籃姑
籃姑（粵拼：Naam4 gu1），又叫做菜籃姑[1]、籃仔姑[2]，係廣東、福建、臺灣鹿港客家人傳說中嘅女性，而且重流傳到去馬來西亞安順嘅客家移民嗰度。啲人通常喺中秋嗰時會用竹籃做道具，用類似扶乩嘅方式問佢嘢，而安順嘅客家人就係喺七夕咁做。
類似嘅習俗有用凳做道具嘅椅仔姑，學者認為兩樣都係由用糞箕做道具嘅紫姑演變出嚟嘅廁神[3]。
儀式
[編輯]喺廣東只係畀女人玩同睇，中秋節要喺屋入面啲人睇唔到嘅地方，將女人杉披喺有椰子殼嘅竹籃嚟代表籃姑，然後兩個女性盤坐喺地下用雙手拖住個竹籃，前面放一張矮凳，跟住佢哋一齊唱：「請籃姑，請籃姑，你係佛山人氏女，你係省城人士娘，家婆嚴令吞金死，丈夫嚴令早辭陽。」如果靈魂上到個籃度，就會向矮凳唔停咁叩頭，啲人就有得問佢嘢，個籃會用叩頭嘅次數嚟答。[4]
廣東梅州嘅中秋節夜晚，兩個女人會一齊捧住一個菜籃，上面襟件杉，另一個人就一路燒衣紙一邊唱：「菜籃姐，菜籃姑，八月十五請你下來嬲一晡（夜）。你愛來只管來，莫在河唇河喙攪溜苔。燈芯搭橋你愛過，竹葉撐船你愛來。」[1]
福建詔安嘅中秋夜，啲人用彩纸畫眼、鼻、口，貼喺個菜籃度，由二個姑娘喺兩邊撑住，一班人圍埋一齊搞。如果個籃會搖擺，就（用閩南話）講：「籃姑嚟喇。」，就可以問佢嘢。[5]
馬來西亞安順市嘅廣東客家移民會喺七夕前一晚拜七姐，夜晚八點至第日凌晨兩點，後生女會聚喺屋企門口前面，由兩個人托住穿過竹籃木棍兩端，用廣東話唸出：「籃姑籃娘，請妳出來商量。」如果籃姑嚟咗，鎖匙串就會發出聲響，竹籃插住嘅香煙會好似有人食咁發光。問嘢嗰陣，成個竹籃會傾埋一邊 up6 頭三次。少女多數係問姻緣。未結婚嘅少女食素一日會易啲達成；如果有嫁咗人嘅女性企埋一齊，就難啲請出，因為籃姑係畀佢家婆刻薄致死，所以唔鍾意以家婆身份出現嘅女人。[6]
喺鹿港嘅中秋習俗都有呢個儀式[2]。手攞住個籃嘅女仔喺周圍嘅同伴唸咒之後，開始唔自覺咁喊，個頭搖。作家保真認為咁嘅風俗帶有邪氣嘅迷信[7]。
睇埋
[編輯]攷
[編輯]- ↑ 1.0 1.1 沈丽华、邵一飞 (2007)。《《廣東神源初探》》 (中國中文)。中國：大眾文藝出版社。ISBN 9787801719478。
- ↑ 2.0 2.1 尤增輝 (1979)。《《鹿港斜陽》》 (臺灣中文)。台灣：大漢出版社。
- ↑ 朱介凡 (1989-08-01)。《《中華諺語志》》 (臺灣中文)。台灣：台灣商務印書館。ISBN 9789570500042。
- ↑ 劉志文 (2007-01-01)。《《廣東民俗大觀》》 (中國中文)。中國：廣東旅游出版社。ISBN 9787806538333。
- ↑ 福建省诏安县地方志编纂委员会 (1999–12)。《《诏安县志》》 (中國中文)。中國：方志出版社。ISBN 9787801225412。
{{cite book}}: CS1 maint: date format (link) - ↑ 〈夜祭七姐玩"菜籃姑"‧七夕民俗活動‧安順絕跡40年〉 (星加坡中文)。《星洲日報》。2012-08-23。原著喺2015-05-18歸檔。喺2015-05-12搵到。
- ↑ 保真 (1997-05-10)。《《醒來仍在江上》》 (臺灣中文)。台灣：健行文化。ISBN 9579680205。