珠江新城旅客自動輸送系統
| 珠江新城旅客自動輸送系統 | |
| |
| 概覽 | |
|---|---|
| 營運地區 | 中華人民共和國，廣州 |
| 服務類 | 城市軌道交通 |
| 線路長 | 3.94km |
| 車站總數 | 9 |
| 軌道標準 | 2,032mm混凝土軌道 |
| 列車偏組 | 2節編組CX-100列車 |
| 營運資訊 | |
| 營運時期 | 2010年11月8號～而家 |
| 營運單位 | 廣州市地鐵集團有限公司 |
| 乘客量 | 34,000 (2015統計)[1] |
珠江新城旅客自動輸送系統，全名叫廣州市珠江新城核心區市政交通專案旅客自動輸送系統，原名叫珠江新城集運系統（英文：Zhujiang New Town Automated People Mover System），簡稱係APM綫，係廣州地鐵營運緊嘅路綫，代表色係天藍色。呢條綫係廣州第一條膠輪路軌系統綫路。
歷史
[編輯]建設歷程
[編輯]- 2006年6月30號，珠江新城旅客自動輸送系統喺林和西站工地正式開工。
- 2007年7月16號，廣州地鐵同龐巴迪簽訂系統供應合同。龐巴迪將會向廣州地鐵提供14曱CX-100列車、CITYFLO 650列車控制系統同埋18個專用分叉路。
- 2008年1月1號，天河南站到體育中心南站區間嘅左綫盾構機到達體育中心南站，標誌著林和西~天河南區間雙綫貫通。
- 2008年6月8號凌晨，黃埔大道站到天河南站區間左綫盾構機成功下穿1號綫到達天河南站，標誌著黃埔大道~天河南區間雙綫貫通。而右綫已經喺2007年9月貫通。
- 2009年4月19號，廣州塔到大劇院區間嘅右綫盾構機到達大劇院站南邊嘅吊出井。
- 2009年4月28號，施工緊嘅地下停車場基坑東邊出現地陷，陷落面積大概有10平方米。
- 2010年3月20號，第一部APM列車入駐赤崗塔停車場。
運營
[編輯]- 2010年11月8號14點，APM綫（林和西~歌劇院段）開通。（營運時間：8:00～20:00）
- 2010年11月，隨著廣州亞運會嘅結束，APM綫嘅赤崗塔站正式開通。
- 2011年2月19號，APM綫延長運營時間1個鐘（運營時間：8:00～21:00）。
- 2011年2月24號，海心沙站開放。同日服務時間再延長個半鐘（運營時間：8:00～22:30）。
- 2011年4月20號，最後兩曱車運到赤崗塔停車場，APM綫一期嘅14曱列車到齊嗮。
- 2011年11月8號起，APM綫晚黑延長半個鐘收車（運營時間：8:00~23:00）
- 2013年8月，歌劇院站A、B出口啟用。
- 2013年12月28號，APM綫原歌劇院站同赤崗塔站分別改名為大劇院站同廣州塔站。
- 2014年10月4號起，APM綫服務提早一個鐘開始，延長半個鐘收車（運營時間：7:00~23:30）。
- 2016年2月初，APM綫開始試行微信二維碼刷卡進閘。隨後呢種支付方式推廣到咗成個綫網入邊。
- 2016年8月18號，APM綫開始試行銀聯雲閃付刷卡進閘。隨後呢種支付方式推廣到咗成個綫網入邊。
路線
[編輯]綫路從海珠區嘅廣州塔站去到天河區嘅林和西站，全長3.94公里，總共設置9座車站，最大站間距693.5m，最小站間距315.5m。綫路設置1座地下車輛維修中心（包括埋控制中心）。
車站
[編輯]綫路由北往南設置車站如下：林和西站、體育中心南站、天河南站、黃埔大道站、婦兒中心站、花城大道站、大劇院站、海心沙站同廣州塔站。
- 全部車站都喺地下。
換乘站
[編輯]APM綫換乘其他綫路，都需要出閘，調轉過嚟亦係噉。
計費方式
[編輯]本綫獨立計費，收費區同地鐵系統唔連通。由地鐵系統轉APM綫嘅乘客，需要先出閘兼買咗APM車飛先至入到閘坐APM，調轉嚟亦係噉。單程車票價格2元，可以搭乘任意區間；車票淨係喺入閘時使用，單程票會直接回收。
客流量
[編輯]根據APM綫嘅客流預測，近期APM綫配屬7列14部列車，上綫5列10部列車，高峰開行13對/小時，間隔約277s，高峰小時單向運力為3588人次。 根據地鐵公司畀出嘅數據，由2010年11月8號到2014年7月，APM綫日平均客流凈係得29034人次，冇之前預測嘅50000人次咁多。[2]
用車
[編輯]APM綫係無人駕駛自動導軌系統，根據綫路定位同客流預測，使用龐巴迪Innovia APM 100型列車，車長12751mm，寬2845mm，定員為座位16人、站位122人（按6人/㎡），AW3狀態載客量係179人。列車係全動車，可以單獨運行，亦可以連掛成多節編組運行。列車喺初期兩節連掛運行，同時綫路預留咗遠期三節連掛運行嘅條件同站台空間。
依家APM綫擁有7列共14部列車。根據客流預測，遠期綫路運力將會達到25對/小時，同時編組加到三節，需要配屬11列共33部列車，而入邊嘅9列會上綫運營。不過增購列車亦好麻煩，一個係因為CX-100型列車已經換代停產，另外一個係因為列車造價過高，一部CX-100型列車喺當時就要345萬美元，相比之下1輛A型地鐵列車淨係需要174萬美元。
未來發展
[編輯]2014年8月上旬，廣州市規劃局喺「四館一園」建築設計競賽發佈會上講，APM綫會繼續南延，經過廣州塔南邊嘅嶺南廣場，不過具體方案未定。之後幾年，陸續有消息指，APM綫可能重會延長到瀝滘，途中設站同地鐵12、19、8、11號綫換乘。[3][3]不過由於南中軸開發時間未定，呢個設想冇列入到廣州地鐵嘅遠期規劃。
註
[編輯]- ↑ 〈元旦假期地铁总运客2113万人次〉。《廣州市地鐵集團有限公司》。2015-01-04。原著喺2015-01-04歸檔。喺2015-01-04搵到。
- ↑ 〈APM线吃不饱，南延客村好不好〉。广州日报。2014-08-20。原著喺2014-08-20歸檔。喺2014-08-26搵到。
- ↑ 3.0 3.1 广州市规划部门：APM线或将南延并与客村站换乘 互聯網檔案館嘅歸檔，歸檔日期2020年3月28號，. 广州本地宝 喺2014-08-21搵到
