開通初期，曾經俾廣州當地街坊話佢做唯一喺海珠一個區營運嘅地鐵綫。

歷史

規劃

1987年嘅「十字綫網」規劃

1987年，廣州市政府喺準備引入法國資本起地鐵時，一共出咗4個方案，經過意見徵詢，最後決定採用其中嘅「十字綫網」方案。其中嘅2號綫（新市到赤崗），就包括而家8號綫嘅曉港到赤崗呢部份。

到咗1997年，《廣州市城市快速軌道交通綫網規劃研究（最終報告）》提出，要將1987年方案入面嘅2號綫拆開。

係嗰陣時嘅方案A入面，2號綫由新市開始，經過起義路同江南大道，去到南邊嘅後滘（依家嘅瀝滘）；而2號綫拆解出嘅東西向綫路5號綫（唔係依家嘅5號綫）以西塱為起點，沿鶴洞路、昌崗路同新港路行進，經過鶴洞橋、中大，去到琶洲之後，分出支綫去世界大觀(就係依家嘅4號綫北段同21號綫部分路段)，之後主綫繼續去到新洲；嗰陣時嘅工業大道到黃金圍呢部份就屬於4號綫(唔係依家嘅4號綫)。

由於嗰陣時海珠區南邊嘅客流較少，而新港路沿綫交通需求量大，重要服務琶洲會展中心，有關部門最後決定先起2號綫嘅三元里到江南西段同埋5號綫嘅琶洲到曉港段，兩段綫路喺江南西到曉港區間通過雙向聯絡綫嚟連通，以2號綫嘅名義嚟運營；喺呢個區間重預留埋拆解條件，喺未來有需要嘅時候可以拆解成獨立嘅兩條綫。呢個組合就係所謂嘅“舊2號綫”。

喺2003年方案中，1997方案中嘅4、5號綫重組。其中，4號綫嘅沙園到南洲段同5號綫嘅西塱到沙園段成為咗宜家廣佛綫廣州段嘅一部分；5號綫支綫獨立延長成為宜家嘅4號綫；而兩綫嘅其餘部分，就重組為宜家嘅8號綫。

2008年嘅《廣州市新一輪軌道交通綫網規劃方案》提出將原嚟嘅8號綫整成環綫，新建反L形路段喺鳳凰新村同琶洲與8號綫貫通成環，改名為11號綫。而琶洲到新洲段同埋同德圍段，喺細環方案入邊，就分別屬於嗰個方案入邊嘅新8號綫（凰崗-化龍）同13號綫（白雲湖⇄新塘/黃埔客運港）；喺大環方案入邊，就改成咗個方案入邊嘅新8號綫（白雲湖⇄化龍，不過係濱江綫）嘅一段。雖然嗰年提出嘅大細兩個環綫方案中，大環方案獲得咗支持。但係喺2010年，一個「特大環方案」取代咗原嚟嘅大環方案。喺特大環方案中，8號綫大致保持原樣，而環綫（11號綫）就向南同向西拓展咗而變成新起嘅路線。同時，規劃緊嘅8號綫東延段從新洲繼續延長到化龍，後嚟又改成去到廣汽集團化龍基地。

二期（鳳凰新村~文化公園）係2、8號綫拆解工程嘅第14標段，原本諗住喺2013年同6號綫一齊通車。但由於同福西站搞出文物糾紛兼多次更改設計，加上6號綫起好之後冇保留8號綫文化公園站嘅軌排井，呢段綫路將會同北延段（文化公園⇄白雲湖）一齊通車。

本嚟8號綫北邊淨係計劃延伸到江高，但出於花都區政府嘅強烈要求，佢卒之延長到咗廣州北站。呢條延長綫喺2015年被寫入規劃方案，並喺2016年公佈，期間重由於唔合理延長嘅性質而出咗好多拗數。同時，2016方案中亦提出，東延段改為由化龍繼續向南延長，經過蓮花城軌站同石樓鎮後到海傍站為止；同時，去廣汽基地呢段變成咗支綫，重會過江到廣州經濟技術開發區嘅黃埔客運港。後嚟又有消息話條支綫併入咗17號綫。

2017年初，廣州將8號綫北延廣州北站段同其他9條綫路打包成為第三期建設規劃，上報俾國家發改委。到咗3月20號，廣州地鐵第三期建設規劃獲得國家發改委批復，8號綫嘅呢段喺埋入邊。3月23號，8號綫北延廣州北站段進行咗第一次環評公示。

2017年11月26號，地鐵方首次公開講到，8號綫北延段會喺江府站預留拆解條件，拆解之後江府以北路段會成為新嘅未知路綫。

工程同埋營運

舊2號綫（三元里⇄萬勝圍）時期

睇埋：廣州地鐵2號綫

舊2號綫圖示

2010年9月21號拆解之前，2號綫列車上嘅路綫圖

• 1998年7月28號，舊2號綫嘅第一個工點海珠廣場站開工。
• 2001年8月23號，客村站封頂。
• 2001年9月5號，舊2號綫鋪軌工程喺公園前鋪軌基地開工。
• 2002年12月29號，舊2號綫首通段（三元里⇄曉港）開始試運營。
• 2003年5月8號，首通段停止服務50日，準備接入琶洲段。
• 2003年6月28號，三元里到琶洲段開始試運營。
• 2005年12月26號，舊2號綫調整工程（琶洲⇄萬勝圍）同4號綫大學城專綫（萬勝圍⇄新造）一齊通車試運營。嗰時舊2號綫全綫通車。

8號綫（鳳凰新村⇄萬勝圍）時期

• 2004年底，2、8號綫拆解延長工程試驗段：8號綫沙園站同埋2號綫南洲站開工。
• 2007年6月，2、8號綫拆解延長工程得到國家發改委批復。
• 2007年8月，拆解延長工程開工。工程將舊2號綫拆解並向南、西、北三個方向延長。
• 2009年7月19號，土建1標隧道貫通，意味著2、8號綫拆解延長工程全部洞通。
• 2010年3月22號，拆解延長工程短軌鋪通。
• 2010年9月21號收車後，舊2號綫三元里站⇄萬勝圍站停止服務。
• 2010年9月22號到24日，舊2號綫停運，進行軌道一分為二、信號，供電割接工程同埋聯合調試。
• 2010年9月25號，舊2號綫曉港到萬勝圍段所有車站正式改成8號綫嘅車站，同新起嘅鳳凰新村到曉港段貫通成為依家嘅8號綫。由於沙園冷站工期拖延，鳳凰新村到寶崗大道呢三個站冇冷卻水供應，被逼延遲開通，列車喺昌崗站清客，空車到鳳凰新村站返轉頭。
• 2010年11月3號，鳳凰新村、沙園，寶崗大道三站正式開始服務。

8號綫北延段及二期（白雲湖⇄萬勝圍）時期

2015年1月21號，華林寺站重喺度起緊。

• 2012年7月23號，8號綫北延段進行第二次環評公示，提出增埗站比選方案。
• 2013年1月29號，文化公園站後暗挖存車折返綫發生地陷，導致民居被毀。施工方緊急回填咗暗挖地陷段。事後，呢個暗挖區間通過冷凍法重新開挖。
• 2014年1月，8號綫北延段工程可行性研究報告獲得省發改委批復。
• 2016年2月3號，全綫首個新建車站——亭崗站封頂。
• 2016年4月14號，首台盾構機喺亭崗⇄石井區間左綫始發，係全綫首台始發嘅盾構機。同年6月28號，區間右綫盾構亦始發咗，係全綫第二台始發嘅盾構機。
• 2016年10月28號，鳳凰新村-同福西站暗挖隧道（含同福西站暗挖部分）雙綫貫通，係北延段（及二期）第一個雙綫貫通嘅區間。
• 2016年11月尾，白雲湖站封頂。同時，最後一個車站西村站準備進場施工。
• 2016年12月2號，市地名辦公示咗8號綫北延段初定站名，聚龍、平沙同白雲湖站擬分別改名為德康、石潭同滘心站。
• 2016年12月13號，同德圍站南段封頂。
• 2017年1月18號，白雲湖車輛段綜合樓主體結構封頂。
• 2017年2月15號，同德圍公咨委、地鐵公司、荔灣區徵收辦、市住建辦與市林業和園林局及釘子戶協調西村站問題未果，西村站確認飛站。
• 2017年2月24號起，華林寺站因配合考古工作而停工八日。
• 2017年3月初，西村站部分開工。
• 2017年6月23號，石井站主體結構封頂。
• 2017年7月3號，西村站最後一戶被拆除而全面入場施工。
• 2017年8月10號，小坪站封頂。

綫路

概況

8號綫圖示

廣州地鐵8號綫係廣州地鐵一條L形走向嘅市區幹綫，綫路從白雲區白雲湖附近開始，穿過白雲區、荔灣區同海珠區，經過同德圍、上下九、沙園、珠影同琶洲，行到海珠區琶洲附近，有28座車站，全部係地下站；車輛段一處。採用6節A型編組列車。

走向

已開通路段由文化公園引出，先喺人民橋底過海，再經過工業大道北，喺沙園站后轉向東，下穿沙園小區后沿昌崗路同新港路敷設，跟住經過江南大道中、南嘅交界、東曉南路、廣州大道南、江海大道、華南快速同科韻南路，經過昌崗立交、中大南門、客村立交同琶洲會展中心，最後去到新滘東路口附近嘅萬勝圍。

車站

冧巴	車站	開通時間	結構	工法	轉乘綫路	轉乘方式	區屬
801	滘心	2020年11月26號					白雲
802	亭崗
803	石井
804	小坪
805	石潭
806	聚龍
807	上步
808	同德
809	鵝掌坦
810	西村	2022年12月28號			5		荔灣
811	彩虹橋	2022年9月28號
812	陳家祠	2020年11月26號			1	T形節點轉車
813	華林寺
814	文化公園	2019年12月28號	地下分離島式車站	明暗挖結合	6	L形節點轉車
815	同福西		地下分離島式車站	暗挖			海珠
816	鳳凰新村	2010年11月3號	地下分離島式車站	明暗挖結合
817	沙園		地下三層三跨島式車站	部分蓋挖	GF	疊摞式平行跨站台轉車
818	寶崗大道		地下雙層雙跨島式車站	部分蓋挖
819	昌崗	2010年9月25號	地下雙層三跨島式車站	分期明挖	2	L形節點換乘
820	曉港	2002年12月28號	地下雙層三跨島式車站	部分蓋挖
821	中大	2003年6月28號	地下雙層雙跨島式車站	明挖
822	鷺江
823	客村		地下雙層三跨島式車站		3	十字節點換乘
824	赤崗
825	磨碟沙				18	換乘
826	新港東
827	琶洲
828	萬勝圍	2005年12月26號			4	偏十字島側節點換乘

轉車站

• 文化公園：轉6號綫。

  呢個站係L形節點轉車站，由於客流控制嘅原因，高峰時期兩條路綫嘅轉車方法都唔一樣：

  8→6：直接行8號綫月台南邊新起嘅轉車通道，坐扶手電梯或行樓梯或坐𨋢上去就到6號綫月台；

  6→8：行出站廳後向東行到㞘，之後轉左搭扶手電梯或行樓梯或坐𨋢落去就可以到8號綫月台。

• 陳家祠：轉1號綫。

  呢個站係T形節點轉車站，喺8號綫站廳南端會直接同1號綫站廳中部打通。

• 沙園：轉1號綫。

  呢個站係疊摞式逆向平行跨月台轉車站。8號綫行鳳凰新村嗰邊同廣佛綫行燕崗嗰邊喺負二樓，8號綫行萬勝圍嗰邊同廣佛綫新城東方向喺負三樓，同層嘅兩個方向可以實現跨月台轉車，兩層之間通過三組扶梯同樓梯相連。

• 昌崗：轉2號綫。

  呢個站係L形節點轉車站，喺8號綫站台東端有樓梯落去2號綫月台北邊。同時亦可以行站廳換乘。個站由於地下管綫問題，兩條綫嘅車站位置都唔喺路口正下方。

• 客村：轉3號綫。

  呢個站係十字節點轉車站，兩條線喺站台兩端都有樓梯通往轉換層，可以通過轉換層實現快速換乘。喺舊時嘅2號線車站設計嗰陣，呢個站重唔係轉車站，但係動工之後又突然改到要同3號綫換乘，所以要緊急停工嚟改設計，做咗轉車嘅預留條件。即使係噉，喺起緊3號綫嗰陣，重係要托住舊時2號綫月台入面嘅樁基。

• 磨碟沙：轉18號綫。

  呢個站喺開通初期，冇做任何預留轉車通道條件。佢用北站廳北邊棟牆嚟打通兩站嘅轉車。若果：

  8→18：

  去萬勝圍嗰邊——落車之後兜到月台中間嘅闊樓梯或搵月台兩邊嘅窄樓梯後落一層樓，行到對面站廳後上返一層樓，繼續向北行到㞘，見到白墻面後轉兩次彎，到18號綫大站廳後，搭扶手電梯或行樓梯或坐𨋢落去就可以到18號綫月台。

  去滘心嗰邊——落車之後繼續向北行到㞘，見到白墻面後轉兩次彎，到18號綫大站廳後，搭扶手電梯或行樓梯或坐𨋢落去就可以到18號綫月台。

  18→8：

  去萬勝圍嗰邊——落車之後上三層樓繼續向南行到㞘，轉兩次彎，見到橙墻面後搵月台中間嘅闊樓梯或搵月台兩邊嘅窄樓梯後落一層樓，行到對面站廳後上返一層樓後調頭即到8號綫月台。

  去滘心嗰邊——落車之後上三層樓繼續向南行到㞘，轉兩次彎，見到橙墻面後直行就到18號綫月台。

• 萬勝圍：轉4號綫。

  呢個站係偏心十字島側節點換乘站。8號綫嘅側式站台喺負一樓，兩邊都各有組扶梯落去4號綫嘅島式站台。

將來嘅發展

二期同北延段

8號綫嘅北延段（二期）計劃

八號綫二期（鳳凰新村⇄文化公園）係8號綫嘅過江段，長1.8km，總共設置兩個車站(唔含鳳凰新村站)。佢本嚟係2、8號綫拆解工程嘅第14標段，但係通車時間一再拖延。原計劃喺2013年尾同6號綫首期同步通車；宜家又話同8號綫北延段（文化公園⇄白雲湖）一齊通車。

原因一個係同福西站中間改咗好多次設計，預留同19號綫轉車，重引起拆遷同埋文物保護嘅拗數，搞到2014年初先至完成清拆工作而開始喐手；第個係6號綫完工後冇保留到文化公園站嘅軌排井，搞到呢段綫路冇辦法單獨鋪軌，要同北延段一齊鋪軌調試先得。

北延段（文化公園⇄白雲湖）全長16.1km，設站13座（唔計文化公園站），加咗一個車輛段。佢同二期工程已經喺2014年動工，目前全綫已完成40％。

以下將二期工程同北延段記埋一齊：

走向

北延段及二期綫路由白雲區鴉崗立交東北側白雲湖站向南引出，穿過華南快速同滘心村后沿石沙路、石槎路同西槎路行進，下穿石井河、德康路同北環高速，經過同德圍片區，喺鵝掌坦站后向南下穿增埗河，轉向東南沿西增路敷設，喺西村站以南下穿民居、廣州西站、站前路同流花湖公園，轉向南偏西，沿荔灣路、康王路敷設，下穿東風西路、中山七路同長壽西路，經過陳家祠同上下九，喺文化公園以南下穿粵海關舊址，喺人民橋以東約100m處過珠江，沿洪德路同工業大道行進，止於南田路口鳳凰新村站前。

新建車站

車站由南到北依次為華林寺、陳家祠、彩虹橋、西村、鵝掌坦、同德圍、上步、聚龍、平沙、小坪、石井、亭崗、白雲湖。

新增換乘站

• 同福西站：換乘19號綫，為π形節點換乘，8號綫分離式嘅上下行站台各自有換乘節點連接19號綫嘅島式站台。8號綫建設時已預留。
• 彩虹橋站：換乘11號綫同埋13號綫，為T形節點換乘。本站8號綫部分為一島兩側式車站，車站北側通過暗挖部分與換乘節點相連。11同13號綫節點部分喺8號綫建設時已作預留。
• 西村站：換乘5號綫。本站喺5號綫建設時，喺南邊嘅三角站廳預留咗站廳換乘，不過係喺廣雅路一側，而宜家嘅8號綫車站移到咗西增路一側。
• 聚龍站：換乘12號綫，為T形節點換乘，8號綫喺上邊，通過車站南端嘅節點連接12號綫車站中部。8號綫建設時已作預留。

新增車廠

本綫喺廣清高速鴉崗立交東南設置白雲湖車輛段，接軌站係白雲湖。

白雲湖車輛段投用后，原來嘅赤沙車輛段將會拆除重建為11號綫嘅車輛段，而赤沙出入段綫將保留一條，作為8號綫同11號綫嘅聯絡綫。

三期（北延廣州北站段）

8號綫喺白雲湖站之後，重會繼續向北延伸，去到廣州北站。呢條延伸綫主要經過白雲區嘅江高鎮、神山鎮同花都區嘅雅瑤鎮、廣州北站地區，串接白雲、花都兩大組團，對加強兩個地區同中心區嘅聯繫、支持沿綫各鎮區發展具有重要意義。同時，8號綫接入廣州北站，能夠同廣清城際、廣佛環城際、穗莞深城際軌道無縫銜接。

綫路全長約20km，為全地下敷設；新增9座車站，平均站間距2.25km，最大站間距3.06km（江村~江府），最細站間距0.97km（江高~江村）；喺雅瑤鎮附近新設一座停車場。綫路預留咗拆解條件。

目前呢個規劃已經納入咗廣州市軌道交通第三期建設規劃(2017－2023)，預計喺2019年前後實施。

走向

綫路由白雲湖站折返綫引出，向北下穿流溪河同武廣高鐵後，沿鳳翔南路敷設，到江高城軌站附近轉向東，下穿武廣高鐵後沿環鎮東路、夏花三路經過江高鎮區，轉向北沿廣花公路行進，到雅瑤附近轉向西北，再次下穿武廣高鐵後，去到廣州北站西廣場為止。

新增車站

由南往北依次係：鳳翔路站、江高站、江村站、江府站、水瀝站、神山站、鏡湖大道站、雅瑤站、廣州北站。

• 全部車站都喺地下。
• 其中廣州北站同江府站係換乘站，廣州北站可轉乘9號綫同國鐵、城際，江府站可以同拆解後嘅新綫換乘。設計方亦考慮緊喺江高站同廣清城際嘅換乘方式。

新增車廠

喺雅瑤鎮附近設置停車場一座，出入場綫接軌站為神山站同鏡湖大道站。車廠預留遠期綫路擴建為車輛段嘅條件，用地規模亦按照遠期擴建為車輛段預留。

質疑

對此曾經有質疑稱，如估呢個計劃得到落實，8號綫全長將會達到80公里以上，受綫路長度、列車速度、設站密度、營運組織同系統設計等問題影響，到時難以保證8號綫嘅營運質量，對乘客嚟講乘坐體驗亦唔好。而應對綫路過長、旅速過慢嘅問題，最好嘅方法係遲啲將呢條延長綫拆解成一條新嘅快綫。此後地鐵方亦喺深化設計階段考慮預留咗綫路拆解嘅條件。

拆解

將來8號綫嘅江府~廣州北站段可能會拆解成為一條新綫並延伸，而8號綫可能會以江府站作為終點站。目前呢條新綫未有編號，獨立之後嘅延伸計劃亦未公佈，但清遠方面已經提出咗繼續北延嘅設想。

綫路設計充分考慮並預留咗拆解所需條件：

• 拆解節點：江府站預留拆解同換乘條件。
• 地下區間疏散平台：白雲湖-江府段疏散平台設置原則同8號綫既有綫路保持一致，江府-廣州北站段增設疏散平台。
• 車廠：停車場預留遠期路綫拆解病擴建為車輛段的條件，用地規模按遠期擴建為車輛段進行預留。
• 機電設備：本工程嘅供電、通信、信號、綜合監控、自動售檢票、環境同設備監控、門禁同安防等機電系統接入既有運營系統，將來新綫設計方案會考慮接入方案同對既有系統與設備嘅改造工程嘅可行性，同時兼顧新技術與設備更新換代嘅要求，保持技術嘅適當先進性；8號綫遠期延伸綫路需要拆解運行，本工程機電設備系統級方案嘅設計會考慮拆解方案嘅可實施性同合理性。

東延段

8號線東延段（萬勝圍⇄海傍）喺廣州一條規劃中嘅地鐵延長綫，未納入新一輪建設規劃(2016－2022)。

以下信息來自官方已經公佈嘅綫路示意圖：

走向

從依家嘅萬勝圍站開始一直向東行，經過長洲島同化龍展貿城，去到化龍站分出支綫，再南下經過城軌蓮花站同石樓鎮，到3、4號綫海傍為止。

新增換乘站

• 長洲站：換乘7號綫。
• 蒙地站：換乘17號綫。

新增車廠

喺化龍站附近設置化龍停車場一座。

支綫

8號綫支綫(化龍－黃埔客運港)係廣州規劃緊嘅一條地鐵支綫。呢條綫未納入新一輪建設規劃(2016－2022)。

走向

綫路由化龍站出岔，轉向東沿金山大道行進，過江到達5號綫嘅黃埔客運港站。

換乘站

• 廣汽基地站：換乘17號綫。
• 黃埔客運港站：換乘5號綫。

有關事宜

• 由於17號綫過黃埔客運港嘅規劃出現喺一部分區域規劃中，而且具有時效性同權威性，唔排除8號綫支綫拆解為17號綫嘅可能。
• 有傳言話8號綫喺北邊都會整條支綫，由神山到人和，但未有任何官方渠道證實。