香港嘅島

香港有263個島（包埋大嶼山、香港島同埋其他面積大過500平方米 。總面積約莫係309平方千米。當中大嶼山面積最大，約莫係147.16 平方千米，佔香港總面積接近9%。

香港島北部係歷史悠久嘅政治同商業中心，亦都係香港殖民地時期嘅第1個發展城市維多利亞城嘅所在地；而大部份喺市區以外嘅島稱為離島。

行政區

香港諸島，散佈各區行政區，通常近邊個區就歸入嗰區。

人口眾多嘅香港島，分四區，卽中西區、灣仔區、東區同南區。近香港島嘅島，都歸香港島嘅區，好似鴨脷洲歸南區，青洲歸中西區。最大嘅大嶼山，分兩區管，東北角歸荃灣區，其餘歸離島區。而青衣島歸葵青區。

其餘各島，按水域而分。荃灣到大嶼山東北，就歸荃灣區，當中有馬灣。大嶼山以北水域，赤鱲角歸離島區，其餘歸屯門區，當中包括大小磨刀、龍鼓洲。大嶼山西南東三面水堿，以及香港島以南，都歸離島區，包括長洲、坪洲、南丫島、蒲台島。沙頭角海歸北區，包括吉澳。大埔海、赤門、大鵬灣等水域，就歸大埔區，包括平洲、塔門、馬屎洲。而香港東南水域，就歸西貢區，包括果洲羣島、東龍島、滘西洲。