青衣島
青衣島（粵拼：cing1 ji1 dou2），或者就咁叫青衣，係香港西面水域嘅一個島，響新界南面，接近荃灣同葵涌，係香港都會區（即係市區）嘅一部分。面積約十點六九平方千米[1]。青衣島絕大部份嘅海邊已經填晒海，而且重拼埋周圍嘅兩個島，牙鷹洲同洲仔。未填海之前，島上有東北部有三個海灣同埋漁港。佢哋就係門仔塘、青衣塘同埋青衣灣。滄海桑田，海面變晒做青衣嘅新市鎮。
青衣島四面都係海。東同北面同荃灣葵涌隔住條藍巴勒海峽。西面係馬灣海峽，南面就係維多利亞港。島上有鄉村，市區，重工業同輕工業，亦都係香港嘅油庫。以前個島好隔涉，但家下已經係香港交通樞紐，有七條橋駁住。個島係去香港國際機場必經之地，附近航道係東西海運必經。藍巴勒海峽邊，青衣島東南係九號貨櫃碼頭，係葵青貨櫃碼頭一部份。
青衣島1974年青衣大橋通車之後，就開始納入荃灣新市鎮一部份，係由長青邨開始，一直由南向北發展。青衣島發展比較散，各邨各有各核心，而最旺嘅地方響東北便，青衣港鐵站嘅青衣城。附近亦有長發邨嘅長發商場（而家「長發廣場」），係領匯其中一個重要商場。舊時有青衣大街，不過已經移平起晒樓，唔再係島嘅中心。青衣島大部份公共設施都響島東北。
名
[編輯]青衣島英文寫做Tsing Yi Island，而再早一啲又寫做Tsing-I Island。早期地圖上面，青衣島個位標咗青衣潭或者青衣潭山。青衣個名，唔知點來，不過有幾個傳說。一說青衣島個海多青衣魚，另一說係青衣以前好多船到，交易會磅衫，叫稱衣，叫叫下叫青衣。不過青衣島個名見於白玉禪師嘅讖詩[2]「長沙左手接青羅，右攬青衣濯碧波，深夜一潭旦斗現，裡頭容得萬船過，有人下得朝陽過，十三年後必登科，若是世人尋不得，回頭轉問釣魚哥。」呢首詩傳說係鄧符協落戶岑田（今日錦田），響荃灣一個叫「半月照灣」嘅名穴度葬佢老竇，掘到呢讖詩石。長沙就係長沙灣，青衣就係青衣島。中間洋面有好多船來來往往。
青衣其實重有古名，叫春花落。家下青衣東南都有個地方叫春花落，嗰度有條村叫春花落。咁啱早期青衣島英文亦都寫做Chun Fa Island或者Chung-Hue Island不過條村同古名嘅關係不明。大明時青衣對出個海叫春花洋。春花洋有海盜出沒，大明水師就響度打低班海盜。大明粵大記海圖畫低春花落，響葵涌隔籬。
行政
[編輯]
青衣島家下係屬葵青。雖然係個離島，但係同荃灣好近，所以多年來都係荃灣範圍，所以舊時係歸荃灣區，而唔係離島區。後尾荃灣區實在人太多，青衣島同葵涌劃咗出來，開個葵涌及青衣區，即係家下葵青區。
不過鄉村又有自己分法，青衣島自成一角，屬青衣鄉事委員會。呢樣同葵涌唔同，葵涌係歸荃灣鄉事委員會。青衣鄉事委員會曾經響島好有政治影響力，不過自從有區議會同已經廢咗區域市政局，影響力大不如前。家上青衣住城人口多過村人口好多，影響力更加細。
史
[編輯]青衣島因為響邊疆，古代記載唔係好多，家下搵到最古老記載，都係大明嗰陣嘅海防圖。