廣府廟會
.jpg)
廣府廟會（粵拼：gwong2 fu2 miu6 wui2）係由中國]廣東廣州政府發起嘅廟會，亦係新春時節嘅嘉年華。同本土傳統神誕墟市唔同嘅係，個會結合本地同北方元素。廣州市越秀區政府，借亞運修復廣州都城隍廟後，喺二〇一一年元宵節，開始攞城隍廟做主會場搞「廟會」。會期喺農曆正月十五到正月廿一，入面有木偶薈萃、中華絕活、武林大會，同埋元宵燈會等，總共十個主題活動，重包埋祈福、民俗、美食、商貿同休閒嘅文化等好多嘢。當局整嘅新廟會，係溝埋廣府傳統嘅大中華化民俗文化特色嘅活動，嚟加大新式廣府文化嘅凝聚力同影響力，向遊客同市民宣傳展示啲唔同嘅廣府文化。之不過，廣府廟會，並唔係傳統嘅本土廣府文化、民系、廣府話（粵語）嘅組成，而呢個廣府同河北省嘅廣府城、廣府古城完全唔拉更嘅。
緣起
[編輯]越秀區文廣新局局長王衛國話，2010年12月渠啱坐呢個位，就收到柯打去度橋整「廣府廟會」，就同陳曉丹、何願飛等人去五仙觀度開神仙會度橋，由此開咗頭炮。而越秀區常委、宣傳部長陳曉丹話，喺2009年越秀區搞過個廣府文化嘉年華活動，見啲市民幾中意下，就決定照埋北方廟會嘅形式整出個文商旅相融合嘅活動平臺。王衛國話，活動嘅常態目標第一係畀啲市民節日狂歡，第二係做廣府文化嘅盛宴，第三係整成文化、商業、旅遊融合嘅新咭片[1]。
本土化問題
[編輯]廣州本來就冇廟會，喺廣州類似於廟會嘅係誕[2]。廣東嘅傳統誕會係夾埋神誕同埋賽會（或出會）嘅，所以嗌誕會。傳統誕會照會期係分成有誕冇會（如新橋天后誕）、誕期出會（如鍾村康公出會）同非誕期出會（如十鄉會）等三種[3]。
廣府廟會嘅開放係一種北方廟會嘅植入。復修咗廣州都城隍廟就畀咗植入一個契機[2]。不過中山大學中文系教授葉春生話，雖然「元宵逛廟會」唔係嶺南傳統，但越秀區舉辦廣府廟會，可以當係展示文化嘅平臺，方便聚人氣[4]。學者朱光文就話應培育返廣府誕會，保障返南粵民間信仰同迎神賽會嘅話語體系係按照傳統來延續落去[3]。