香港藝術館

香港藝術館（Hong Kong Museum of Art）位於香港尖沙咀梳士巴利道10號，係香港特別行政區政府康樂及文化事務署轄下嘅博物館之一。香港藝術館係香港展覽本地、中國同世界各地藝術品嘅主要場地，收藏嘅展品數量達4000幾件、涵蓋中國書畫同古玩、古代文物、具歷史意義嘅畫作同本地藝術家嘅創作成果等。香港藝術館不時舉行各類型嘅藝術展覽，開放畀學校，團體同公眾參觀。藝術館喺2015年8月3號開始閉館3年進行翻新擴建工程，2019年11月30號重新開放。

歷史

香港藝術館嘅歷史，可追溯至1962年3月2號響香港大會堂高座頂層啟用嘅「香港博物美術館」。同埋到1975年7月，「香港博物美術館」分拆為香港藝術館同香港博物館（香港歷史博物館前身）。香港博物館搬去尖沙咀星光行，負責有關歷史及考古嘅收藏；香港藝術館就繼續保留香港大會堂高座頂層原址，負責藝術品嘅收藏。不過，隨住香港藝術館日益發展，原址嘅展覽場地爆晒棚，因此當時嘅市政局為藝術館搵過新館址。

香港藝術館嘅新館址設響尖沙咀，毗鄰香港文化中心同香港太空館。香港藝術館新館於1988年9月動工，1991年11月15號落成啟用，由當時嘅港督衛奕信爵士夫人主持揭幕典禮。

舊三軍司令官邸響1984年改建為茶具文物館，係香港藝術館嘅分館。及至1995年12月14號，茶具文物館嘅新翼「羅桂祥茶藝館」亦落成啟用。

香港藝術館現任總館長係莫家詠，歷任嘅總館長如下：

1	約翰‧溫訥（John WARNER）	1962年至1975年（香港博物美術館館長）
2	譚志成	1975年至1985年（香港藝術館館長）、1985年至1993年（香港藝術館總館長）
3	曾柱超	1993年至2000年
4	朱錦鸞博士	2001年至2006年
5	鄧海超	2006年至2011年
6	譚美兒	2012年至2018年
7	莫家詠博士	2018年至今

大樓

翻新後

翻新後入口改為地下，並設有兩間海景餐廳。展覽空間由原來6,019平方米，增加至大概10,000平方米。其中位於頂層嘅新展廳佔地800平方米，設有三面落地大玻璃，畀市民可270度欣賞維多利亞港美景。

五樓：新視閣、新空間
四樓：至樂樓藏中國書畫館、吳冠中藝術廳、中國書畫廳
三樓：中國文物廳、外銷藝術廳
二樓：專題展覽廳、虛白齋藏中國書畫館、香港藝術廳
一樓：匯堂、別館（上）、澳洲餐廳HUE Dining Room
地下：大堂、別館（下）、藝術館禮品店、INK咖啡店
地庫：活動室、藝術館資源中心、演講廳

翻新前

翻新前香港藝術館嘅建築由建築署負責設計，外牆用料同設計跟香港文化中心大同小異。香港藝術館嘅外牆亦有參與幻彩詠香江嘅鐳射燈光音樂匯演。

香港藝術館分東、西兩座，樓高四層同地庫，樓面總面積17,530平方米。館內設有有七個展覽廳，面積共6,019平方米，分佈如下：

四樓：中國書畫展覽廳
三樓：中國文物展覽廳（1）、專題展覽廳（2）
二樓：專題展覽廳（1）、虛白齋藏中國書畫館、當代香港藝術展覽廳
一樓：中國文物展覽廳（2）、雕塑院
地庫：演講廳

藏品

香港藝術館嘅藏品、除咗由館方從唔同地方同向收藏家蒐購所得之外，主要館藏大多由藝術家、收藏家同公眾捐贈所得。其中特別受注目嘅，係1989年由劉作籌所捐贈嘅一批為數四百幾件嘅中國書畫。呢次嘅捐贈，係香港藝術館歷嚟所接受嘅最大批捐贈。

香港藝術館的藏品主要分為「中國書畫」、「中國古代文物」、「香港藝術」、「歷史繪畫」及「虛白齋藏中國書畫」。

虛白齋藏中國書畫

虛白齋藏嘅藏品，涵蓋由六朝至二十世紀當代作品。尤其以明、清兩朝流派最為齊備、包括揚州八怪及清初六家等。

歷史繪畫

「香港博物美術館」成立時就係以一些反映舊日民生、風俗、地方風貌嘅歷史繪畫為館藏核心，當中包括錢納利同埋郎世寧嘅畫作。

展覽

香港藝術館不時舉行各類型藝術展覽，並經常同世界各地著名嘅博物館合作，邀請博物館借出珍貴展品來港展出，增加市民欣賞藝術嘅機會同埋知識。同時，香港藝術館亦會借出本身嘅珍藏到各地嘅博物館展出，將香港嘅藝術文化介紹到世界各地，促進藝術交流。

開放時間

星期一至三、五：上晝十點至下晝六點
星期六、日、公眾假期：上晝十點至夜晚七點
聖誕前夕同農曆新年除夕：上晝十點至下晝五點
星期四（除咗公眾假期）、農曆年初一、初二休館

入場費

常設展覽免費入場，部分專題展覽可能要另外收錢。

禮品書店

香港藝術館禮品書店係設響香港藝術館嘅書店，位於香港藝術館一樓大堂。訪客可以搵到唔少藝術設計嘅書、掛畫、光碟、香港名設計師設計嘅禮品同香港藝術館出嘅書。

香港藝術館禮品書店唔係由香港藝術館營運。

參考

香港藝術館著，《香港藝術館指南》，香港：市政局，1991。
香港藝術館著，《香港藝術館通訊》，香港：康樂及文化事務署。

睇埋

出面網頁