綠

  想搵日本群馬縣一市嘅話，請睇綠市。

綠
色彩座標
HTML	#008000
RGB （R, G, B）1	（0, 128, 0）
CMYK （C, M, Y, K）2	（100, 0, 100, 50）
HSV （H, S, V）3	（120°, 100%, 50%）
數值限制範圍： （１）Ｒ、Ｇ、Ｂ：0～255 （２）Ｃ、Ｍ、Ｙ、Ｋ：0～100 （３）Ｈ：0～360　　Ｓ或Ｖ：0～100
友情提示： 1. 篇嘢嘅色代碼凈提供參考，唔係共通標準。 2. 篇嘢可能用咗顏色標示，可能因為唔同閱讀環境而產生變化，詳細睇網絡無障礙。 3. 色盲或色弱人士用家，一定要搵辨色力正常嘅人士或用無障礙軟體嚟幫手。 4. 黑白屏幕用家一定要改用真彩色或全彩色嘅屏幕先至睇到呢啲色。

綠係一隻色，介乎喺黃同藍之間。係加色法三原色之一。綠色喺大自然入面好常見，好多植物嘅葉都係綠色嘅。其他綠色嘅嘢包括呂宋綠寶石。綠色通常象徵大自然或者安全。

名

睇埋：綠色嘅漸變、色名同語言點分藍綠

綠色係一啲差唔多色水嘅顔色嘅總稱。中文嚟講，仲可以細分做草綠、鴨綠、薄荷綠等等。

淺啲又帶啲黃嘅綠有時可以稱佢為「青色」，例如青檸、青草噉。但係青色仲有其他含義，佢可以解藍色，好似「青天白日滿地紅」，亦可以解藍綠交界嘅一隻色，例如彩虹嘅七色「紅橙黃綠青藍紫」。

有啲語言入面係冇專指綠色嘅詞嘅，佢哋可能將綠色同藍色擺埋一齊。越南文係一個例子：佢哋用 xanh（青）一隻字嚟解嗮藍或者綠。

顔色科學

綠色係一隻可見色。當光嘅主要波長喺495–570納米左右嗰陣，人眼就會見到綠色。

喺畫畫同彩色印刷用嘅減色法（subtractive colour）理論上面，綠色係黃色同藍色或者青色（cyan）溝出嚟嘅，互補色係紅色。不過喺用到加色法（additive colour）嘅時候，例如電視、電腦用嘅RGB色彩模式，綠色就係三原色之一。意思係佢唔能夠溝出嚟，只可以用嚟整第二隻色。呢個時候，佢嘅互補色就係桃紅。

望住綠色光可以放鬆對眼。研究仲指出，喺綠色嘅環境入面可以等人冇咁攰。

藝術史

喺十八到十九世紀期間，染料製造有咗新嘅突破。綠色嘅合成顏料同染料好快就取替咗由植物或者礦物整出嚟嘅天然染料。呢啲新染料唔止鮮艷過以前用開嗰啲，仲要穩定過啲天然染料。不過新染料入面，有啲含有大量對人體有毒嘅砷，所以後來俾人禁用。

差唔多同一期間，綠色開始同浪漫主義產生關聯。呢個時候嘅畫同文學作品好鍾意描繪鄉郊野外嘅鬱鬱葱葱，因為呢啲綠色景觀同工業革命嘅灰黑色有明顯對比。代表畫家有柯洛（Camille Corot）同康斯特勃（John Constable）。

梵高嘅《夜晚咖啡館》

去到十九世紀末，藝術家開始系統性噉研究顔色嘅運用，顔色理論作為一門新嘅學説開始興起。顔色理論嘅研究範疇包括咗對比色嘅運用，例如紅綠擺埋一齊會點樣互相加強效果。梵高就係熱衷用顔色理論嘅畫家之一，佢1888年寫畀細佬嘅信裏面講解咗佢幅《夜晚咖啡館》（法文：Le Café de nuit）嘅顔色運用：

我嘗試用紅同綠表露人類強烈嘅情感。大廳係血紅同深黃色嘅，中間有張綠色嘅桌球檯；四盞檸檬黃嘅燈，散發住橙色同綠色嘅光。每一度都有最唔同嘅紅同綠對立、互片

象徵意義

大自然

綠色嘅常見象徵意義之一係大自然，以及相關概念例如生命、環保。有好多環保組織都用綠色嚟做佢哋嘅代表色，甚至係佢哋個名，好似綠色和平同世界各地嘅綠黨（green party）噉。好多地方仲會預留綠色地帶俾市民享受自然。

安全

綠色時常會用嚟表示安全。原因係紅色有危險嘅意思，而綠色作為紅色嘅對比色，可以最大程度噉同紅色做差異。絕大部分嘅紅綠燈都係用綠色表示安全、可以行，紅色代表唔好行。呢個做法可以追溯到十九世紀嘅火車訊號，當時已經用綠色表示可以安全噉行嘅意思。今時今日，綠色仲可以引申出另一個意思，解冇問題、一切正常。

因為綠色同安全嘅關聯，佢仲衍生咗批准嘅意思出嚟。例如美國派畀永久居民嘅身份證明文件，花名又叫做綠卡，攞到就代表美國政府批准可以永久留低。

平靜

實驗證明，綠色係令人覺得平靜、愜意、宜人嘅顔色，見到可以減少負面情緒。除此之外，綠色仲有其他正面象徵，例如中立、和諧，睇見綠色仲可以啓發人嘅創意。

愛爾蘭

睇埋：矮精靈同聖柏德歷節

綠色成日俾人同愛爾蘭聯想埋一齊，因為綠色同愛爾蘭本土嘅蓋爾（Gaelic）文化有關，愛爾蘭仲有個花名叫呂宋綠島（Emerald Isle）。愛爾蘭民間傳說入面好出名嘅矮精靈（Leprechaun）形象往往係鬍鬚濃密、得大約 3 呎咁高嘅男人，多數著住綠色衫同戴住頂綠色帽。

呢幅畫描繪咗典型嘅矮精靈形象。 呢幅畫描繪咗典型嘅矮精靈形象。  呢幅彩繪玻璃畫嘅係聖柏德歷。 呢幅彩繪玻璃畫嘅係聖柏德歷。

另外，綠色仲同愛爾蘭嘅主保聖人、又稱之為愛爾蘭使徒嘅聖柏德歷（St. Patrick；愛爾蘭蓋爾文：Naomh Pádraig）有關。每年3月17號聖柏德歷節，世界各地嘅愛爾蘭人慶祝嗰陣都會周圍擺綠色嘢、着綠色衫，芝加哥河仲會成條染綠。而因為噉，綠色亦同愛爾蘭當地嘅天主教社區有關。

伊斯蘭教

綠色喺伊斯蘭教入面係一隻神聖嘅色，喺可蘭經入面佢同天堂（Jannah）有關。喺麥地那嘅先知穆罕默德陵墓上面，就起咗一個綠色嘅穹頂（Green Dome）。綠色主要同伊斯蘭教嘅什葉派有關，同白色一齊係嗰派嘅代表色，但係遜尼派有時都會用到綠色。

中華文化

喺傳統中華文化入面，綠色象徵住東邊，所以有句嘢話「左青龍右白虎」。而因為青龍係一隻瑞獸，所以綠色亦係祥瑞嘅顔色。

去到現代，如果一個男人佢老婆出軌偷食，個男人會俾人講話佢戴綠帽，所以綠色有時會講笑叫做「原諒色」。

用落國旗度

意大利國旗（1797年）嘅綠色部分嚟自歷史上米蘭軍隊嘅軍服顔色。 意大利國旗（1797年）嘅綠色部分嚟自歷史上米蘭軍隊嘅軍服顔色。  巴西國旗（1889年）嘅綠色底色係布拉干薩（Bragança）王朝嘅代表色。 巴西國旗（1889年）嘅綠色底色係布拉干薩（Bragança）王朝嘅代表色。  立陶宛國旗（1918年）上面嘅綠色象徵自由、希望、同自然嘅靚。 立陶宛國旗（1918年）上面嘅綠色象徵自由、希望、同自然嘅靚。  愛爾蘭國旗（1919年）嘅綠色代表當地嘅蓋爾（Gaelic）文化同天主教社區。 愛爾蘭國旗（1919年）嘅綠色代表當地嘅蓋爾（Gaelic）文化同天主教社區。  沙地阿拉伯國旗（1932年）嘅綠色底色嚟自伊斯蘭教嘅神聖顔色。 沙地阿拉伯國旗（1932年）嘅綠色底色嚟自伊斯蘭教嘅神聖顔色。  印度國旗（1947年）最底嘅綠色可以解做希望同繁榮兩個意思。 印度國旗（1947年）最底嘅綠色可以解做希望同繁榮兩個意思。  巴基斯坦國旗（1947年）嘅綠色代表住佢哋係穆斯林為主嘅國家。 巴基斯坦國旗（1947年）嘅綠色代表住佢哋係穆斯林為主嘅國家。  尼日利亞國旗（1960年）左右兩邊嘅綠色象徵佢哋國家嘅森林同豐富嘅自然資源。 尼日利亞國旗（1960年）左右兩邊嘅綠色象徵佢哋國家嘅森林同豐富嘅自然資源。  孟加拉國旗（1971年）嘅綠色底色代表佢哋國土嘅茂盛。 孟加拉國旗（1971年）嘅綠色底色代表佢哋國土嘅茂盛。  南非國旗（1994年）上面有綠色、黃色、同黑色，係非洲民族議會（African National Congress）嘅代表色。 南非國旗（1994年）上面有綠色、黃色、同黑色，係非洲民族議會（African National Congress）嘅代表色。