港澳粵語

  呢篇文章講嘅係正式名稱係「廣州話」嘅香港通用語。想搵香港本土嘅粵語，請睇「蜑家話」。想搵新界本土嘅粵語，請睇「圍頭話」。想搵澳門本土嘅粵語，請睇「石岐話」。

港澳粵語即係香港同澳門，粵語喺呢兩度都係最多人常用嘅語言，幾乎係人都識講粵語，香港人一般叫呢個語言做「廣東話」或「中文」。

香港粵語出名中英夾雜，係洋化咗嘅廣東話。香港粵英文化薈萃，結合各地文化。英文喺香港比較普及，加上喺好長一段時間香港都係早過中國接觸外來嘅新事物，過去唔熟英文嘅市民都會用廣州話拼讀日常嘅英文詞彙，所以香港粵語嘅英文外來詞非常普遍。

歷史

而家港澳通行嘅粵語，基本上大部分都同廣州市區嘅粵語有同一個來源，同時亦有好多其他粵語口音、其他語言嘅借詞組成。

1949年前嘅香港，由於粵、客混居，所以當時嘅香港粵語帶有好濃嘅粵客混雜口音（即香港客家話同香港廣府話喺音調同辭彙上互相影響嘅結果。）

1949年後，香港人講廣府話時開始出現大量音變，有人稱為懶音。當中最顯著嘅係鼻音消失（將n聲母讀成l聲母）同埋 w 介音嘅消失。好多人將「你」[lei⁵] 同「我」[ngo⁵] 讀成「理」[lei⁵] 同 [o⁵] 。將「國」[gwok³] 讀成「角」[gok³]，「過」[gwo³] 讀成「個」[go³] 。好多呢類發音已經存在幾十年，亦有大量市民由出世開始已經使用呢種發音。

不過，1980年代之前嘅大眾媒體依然盡力避免喺電台電視節目上出現呢類音變，直到而家，部分香港語言學家亦對所謂「懶音」屢加抨擊，並提出「正音」運動，諗住用古書嘅切音去代替現代通行嘅發音，譬如提倡將時間個間(gaan3)讀成「姦」(gaan1)。但係喺大多數大眾媒體、歌手同埋七、八十年代出世嘅一輩口中不時出現同古書唔一樣嘅發音，甚至已經成為主流。

整體上，香港粵語同廣州話到今日都仍然非常接近，香港大學等學術機構仍然奉廣州音為香港粵語嘅標準音。而廣州話都有部分類似嘅音變存在。

特色

其中特色之一就係中英夾雜，英文字直接使用，表達相同或者相似嘅意思同埋語法，舉例講：「今日去邊度食 lunch？」；「friend 嚟㗎」。

使用粵語嘅近似讀音讀英文詞非常普遍。「地盤管工」叫「科文」（foreman）、「煞車」叫「逼力」（brake）、「軸承」叫「啤令」（bearing）、「草莓」叫「士多啤梨」（strawberry）等等。唔少老人家仍然將「郵票」稱作「士擔」（stamp）、「保險」叫「燕梳」（insurance）等。另外，對男士可以稱呼「阿Sir」（aa3 soe4），對女士可以稱呼「Miss」（mit1 si4）。

而港式粵語有啲特別英文詞彙，保留原本嘅英文發音同寫法，不過唔遵守原先嘅語法同意義，祇係講香港話嘅用家先明同用。

睇埋

• 英文史