利蘭勝利二型

出自維基百科,自由嘅百科全書
Jump to navigation Jump to search
利蘭勝利二型第二系列
Leyland Victory Mk2, Series 2
Guy Victory At The Scottish Vintage Bus Museum - geograph.org.uk - 3119166.jpg
利蘭勝利二型第二系列
製造廠 利蘭(喺旗下佳牌間廠出)
邊道出 英格蘭Wolverhampton
製造年份 1978年—1981年
主要對手 丹尼士喝采
規格
9.7米
2.5米
4.4米
引擎 吉拿6LXB
波箱 Voith DIWA851
Self-Changing Gears GB350

利蘭勝利二型第二系列英國利蘭喺1978年至1981年出嘅前置引擎雙層巴士。同佢嘅競爭對手丹尼士喝采一樣,呢款車係針對當時香港嘅路面環境同埋一人控制模式而設計。

利蘭總共出咗716個勝利二型底盤,全部都賣咗去香港。

利蘭勝利二型喺香港曾經出名過,皆因九巴同埋中巴用緊勝利二型巴士期間,曾經發生多宗重大意外事故,而且大部分都係涉及巴士行駛途中失重心而翻側嘅事故。

設計[編輯]

勝利二型巴士設計係源自利蘭旗下嘅佳牌勝利J型(Guy Victory J)。喺1970年代中,南非嘅Bus Bodies (South Africa) Limited將多架勝利J型改裝成雙層巴士規格兼自己嵌埋車身,供應當地市場,而香港嘅九龍巴士亦因為想要返前置引擎雙層巴士,而喺1976年引入4架嚟試。呢啲舉動令利蘭決定研製過一隻新嘅前置引擎雙層巴士。

勝利二型巴士有移後咗少少嘅前軸,令道窄前門可以擺喺前輪跨上面,同埋有加強咗嘅車陣,而地台離地距離亦低過之前嘅勝利J型。佢可以配吉拿6LXB引擎同埋Voith DIWA 851波箱,不過中華巴士其中一架勝利二型係配Self-Changing Gears(SCG)嘅GB350波箱。

訂單[編輯]

九龍巴士[編輯]

利蘭勝利二型推出之後,九巴就訂咗152架配亞歷山大KB車身嘅勝利二型,包括1架試用嘅冷氣車,以取代原本落訂嘅兩架勝利J型同埋150架利蘭珍寶,151架冇冷氣巴士喺1979至1980年出。

至於架勝利二型冷氣客車就喺1981年付運,配亞歷山大KB車身,冷氣機係由另一副擺喺車尾嘅引擎行,而主引擎嘅油缸就由左尾轆嘅後面移咗去前面。不過架車嘅冷氣被認為係唔可靠,最終副冷氣機喺1983年拆走咗,改為冇冷氣嘅客車。後來架車再降格為巴士。

之後九巴再分兩批訂125架同埋65架勝利二型,佢哋嘅亞歷山大KB車身上有一啲改良,喺1980至1981年出。至於最後一批共200架勝利二型嘅引擎入水位就由車頭移入擋風玻璃後面嘅車廂,而個亞歷山大KB車身再有一啲改良,其中198架喺1981至1983年出,另外兩架喺嵌完車身之後賣咗畀新大嶼山巴士。

自1980年代開始,一直有啲勝利二型提早自九巴車隊退役,當中有啲係因為燒咗或者喺交通意外撞毀而退役,亦有啲係賣咗畀新大嶼山巴士。至於大規模嘅退役潮就喺1995年開始,最後幾架喺1998年3月31號退役。

中華巴士[編輯]

中華巴士喺1979年有一架配亞歷山大CB車身嘅勝利二型投入服務。之後中巴喺1980至1981年引入多146架配亞歷山大CB車身嘅勝利二型,其中兩架係因為利蘭出唔到一架11米利蘭泰坦(B15)而出現嘅。然後中巴喺1982年引入多20架勝利二型,但改配都普金屬部分車身。

中巴有4架勝利二型喺1990年代因為燒咗或者喺交通意外撞毀而提早退役,其中一架本來係改做工程車,但改裝工程最終被中止,後來副底盤捐咗畀香港專業教育學院李惠利分校。而其餘嘅163架勝利二型喺1998年9月1號中巴專營權完咗之後賣咗畀新世界第一巴士,之後呢啲前中巴勝利二型就一路俾新巴士取代,最後幾架喺2000年8月31號退役,其中一架喺當日用作告別遊河。

新大嶼山巴士[編輯]

新大嶼山巴士喺1977年試過一架中巴嘅佳牌阿拉伯五型雙層巴士之後,喺1980年引入兩架配亞歷山大LB車身嘅勝利二型,之後喺1981年引入4架配亞歷山大CB車身嘅勝利二型。1982年新大嶼山巴士喺九巴買兩架啱啱嵌完亞歷山大KB車身嘅勝利二型。再之後新大嶼山巴士喺1983年引入多一架配亞歷山大LB車身嘅勝利二型。

其後新大嶼山巴士喺1985、1987同埋1991年自九巴引入二手勝利二型,每次都係入兩架。

1993年,新大嶼山巴士將其中10架勝利二型(包括全部嚟自九巴嘅二手車)賣畀城巴,用嚟行城巴喺1993年9月1號接辦嘅前中巴路線(統稱Network 26新里程)。而新大嶼山巴士剩低嗰5架勝利二型喺1995年已經退役,之後一直擺喺梅窩,去到2001年已經全部拆晒。

至於賣咗畀城巴嘅勝利二型喺1995至1996年退役,其中5架繼續留喺城巴,一架做鋸樹車、一架做訓練巴士、另外三架被重建成工程車。去到2009年,城巴得番架勝利二型鋸樹車重用緊。

參考/睇多啲[編輯]