波斯

出自維基百科,自由嘅百科全書
公元前6世紀波斯帝國(阿契美尼德王朝)版圖
而家嘅伊朗喺世界上嘅位置

波斯(Persia)係伊朗歐洲嘅古希臘文同拉丁文嘅舊譯音,係伊朗歷史嘅一部分。佢喺西南亞地區曾經建立過好多個帝國。全盛時期領土最東到印度河平原,最西北到小亞細亞歐洲馬其頓希臘半島色雷斯,最西南到埃及也門。波斯喺伊朗高原嘅西南部興起。

波斯喺公元前2700年已經有文字記錄,當時係叫埃蘭。公元年600年開始,波斯同希臘往來越嚟越多。

1935年,當時嘅統治者禮薩汗將「波斯」正式改名做「伊朗」,但仍然有唔少嘢用開「波斯」呢個名,包括波斯文波斯地氈

波斯嘅帝國[編輯]

埃蘭同米底亞時期(前2700年-前553年)[編輯]

埃蘭同米底亞重未俾希臘人叫做波斯,但係呢個係波斯地區歷史入面嘅一個唔少得嘅部份。

埃蘭係波斯地區最古老嘅文化,佢喺今日伊朗嘅西南面,公元前3000年以前喺底格里斯河嘅東岸建國。佢哋同達羅毗荼人關係好密切。喺公元前2700年去到前600年之間幾次滅國同復國,最後喺公元前639年俾亞述滅咗國。

米底亞(前678年-前553年)係一個以古波斯地區做中心嘅王國,領土面積最西到小亞細亞嘅卡帕多西亞,最東到阿拉霍西亞西面。佢哋嘅語言屬於印歐語系,係雅利安人,亦係第一批喺伊朗高原地區定落嘅民族。亞述帝國曾經入侵過伊朗高原,試圖去征服佢哋。但係亞述嘅入侵,促進咗米底嘅每個部落聯合,形成咗米底亞。前553年,米底亞國王嘅孫仔居魯士二世起兵反叛米底亞,建立咗阿契美尼德帝國,米底亞王國完咗。

阿契美尼德王朝(前553年-前334年)[編輯]

內文:阿契美尼德王朝

公元前559年居魯士二世統一古波斯嘅部落,建立咗阿契美尼德王朝。居魯士二世喺前553年-前550年打敗咗當時統治咗波斯嘅米底亞王國,波斯變得好強,前547年居魯士二世用武力征服咗當時喺小亞細亞西面嘅利底亞,阿契美尼德王朝開始崛起,前546年-前540年,居魯士二世向東用武力征服咗帕提亞、阿利亞、巴克特里亞、德蘭吉亞那、格德羅西亞、阿拉霍西亞、馬爾基安娜、錫爾河同阿姆河之間嘅中亞河中地區(索格狄亞那)、乾陀囉、克蘭斯米亞。前539年,居魯士二世用武力征服咗喺美索不達米亞新巴比倫帝國嘅首都巴比倫,但係佢喺前529年出征錫爾河同阿姆河之間中亞河中地區嘅錫爾河谷地嘅馬薩革泰人戰鬥入面死咗。到咗岡比西斯二世時代(前529年-前522年)最終喺前525年征服咗古埃及後王朝

到咗大流士一世,帝國越嚟越大。大流士喺前521年東征印度河平原,西面就出兵到多瑙河三角洲、色雷斯馬其頓王國古希臘,但就係因為馬拉松戰役(前490年)失利而功敗垂成(睇前499年-前449年嘅希波戰爭)。佢個仔薛西斯一世喺前480年再一次向希臘嘅城邦用兵,但一樣功虧一簣(睇温泉關戰役蕯拉米灣海戰普拉提亞戰役)。古波斯嘅阿契美尼德王朝係當時世界上領土面積最大嘅帝國。

希臘化時期(前330年-前129年)[編輯]

喺前356年建立嘅腓力二世馬其頓王國係咁將古希臘城邦統治之前,就有咗用武力征服古波斯阿契美尼德王朝嘅野心,喺前338年將古希臘城邦統治之後(唔計斯巴達),喺前336年就集結咗由阿塔修斯統帥嘅5萬軍隊越過赫勒斯滂海峽之後用武力入侵咗阿契美尼德王朝喺小亞細亞嘅領土。不過,佢喺佢個女嘅婚宴上畀人殺死,之後亞歷山大大帝成功登上王位同鎮壓反叛,跟住佢好似老豆腓力二世咁用武力入侵阿契美尼德王朝,喺前334年-前330年之間亞歷山大大帝嘅5萬大軍打咗格拉尼庫斯河戰役米利都圍城戰哈利卡納索斯圍城戰伊蘇斯戰役泰爾圍城戰加沙圍城戰高加米拉戰役波斯隘口戰役粟特岩山戰役9場戰役之後,大流士三世喺逃走嘅時候畀貝蘇斯刺殺,阿契美尼德王朝滅亡,之前嘅領土大部分變成咗馬其頓帝國嘅一部分。馬其頓帝國喺前322年-前301年嘅8場繼業者戰爭之後就分裂咗。亞歷山大大帝嘅部屬將軍嘅其中之一塞琉古一世經過咗繼業者戰爭喺前312年自立塞琉古帝國塞琉西亞安條克係呢個帝國嘅中心,統治咗成個波斯。

呢個時候伊朗係東西方交流嘅一個樞紐:絲綢之路連接錫爾河同阿姆河之間嘅中亞河中地區(索格狄亞那)同印度佛教從印度嘅孔雀王朝傳過嚟,而瑣羅亞斯德教就向西影響咗猶太教

喺前238年,東面嘅阿爾沙克王朝由嚟自喺裹海東岸嘅游牧部落聯盟大益嘅成員帕尼人酋長阿爾沙沙克一世喺打完帕提亞同接受咗帕提亞文之後建立咗呢個古代君主制國家,跟住係咁擴張領土,喺前177年-前138年嘅米特里達梯一世時期係整個帝國領土最大嘅時候,西到敍利亞段嘅幼發拉底河以西嘅包括全部美索不達米亞,東到阿姆河,東南到哥德羅西亞,南到波斯灣同阿拉伯海,同前250年大夏(巴克特里亞)獨立之後,東面要面臨大夏嘅米特里達梯一世時期嘅領土擴張,喺前190年之後,西面又要面臨羅馬共和國嘅武力征伐,導致咗整個國家嘅衰敗,喺阿爾沙克王朝米特里達梯一世時期冇咗伊朗高原同美索不達米亞嘅全部領土。最後羅馬共和國喺前63年將佢徹底消滅。

安息帝國(前247年-226年)[編輯]

內文:安息帝國

安息帝國又可以叫做阿薩息斯王朝或者帕提亞帝國,發源喺依家嘅伊朗東北嘅帕提亞地區,喺米特里達梯一世(前177年-前138年)統治嘅極盛時期嘅領土包括小亞細亞東面、亞美尼亞阿塞拜疆美索不達米亞敍利亞伊朗高原阿富汗阿姆河以南嘅大呼羅珊同印度河以西嘅巴基斯坦,同古羅馬帝國幼發拉底河作為國界,首都泰西封喺美索不達米亞嘅塞琉西亞附近。呢兩個帝國成日都打仗。同時安息帝國同1世紀之後建立嘅貴霜帝國成日都戰事頻傳。帝國嘅美索不達米亞同都城泰西封分別喺116年、164年-165年、197年-198年幾次畀羅馬攻佔而導致國力衰竭,造成咗3世紀初期嘅諸侯割據。

薩珊王朝(224年-651年)[編輯]

內文:薩珊王朝
亞兹德嘅瑣羅亞斯德教神廟
公元621年-626年嘅薩珊王朝嘅領土疆域

喺224年,安息帝國嘅一個地方總督個仔阿爾達希爾一世因為要擴張地方勢力,開始同安息帝國打仗。經過咗兩年嘅戰爭之後,成功推翻咗安息帝國同殺死國王,喺226年正式建立薩珊王朝(依蘭沙赫爾),首都喺泰西封。薩珊王朝因為阿達希爾嘅阿爺而得名。波斯喺阿契美尼德王朝之後再次統一,好多人認為佢係第3個波斯帝國。

薩珊王朝成日都同羅馬帝國開戰,喺260年俘虜過羅馬皇帝瓦勒良。不過薩珊王朝嘅美索不達米亞同底格里斯河畔右邊嘅首都泰西封曾經喺283年、297年同埋361年三次畀羅馬攻佔。

薩珊王朝係一個高度中央集權嘅帝國,國教係瑣羅亞斯德教,全體人民分咗做教士、軍人、文人、同埋平民4個等級。基督教入面嘅天主教一度被迫害,景教就開始發展。

由於薩珊王朝成日都同東羅馬帝國打仗,所以向臣民收税收得好重,同時加強咗對宗教嘅控制,造成咗暴亂,喺629年同642年,有兩任皇帝畀人刺殺,又同時受到阿拉伯帝國嘅攻擊,帝國終於崩潰。

魏晉南北朝時期,中國同波斯嘅友好往來比較頻繁,《魏書》記載,波斯使臣去中國交聘咗幾十次,向北魏皇帝帶咗好多禮品,有珍物、馴象等等。1970年,喺甘肅張掖大佛寺出土咗6個波斯薩珊王朝嘅銀幣。帝國喺632年開始畀阿拉伯軍隊攻擊,喺651年帝國滅亡之後,蕯珊王朝最後一個皇帝嘅仔俾路斯曾經走佬去到唐朝中國,要求唐高宗救兵抗擊阿拉伯入侵,唐朝護送佢返回阿富汗嘅鍚斯坦一帶,喺661年建立波斯督護府,但係好快喺663年畀阿拉伯消滅咗。

伊斯蘭哈里發時期(632年-1258年)[編輯]

阿拉伯帝國薩珊王朝打仗,統治者伊嗣埃三世畀人殺死,蕯珊王朝好快畀伊斯蘭教指引嘅阿拉伯帝國消滅(伊斯蘭對波斯嘅征服)。薩珊帝國嘅滅亡係伊朗歷史嘅一個轉折點。伊斯蘭教好快取代咗瑣羅亞斯德教,起咗好多清真寺,於是瑣羅亞斯德教衰亡,阿拉伯文成為咗通行語言。波斯成為咗阿拉伯帝國嘅一部分。

661年,阿拉伯帝國第四任統治者哈里發阿里畀人刺殺。總督穆阿維葉一世建立倭馬亞王朝,首都係大馬士革,然後宣佈由佢個仔繼位,即係雅季德一世。倭馬亞王朝嘅最大領土面積超過1100萬平方公里,達到咗另一個高峰。宣稱冇一個帝國嘅疆域大過倭馬亞帝國。

749年,阿拔斯一世起兵攻入首都大馬士革,殺死啲王室,倭馬亞王朝完咗,進入阿拔斯王朝嘅時代。

阿拔斯一世

由750年開始,阿拔斯王朝統治阿拉伯帝國,雖然中央係由阿拉伯人掌控,而波斯人就喺地方首府中有支配地位,喺呢個時候波斯的文化有好大嘅發展。

馬蒙之後,阿拔斯王朝因為軍事實力衰落而國勢日衰,開始出現割據局面;喺波斯土地上面先後出現塔希爾王朝薩法爾王朝薩曼王朝齊亞爾王朝阿拉菲德王朝白益王朝伽色尼王朝古爾王朝塞爾柱帝國花剌子模王朝

1042年,塞爾柱帝國嘅建築師喺伊斯法罕城起咗星期五清真寺。波斯數學家同詩人歐瑪爾·海亞姆(Omar Khayyám)喺塞爾柱時期寫低咗佢嘅詩集《魯拜集》(Rubaiyat)。

塞爾柱人喺12世紀末期冇咗波斯嘅控制權,由嚟自鹹海嘅阿姆河下游三角洲嘅另一個伊朗文民族建立嘅花剌子模王國取代。1194年,花剌子模王國嘅阿拉烏丁摩訶末消滅塞爾柱帝國,之後攻佔伊朗高原。1205年,阿拉烏丁摩訶末攻佔波西斯。1212年,阿拉烏丁摩訶末消滅喀喇汗國,統治成個中亞河中地區。1215年,阿拉烏丁摩訶末消滅古爾王朝

1258年,旭烈兀西征嘅時候,佢率領嘅12000大軍攻陷阿拉伯帝國嘅首都巴格達,哈里發穆斯台綏木投降之後畀人殺死,阿拉伯帝國完咗。[1]

伊兒汗國時期(1220年-1357年)[編輯]

內文:伊兒汗國

1219年年尾-1220年之間,成吉思汗率領蒙古帝國10萬大軍用武力征服花剌子模,鎮壓咗境內嘅30個城市,大伊朗地區畀蒙古人統治咗。之後喺歷任蒙古帝國最高統治者拖雷窩闊台乃馬真後貴由汗欽淑皇后同埋蒙哥時代嘅地方總督綽兒馬罕拜住野里知吉帶、畏兀兒人闊里吉思同埋衛拉特人阿兒渾阿加繼續對亞美尼亞格魯吉亞阿塞拜疆同埋羅姆蘇丹國嘅鎮壓,尤其係成吉思汗嘅孫仔旭烈兀喺1256年-1259年之間鎮壓木剌夷阿拔斯王朝同埋敍利亞嘅阿尤布王朝,喺1256年建立伊兒汗國。1295年,伊兒汗國嘅君主合贊汗皈依伊斯蘭教。1335年,伊兒汗國開始分裂,去到1353年伊兒汗國已經消失。

帖木兒帝國、黑羊王朝同埋白羊王朝(1370年-1508年)[編輯]

從1381年去到1467年,波斯成為咗帖木兒帝國嘅一部分。帖木兒死咗冇幾耐之後西邊嘅波斯畀土庫曼人建立嘅黑羊王朝(1375-1468)同埋白羊王朝(1378-1508)統治。

喺1405年去到1433年,明朝永樂帝鄭和西洋,去過帖木儿帝國幾次。鄭和喺斯里蘭卡立嘅石碑用咗中文泰米爾文波斯文3種文字寫。阿拉伯文同埋波斯文喺明朝穆斯林嘅經堂教育入面廣泛使用。

薩法維王朝(1501年-1736年)[編輯]

內文:薩法維王朝

薩法維王朝係一個由土庫曼人建立嘅帝國,由建國君主伊斯邁爾一世統一成個波斯,將帝國嘅疆域擴展到今日嘅阿塞拜疆伊拉克同埋阿富汗嘅一部分,國教係什葉派嘅「十二伊瑪目」。薩法維王朝成日同奧斯曼帝國打仗。

1588年,阿拔斯一世繼位,遷都伊斯法罕,同土耳其和平咗,趕走埋烏茲別克人,從葡萄牙人手中攞到波斯灣中嘅小島巴林,波斯成為咗伊斯蘭世界中最重要嘅文化中心。

大博弈(1722年-1914年)[編輯]

1907年英俄協議之後嘅波斯

1722年俄羅斯帝國彼得大帝聯合奧斯曼帝國入侵薩法維王朝,跟住波斯又爆發咗遜尼派教徒為咗抵抗被迫信奉什葉派暴動,薩法維王朝滅亡。波斯之後畀土庫曼人建立嘅阿夫沙爾王朝桑德王朝同埋卡扎爾王朝統治。

1779年-1925年,波斯喺卡扎爾王朝嘅統治下,領土畀北面嘅俄羅斯帝國同埋東面嘅英屬印度吞食,畀大英帝國搶走咗巴林同埋阿富汗嘅一部分,而俄羅斯帝國就搶走阿塞拜疆土庫曼同埋烏茲別克。俄、英喺呢度喺呢度爆發嘅戰略競爭叫做「大博弈」。

一戰同埋之後(1914年-1935年)[編輯]

一戰期間,參戰嘅俄羅斯帝國奧斯曼帝國大英帝國同埋德意志帝國都向波斯出兵,目的係控制波斯嘅油田。完戰之後,波斯北部畀大英帝國嘅駐軍控制。1925年12月禮薩汗推翻咗卡扎爾王朝建立巴列維王朝,直到冷戰期間,英國同蘇聯一直對波斯保持影響力。

1935年,禮薩汗將波斯喺國際上改名做伊朗,波斯完。

參考[編輯]

  1. 李一新 (1994年4月). 西. 州师范大学学报(社会科学版). 原著喺2013-11-10歸檔. 喺2013-11-10搵到.