地下鐵
地下鐵，又叫地下鐵路、地鐵，狹義上係指起響地底（包括過海隧道）為主嘅城市鐵路系統；係鐵路運輸嘅一種。但係廣義上，因為好多呢類系統為咗配合建築嘅環境，或者會有起喺地面（包括天橋同隧道），所以通常涵蓋咗都會地區各種起喺地底同地面上嘅高密度城市鐡路系統[1]。因為咁樣，好多地下鐵都有專用路權，呢個係地下鐵同輕鐵嘅分別之一。
史
[編輯]世界上第一條地下鐵係喺1863年通車嘅倫敦地鐵，佢嘅興建係為咗解決當年倫敦嘅塞車問題。嗰陣時電力未普及，所以即使係地下鐵亦都只可以用蒸汽機車去行。因為機車釋放出嚟嘅廢氣對人體有害，所以嗰陣時嘅地鐵隧道每隔一段距離就要有通去地面嘅通風槽。
到咗1870年，第一條鑽挖式嘅客運地鐵又喺倫敦通車，由倫敦塔左近越過泰晤士河。但係呢條地鐵唔算成功，幾月後便唔再服務嘞。而家最早鑽挖式地下鐵就喺1890年通車，亦都喺倫敦，連接市中心同埋南部地區。最初起地鐵嘅人打算用纜車，但係最後用咗電力車，令到佢成為第一條電動地下鐵。倫敦嘅地下鐵亦都喺1905年全數電氣化。
1896年，嗰時屬於奧匈帝國嘅布達佩斯起咗歐洲大陸嘅第一條地下鐵，全長五公里，十一個站，至而家重用緊。
法國嘅巴黎地鐵喺1900年開通，最初嘅法文名係「Chemin de fer métropolitain」（法文直譯即係「大都會鐵路」），係由「Metropolitan Railway」直接譯過去嘅[未記出處或冇根據]，後來縮短成「métro」，所以而家好多城市軌道系統都叫metro。俄羅斯嘅地鐵亦都用咗呢個名，不過佢用咗基里爾字母，叫Метро。
施工
[編輯]喺地底掘隧道並唔容易，而且需要極多嘅錢同埋時間，至少亦要幾年時間至可以完成。
明挖回填
[編輯]掘地下鐵隧道最簡單直接嘅方法係明挖隨填（又叫做明挖回填）。呢種方法即係喺街道上面挖一條大坑渠，然後喺嗰條大坑渠入面起隧道結構，等到隧道結構完成、有足夠嘅承托力之後先會重新鋪路面。
除咗條路俾人掘開咗之外，其他嘅地下結構（例如電線、電話線同水管）都要重新再鋪過。
起呢一種隧道嘅物料一般係混凝土或者鋼，但係舊啲嘅系統就會用到磚同鐵。
鑽挖法
[編輯]另一種方法係先喺地面某一度掘一個豎井，再喺井底掘隧道。最常見嘅方法係用鑽挖機（潛盾機，盾構機），一邊掘一邊將預先準備好嘅管片安裝喺隧道嘅牆壁上面。對於建築密度高嘅地方或者冇辦法做到明挖法嘅地方（例如水域），鑽挖法甚至係唯一可行嘅建造方法。
呢種方法嘅優點一個係慳時間慳力，全機械化操作，唔使人手掘土；另一個係對街道交通或者其他地下設施嘅影響好細；重可以喺水底起地鐵（倫敦、紐約、東京、香港同首爾呢啲城市嘅城市軌道系統都有好多越過河流或者海港嘅隧道）。
但係呢種挖法又唔係冇缺點嘅，除咗成本高之外，重要經常留意地下水嘅影響；另外喺一啲比較硬嘅岩層開挖，可能要用到炸藥。地底空氣供應問題甚至隧道坍塌亦有可能搞到工人受傷，甚至死亡。另外喺建築密度高嘅地方進行鑽挖法嘅時候除咗要留意避免影響工地四圍嘅建築結構之外，有時亦要統籌嗰邊嘅公用事業，將地底嘅水喉、輸電管線搬走，以騰出地方去起列車通道。
例子
[編輯]參攷
[編輯]- ↑ Urban Mass Transit: The Life Story of a Technology，2006，Greenwood Press，ISBN 978-0-313-33916-5
