奧地利

Republik Österreich

(國旗) (國徽)
國家格言: 冇
官方語言	德文
首都	維也納
總統	Alexander Van der Bellen
總理	Werner Faymann
面積  - 總計  - % 水域	第112位 8,3858 km² 1.3%
人口  - 總計  - 密度	第94位 8,189,000（2005年估計） 8,032,926（2001年人口普查統計） 97/km²
獨立  - 時間	1955年7月27號
貨幣	歐元¹，奧地利歐元硬幣
時區	UTC +1
國歌	山之國，河之國（Land der Berge, Land am Strome）
互聯網域名	.at
國際電話區號	43
（1）1999年前：奧地利先令

奧地利（粵拼：ou³ dei⁶ lei⁶，德文：Österreich，英文：Austria），官名奧地利共和國（德文：Republik Österreich，英文：Republic of Austria），舊時叫奧國，係一個喺歐洲中部嘅內陸國。同奧地利接壤嘅，西面有列支敦士登同瑞士，南面有意大利同斯洛文尼亞，東面有匈牙利同斯洛伐克，同埋北面有德國同捷克。

歷史

內文： 奧地利史

奧地利曾先後畀羅馬人、匈奴人、倫巴第人、東哥德人、巴伐利亞人同法蘭克人佔領。喺10至13世紀，奧地利由巴本堡王朝統治。從此之後，哈布斯堡王朝就一直統治奧地利到20世紀。

1806年，神聖羅馬帝國解體，而喺事件發生前兩年，法蘭西一世（即神聖羅馬帝國嘅法蘭西二世皇帝）宣佈自己係奧地利帝國嘅皇帝，統治範圍係以奧地利為中心，哈布斯堡王朝世襲領地。1867年，為咗化解普奧戰爭失利對帝國嘅衝擊，奧地利帝國又變為二元君主國──奧匈帝國，直到第一次世界大戰爆發。戰敗後嘅奧匈帝國被分割，其中嘅一部分就形成咗而家嘅奧地利共和國。1938年，納粹德國強行吞併奧地利，並且將奧地利拖入第二次世界大戰。

二戰完咗之後，盟軍繼續佔領奧地利直到1955年。喺宣佈永久中立之後，佔領軍撤軍，奧地利獲得獨立。1989年，東歐共產主義政權解體之後，奧地利逐漸參與更多嘅歐洲一體化進程。奧地利喺1995年加入歐盟，又喺1999年加入歐元體系。

政治

內文： 奧地利政治

總統係奧地利嘅一國元首，由每6年全民選舉選出。總統負責提名總理，總理人選通常都係議會入面最大黨派領袖。奧地利議會由兩院組成，分別係由64個州代表構成嘅聯邦院（Bundesrat）同埋由183名喺直接選舉選出嘅議員構成嘅國民院（Nationalrat）。國民院負責制定法律，主持新政府嘅就職儀式，通過不信任表決罷免聯邦政府同埋佢嘅成員。聯邦院就代表各個州嘅利益，有權將國民院通過嘅法案駁回，但係如果國民院堅持原法案，聯邦院就冇權再次否決。

喺社會民主黨佔據議會多數30年之後，2000年2月，保守嘅人民黨同右翼嘅自由黨組成嘅右翼聯盟取得執政地位。呢件事喺奧地利國內國外都引起強烈嘅反應。奧地利入面爆發大規模嘅抗議浪潮；而歐盟就對新政府採取咗政治制裁措施，奧地利嘅外交陷入孤立。喺9月歐盟取消制裁，奧地利嘅政局同對外關係就逐步恢復正常。2002年9月，由於執政兩黨喺關於政策同領導權嘅爭執加劇，總理沃爾夫岡·許塞爾（人民黨）宣佈提前舉行議會選舉。喺當年11月嘅選舉中人民黨嘅地位獲得鞏固（42.3%選票），而自由黨只係得到10.1%嘅選票。

目前奧地利議會（國民院）嘅議席分配如下：

• 79 席 人民黨 (42.3%)
• 69 席 社會民主黨 (36.51%)
• 18 席 自由黨 (10.1%)
• 17 席 綠黨 (9.47%)

政區

內文： 奧地利各聯邦州

奧地利地區行政

奧地利

奧地利由9個聯邦州組成，分別係：

聯邦州

	德文名	英文翻譯	中國大陸翻譯	台灣翻譯	首府	人口	面積(km²)
1	Burgenland	Burgenland	布爾根蘭州	布根蘭邦	艾森施塔特（Eisenstadt）	278,600	3,965
2	Kärnten	Carinthia	凱恩藤州	肯特邦	克拉根福（Klagenfurt）	561,114	9,532
3	Niederösterreich	Lower Austria	下奧地利州	下奧地利邦	聖珀爾滕（St. Pölten）	1,549,640	19,172
4	Oberösterreich	Upper Austria	上奧地利州	上奧地利邦	林茲（Linz）	1,382,017	11,978
5	Salzburg	Salzburg	薩爾茨堡州	薩爾茲堡邦	薩爾茲堡（Salzburg）	518,580	7,154
6	Steiermark	Styria	施泰爾馬克州	史泰爾馬克邦	格拉茲（Graz）	1,185,911	16,388
7	Tirol	Tyrol	蒂羅爾州	提洛邦	因斯布魯克（Innsbruck）	675,063	12,650
8	Vorarlberg	Vorarlberg	福拉爾貝格州	福拉爾貝格邦	佈雷根茨（Bregenz）	351,565	2,601
9	Wien	Vienna	維也納州	維也納邦	維也納（Wien）	1,562,676	415

州下面設市、區同埋鎮（鄉）。

地理

內文： 奧地利地理

奧地利係一個喺歐洲中部嘅內陸國。地勢西高東低，阿爾卑斯山貫穿奧地利嘅西部同南部，呢樣嘢令到奧地利成為著名嘅冬季運動勝地。山地佔全國面積嘅70%。山脤南北兩邊係石灰岩帶，而中間就係結晶岩帶。最高峰係大格洛克納山Grossglockner，海拔達3798米。東北部係維也納盆地，東南部同北部就係丘陵地型同高原。多瑙河流經東北部，喺境內長350公里。南部有穆爾河同德拉瓦河，而西部就有因河同薩爾察赫河等。奧地利大部分地區處於溫帶海洋性氣候同溫帶大陸性氣候過渡區入面，氣候溫和，夏天涼爽，冬天就凍。

首都係座落喺多瑙河邊嘅維也納。其它主要城市包括薩爾斯堡、因斯布魯克、格拉茨同林斯等等。

經濟

內文： 奧地利經濟

奧地利嘅市場經濟發達，人民生活水平較高。同時奧地利嘅工農業都比較發達。工業主要有冶金、機械、石油、化工、電器、紡織、木材加工同水力發電等；畜牧業就以養牛同養豬為主。農作物有薯仔、甜菜、小麥同粟米等等。奧地利嘅經濟同其它歐盟國家聯繫緊密，特別係同德國之間。加入歐盟令奧地利直接進入統一嘅歐盟市場，由此帶入更多嘅外資。近年嚟，德國經濟嘅減速同全球經濟嘅不景氣亦影響到奧地利。2001年奧地利嘅經濟增長率只係1.2%。

人口

內文： 奧地利人口

奧地利絕大多數人都係奧地利裔，屬歐羅巴人種，大部份係阿爾卑斯類型，其餘大約10%嘅奧地利人口就係非奧地利裔。呢啲人多數都嚟黎自周邊地區，特別係東歐國家。另外有大約1萬8千個斯洛文尼亞族人喺克恩頓州同施蒂利亞州定居。地處歐洲三大族（日耳曼、斯拉夫、拉丁）嘅交匯處，奧地利人主要係由屬於日耳曼部落群嘅阿勒曼尼人、巴伐利亞人同法蘭克人結合而成，並且有馬扎兒人、匈奴人、斯拉夫人以及羅馬化嘅土著居民嘅成分。佢哋雖然同德意志人喺族源同語言上有唔少近似嘅地方，但係就有自己獨特嘅民族形成過程。

奧地利嘅官方語言係德文，德意志話嘅多種方言（下阿勒曼尼方言、中巴伐利亞方言、下巴伐利亞方言），同書面語差別較大。奧地利德文同德式德文亦都有一啲區別。

超過四分之三嘅奧地利人信奉羅馬天主教，有6%係基督新教中嘅加爾文派。其他主要宗教包括伊斯蘭教同基督教新教。猶太人曾經大量喺奧地利居住，1930年嘅時候人口超過十萬人，但後來受第二次世界大戰嘅影響，數量劇減，現時人口有大約1-2萬，但係有上升嘅趨勢。

文化

內文： 奧地利文化

奧地利出產過好多著名嘅作曲家，例如莫札特、舒伯特、布魯克納、老約翰·施特勞斯、小約翰·施特勞斯、馬勒、勛伯格、維博恩、博格等。其他著名嘅奧地利人包括物理學家玻耳茲曼、薛丁格，哲學家維根斯坦、哥德爾，精神分析學家佛洛伊德，詩人彼特·魯塞格爾（Peter Rosegger）同埋畫家古斯塔夫·克裡姆特（Gustav Klimt）等等。

節日

日期	中文名	節日名	注
1月1日	新年	Neujahr
1月6日	主顯節	Heilige Drei Könige
冇定	復活節星期日	Ostersonntag	耶穌受難日（復活節之前2日）係法定新教節日
冇定	復活節星期一	Ostermontag
5月1日		Staatsfeiertag	亦為勞動節
冇定	耶穌升天日	Christi Himmelfahrt	復活節40日之後嘅星期四
冇定	聖靈降臨節星期日	Pfingstsonntag
冇定	聖靈降臨節星期一	Pfingstmontag
冇定	聖體節	Fronleichnam	聖靈降臨節11天後嘅星期四
8月15日	聖母升天節	Mariae Himmelfahrt
10月26日	國慶節	Nationalfeiertag	1955年通過永久保持中立之法。
11月1日	萬聖節	Allerheiligen
12月8日	聖母聖潔日	Mariae Empfängnis
12月25日	聖誕節	Christtag, Weihnachten
12月26日	聖誕節翌日	Stephanitag
12月31日	新曆除夕	Silvester

相關主題

• 奧地利名人一覽
• 奧地利通訊
• 奧地利交通
• 奧地利軍隊
• 奧地利外交
• 奧地利旅遊
• 奧地利電子藝術大獎

出面網頁

• 奧地利嘅官方網站
• Österreich | Europäische Union，歐洲聯盟 （德文）
• "国家概况 — 中华人民共和国外交部" (中文). 中華人民共和國外交部.
• "奧地利共和國 Republic of Austria - 歐洲地區 - 中華民國外交部 - 全球資訊網 Ministry of Foreign Affairs, Republic of China (Taiwan)" (中文). 中華民國外交部.
• "Austria - United States Department of State" (英文). 美國國務院.
• 奧地利喺中央情報局《世界概況》嘅資料 （英文）
• "オーストリア共和国 ｜ 外務省" (日文). 日本外務省.
• "Austria - Department of Foreign Affairs and Trade" (英文). 澳洲外交貿易部.