廣州地鐵4號綫

廣州地鐵4號綫
概覽
營運地區	中華人民共和國，廣州
服務類	城市軌道交通
線路類	市域快綫
線路長	59.3km
- 營運長	43.65km
車站總數	16
軌道標準	1435mm
列車偏組	4卡編組L型列車
營運資訊
營運時期	2005年12月25號～而家
營運單位	廣州市地鐵集團有限公司
乘客量	443,000 (2015統計)

 廣州地鐵4號綫（粵拼：gwong2 zau1 dei6 tit3 sei3 hou6 sin3） ，第個名係南沙綫（naam4 saa1 sin3）／大學城綫（daai6 hok6 sing4 sin3）／亞運綫（aa3 wan6 sin3），係廣州第4條通車嘅地鐵綫路，綫路代表色係■綠色。

佢亦係廣州第一條上天落地嘅地鐵綫。

歷史

規劃

1997年，喺嗰年嘅方案A入面，5號綫嘅支綫從琶洲分出，向北過江去到世界大觀。到咗2000年，呢條5號綫支綫被獨立成依家嘅4號綫，北邊延長至科學城，而南邊為咗配套小谷圍島上邊大學城嘅開發同照顧番禺撤市設區，而延長到新造鎮。綫路喺琶洲塔站同舊時嘅2號綫轉乘。

2003年，喺年初嘅A、B兩份方案入邊，4號綫南邊都係沿住廣澳高速繼續行，喺規劃緊嘅廣州新城附近轉彎向東去到海鷗島。而嗰時嘅3號綫喺去到廣州新城之後沿住廣澳高速繼續向南去到南沙。但最後定出嘅方案係3號綫同4號綫嘅轉乘站——廣州新城站（而家係海傍站）嘅南、東兩邊路線調轉，改成3號綫入海鷗島，而4號綫確定向南插入南沙區，北段繼續向東插入蘿崗新區。

本嚟話4號綫北延段要對接蘿崗區（今日嘅黃埔區），去到水西為止，但喺2008年，蘿崗區揀咗6號綫二期入嚟，令4號綫北延段被延期。

2010年前後，廣州為咗對接增城，將北延段獨立成為21號綫兼向兩邊延長。之後4號綫就冇咗北延計劃。雖然天河區區長公開要求過將4號綫北延入智慧城，但後嚟都冇咗下文。

原先南延段規劃行黃山魯北面同東面嘅進港大道，同規劃緊嘅15號綫高度重合。到咗2011年，為咗配合南沙明珠灣區嘅開發，南延段改成沿住環市大道向南沙嘅舊鎮嗰邊行。

工程同營運

• 2003年1月28號，2號綫調整工程琶洲塔站正式開工。
• 2004年8月13號，新造站主體結構封頂。
• 2005年1月11號，大學城專綫小谷圍站（依家嘅大學城南站）封頂。
• 2005年12月26號，4號綫大學城專綫（萬勝圍⇄新造）、舊2號綫調整工程（琶洲⇄萬勝圍）同埋3號綫首通段同時開始服務。
• 2006年12月20號，4號綫（大學城專綫）暫停服務9日。
• 2006年12月30號，4號綫恢復服務，同時從新造延長去到黃閣。而新造到黃閣部份成為廣州地鐵第一條高架綫。
• 2007年5月8號，因為4號綫延長到金洲嘅關係，成條綫再一次暫停服務。
• 2007年6月28號，4號綫恢復服務，綫路延長到金洲站，同時添加咗蕉門站。
• 2009年12月28號，5號綫通車運營，4號綫亦向北延長到車陂南換乘5號綫。
• 2010年9月25號，4號綫北延段（車陂南⇄黃村）、新2號綫同埋8號綫一齊開始營運。
• 2013年10月30號，4號綫南延段工程俾廣東省發改委批准，可以正式開工。
• 2014年4月22號，南延段最後一個車站南沙客運港開工。
• 2016年6月27號，廣州地鐵首個大盾構區間貫通。呢部盾構機直徑達11.67米，喺2015年10月18號始發，負責中間風井～南沙客運港區間嘅挖掘工作。
• 2016年6月28號，市地名辦發函批准4號綫南延段原金隆站改名為飛沙角站，原資訊園站改名為南橫站，其餘各站站名唔變。
• 2016年7月底，隨著南沙客運港站嘅封頂，南延段全綫車站均實現咗封頂。
• 2016年9月27號，隨著塘坑到南橫區間左綫嘅貫通，南延段實現咗全綫洞通。
• 2016年10月19號，南延段開始鋪軌。
• 2017年3月30號，南延段短軌鋪通。冇耐之後，綫路長軌貫通。
• 2017年4月30號，南延段全綫送電成功。
• 2017年7月28號，南延段正式搞掂三權移交。
• 2017年10月11號，全綫開始搞營運時間表演練持續79日，期間金洲⇄南沙客運港路段暫時唔搭客營運。
• 2017年12月28號朝早，從頭班車開始，路線亦開始延長到南沙客運港。由於飛沙角到南沙客運港部份係地底車站，所以又成為廣州地鐵第一條上天落地嘅路線。

綫路

4號綫圖示

廣州地鐵4號綫北起天河區黃村，穿過天河區、海珠區、番禺區同南沙區，南到南沙區南沙客運港，中間經過生物島、大學城、慶盛高鐵站同明珠灣等區域。綫路全長59.3公里，有24座車站，有1座未開通，家陣有5座係換乘站。採用4輛L型列車。綫路設有一個車輛段，一個停車場。

走向

• 4號綫已建成路段由天河東北邊嘅奧體中心開始，經過中山大道、車陂路同新滘東路，下穿萬畝果園、官洲島同小谷圍島，喺興業大道南面出地面後穿過田野，沿廣澳高速、市南大道同鳳凰大道行駛，喺區府門口轉向東止於雙山大道祁豐路口，全長43.65公里，擁有已運營車站16個、在建預留車站2個同埋一個車輛段。佢都係依家南沙區唯一嘅軌道交通綫路。
• 4號綫南延段由金洲站後開始，兜去金隆路繼續向南行，過咗虎門高速之後轉去東南向，沿環市大道行進，轉行東北兜上海港大道，喺科技大道同港前大道交界嘅東邊設終點站。全長12.6km，新增6個站，全部係地下站；新建一座停車場。

站點

呢條地鐵喺官橋到金洲嗰橛10站都係高架站，其它都喺地底。其中呢條線有16個站：

黃村、車陂、車陂南、萬勝圍、官洲、大學城北、大學城南、新造、石碁、海傍、低涌、東涌、慶盛、黃閣汽車城、黃閣、蕉門、金洲、飛沙角、廣隆、大涌、塘坑、南橫，南沙客運港。其中黃村、車陂南、萬勝圍，大學城南、海傍都係轉車站。

呢條地鐵路線除咗金洲、車陂、黃村、大學城北、新造同埋官洲呢6個站冇廁所之外，其它站點都有廁所。

轉車站

開通咗

黃村：轉乘21號綫

呢個站喺起緊4號綫北延段時，冇預留到轉車條件，係平行站廳轉車。

車陂南：轉乘5號綫

呢個站喺起緊5號綫時順手起，屬T形節點轉車。兩綫嘅轉乘方式係既可以行出站廳轉，又可以喺月台範圍轉。若果揀月台範圍轉嘅必須要噉：

• 4→5：必須要去到月台北邊條樓梯上去先至得。
• 5→4：必須要去到月台中間條向下樓梯落去先至到。

萬勝圍：轉乘8號綫

呢個站喺起緊舊2號綫東延段時順手起，屬偏十字島側節點轉車。兩綫嘅轉乘方式：

• 4→8：必須要喺月台北邊條樓梯上去先至得，因為南邊條樓梯通去尾站月台，唔畀上車。
• 8→4：出車門之後唔好出閘，而係行月台中間條樓梯落去即到。

大學城南：轉乘7號綫

呢個站喺起緊4號綫首通段時預留咗十字轉車結構，屬十字島側節點轉車。兩綫嘅轉乘方式：

• 4→7：出車門之後唔好出閘，而係行月台中間條樓梯落去即到。
• 7→4：出車門之後直接行月台中間條樓梯上去即到。其中西南邊條樓梯去南沙客運港，東北邊條樓梯去黃村。

海傍：轉乘3號綫

呢個站喺起緊亞運城嘅時候預留咗3號綫嘅月台，4號綫嘅站廳都預留咗轉乘通道同扶梯嘅位置，係站廳轉車。

規劃緊嘅

• 車陂：換乘13號綫。

  平行站廳換乘。

• 官洲：換乘12號綫。
• 大學城北：換乘12號綫。
• 官橋：換乘17號綫。
• 蕉門：換乘15號綫。
• 南沙客運港：換乘15號綫。

  本站已預留島側節點。

各站首、末班車詳細

僅供參考：

站名	首班車往南沙客運港站	首班車往黃村站	末班車往南沙客運港站	末班車往黃村站
黃村站	6:00	－	23:15	－
車陂站	6:02	6:17	23:17	23:37
車陂南站	6:04	6:14	23:19	23:34
萬勝圍站	6:07	6:11	23:22	23:31
官洲站	6:11	6:07	23:26	23:27
大學城北站	6:13	6:05	23:28	23:25
大學城南站	6:16	6:02	23:31	23:22
新造站	6:15	6:00	23:34	23:19
官橋站（冇開通）	－	－	－	－
石碁站	6:16	6:20	23:43	23:10
海傍站	6:18	6:17	23:46	22:07
低涌站	6:21	6:14	23:49	23:04
東涌站	6:07	6:10	23:53	23:00
慶盛站	6:00	6:08	23:55	22:57
黃閣汽車城站	6:03	6:17	23:59	22:53
黃閣站	6:05	6:15	0:01	22:51
蕉門站	6:09	6:12	0:05	22:48
金洲站	6:12	6:10	0:08	22:45
飛沙角站	6:15	6:12	0:11	22:42
廣隆站	6:12	6:10	0:13	22:40
大湧站	6:14	6:08	0:16	22:38
塘坑站	6:16	6:05	0:18	22:35
南橫站	6:19	6:02	0:21	22:32
南沙客運港站	－	6:00	－	22:30

註同攷

註

攷