跳去內容

粵語兒歌

出自維基百科,自由嘅百科全書
(由廣東話童謠跳轉過嚟)

粵語兒歌,係指啲喺粵語地區流傳嘅兒歌

發展

[編輯]

隨住1949年大批嘅粵人移民搬去香港,香港繼承咗好多粵語兒歌,好似係「月光光」、「賣懶」呀噉。

1970年代尾,隨住日本卡通香港熱播,同埋社會嘅需求增加,好多新嘅廣東話兒歌湧現,例如係小時候[註 1]飄零燕[註 2]等等。

但由於受推廣普通話嘅影響,唔少廣東話童謠有消失嘅危險[1]

常見粵語兒歌

[編輯]
  • 月光光,照地堂;年卅[註 3]晚,摘檳榔;檳榔香,嚼子薑;子薑辣,買蒲達[註 4];蒲達苦,買豬肚[註 5];豬肚肥,買牛皮;牛皮薄,買菱角;菱角尖,買馬鞭;馬鞭長,起屋樑;屋樑高,買張刀;刀切菜,買籮蓋;籮蓋圓,買條船;船浸底,浸親兩個番鬼仔[註 6];一個蒲頭[註 7],一個浸底[註 8];一個摸茨菇,一個摸馬蹄
  • 月光光,照地堂,蝦仔[註 9]你乖乖瞓[註 10]落床,聽朝[註 11]阿爹要捕魚蝦囉,阿嫲織網要織到天光。
  • 點蟲蟲,蟲蟲飛,飛到荔枝基;荔枝熟,摘邊 buk9[註 12],邊 buk9 啖啖肉[註 13]
  • 點貓貓,貓婆竇,問你捉豬又捉牛?捉到黃牛三百兩,球揣球,開花點豉油
  • 荔枝熟,摘滿屋;屋滿紅,伴住個細蚊公[註 14]
  • 排排坐,食粉果;豬拉柴,狗透火[註 15];貓兒擔[註 16]姑婆坐;坐埋一齊唱支歌。
  • 凼凼轉[註 17],菊花園;炒米餅,糯米團;五月初五係龍舟節啊,亞媽佢叫我去睇龍船;我唔唔去睇,要去睇雞仔;雞仔大,[註 18]去賣;賣咗幾多錢?賣咗幾多隻啊?我買隻風車仔,佢轉得好好睇,睇佢凼凼轉啊菊花園,睇佢凼凼轉啊凼凼轉啊轉[註 19]
  • ABCD,大頭綠衣[註 20];捉人唔到,吹 BB[註 21][註 22]
  • 落雨大,水浸街,阿哥擔柴上街賣,阿嫂出街着花鞋,花鞋花襪花腰帶,珍珠蝴蝶兩邊排。
  • 賣懶去,買精歸,賣左懶仔過新年,食過年飯好種田。
  • 賣懶,賣懶,賣到年三十晚,人懶我唔懶。
  • 細蚊仔,瀡[註 23]滑梯,因住[註 24]跌落嚟;咪學陳德貴,成日[註 25]流鼻涕,跌親[註 26]籮柚唔好睇。
  • 河邊有隻羊,羊邊有隻象,象邊有隻馬騮[註 27],好似你噉樣[註 28]
  • 須,要睇毛,短毛輸,長毛贏,冇毛唔算數。
  • [註 29]開柑,數柑核,邊個[註 30]核多就邊個贏,唔准手賴就縮骨[註 31]
  • 拍大[註 32],唱山歌,人人話我冇老婆[註 33]起心肝娶翻個,有錢娶個嬌嬌女,冇錢娶個豆皮[註 34]婆,豆皮婆,食飯食得多,屎屙兩籮,屙尿沖大海,屙屁打銅鑼。
  • 呈沉剪[註 35],呈沉包,呈沉糯米叉燒包。老鼠唔食香口膠,要食豆沙包
  • 伏匿匿[註 36]:一就預備,二就匿埋,三就開盤,四就嚟到,baang4[註 37]到算數。
  • 點指兵兵,點指賊賊,點著誰人做大兵,點著誰人做大賊。
  • 手指,要估中,邊個唔中,就唔中用,褲浪底[註 38]見個窿
  • 騎牛牛,牛牛走,牛牛響[註 39]前咪回頭,若然[註 40]回頭就打籮柚[註 41]
  • 大眼雞[註 42]鹹魚頭,你屙尿,唔洗手。
  • 咕碌咕碌一,咕碌咕碌二,咕碌咕碌三,準備開炮打敵人!
  • 董存瑞,十八歲,為國犧牲炸堡壘,炸到堡壘 ngok7 ngok7[註 43],全國人民流眼淚。
  • [註 44]銅仙,打銅錢,全憑眼界手出變,叮響銅錢畀個仙[註 45]
  • 打泥炮,泥炮響,唔使摣[註 46]槍上戰場。
  • 折紙機,麻鷹飛,飛嚟飛去唔落地,麻鷹有條尾。
  • 咚啄,酸薑,你亞嫲,纏腳娘。
  • [註 47],跳跳腳,咚咚咚,上跳下跳似麻雀。
  • 跛跛,跛咗蹄,冇米煮,煮泥沙,冇屋住,住樓梯,樓梯有只鬼,嚇到你瓹[註 48]落床下底。
  • 伸長手,頂手掌,死人都要頂硬上[註 49],依牙崩哨[註 50]貓噉樣。
  • 劈友[註 51],劈友,快啲走,走得快,好世界,走得嚤[註 52],冇鼻哥[註 53]
  • 鬥遠掟石頭,因住咪甩手,石頭最冇眼,掟親唔好眼淚流。
  • 掟磚頭,鬥大嚿[註 54],一掟掟到西門口,濺起浪花拋浪頭。
  • 手巾[註 55],真引人,基邊撈魚好過癮,一兜一條好手運,千祈唔好到你頭暈。
  • [註 56]塘 mei1[註 57],塘 mei1 飛,飛到菜田基,田基有條蛇,嚇親你兩仔爺[註 58]
  • 煮飯仔仔先落米,風爐透火柴對齊,千祈唔好咁俹簁[註 59],我哋係細蚊仔。
  • 一人騎膊馬,兩人騎豬,三步要埋頭,撞到面[註 60]就打。
  • 紅辣椒,綠辣椒,平時你牙擦嘴藐藐[註 61][註 62],今日你冇膽同我撩[註 63]
  • 鬼叫[註 64]你咁貪心,聞咗我個屁,嗍[註 65]咗入個鼻,我要你賠翻二兩四。
  • 氼水底,摸泥沙,摸到泥沙當金龜,摸唔到係契弟
  • 陳德貴,住得矮,床下底有只鬼,嚇到瓹[註 66]臺底。
  • 一二三,三二一,一二三四五六七,二三四,四三二,四五六七八九十,肥婆跳舞頂第一[註 67]
  • 過天梯,蝦[註 68]矮仔,人在雲東過到西,唔怕米貴就最怕矮。
  • 黑面李逵,紅面關公,三國水滸亂晒龍[註 69],打敗清兵係英雄。
  • 打棋子,靠眼屎,全憑眼界靠本事,唔好睇錯認鳩屎[註 70]
  • 乞兒仔,畫烏龜,一人一筆咪亂嚟,最後嗰個正衰仔!
  • 大笨象,摣支槍,去打仗,打完仗,翻嚟食碗鹹酸薑[註 71]
  • 鋼盔個大頭佛,着鞋就唔着襪。
  • 有隻雀仔跌落水,跌落水,跌落水,有隻雀仔跌落水,被水沖去。
  • 肥仔個頭,大過五層樓[註 72],肥仔隻手,細過荷蘭豆[註 73]
  • 雞公仔,尾彎彎,做人新婦[註 74]甚艱難!早早起身都話晏,眼淚唔乾入下間,下間有個冬瓜仔,問安人老爺煮定蒸:安人又話煮,老爺又話蒸,蒸蒸煮煮唔中安人老爺意,大揸拉鹽又話淡,手甲挑鹽又話鹹,三朝打爛三條夾木棍,四朝跪爛四條裙!咁好花裙俾你跪爛,咁好石頭俾你跪崩!橫又難,直又難,不如捨命落陰間!人話陰間條路好,我話陰間條路好艱難[4]
  • 秋蟬喊,荔枝熟,阿婆喊,買豬肉。
  • 曖姑乖,嫁後街,後街有鮮魚鮮肉賣,又有鮮花戴,戴唔曬,擺落床頭卑老鼠拉,拉拉拉,拉去大新街,大新街又有個扯皮鞋,扯下開,又扯下埋。

[編輯]
  1. 一九七七年電視劇,劇終日期為一九七八年九月十六日,主題曲由顧嘉煇作曲,鄭國江填詞
  2. 一九七四年日本卡通片,主題曲由渡邊岳夫作曲,盧國沾填詞
  3. 年卅:除夕
  4. 蒲達:苦瓜。
  5. 「檳榔香,子薑;子姜辣,蒲達;蒲達苦,豬肚」又作「檳榔香,子薑;子姜辣,蒲達;蒲達苦,豬肚”。」
  6. 番鬼仔:洋人細路。
  7. 蒲頭:露出水面。
  8. 浸底:水下面。
  9. 蝦仔:孲𤘅子
  10. 瞓讀 fan3西關口音讀 han3
  11. 聽朝:第二日朝早
  12. buk9:量詞,束,串。
  13. 啖啖肉:形容果肉飽滿。
  14. 細蚊公:細路仔(戲稱)。
  15. 透火:生火。
  16. 擔凳:搬凳仔。
  17. 凼凼(tam4 tam4→2)轉:氹氹轉。
  18. 1:nik7,拎。
  19. 有版本作:「凼凼(tam4 tam4)轉,菊花園;炒米餅,糯米團;亞媽叫我睇龍船;我唔睇,睇雞仔;雞仔大,捉去賣;賣得幾多錢,賣得二百錢。”
  20. 大頭綠衣:警察(當時警服為綠色)。
  21. BB:bi1 bi1,哨子。
  22. 呢首童謠係昔日針對沙面租界警察而唱[2][3]
  23. 音 soe4
  24. 因住:小心。
  25. 成日:經常。
  26. 跌親:跌到,仆到。
  27. 馬騮仔:猴子 BB。
  28. 同你個樣。
  29. 搣:用手指去捏,然後用力扭。
  30. 邊個:誰人。
  31. 縮骨:吝嗇。
  32. :又作“”,大腿。
  33. :提,拎。
  34. 豆皮:痘疤。
  35. 猜呈沉:包剪𢱕
  36. 伏匿匿:音 buk9 nik1 nei1
  37. baang4:扮槍聲。
  38. 褲浪底:褲「浪」。
  39. 響:喺;「在」。
  40. 若然:如果。
  41. 籮柚:原指碌柚,引申為臀部之意。
  42. 大眼雞:魚名,又叫赤鰓松毬、厚殼仔、金鱗甲、鐵甲、鐵甲兵、瀾公妾、鐵線婆。
  43. ngok7 ngok7脆:形容脆。
  44. 轆:原指車轆,引申為動詞,滾動。
  45. 仙:cent 嘅音譯,單位,一仙即一分錢。
  46. 摣:揸。
  47. 跛跛:跛下下。
  48. 瓹音 gyun1:四圍走。
  49. 頂硬上:硬著頭皮上。
  50. ji1 ngaa4 baang6 saau3 :露出啲牙又崩又
  51. 劈友:斬人。
  52. 嚤:慢。
  53. 鼻哥:
  54. 大嚿:大隻,高大身材。
  55. 花手巾:魚名,鬥魚,俗稱、龍魚、中國鬥魚、菩薩魚、天堂魚。
  56. 黐:黏。
  57. 塘 mei1蜻蜓
  58. 兩仔爺:兩父子。
  59. 俹簁:音 laa2 sai1,求其是但
  60. 見面
  61. 另一版本:「平時你鑔嘴藐藐」,鑔音 caak8 或 caat8
  62. 藐音 miu2:唔服氣、藐視咁扁嘴叫嘴藐藐。
  63. 撩:鬥。
  64. 鬼叫:邊個叫。
  65. 嗍:吸。
  66. 音 gyun1。從孔竅出曰瓹。『玉篇』,瓹。甕底孔下取酒也。『廣韻』,盆底孔也。水從孔出曰瓹。人從孔出亦曰瓹。作動字用。孔仲南,《廣東俗語考
  67. 本童謠之中「肥婆」兩字可換做任意人名。
  68. 蝦:haa1:欺負。
  69. 音 lyun6 saai3 lung4:大混亂。
  70. 鳩屎:懶叻。鳩:粗口,本字為「㞗」。
  71. 另一版本:返嚟食碗辣椒醬!
  72. 五層樓:即係鎮海樓,喺觀音山(即越秀山)上。
  73. 本童謠之中「肥仔」兩字可換做任意人名。
  74. 婦:音「抱」,本字為「婦」。

參考

[編輯]
  1. . 信息时报. 2012-08-22. 原著喺2014-09-04歸檔. 喺2013-09-14搵到.
  2. www.360doc.com. 广. www.360doc.com. 原著喺2019-12-06歸檔. 喺2018-03-05搵到.
  3. 广. www.xlmz.net. 2005-11-13. 原著喺2019-06-05歸檔. 喺2018-03-05搵到.
  4. 來自《廣州兒歌甲集》第二十一篇

出面網頁

[編輯]