越南文

越南文化 系列文章
順化古城
越南文化介紹    民族    風俗    節慶    信仰    宗敎    語文    文學    藝術    飲食    服飾    武術    遺產 越南地方文化    西北文化    東北文化    北部平原    中北部文化    中南部文化    西原文化    東南部文化    西南部文化

越南文（粵拼：jyut6 naam4 man4*2；越南文：tiếng Việt／㗂越），又叫做京語（ging1 jyu5；tiếng Kinh／㗂京），係越南京族嘅語言。越南文同廣東話一樣係聲調語言同分析語。主要文法同廣東話差唔多，主要唔同係，越南文形容詞習慣擺喺名詞同動詞嘅後邊，同國語相反。語言學分類上，越南文劃入南亞語系孟-高棉語族，呢種劃分係家下學術界嘅主流意見。學界曾經以爲越南文屬漢藏語系，而喺1954年安德利-佐治·柯德希古證明咗越南文聲調系統係反映原始南亞語嘅尾輔音，所以學界基本上確認越南文係南亞語系嘅語言。

聲韻

内文：越南話聲韻

越南文似廣東話，每個字得一個音節。亦都同廣東話一樣有「-p, -t, -k, -m, -n, -ng」呢六種韻尾（對應越南文拼寫：-p, -t, -c, -m, -n, -ng）。另外，重多出咗-nh同-ch呢對韻尾，不過北方音將呢啲發成「-ng／-k」尾音，南方音發成簡單啲嘅「-n／-t」尾音。聲調格局為六聲，按漢藏語言習慣可以分成八調（標準廣東話就六聲九調）。喺發音方面，越南文同廣東話好似，同史上兩種話影響有關。

文法

基本文法係SVO型，文法上修飾動詞嘅成份，要擺喺動詞後邊，呢幾點同廣東話一樣。不過佢啲特點係習慣將啲形容詞擺喺名詞後邊，似法文噉。例如廣東話嘅「長髮」、越南文叫「tóc dài」（「髮長」），有時兩個名詞都唔同廣東話啲次序，例如「越南文」呢個名係要調返轉嚟寫，叫做「Tiếng Việt」（「文越」） 。廣東話轉去越南文嘅「lạp xưởng」（臘腸）同「lì xì」（利是）唔使調轉寫，因爲係譯音，不過越南文好少有呢啲字。另外，佢有好多字都係嚟自法文，例如「紅蘿蔔」叫「cà rốt」，嚟自法文嘅「carotte」，「鏈」叫「sên」，嚟自法文嘅「chaîne」。

指示詞

内文：指示詞 § 越南文

指示詞越南文比較複雜，分成近指、遠指、更遠指，指示代詞、指示形容詞有分別，搭配到唔同時間地點嘅詞都有唔同規律。

文法助詞

越南文係分析語，動詞時體貌之類靠助詞表達。

	喃字	越南文國語字	對應粵字	用法
判定謂詞	羅	là	「係」	指明係乜嘢
否定詞	空	không	「唔」「冇」	否定
否定詞	庄	chẳng	「唔」「冇」	否定
否定詞	𣗓	chưa	「未」	對完成體否定
疑問引詞	固	có	（冇對應，對應閩南語「敢」、吳語「阿」）	喺謂詞前變提問句，跟「..空？」佮埋使，相當於「係..冇」
疑問代詞（人）	埃	ai	「乜人」「邊位」「伆(合音)」	對人提問
疑問代詞（嘢）	夷	gì	「乜嘢」「咩(合音)」	對嘢提問
疑問埞詞	兜	đâu	「邊度」「邊(慳音)」	對埞提問
強調詞	𣎏	có	「有」	1.本意「有」，喺「𣎏」之外動詞前做強調； 2.孻尾加「空」時提問句字，相當於「有..冇」
完整體助詞	㐌	đã	「-唨」「已經」	表示單一完成嘅動作，一般跟「未」相返；喺動詞前
完成體助詞	耒	rồi	「喇」	表示完成出效果嘅動作；放喺句尾
否定詞	空	không	「唔」「冇」	是否/有冇問句句尾詞，相當於「……冇？」「……唔啊？」
完成體問詞	𣗓	chưa	「..未？」	對完成體提問；放喺句尾
進行體助詞	當	đang	「-緊」「喺度」	表示進行緊嘅動作；喺動詞前
未來	𠱊	sẽ	「會-」	表示將來嘅動作；喺動詞前
近未來		sắp	「就-」「就嚟」	表示就嚟發生嘅動作；喺動詞前
近過去	𣃣	vừa	「啱-」	表示啱先發生嘅動作；喺動詞前
慣常體助詞	𫨩	hay	「-開」	表示經常發生嘅動作；喺動詞前；本義係「知到」「學到」
先行態助詞	𡤔	mới	「-先-」「-正-」	表示前動作喺先，再接後動作；本義係「新」

書寫

内文：越南國語字同漢喃

以前越南文一路用漢字寫，加啲自己創制嘅字，叫做喃字（chữ Nôm／𡨸喃），夾雜喺傳統漢字中間，就同而家嘅廣東話書寫情況差唔多。後尾法國人殖民越南，為咗排斥中國對越南嘅傳統影響，割裂越南同中國嘅歷史文化聯繫，啲法國傳教士創制咗拉丁字母嘅越南文，由殖民當局同傀儡政權推廣，同時限制漢字同文言文行文，令到傳統漢字書寫方式式微。20世紀中期之後，越南當局推行法國傳教士創制嘅拉丁字母越南文，到越共上臺後正式廢止咗漢喃。而家喺越南嘅寺廟同舊皇宮先至睇得到漢字。非常之有意思嘅現象係，越南人同中國人一樣過年貼對紙。以前用漢字嗰陣，用漢字寫對聯，書法亦都用毛筆，廢止漢字之後，有啲人就用圈嚟代替漢字，喺門口兩邊各貼一張紅紙畫好多個圈代替漢字；亦有人用拉丁字母嘅越南文嚟寫對聯，睇落去極之騎呢，但而家演化出國語字書法，即係將拉丁字組裝成方塊字嘅形式，類似於諺文噉。

方言

内文：越南話方言

越南文嘅方言比中文簡單，分南、中、北三隻。南部方言代表係西貢音，中部方言代表係順化音、乂安音，北部方言代表係河內音。