夏達華聖經世界
夏達華聖經世界（英文：HaDavar Biblical World）又稱為夏達華聖經文物博物館，係香港一間以《聖經》為主題嘅博物館，喺香港新界粉嶺崇謙堂村5A。目的係幫助信徒走入《聖經》嘅場景，親自體會《聖經》裏面嘅山川氣候、風俗文化，親手觸摸同《聖經》有關嘅文物同植物，從而重塑《聖經》嘅故事，令信徒更加了解《聖經》嘅教導。
文物展館[編輯]
2004年，一位夏達華研道中心嘅導師 Peter Wong 從以色列買返嚟嘅一盞油燈開始，呢件文物幫助信徒能夠睇到聖經古代世界，喺之後嘅十年之間導師陸續搜集同聖經有關嘅文物同仿製品，將住所佈置成為一間聖經教室，又喺天台種植各種聖經植物，喺週末開放畀人參觀，聖經世界嘅雛型逐漸形成，跟住開始為聖經教室搵一個獨立嘅場所。
2014年成功喺粉嶺崇謙堂村物色到一間私人住宅，佔地二萬六千尺，起咗兩幢建築物，一幢為一層高、面積一千五百尺，另一幢為兩層高、每層五百尺，戶外係一大片花園草地，加上崇謙堂村有著深厚嘅基督教歷史，實在非常適合作為聖經世界嘅地方。經過兩年嘅資金籌集、買地同工程，聖經世界喺2016年10月正式開放。聖經世界現時有一間文物展館同一個聖經植物培植場。
展館分為五區，館內收藏同聖經有關嘅文物同仿製品共有五百幾件。
- 會堂
- 舊約展館
- 新約展館
- 藏經閣
- 模型室
聖經花園[編輯]
導師走訪過以色列、敍利亞、黎巴嫩、土耳其、埃及等地方，又參觀過以色列嘅植物花園，之後為咗對聖經提及過嘅植物作出更深入嘅研究，就引入一啲品種，喺自己住所嘅天台培植。
根據統計，全本聖經提及嘅植物品種多達二百五十五種，但係喺過去一個世紀，好少有人對聖經嘅植物有系統嘅研究，而家希望信徒應該認真噉去探討呢個課題。自2008年到今日，由天台培植到而家嘅溫室同花園，由品種研究到品種繁殖，經歷過無數次嘅失敗同嘗試，直到今日成功培植嘅品種有五十幾種。
參觀須知[編輯]
預約參觀[編輯]
夏達華聖經世界只接受團體網上預約，免費入場，唔接受冇預約嘅臨時到訪。
每次申請，只可以選擇其中一個部分。若果少過或多過限定人數，申請有機會被取消。
- 「聖經文物展館」每團人數為12至25人
- 「聖經植物」每團人數為10至15人
參觀大概需時三個鐘，包括兩個半鐘嘅導賞同半個鐘嘅自由時間。
注意事項[編輯]
- 若果係學校團體申請，只接受中學或以上學院申請。參觀當日必須有至少1位老師在場，而嗰位老師必須係申請人。
- 由於導賞內容涉汲文化、歷史同地理，所以參觀者需要有一定程度嘅理解能力同專注力。因此，建議參觀者最好年滿12歲，若果要帶11歲或以下嘅細路去，請由家長陪同並且自行照顧。
