M+

出自維基百科,自由嘅百科全書
跳去導覽 跳去搵嘢
M+博物館(2021年11月)

M+英文M Plus)係香港一間視覺文化博物館,喺西九龍西九文化區,重點展出20至21世紀嘅藝術、設計、建築同影像,博物館喺2021年11月11號開幕,第二日(2021年11月12號)正式向公眾開放。

關於M+[編輯]

M+係香港嶄新嘅視覺文化博物館,同時係西九文化區項目之中嘅一塊重要基石,囊括20至21世紀來自香港、中國大陸、亞洲以至全世界嘅視覺藝術、設計、建築同流動影像。

M+位處於全球最有活力嘅地區之一,旨在愈加交互連繫於全球狀態之中,為視覺文化記錄過去、透視現狀、貢獻未來。M+將採跨領域嘅出發點,同時挑戰亦尊重既定界別之間嘅規限,為唔同嘅睇法、敍述同觀眾建立交會點。

M+自2012年開始,即推動各類型嘅公眾項目同展覽,同埋建立永久館藏。

M+大樓[編輯]

經過全球性比賽,M+大樓由世界知名嘅瑞士建築師事務所Herzog & de Meuron,聯同香港TFP Farrells同香港奧雅納工程顧問公司合作設計。佔地六萬平方米嘅M+大樓,將坐擁維多利亞港景致,成為與眾不同嘅地標式建築。

外型修長、設計開揚通透嘅豎向板樓,配備教學、辦公室同餐飲設施,聳立於設有多個展館嘅水平展廳之上。大樓低層就會連接平台花園同區內其他設施,並設有公共資源中心、劇院、購物區、餐廳同後勤區。以倫敦泰特現代美術館、北京國家體育館(「鳥巢」)同其他著名建築設計項目享負盛名嘅Herzog & de Meuron建築師事務所,靈活運用M+選址嘅特色,喺現有嘅機場快綫隧道旁邊,開闢出寬敞嘅大型地下展區「Found Space」,成為主宰整個M+項目嘅關鍵。

展覽[編輯]

開幕展由六個專題展覽組成。

展廳 展覽名 展覽日期 簡介
地下大堂展廳 香港:此地彼方 2021年11月12號至2022年11月27號 透過一段段個人同群體嘅歷史,展現香港從戰後到當下所經歷嘅各種轉變。展覽分為四個章節:
  1. 此地
  2. 身分認同
  3. 地方
  4. 彼方

從多角度呈現香港視覺文化,令觀眾一齊感受香港呢個城市嘅脈動。

希克展廳 M+希克藏品:從大革命到全球化 2021年11月12號至2022年10月7號 探索當代中國由1970年代初至今嘅文化發展。隨住中國喺世界舞台嘅角色愈嚟愈重要,藝術家致力同國際進行交流與對話。展覽用嶄新嘅媒介同方式,挑戰傳統思維同藝術實踐方法,展示呢批藝術家勇於創新嘅精神同當代中國嘅變化,令觀眾能夠了解今日中國。
西展廳 安東尼.葛姆雷:亞洲土地 2021年11月12號至2022年7月3號 由大約300位老少居民,用咗五日時間製作大概20萬個泥人,藝術家只提出三個簡單要求:一、泥人要類如手掌咁大;二、泥人可以企到;三、泥人要有兩隻眼。其他部份都可以由創作者自由發揮。觀眾可以企自定喺某一個角度觀賞呢片好似海噉嘅泥人,同時又好似俾成千上萬對眼睛望住。
南展廳 個體.源流.表現 2021年11月12號至2023年2月5號 展示英國藝術家安東尼,2003年由大概300位老少居民,用咗五日時間嚟整約20萬個泥人。觀眾可以企喺最佳角度欣賞《亞洲土地》呢件裝品,感覺好似俾成千上萬對眼睛望住。展覽同時展出攝影師張海兒嘅作品。
東展廳 物件 · 空間 · 互動 2021年11月12號至2023年5月21號 展出過去七十年嚟喺亞洲製造同受佢影響嘅500幾件家具、建築、平面藝術同其他設計作品。作品展示出一啲可以左右此地區大局嘅巨大力量,包括全球脈絡下嘅社會經濟變化,呢個展廳更加好似一個窗口,從設計同建築中睇見同生活息息相關嘅種種問題。
合院展廳 博物館之夢 2021年11月12號至2022年9月18號 以「拾得之物」嘅概念,展示藝術家點樣以文化為素材嚟革新傳統,對偶然性同執到嘅件進行妙趣橫生嘅探索。展覽將呢座博物館同裏面嘅藏品想像成一個寶庫,令觀眾有機會以嶄新嘅方式發現世界。

開放時間[編輯]

  • 禮拜二至四、六至日、公眾假期:上晝10點至下晝6點
  • 禮拜五:上晝10點至夜晚10點
  • 禮拜一休館

爭議事件[編輯]

被親中建制派媒體狙擊[編輯]

2021年3月,中聯辦控制嘅《大公報》同《文匯報》多次報道批評M+,質疑佢哋一啲藏品違犯《香港國家安全法》,又話佢哋唔少藏品意識不良。有部份親中建制派人士亦都附和兩報嘅講法,話M+唔尊重道德價值[1]

部分被指違反國安法嘅作品,包括美籍華裔攝影師劉香成有關八九民運嘅攝影作品、中國大陸異見藝術家艾未未天安門舉中指嘅作品等。M+表明,無論籌劃展覽定發展藏品,博物館都係以研究為基礎,以嚴謹嘅學術精神為原則[1]

另外,親中建制派傳媒人屈穎妍亦有發表文章參與批鬥,但係提及嘅各樣資料都畀人搵到錯處,包括收藏家嘅背景、董事局成員名單等[2]。佢俾泛民主派嘅公民黨前立法會議員陳家洛形容係搞港式文革[3]

參考[編輯]

  1. 1.0 1.1 "【香港文革】大公文匯續批鬥 M+ 斥亂買「偽術品」醜化國家領導人、充斥裸照 馬逢國附和:需尊重道德價值 | 立場報道 | 立場新聞". 立場新聞 Stand News (英文). 原著喺2021-03-21歸檔. 喺2021-03-21搵到.
  2. "屈穎妍《大公》專欄 批鬥 M+ 博物館藏品文章錯處多 | 立場報道 | 立場新聞". 立場新聞 Stand News (英文). 原著喺2021-03-25歸檔. 喺2021-03-25搵到.
  3. "Chan Ka Lok 陳家洛". Facebook (英文). 喺2021-03-25搵到.

出面網頁[編輯]