鑊耳屋

鑊耳牆（粵拼：wok6 ji5 coeng4）係嶺南建築傳統民居嘅一種山牆，有呢種山牆嘅屋叫鑊耳屋（粵拼：wok6 ji5 uk1）係嶺南建築傳統民居嘅代表。多數用青磚、石柱、同石板砌出嚟，外牆有啲花同雀仔嘅圖案，因為佢哋埲山牆形狀似鑊耳，所以亦叫做「鑊耳屋」。嶺南北部嘅客家地區興嗌佢做「雲牆」或者係「茶壺環」。鑊係古一種大鍋，所以鑊耳牆有時又會畀人嗌做「鍋耳牆」。

建築特點[編輯]

鑊耳牆好似大明嗰啲官帽嘅兩隻耳仔，有「獨佔鰲頭」咁嘅意思，淨係得有功名嘅鄉村先至有資格用，所以亦都係嗰時啲人家境殷實嘅象徵。鑊耳屋用嘅材料好講究，而且造工精細。例如係鑊耳屋用嘅青磚，以打磨嘅水磨青磚為上乘，如果唔係有啲錢嘅人家，係用唔起住唔起嘅。又例如係屋兩邊嘅鑊耳，佢哋結構由簷口至個頂用兩排瓦筒壓頂並用灰塑封好，處理收口嘅工藝，係成座建築工程入面難度最高，造價最貴嘅地方^[1]。

鑊耳狀嘅建築有防火，通風性能良好呢啲特點。火燭嗰陣，高聳嘅山牆可以阻止火勢蔓延同入侵；有微風吹嗰陣，山牆可以擋啲風入巷嗰度，進而通過門同窗流入屋度。民間重有「鑊耳屋」蘊含富貴吉祥，豐衣足食嘅講法。鑊耳屋以廣府風格嘅民居建築為主要嘅代表，但係潮汕、客家嘅民居建築都有類似嘅鑊耳山牆。

由正面睇兩埲高聳嘅牆呈鑊耳咁嘅形狀，由側面睇就似個「凸」字，睇得出嗰時珠三角古居民嘅建築風格。當時嘅順德重有一種以蠔殼砌牆嘅居屋，而嗰頭間唔中亦都有啲用蠔殼代替青磚起嘅鑊耳屋－廣州海珠區嘅黃埔古港同小洲村就有啲咁嘅建築物^[2]^[3]。