丹拿珍寶

丹拿珍寶/利蘭珍寶 Daimler Fleetline/Leyland Fleetline
丹拿珍寶 單層嘅丹拿珍寶 唯一一架喺英國行嘅36呎雙層版丹拿珍寶
製造廠	丹拿（1960年—1973年） 利蘭（1973年—1980年）
邊道出	英格蘭高雲地利（丹拿） 英格蘭Farington（利蘭）
取代咗	丹拿勝利型
製造年份	1960年—1980年
後繼產品	單層：利蘭National 雙層：利蘭奧林比安
主要對手	利蘭Atlantean Bristol VR 艾莎富豪B55 MCW-Scania Metropolitan 丹尼士統治者 都城嘉慕威曼都城巴士
規格
長	30呎、33呎、36呎
闊	8呎、8呎2.4吋
引擎	丹拿CD6 吉拿6LW/6LX/6LXB 康明斯V6-200 利蘭O.680/O.690
波箱	Daimatic Self-Changing Gears

丹拿珍寶（Daimler Fleetline），大概1975年開始改叫利蘭珍寶（Leyland Fleetline），係英國丹拿設計嘅一款後置引擎巴士，1960年亮相。

丹拿珍寶底盤原本係喺高雲地利出，但喺1973年改咗喺利蘭位於Farington嘅廠出。

設計

丹拿珍寶底盤基本設計同利蘭Atlantean相差唔大，副引擎係打橫擺喺車尾，而波箱就擺喺引擎右邊，不過丹拿珍寶一開始就將U形（英文Dropped-centre）尾擔列為標準，所以配矮車身嘅珍寶巴士嘅上層車廂通道可以由頭到尾都設喺中間。

丹拿珍寶通常係配雙層巴士車身，不過丹拿喺1965年推出單層版珍寶，冇耐就改良到最後排座椅可以擺喺引擎室上面。單層版珍寶一直出到1972年利蘭National投產為止。

丹拿珍寶推出初期係30呎長，丹拿1966年推出33呎長單層版珍寶（1967年出埋雙層版），再喺1968年推出36呎長單層版同埋雙層版珍寶。36呎雙層版珍寶嘅底盤設計係源自丹拿Roadliner單層巴士，佢嘅引擎係打直擺喺車尾偏右位置，同其他珍寶好唔同。

1970年代中利蘭特別為倫敦運輸局設計一隻珍寶B20，佢用咗新設計嘅密封式引擎室，頂部兩邊都有條煙囪噉嘅嘢，並將引擎冷卻水箱結合引擎室通風系統，以減少引擎噪音。

引擎方面，頭幾架樣辦車係配丹拿CD6，投產之後就改用吉拿6LX/6LW/6LXB，1970年起加入利蘭O.680選擇；36呎雙層版珍寶係用康明斯V6-200引擎；珍寶B20型係用利蘭O.690渦輪增壓引擎。至於波箱有早期嘅丹拿Daimatic同埋後期嘅Self-Changing Gears（SCG），可以揀半自動或者自動波。

英國

丹拿珍寶喺英國本土有多間巴士公司買，蹤跡遍及英國各地。1968年英國政府開始資助巴士公司買後置引擎巴士，以推行一人控制模式，丹拿珍寶等後置引擎巴士更將英國所有前置引擎巴士淘汰。

丹拿亦有為英國市場出特別設計嘅丹拿珍寶。Walsall Corporation喺1960年代初接收咗一架短前輪跨嘅丹拿珍寶，車門擺喺前軸後面。之後Walsall Corporation同埋SHMD接收短前輪跨嘅丹拿珍寶，不過前輪跨長番啲，兼且有一隻窄車門擺喺前輪跨上面。

另外Walsall Corporation喺1968年接收咗一架36呎雙層版珍寶，後來呢架車做咗收藏品。

倫敦

倫敦運輸局喺1965年買咗8架丹拿珍寶嚟試，批車喺1970年交晒畀London Country Bus Services，最後一架喺1981年退役。

1970至1978年，倫敦運輸局分幾批買入2646架30呎丹拿/利蘭珍寶，配自動波同埋Park Royal或都城嘉慕威曼車身。其中大部分係用一人控制模式，車隊型號DMS；而其餘近600架巴士有售票員，車隊型號DM。倫敦運輸局喺1974年將1架丹拿珍寶CRL6（編號DMS854）送返利蘭做減低噪音嘅研究，即係B20計劃，隨後以珍寶B20樣辦車身份復出。結果，倫敦運輸局最後一批共400架DM/DMS係屬於B20型。

不過呢啲珍寶DM/DMS（但統稱DMS）壞車率高，一人控制嘅效率亦唔及有售票員嘅車。結果自1979年起，倫敦運輸局就開始淘汰DMS，其中多架巴士透過Ensignbus公司轉售至倫敦以外以及海外嘅巴士公司。最後一架DMS巴士喺1993年退出載客服務。

出口市場

葡萄牙

葡萄牙里斯本嘅CCFL公司喺1967至1972年引入55架左軑版丹拿珍寶，配當地車身。

南非

1969年，有16架36呎雙層版珍寶運咗去南非約翰奈斯堡行。去到1970年代有更多雙層版珍寶（不過唔再係36呎長）被運去約翰奈斯堡、開普敦同埋伊利沙伯港行。

香港

香港嘅中華巴士喺1972年引入一架30呎丹拿珍寶嚟試，之前喺1973至1979年引入305架33呎丹拿珍寶同埋30架30呎丹拿珍寶。中巴做宣傳嗰時以「珍寶」嚟形容旗下33呎丹拿珍寶嘅載客量，因此丹拿Fleetline普遍俾人叫做珍寶。

而九龍巴士亦喺1974至1979年引入450架33呎丹拿珍寶。

1980年代，中巴同埋九巴都有買前倫敦運輸局嘅二手丹拿珍寶。中巴買咗208架（一架做訓練巴士，一架喺運送期間損毀而冇出），九巴買咗100架。另外非專利巴士公司城巴同埋雅高巴士都有買前倫敦運輸局同埋倫敦以外嘅二手丹拿珍寶。

1980年代尾至1990年代中，有多架喺香港退役嘅丹拿珍寶俾人運咗上中國大陸，喺多個城市繼續行，直到1997至2001年左右。而喺1990年代尾，增城嘅穗景客車有限公司將幾十架丹拿珍寶改裝（包括改為左軑）同埋換新車身，成為星王ZA6100D，又叫「巨鷹珍寶」。佢哋被賣去廣州同埋深圳繼續行，其中廣州嗰啲喺2001年退役，而深圳最後5架喺2008年10月1號退役。

停產

利蘭珍寶喺1980年停產，但最後一批珍寶去到1983年初至喺英國投入服務。

睇多啲

• Booth, G. (2010). Daimler Fleetline. Ian Allan Publishing. ISBN 978-0-7110-3456-3

出面網頁

• The DMS Bus Page - 專講倫敦運輸局嘅丹拿珍寶DM/DMS巴士