潮州木雕

出自維基百科,自由嘅百科全書
Jump to navigation Jump to search

潮州木雕粵拼:Ciu4 zau1 muk6 diu1),又或者嗌做「潮州金漆木雕」,係喺廣東潮州汕頭揭陽嗰頭流行嘅一種民間雕刻藝術,尤其係以多層鏤通又金碧輝煌嘅金漆木雕最出位[1],同東陽木雕黃楊木雕龍眼木雕一齊畀人嗌做中國嘅四大木雕[2]。潮州木雕歷史好耐,喺大唐時期(6 至 9 世紀)同大宋時期(10 到 13 世紀)嗰陣開始有,喺大明時期(14 至 17 世紀)尾成熟。佢犀利到喺 2006 年 5 月 20 日畀人列咗入第一批中國國家級非物質文化遺產名錄[3]

歷史[編輯]

潮州木雕初頭嗰陣風格粗獷啲,但係去到大明時期已經好精美,今日用嘅木雕喺大清時期(17 世紀至廿世紀早期)成咗形。佢嘅歷史有得追溯到 9 世紀尾橛,喺劉恂嗰本書《嶺表異錄》入面[4][5][6],就有三則有關潮州雕刻藝術嘅記載。而潮州金漆木雕嘅出現,就係喺 1054 年左右就有咗文獻記錄[7]。而喺 738 年嗰時起嘅潮州開元寺,入面保存咗一條大約 1 米長嘅唐朝木魚,同埋一條北宋政和四年嘅木龍。而許駙馬府亦都保存咗宋朝嘅樑架雕飾,雖然呢啲木雕飾物嘅刀法簡樸,但係說明咗喺唐宋時期,潮州已經有咗用嚟裝飾建築嘅木雕工藝[8]

藝術特色[編輯]

潮州木雕

種類繁多[編輯]

潮州木雕好少可會攞嚟做獨立嘅擺設,通常係同啲建築物、家俬、同埋啲神器結合埋一齊做後者嘅裝飾或者構件。照用法嚟分,大致上有得分做建築裝飾、神器裝飾、家俬裝飾、同枱頭嘅擺設四類[9]

建築裝飾[編輯]

喺建築物度用嘅潮州木雕包括咗牌匾獅、進屏、屐頭、簷角、柱頭、橫梁、門楣、屏風、門飾、窗格、欄杆、同埋樑嘅雕飾等百幾種。雖然潮州木雕係由閩系潮州人搞起嘅,但係喺粵式建築或者係粵式園林嘅園林建築物入面成日都會用到。

神器裝飾[編輯]

神器裝飾,又或者嗌做「宗教用品裝飾」,分做五類:龕櫝類(包括大龕同櫝仔)、饌盒類(包括饌盒、果碟、糖枋架、同餅架等呢啲)、宣爐罩類(四方型、八角型、圓筒型、木雕加玻璃型等)、神轎神亭類、同游神配套類(包括茶擔、鼓架、燭台、香架、香爐等)。

家俬裝飾[編輯]

包括床、枱、凳、衣櫃、梳妝枱、紙煤筒、燈心筒呢啲屋企成日見到嘅家俬。

枱頭嘅擺設[編輯]

有啲欣賞型嘅細舊木雕。

題材嘅選擇[編輯]

木雕表達嘅內容取材好廣泛,有民間故事小說亦都有啲戲劇故事,或者係地方熟悉嘅歷史人物,更多係嚟自平民嘅生活。

雕法[編輯]

雕刻嘅形式有得分做浮雕沉雕圓雕、同通雕四類[10]

製作過程[編輯]

廣東博物館展示嘅潮州木雕嘅刀具

潮州木雕嘅製作大致分做三個階段,第一係「起草圖」,第二係「鑿粗胚」,第三係「細雕刻」。

木材點揀[編輯]

潮州木雕常用嘅木材有好多種:樟木杉木苦楝黎木殺柴柯木合歡木榕木、同埋柚木呀咁。呢啲木材嘅共通點,就係質地夠結實,又有好高嘅堅韌度。實際運用嗰時要根據飾物嘅種類、用途、同內容,嚟分別咁揀所需嘅木料。其中樟木係主要嘅木材用料[11]

工具點揀[編輯]

除咗畫草圖需要嘅弓把同夾仔,常用嘅工具有幾種:

  • 叩槌,即係敲個鑿用嘅木槌;
  • 方鑿刀,即係平口刀;
  • 方湖刀,刀刃稍弧形,用嚟整出啲有弧度嘅形狀;
  • 圓鑿刀,刀刃弧形,用嚟整圓啲嘅形狀;
  • 撓鑿刀,刀口翹起同刀梗成一定嘅角度,用嚟削平喺深層其他刀掂唔到嘅地方;
  • 雕刀,刀刃成銳角形,用喺劃線條同花紋嗰度;
  • 毛尾刀,鏤空雕刻用嘅特製刃刀,形成長銳角形,用喺側面嘅造型刻畫嗰度[12]

上漆[編輯]

潮州木雕除咗大幅度咁用髹漆貼金之外,重有水漆、退光漆、刀漆、金漆畫、五彩漆畫等嘅工種。一般髹漆貼金要製漆、濾漆、填料、同上漆四個工序[13]

圖片[編輯]

睇理[編輯]

[編輯]

  1. asp?id=712 潮州木雕[失咗效嘅鏈]
  2. "嶺南寫真:潮州木雕後繼乏人遭遇外來木雕搶灘". 中新網. 
  3. 國家名錄339潮州木雕[失咗效嘅鏈]
  4. 《嶺表異錄》(卷上):“廣之屬郡,潮、循州多野象,矛小而紅,最堪作笏。”
  5. 《嶺表異錄》(卷中):“枹木產江溪中,葉細如檜,身堅類柏,惟根軟不勝刀鋸。今潮、循人多用其根,刳而為履。當未乾時,刻削易如割瓜;既乾之後,柔韌不可理也。或油或漆,其輕如通草。暑月著之,隔卑濕地氣,有力如杉木。今廣州賓從諸郡牧守,初到任,下簷皆有油畫枹木履也。”
  6. 《嶺表異錄》(卷中):「枹椽子,形如瓜,皮似橙而金色,故人重之,愛其香氣,京輦豪貴家仃盤筵,憐其遠方異果。肉甚厚,白如蘿蔔。南中女子競取其肉雕鏤花鳥,浸之蜂蜜,點以胭脂,擅其妙巧,亦不讓湘中鏤木瓜也。」
  7. 永樂大典》「潮」字,卷 5345 林汶可《刻漏記》:「乃擇牙校就汀受法,指工繩木,丱金塗漆。歷四旬,凡總六十事件,而漏刻成」
  8. 楊堅平 (2008-03-01). "第二章". 《潮州木雕》. 廣東人民出版社. 第 第19頁頁. ISBN 9787536238039. 
  9. 楊堅平 (2008-03-01). "第七章". 《潮州木雕》. 廣東人民出版社. 第 第107頁頁. ISBN 9787536238039. 
  10. 楊堅平 (2008-03-01). "第七章". 《潮州木雕》. 廣東人民出版社. 第 第124頁頁. ISBN 9787536238039. 
  11. 楊堅平 (2008-03-01). "第八章". 《潮州木雕》. 廣東人民出版社. 第 第136頁頁. ISBN 9787536238039. 
  12. 楊堅平 (2008-03-01). "第八章". 《潮州木雕》. 廣東人民出版社. 第 第138頁頁. ISBN 9787536238039. 
  13. 楊堅平. "第八章". 《潮州木雕》. 廣東人民出版社. 第 第147頁頁. 

參考[編輯]

  • 王大勇. (2011). 潮州木雕艺术地域特色探究. 装饰, (5), 84-85.
  • 沈启绵. (1997). 潮州木雕的源流及其特点 (Doctoral dissertation).
  • 杨坚平. (2000). 潮州民间美术全集. 潮州木雕.