太平站 (廣州)

太平 Taiping
太平站嘅站名
概覽
冧巴	1409
位置	從化區太平鎮近北回歸線邊 105國道嘅K2511+200標記位
座標	23°27′15.50″N 113°29′11.55″E
車站色
經過路線	14
啟站	2018年12月28號
月台數	2
站口數	2
營運資訊
車站服務時間	06:02～23:28
列車服務時間	06:07～23:23
廣州地鐵14號綫 嘉禾望崗　◄新和 （5.2km） （3.9km）神岡►　東風

太平站（注意「平」字有鄉下話讀音，粵拼：taai3 ping2 zaam6；英文：Taiping Station）係廣州地鐵14號綫嘅車站，2018年12月28號開通，喺從化區太平鎮近北回歸線邊（前太平收費站位置，105國道嘅K2511+200標記位）。

呢個站係廣州地鐵系統入面，離北回歸綫最近嘅車站。佢距離北回歸綫淨得1.39km到。

結構

外觀

從出面睇太平站嘅樣

同其它14號綫嘅高架站一樣，呢個站嘅外觀方面，個樣似高鐵嘅高架站多啲，其中2樓部份睇落似玻璃牆。但佢有個地方同琶洲嘅會展中心唔一樣嘅係，呢個站最頂冇大隻紅字印住個站名響度。

樓層

呢個站一共有3層樓嘅地上區域，其中地上1樓係出入口，有設備房同市政設施；地上2樓係站廳，有票務設施，客務中心同商鋪；地上3樓係14號綫月台。站內既有休息室，又有廁所，更加有母嬰室。其中休息室有4個，喺14號綫月台範圍入面，每個月台各兩個。而廁所同母嬰室喺站廳收費區入面近北邊牆邊範圍，其中母嬰室喺殘疾人廁所門口隔籬。

打掂

地上 三樓	4月台	14號綫備用月台
	島式月台，開左邊門（限慢綫）
	2月台	← 14號綫列車去新和站（行嘉禾望崗嗰邊）
	1月台	14號綫列車去神岡站（行東風嗰邊） →
	島式月台，開左邊門（限慢綫）
	3月台	14號綫備用月台
地上 二樓	站廳	售票機、客服中心、商舖、警務室、安檢設施
地面		出入口、設備房、市政設施

打橫

太平站嘅站廳

太平站嘅月台

站廳

太平站嘅站廳收費區喺車站東邊，西邊係過街通道。收費區有好多部扶手電梯同樓梯、專用𨋢往返月台都得。

月台

呢個站有兩個島式月台，喺廣從南路華軟西大門口地段嘅上空。

不過，由於14號綫實行咗快慢綫，兩綫嘅列車行嘅軌道都唔同。按道理嚟講，慢綫列車喺車站開邊嗰兩條軌道停站，而快綫列車直接喺車站埋邊嗰兩條軌道飛站唔停。不過14號綫嘅快車重未加密，所以快車喺大多數情況下經埋邊嗰兩條軌道直接飛站唔停，而慢車同快車一樣，都喺埋邊嗰兩條軌道停站。

另外，呢個站嘅車行嗰四條軌道入面嗰兩條軌道之間，有條波口位響度，專門畀喺太平站以東北啲車站出冬瓜豆腐時，啲車會攞呢個站做總站，屆時去從化神岡、白田崗、江埔、街口一帶嘅需要轉乘其它交通工具。

商舖同自助服務

呢個站冇商舖，但得臺自助服務。自助服務凈得部共享雨遮響度。

自助服務 共享雨遮

出入口

太平站冚唪唥嘅出入口
A出入口 A出入口  B出入口 B出入口

呢個站有2個出入口，分别係A同B。

冧巴	標記	方位	去到邊度
出入口A	廣從南路	西	平南路、地鐵太平站巴士站（南行）
出入口B	廣從南路	東北	福從路、昌宏街、地鐵太平站巴士站（北行）
註： 有盲人引導徑 | 有輪椅升降臺 | 有斜道 | 有專用𨋢

頭尾班車信息同配線圖

配線圖
█ 14號綫 ▲神岡站
▼新和站

行去邊頭	頭班車	尾班車
每日
14號綫
嘉禾望崗站	06:07	22:59
東風站	06:09	23:23
注意： 喺晚黑最後一班車開走之前嗰5分鐘之內， 係唔畀入閘坐車（包括埋買車飛）。

車站歷史

規劃

喺2003年份地鐵規劃方案入面，嗰時嘅新華綫由花都汽車城出發，先經過人和同太和，再跟住廣從公路去到從化街口為止，嗰時路線經過廣從公路嘅佛公橋一帶。但2005年，新華綫嘅西段（花都汽車城⇆高增）被列入咗9號綫一部分，而廣從路段（太和⇆街口）直到2008年份規劃先至重新提出。

2010年，爲咗落實廣州市嘅「北優」發展戰略同埋支持從化同埋知識城嘅發展，嗰時份規劃話起14號綫，路線要起成「人」字樣，呢個站亦唔變。雖然路線提出咗快綫嘅需求，但唔經呢個站。

施工

2016年12月24號，呢個站周邊重喺度整緊柱墩，未鋪高架段。

• 2015年10月11號，車站正式喐手起。
• 2017年11月15號，新和到呢個站之間嘅高架樑框架正式鋪好兼貫通。
• 2017年11月18號朝早，呢個站到神岡之間嘅高架樑框架正式貫通。
• 2017年11月21號，新和⇄鄧村之間嘅環網電纜正式鋪好。
• 2017年11月22號，車站正式封頂。
• 2018年1月5號挨晚，喺太平站近大城雲山樓盤嘅工地現場發生起重機吊臂斷裂，揼咗喺高架嘅地鐵軌道上邊，令橋面護欄揼咗大概1m闊嘅窿出嚟。事發後雖然未造成人員傷亡，但喺105國道從化太平場路段（西南到東北行方向）搞出大塞車。
• 2018年3月12號，呢個站周邊啲路軌已經鋪好嗮。
• 2018年3月16號，呢個站附近已經見到有火車仔開始搞緊冷滑試驗。
• 2018年8月8號丑時，呢個站到赤草（計埋出入鄧村停車場嗰橛）之間嘅接觸軌順利通過咗冷滑試驗。
• 2018年8月15號，隨住呢個站到赤草（計埋出入鄧村停車場嗰橛）之間正式三權移交，路線亦開始入咗營運前調試階段。
• 2018年9月26號，呢個站正式三權移交而開始營運前調試
• 2018年11月30號申時，主綫一期嘅供電系統安裝工程Ⅱ標段（馬瀝⇄東風）順利搞掂單位工程驗收。

開通

2018年12月28號晏晝，由於14號綫一期主綫部份正式開通，呢個站亦正式開放。

利用狀況

呢個站主要畀喺華軟讀書啲學生、北回歸綫標誌塔玩啲遊客同附近啲樓盤、周邊啲村莊上落客為主。喺每個禮拜日晚黑同禮拜一朝早、及禮拜五晏晝到挨晚，A出入口有好多讀書啲學生上落。而B出入口喺逢每年6月21～23號期間先至有啲人流上落。其它時段除上落班高峰同週末、節假日出現有返鄉下探親啲客流之外，都比較冷清。

附近嘅建築同景區

北回歸綫標誌塔

廣州大學華軟軟件學院

公園

• 廣州北回歸綫標誌塔
• 馬仔山公園
• 荔香公園

學校

• 廣州大學華軟軟件學院

商場

• 整租新光百德廣場

住宅小區

• 華標·荔苑
• 大城雲山

村落

• 水南村

註同攷

註

攷

上一站·下一站

上一站⇚⇚　　　　廣州地鐵　　　　⇛⇛下一站
新和站 嘉禾望崗站←	太平站 14號綫（主綫慢車）	神岡站 →東風站